عندي مدة كبيييييرة ما كتبتش لهنا
السبب مجهول مي المهم راني رجعت نكتب في واش راك تهدر
الموضوع اللي رح نحكي معاكم عليه هوما الأخوات
الأخوات اللي يضلو فالمسجد يحفظو فالقرآن واللي يلبسو البرقع والقفازات والتقاشر الكوحل
وليت كي نشوفهم نولي نغلي والسبب ان البعض منهم مدو صورة سيئة على أنفسهم وبالتالي عمت تلك الصورة في ذهني وترسخت في عقلي
طبعا راني نحكي من منظور شخصي مرانيش نعمم مي هادا وش لصق في مخي
ووليت نكرهم ونكره نتعامل معاهم
الله غالب كيما يقول المثل " راح المليح في جرة القبيح "
نشوفهم كي يبخصو النساء فالمسجد ويتعاملو بخشونة رغم ان الدين تعنا دين يسر ودين ترغيب
هوما يتعاملو ديما بأسلوب الترهيب وكون حتى تخوفك من عداب ربي
ديفوا تحكي معاك كي شغل وحدة تبهدل في بنتها رغم انها ممكن تكون قل منك في السن
طبعا انا ما صراتليش خاطر كي نروح للمسجد نجي قدام ماما ونحكم فرد شوكة ونريح
مي ديما نشوفهم كيفاش يتعاملو مع النساء ونكره هاد المعاملة منشمهاش
المهم اللي كرهتني فيهم وحدة جات مؤخرا عندي للبيرو وين نخدم تفتش على المدير او مول الوكالة الاشهارية
قلتلها راه غايب قاتلي راني جيتو من قبل وقتلو كي يحب يخرج مال الزكاة تاعو اي كاينة وحدة محتاجة
الطريقة اللي كانت تهدر بيها كي شغل وحدة عندها الحق وجاية تفرض في رايها عليك ولا تجبرك دير هديك الحاجة بالسيف
قلتلها كي يكون هنا نقولو ،، بقات تمشي وتوصي
ايا من يومين زادت جات انا والله كي شفتها داخلة فسدلي النهار كتر ما كان فاسد
خاطر عمبالي بلافاصون اللي تهدر بيها قادرة تستفزني نتقابد معاها
ايا دخلت قاتلي : السلام عليكم واش ما كانش السيد ليوم تاني؟
انا زنـgـلت قلتلها مكانش كشما تحتاجي (درت روحي ما عرفتهاش)
قاتلي ما قلتيلوش كيما قتلك؟
قتلها: اه ايه قتلو ..
قاتلي : واش قالك؟
قتلها: انا درت اللي عليا وبلغتو وهنا تحبس مهمتي
قاتلي : وكيفاش دركا ديما نبقا نجي وما نلقاهش ؟ ولاكان مش حاب يصدق يقول
وتعيط وحالتها حالة وتغلي كي البرمة تع العيش:-o
انا حرت قلت هادي جات باش دير الخير وتكون وسيط مي بطريقة عدائية؟ حرت:s
قلتها: مادام .. هو راه ما يجيش خلاص غير كي تكون كاينة خدمة كي متكونش او ميجيش خلاص نمدلك نيميرو تعو وتحبي تعيطيلو تتفاهمي معاه راسك لراسو
ومبعد مديتلها كارط فيزيت ... راحت ومزالها تغلي
ومرة كنت في عرس قاعدة مع لبنات نحكيو ونضحكو وكانت قدامنا وحدة من الأخوات شبعت فينا بخص
وبلا سبة ،، قالتنا نتوما الجيل تع درك التلفون ما يتنحاش من ودنيكم ومتعرفوش تلبسو رغم ان ولا وحدة فينا كانت لابسة المفضوح وكامل مخطوبات ووحدة مزوجة يعني باينين معامن رانا نحكيو:$
والله ما لقيناو وش نقولولها؟ وانا كانت تشوف فيا بنص عين وتولي وانتي وقتاش تزوجي نتهناو منك؟ شوكاتني؟ علاش راهي توكل فيا ولا تشرب فيا؟ ولا قاعدتلها كي الهم فوق قلبها ؟ يبقى السؤال مطروح:s
وخلي وخلي وخلي ... كل هاد الأمور خلاوني نهز نظرة مارقة على هاد النوع من النساء
وعلى الرغم اني متيقنة انو كاين البعض منهم ونعم الأخلاق ونعم الأخوات مي الصورة اللي تشكلت عليهم في ذهني ما يمحيها والو
انا قناعتي من بكري انو اللي تلبس وتتشدد في لبستها (مرانيش نحكي على الحجاب الشرعي اللي كامل نعرفوه واللي نلبسو انا شخصيا)
قناعتي انو هاد الناس يمثلو " المثالية" المرأة المسلمة المثالية الخالية من العيوب
وحتى لو كان فيهم عيوب بصح ما تظهرش بزاف
ولكن انتي مدامك هزيتي على عاتقك تلبسي هاد اللباس اللي حابة تبيني من خلالو انك متمسكة بدينك وطبقي فيه خليكي تاني متمسكة بالأخلاق الإسلامية
فالرسول عليه الصلاة والسلام قال: " إنما جئت لأتمم مكارم الأخلاق" و"الدين المعاملة "
فـ ما عندها حتى معنى انك تديني في مظهرك الخارجي ومظهرك الداخلي ماهوش متدين الدين الصحيح
ممكن ما عرفتش نوصل الفكرة وممكن البعض يخالفني الرأي لكني هدا رايي وكل حر في رأيه
وشكرا لكل من مر هنا سواء سينيا ولا بصم :up: خخخخخخخ
آخر تعديل:
