جميع وصفات عضوات ماذا ستطبخين اليوم سيدتي

[ام سراج وملاك]

السلام عليكم اخواتي الفاضلات ليوم ظهرتلي فكرة لي هيا انا نجمعو جميع وصفات عضوات ماذا ستطبخين اليوم سيدتي هنا باش متروحش وصفاتهم الرائعة بين الصفحات نتاع الاجزاء ولي تحب تشوف اي وصفة كتبتها عضوة تلقاها هنا في هاذا الموضوع خطراه كاينين بزاف لي يحبو يطبقو وصفات نتاع لبنات ويظلو يحوسو بين الصفحات لذلك قررت اني نجمعهم هنا
يعني اي وحدة تحط وصفة نتاعاها في اي جزء من اجزاء ماذا ستطبخين اليوم سيدتي اليوم ننقلوها هنا نديرولها نسخ في هاذا الموضوع ومن الاحسن لو يكونو مرفوق بالصورة
راح نبدا نجمع وصفات الجزء انا الاولى باش تكون الفكرة واضحة

 

[ام سراج وملاك]

غراتان الشيفلور nada242008

تفوري الشفلور حتان يطرى
ومن بعد تديريلو ملح وفلفل اكحل ..سنات ثوم وفرماج تاع الميزان وتمرسيه بالفرشيطة شوية
تنصبي مرقة بيضا بالدجاج ... ومن بعد تفتتيه ..وتخلي لاصوص تاع الدجاج بجهة
تقطعي بطاطا دوائر وتقليها
ومن بعد في المول ..تحطي الشفلور الممروس + الدجاج المفتت والبطاطا المقلية + زيتون مقطع دوائر ومعدنوس // ماكانوش عندي
تجيبي لاصوص تاع الدجاج تضيفيلها 4 بيضات وتصبيهم على الخليط
اذا عندك زيديلهم فرماج روج من فوق
ودخليها للكوشة
تجي تهبل

 

[ام سراج وملاك]

سكالوب زهور الشروق

سكالوب قسمتو على زوج نص درتو فالحشو فتتو وحمستو بشوية زبدة وتوم وتوابل*كروية فلفل اكحل شويية قرفة وكمون+شوية ملح ومعدنوس* بعدها خطتومع الروز + فروماج
والنص لاخر خليتهم صفيحات كل صفحة دهنتها بشوية خردل*لاموتارد* زيت زيتون شوية ملح وتوابل ومعدنوس وحطيت طقة فوق ختها وخليتهم يريحو ابري ستفتهم وعمرت الحشو داخلهم وغلقتهم بالخيط وحطيتهم فالفور

 

[ام سراج وملاك]

كعك oum loukmane

كاس سكر-كاس زيت-2بيض -2كسانماء دافئ-كاس حليب دافئ -مغرف ونصف خمارة الخبز-2خمارة الحلوه-قشو رالبر تقال -سا نوج

التحضير**حطي ماء والحليب+خماره وتركيها تخمر ثم +البيض+الزيت خدمي مليح+باقي المقا دير ثم تركيه يخمر في مكان دافئ
شكلي خبيزات صغار تركيهم شوي ق صيهم مثل الخبز خدي طا بع دائر ثقبي في الوسط وشرطي بالسكين من الحواف ثم دهنيه بصفار البيض وطيبه

 

[ام سراج وملاك]

رولي بالشيكولا ملاك 25

بالنسبة لرولي بالشوكولا
المقادير
4 بيض _100غ فرينة_100غ سكر _مغرفة صغيرة فاني
نخبطوة البيض مع السكر مليح حتى يتضاعف الحجم ديالو
من بعد تزيد الفرينة وتحطيه يطيب قبل لازم تكوني شعلتي الفرن نتاعك ب15 دقيقة من قبل
وتحطي الخليط نتاعك في بلا بيه ورق الزبدة باش مايلصقش
وتخليه يطيب 10دقائق
اما لحشو الرولي اختياري
يا كريم شونتي يا كريمة الزبدة
ومن الفوق انا درت الكريم شونتي وشوكولا نواغ

 

[ام سراج وملاك]

جبن صنع منزلي ملاك 25

الجبن المنزلي
نص كاس لبن _شوي ملح وفلفل اسود
يتخلطو مليح في الميكسور
كاس زيت بالشوية تضيفيه كيما المايونز وفي الاخير نص حبة ليمون والتوابل التوم

 

[ام سراج وملاك]

