مشــآركتي في مسابقة اجمل طبق تقليدي--ذكرى أول نوفمبر--

[السلطانة]

السلام عليكم ورحمة الله وبركاته

من بلاد الهواري جيتكم
وجبت معايا طبق تقليدي كانو النساء
أثناء الثورة يطيبوه للمجاهدين بزاف
ولي هو الكسرة



بلاماننساو الأدوات والأواني القديمة لي كانو يستعملوها كيما القصعة تاع الحطب الثقيلة

لي كانو جداتنا يخبزو فيها
ومنحكيلكمش على ملمس الدقيق كي يتحط في اليد

كانو يفوتوه على الغربال 'السيار )
كيما هاكذا باه يصفى وينظاف

المكونات :
دقيق +خميرة+ملح+شوي سكر +ماء دافي

بعد ماتتبل تبقى تخمر شوي وتتعجن مليح

ونكوروها خبزات صغار ونخلوهم يخمرو مرة أخرى

يخمرو نقرصوهم ونبداو نطيبو

نجيبو الكانون ومحلاه من كانون زمان

والطاجين ياعيني على طاجين الطّين

نلوحو خبزاتنا يطيبو

وأكيد ماكانوش يطيبو الكسرة وحدها كانو يزيدو معاها (العgوب )

الملوخية الطبق التقليدي المشهور في منطقتنا







والأهم كانو يحركوها بملعقة تاع الحطب
قديييمة تاع جدة الله يرحمها باه تمد البنة

ويكون أكل الثوار والمجاهدين وجد

طرف تاع كسرة سخونة مع ملوخية :up:

كانت هذه مشاركة بنت قالمة
كل عام والجزائر بألف خير

والسلام عليكم ورحمة الله وبركاته

​

 

[samah06]

يعطيك الصحة ساندي
الكسرة والا الملوخية نموت عليهم ونغمس الكسرة ف الملوخية يا عيني
موفقة حنونة

 

[حُلم عابرْ]

الخبز يشهي اما ملوخية نسمع بيها جامي ذقتها

 

[السلطانة]

يعطيك الصحة ساندي
الكسرة والا الملوخية نموت عليهم ونغمس الكسرة ف الملوخية يا عيني
موفقة حنونة

الله يسلمك اختي سماح
احكيلهم على شعور الملوخية مع الكسرة :p:-r
نورتي :-r

 

[السلطانة]

الخبز يشهي اما ملوخية نسمع بيها جامي ذقتها

ان شاء الله كاش نهار تذوقيها
نورتي أختي

 

[ام اشراق]

وعليكم السلام ورحمة الله وبركاته
الله الله ياعينى على ذيك الكسرة ياساندى تشهى محمرة على الكيف يسلموا ايديك حبيبتى احنا نقولو المطلوع وكاين اللى يقوللها مشوطة جهة الغرب
والملوخية كما قالت الاخت سامية نسمع بيها بصح جامى ذقتها
بصحتكم وبالتوفيق ان شاء الله

 

[الورد الأحمر]

يعطيك الصحة ساندي وجبة تقليدية بحتة وبصحتكم
بالتوفيق في المسابقة

 

[روز]

شحال متمنية نذوفق الملوخية مممم
لاني عمري ولا نعرف طعمها
كل شي يشهي عزيزتي

يعطيك الف صحة
موفقة ياطيبة

 

[الحلم الوردي]

يعطيك الصحة اختي
صح الكسرة كانت كاينة وهي طبق تقليدي جزائري
مي المولوخية طبق عصري مكاش موجود في الثورة
وزيد هوطبق تونسي ماشي جزائري
​

 

[السلطانة]

يعطيك الصحة اختي​

صح الكسرة كانت كاينة وهي طبق تقليدي جزائري
مي المولوخية طبق عصري مكاش موجود في الثورة
وزيد هوطبق تونسي ماشي جزائري​

:s:s:s:s
للعلم الملوخية
طبق عثماني بحت
دخلوه لينا الأتراك كيما احتلو الجزائر زمان
وفي الثورة وأيام الثورة كان كاين
جدة الله يرحمها كانت تطيبو من زمان معروف في عايلتنا
راكي غالطة في معلوماتك أخت ملاك
لي قالك الملوخية طبق تونسي وزيد عصري !! راه غالط !
بلاك عندكم في قسنطينة ماكانتوش تعرفوه وبعدها دخل بعد الثورة أما عندنا راه تقليدي 100/100
وكل الشكر يرجع للأتراك لي دخلوه لينا وانتشر في منطقة الشرق الجزائري
منها قالمة وعنابة وتبسة وسوقهراس خاصة ربما في قسنطينة لحق متأخر فبانلك عصري .
شكرا للمرور الكريم ​

 

[حكيك]

يعطيك الصحة ساندي ويصحتكم
موفقة ان شاء الله

 

[السلطانة]

شحال متمنية نذوفق الملوخية مممم
لاني عمري ولا نعرف طعمها
كل شي يشهي عزيزتي

يعطيك الف صحة
موفقة ياطيبة

ان شاءالله نعرضك وتذوقيها وتقوليلي رايك :p
نورتِ أختي شكرا للمرور الكريم

 

[السلطانة]

يعطيك الصحة ساندي وجبة تقليدية بحتة وبصحتكم
بالتوفيق في المسابقة

الله يسلمك اختي شكرا لمرورك الكريم

 

[السلطانة]

وعليكم السلام ورحمة الله وبركاته
الله الله ياعينى على ذيك الكسرة ياساندى تشهى محمرة على الكيف يسلموا ايديك حبيبتى احنا نقولو المطلوع وكاين اللى يقوللها مشوطة جهة الغرب
والملوخية كما قالت الاخت سامية نسمع بيها بصح جامى ذقتها
بصحتكم وبالتوفيق ان شاء الله

الله يسلمك اختي
الملوخية مع الكسرة تاكليهم تنساي كلش :d
ان شاء الله تذوقيها
نورتِ الموضوع

 

[السلطانة]

يعطيك الصحة ساندي ويصحتكم
موفقة ان شاء الله

الله يسلمك أختي نورتِ

 

[Ľă Mîšš HîBă]

ممممم جوعتيني ساندي نمموووت عليها لملووخيه سيرتو كي تولي سخونه معليش نسقسيك سوال هه هه هادوك لفقعات الي يخرجو فلكسره واش ديريلهم كي تولي راح تقلبيها باه ماتفسدلكش لفورم تاع الخبزه ؟؟؟

 

[nada242008]

يعطيك الصحة شوشو موضوعك شيق والصور زادته جمالا
الملوخية مش معروفة في كل الولايات ..انا ذقتها عند الشاوية تاع ام البواقي
والكسرة القالمية الله الله تهبل .. تسلم الايادي يا بنت قالمة

 

[اوراق الصييف]

يعطيك الف صحة
موفقة ياطيبة

 

[العروة الوثقى]

يعطيك الصحة

شوا هاذي الملوخية نسمع بيها برك

بصح جامي جربناها

حنا الرقيقة نسموها كسرة وهاذا مطلوع

بالتوفيق
​

 

[السلطانة]

ممممم جوعتيني ساندي نمموووت عليها لملووخيه سيرتو كي تولي سخونه معليش نسقسيك سوال هه هه هادوك لفقعات الي يخرجو فلكسره واش ديريلهم كي تولي راح تقلبيها باه ماتفسدلكش لفورم تاع الخبزه ؟؟؟

تفضلي كولي الملوخية يابنت الشرق :p
كي يخرجو الفقاعات اثقبيهم برك :d
نورتِ أختي