حكايتي مع صديقآت العمر

[ضآحكة مستبشرة]

السلآم عليكم و رحمة الله تعالى و بركاته

نحب نشكر مينو عالفكرة الجميلة
ربي يخليهالي و لينا الكل

انا رح نحكيلكم حكاية تاع صديقات العمر
بطلاتها اسماء و نبيلة و سميرة و لمياء
صديقات عشنا اجمل ايام العمر مع بعض تقاسمنا الحلو و المر
تعرفنا على بعضنا البعض في 1 ابتدآئي سنة 2004 / 2005
عمرنا حين ذاك 6 سنوات درسنا مع بعض في نفس القسم لغاية 1 ثانوي 2013/2014
ففي الابتدائي كنا شلة مشاغبة لدرجة الجنون كنا شلة المشاغبين و الاذكياء
عشنا اجمل ايام الطفولة مع بعض
و ساوري لكم بعض منها ففي يوم من الايام ذهب الي صديقتي لمياء بصدد ان نذهب للابتدائي
اسمحولي ندورهآ دآرجة هههههههه
و مبعد باش نروحوا قعدنا نلعبوا لعبنا و لعبنا و لعبنا مفقناش للوقت مين رحنا للشيخ قبضنا بالتيو لحمنا رجعوا زرق و انا مدودين بالطين لانو كنا داخلين في قلتة تاع وحل الله لا يشوفكم
و استمرت الايام لغاية 5 ابتدائي و جبنا السيزيام و كنا كامل من 10 الاوائل رحنا لليسام و تم عينيا بداو يتحلوا هههههه
قرينا الاولى و منشفاش مليح مي كان عام 4444
و السنة ثانية متوسط كنا اشرد كلاصة في السيام منقراو منخلوا الناس تقرا
طحنا مع ناس متشردين لاخر نقطة
زمان طول و هوما يزوجوآ في بعضآهم سلكتلها انا بويسك فهداك الوقت كنت لاتية بتصميم الازياء ههههههه :d
3 متوسط و ين تفرعنا تاع الصح شفنا شوفات و خرجات كبار علينا
انا و نبيلة تم تقربنا لبعضانا تاع الصح و من تم احنا صديقات صدوقات
و في 4 متوسط كآآآآآآآآآآآآآآآآن اجمل عام في حياتي الدراسية
كنا في 19 تلميد في القسم و كنا اجمل كلاصة
عشنا يامات جامي ننساهم يامات 444444

جبنا البيام و رحنا لليسي و مزالنا في نفس القسم لم نتغير الا هاد العام هوما راحوا لغات و انا فلسفة

قد ما نحكي منكمل
صديقات العمر احنـــــــــآ سمآونى كليكة الفيسبوك
نحبهك صديقاتي و جامي ننساهم
هومآ كآمل حياتي و محآل نفرط فيهم


هآدي حكايتي مع صديقات العمر نتمنى تعجبكم

سلآلآلآلآم​

 

[بنت الـ25]

لا شكر على واجب أسووم ربي يخليك انتي تاني
أول مرة نشوف وحدة ما عندهاش المشاكل خخخ
ربي يبعدهم عليك حبيبتي
شكرا ليك على مشاركتك لنا قصتك الممتعة
احنا أكيد كلنا عندنا ذكريات طفولة ومراهقة وأيام لا تنسى
ربي يخليلك صديقاتك يا متشردة خخخخخ
يوضع الموضوع ضمن http://4algeria.com/forum/threads/419250/​

 

[سفيان اسلام]

ربي يخليلك اصدقائك اختي
ودوم المحبة بيناتكم
والله الصداقة اعظم شيء
بالتوفيق
​

 

[♫الباحثة عن الحظ♫]

الله يبارك بطوطة

هادي هي الصداقة تاع الصح

ويكذب عليك الي يقولك مش كاينه الصداقة في الوقت هدا

ربي يدومها

 

[ام اشراق]

ربي يدوم المحبة بينتكم اختى عاشقة الجنة
صح كاين صحابات مثل الاخوات او اكثر
بوركتى على الطرح لجميل
بالتوفيق ان شاء الله

 

[السلطانة]

وعليكم السلام ربي يخليكم لبعض اختي
لأنو مع الوقت الاصدقاء يتبدلو وماتجي تتزوجي تلقاي روحك درتي صديقات جدد وتاع الطفولة كل وحدة لاهية بحياتها
حكايتك هايلة خلاتني نتبسم ونرجع للوراء بالتوفيق

 

[*amina*]

السلام عليكم
حكايتك اختي خلاتني نجع لايام زمان
عندي صديقة اسمها فايزة قريت معاها سنة اولى ابتدائي نحبها وتحبني ومزلنا لحد الان صديقات كل ما نروح لدارنا تجي تزورني مسكينة
نتمنالها كل خير

 

[¬Đỉaмơŋđ ✿]

وعليكم السلآم ورحمة الله و بركآته

كآمل عندنآ ذكريآت التشرد الطفولي ههههههههه وما أحلاها من أيام
ليتهآ تعود يوما ..
ربي يدوّم عشرتكم ويخليكم لبعض
موفقين في دراستكم إن شآء الله
​

 

[آمال النجاح]

و عليكم السلام و رحمة الله و تعالى و بركاته

الله يدوم الصداقة و المحبة و الوفاء و الاخلاص ما بيناتكم أختي

ربي يحفظكم يا رب

الصداقة كنز أختي و ما أروعه من كنز علينا المحافظة عليه

ربي يوفقكم الى كل خير أختي

مشكورة على حكايتك الرائعة أختي ربي يدوم صداقتكم يا رب​

 

[أم منيــــــر]

ما شاء الله
ربي يدوم المحبة بيناتكم ويخليكم لبعض

 

[stelllo]

الله يديم السعادة والالفة والصحبة اللي بينكم