وصفة الكارانتيكا لـ ЯέКîά Яồมkà


شوفي حبوبة على حساب الpلا اللي عندك: انا ندير 2 كيسان حمص مطحوون معاه كاس شابلووغ، 4 كيسان ماء، شوية زيت، ملح و حرور وديفوا ندير حبة بيض ديفوا لالا

 

[ام سراج وملاك]

الزفيطي لـ la_safa


الزفيطي :
ديري كسرة مآء و ملح عآآدية
طمآطم و فلفل حآآر تشوطيهم و لاكان تحبي تزيدي التوم مع شوي ملح
مبعد تجيبي المهرآس تاع اللوح تحطي الفلفل الحآر تهرسيه مليح
مبعد شوي كسرة تكوني دقدقتيهآآ من قبل شويآآ
مبعد تزيدي الطمآطم و تهرسي و تبقآي هكآ حتى تكمليهآ كآمل كي تكملي
تغلي شوي مآآآ و تزيديه و تهرسي حتى تجيك كيمآ التصويرة ^^
و بالصحة

 

[ام سراج وملاك]

عصيدة الزقوقو لـ هدوء المطر

المقآدير:
1 كغ من الزقوقو
750 غ من الطحين
500 غ من السكر
مقادير الكريمة:
لتر ونصف من الحليب
500 غ من السكر
أربع صفار بيض
أربع ملاعق أكل نشاء
ماء الزهر أو الفانيليا على حسب الذوق
طريقة التحضير:
تنقي الزقوقو وتغسليه مليح، منبعد ترحيه، وتحطيه في 1 لتر من الماء خلطيه مليح ومنبعد جيبي الغربال وصفيه، فرغي الخليط اللي صفيتيه في وعاء وديري الطحين ونص كيمة السكر (250غ) حركيهم مليح حتان يذوبو، حطيهم على النار خليهم على النار ونتي تحركي منبعد زيدي حطي النصف المتبقي نتاع السكر، ومنبعد كي تتخثر العصيدة تحطيها في أكواب إلى النصف وتحطيها في الفريجيدار تبرد، وتروحي تحضري الكريمة بالمقادير المذكورة، تخرجي الأكواب اللي فيها العصيدة بعدما تكون بردت طبعاً وتصبي فوق كل كوب الكريمة اللي حضرتيها وأخيراً تزينيها بالمكسرات اللي عندك ( لوز، بيسطاش...)
بالصحة والهناء.

يتبع لجمع باقي الوصفات ولي فهمت واش نقصد تتفضل وتجمع معايا لازم كامل نتعاونو

 

[red rose]

رائع فكرة جميلة على الاق بلا مانحوسوا على الوصفات
نلقاوهم هنا

دمت بود غاليتي

 

[Oum Loukmane]

الله يخليك كنت نحوس على وصفة لتارت لاخت سوسو فكره رائعه

 

[طباخة زماني]

واشنو هو الزقوقو

 

[rose09000]

رد: جميع وصفات عضوات ماذا ستطبخين اليوم سيدتي

يعطيك الصحة على المبادرة و حابت نشارك بلي قدرت عليه إذ مافيهاش إشكال نبدأ ننقل وصفات ممن جزء الأول للفائدة

برانية بالداند لندى242008​

هذي برانية بالداند والبطاطا مافيهاش بادنجال
في طنجرة الضغط تحطي حبة بصل مقطعة مكعبات شوية زبدة وزيت ملح وفلفل اكحل واحدة جومبو دجاج اختيارية وطبعا تنقصي من الملح تقليها مليح وتمرقي حتان يطيب الداند
الزيتون تغليه مع شرائح الليمون وتصفيه وتضيفيه للصوص تاع الداند
البطاطا تقليها وتلوحيها ثاني في الطنجرة لمدة 5 دقائق على نار هادئة وتطفي عليها
تقديميها مع شرائح الليمون والمعدنوس تجي هايلة خير من الروطي
وساعات ندير الدجاج في بلاصة الداند
خفيفة ومافيهاش ليدام

 

[rose09000]

رد: جميع وصفات عضوات ماذا ستطبخين اليوم سيدتي

الحوت مفور لمريم حاسي​

الحوت تبلتو مليح ملح فلفل اسود زنجبيل مطحون كمون جوزة الطيب و شوية زيت الزيتون
و زدت فيه البصل و الطماطم و الثوم ولميتهم في ورق الالمنيوم و عملتهم يتفورو احنا نقولو يتبخرو اي في الكسكاس

 

[rose09000]

رد: جميع وصفات عضوات ماذا ستطبخين اليوم سيدتي

كيكة رخامية لكوثر الواهرنية​

ضربي ستة بيضات فاني و كاس و نص سكر ضربيهم مليح بالباتور حتى يتضاعف الحجم ضيفي نص كاس زيت ضربي مليح ثم نص كاس حليب و ضربي وحدة طخميرة الحلوى ثم زوج كيسان و نص فرينة ضربيهم مليح نحي شويا من الخليط ضيفي له زوج ملاعق كاكاو و خلطي مليح دهني مول فرغي فيه لخليط الابيض ثم ديري دوائر بالخليط لبني ثم براس موص اجيبي ن وصط لدائرة الى حافة المول مثل شبكة العنكبوت ثم دخليها الفرن يكون مسخن مسبقا و خليها تطيب هدي هي الكيكة انشاء الله تفهميني

 

[rose09000]

رد: جميع وصفات عضوات ماذا ستطبخين اليوم سيدتي

التريدة لأسيا11​

للتريدة للصوص لازم بصلة مرابية و اللحم ملح فلفل أكحل شوي كركم و إدا حبيتي شوي قرفة و حمص و تمرق كي يطيب اللحم نصفيوه مح الحمص
والتريدة تدهنها بالزيت و تفوريا ثم تبخيها بلاصوص وتزيدي تفوريها ثم تحطي التريدة في طنجرة و تصبي عليها لا صوص المصفية و خليها تكمل تطيب

 

[rose09000]

رد: جميع وصفات عضوات ماذا ستطبخين اليوم سيدتي

البراج لندى 242008​

البراج
3 كيلات سميد
كيلة زبدة ستار ذايبة
شوية ماز زهر ورشة ملح
تبسي السميد بالزبدة وتبليه بماء الزهر والما وماتعجنيش لمي برك
كل ماتعجني كلما يجيك يابس
المهم تخليه يرتاح مليح لنص نهار اذا قدرتي
الغرس تنقيه وترحيه وتزيديلو رشة قرفة وجلجلانية محمصة وشوية زيت تحليه في غلاف بلاستيكي وتشكليه مستطيل
وكاينة اضافة تحمصي الجوز وترحيه
تحطي طبقة عجين وطبقة غرس وطبقة جوز مرحي وطبقة عجينة تحليها بالوراق مليح
تقطعي مقروضات وتطيبيه في الطاجين

 

[rose09000]

رد: جميع وصفات عضوات ماذا ستطبخين اليوم سيدتي

كرانتيتا لمريم حاسي​

خلطت 250غ حمص مطحونة مع 1 لتر و نصف تاع الماء ملح حبة بيضة شوية زيت و خلطتهم بالميكسور مليح حتي شفت فقاعات
دهنت الصينية بالزيت و دخلتها للفرن كي سخنت ضفتلها الخليط تاع الحمص
و الصينية كانت في الرف الفوقاني وكنت نقلب فيها باش تحمار من كل الجوانب
علي فكرة الحمص انواع و خدي عينك ميزانك في اظافة الماء لازم ما تكون جارية بزااف ما تكون جامدة لازم تكون متوسط

 

[rose09000]

رد: جميع وصفات عضوات ماذا ستطبخين اليوم سيدتي

المشلوش لندى242008​

طيبي الفطير تاع الشخشوخة عادي ومن بعد تلفيه كالرولو وتقطعيه بالسكين الى شرائح طولية
تفوريه ومن بعد توجدي زبدة وعسل حر وشوية ماء زهر تسخنيهم وتسقي بيها المشلوش والتزيين اختياري رشة سكر قلاصي ومكسرات مرحية

 

[rose09000]

رد: جميع وصفات عضوات ماذا ستطبخين اليوم سيدتي

تغميسة البذجان لندى242008​

بالنسبة للبدنجان ثقبتو بالسكين وشويتو مليح ومن بعد حطيتو في ساشي وكي برد قشرتو
حطيتو في الميكسور مع فصين ثوم وعصير نصف حبة ليمون وشوية زيت زيتون وملح و 2م ك مايوناز والله جا هايل
ا

البريك لندى242008​

غليت البطاطا وصفيتها + م ص هريسة ورحيتها
تجيبي ورقة الديول تحطي البطاطا على شكل مربع وفوقها شرائح من الكمومبار وبيضة ورشة معدنوس ونطبقها ونقليها