حكآيتي مع هآد العآم { مع لقرايــــــة }

[ضآحكة مستبشرة]

السلآم عليكم و رحمة الله تعالى و بركاته

وآش حوالكم صافا يا الخاوة

حبيت نرجع و نحكي شوي على المجتمع لي نقرا فيه موش لي نعيش فيه

انا منين جبت البيام محبيتش نقرا في الثانوية لي في مدينتي
حبين نحول على جال كاين اساتدة ملاح على ليسي بلديتي
قلنا بسم الله و تكلنا على ربي سبحانو
جاز العام الاول روعة قرينا فيه و تحصلنا على نتائج مرصية و طلعنا لدوزيام اني


مع بداية هاد العام بداو المشاكل
و الي هوما الاساتدة
في ديبي تاع العام مكاش لي بروف و زعما الليسي مليح و تان جديد نورمالمو راه عندوا امكانيات هائلة
مكاش مطعم مقلنا والو مكاش نظام مقلنا والو
مكاش اساتدة مقلنا والو
مي باش ميقدروش يعاقبوا الي يتمادوا في حدودهم هادي مكاش منها

كل يوم تسمع حكاية لي تخلي مخك يديكلونشي نورمال
استاد ضرب طفلة بكف طفلة درب واحد بموس
طفل درب طفل بكف
تلميد تضارب مع استادوآ


لي سونسيال المشاكل من الاول
انا و صحباتي لي بروبلام كاين معانا بزاف
برك اليوم صرآ وحد المشكل لصاحبتي خلانا نندموا لي جينا نقراو في داك الليسي

يا خاوتي الهدف من موضوعي انو مبقاش احترام لا بين الطفل و الطفلة
لا بين الاستاد و التلميد

قآلك : { كاد المعلم ان يكون رسولآ } معنى هاد العبارة وين راه
يا اساتدتنا الكرام خلآص رانا ملينا من انو كلشي يجي من التلميد و الاستاد دائما مليح
هآدي مكآش منهآ

ولينا عايشين في مؤسسات جنونية وليست تربوية
استادة من لي تدخل و هي مجمعة مع الاولاد و يحكيو على قصص الحب و الغرام و الزواج
استاد يجي يقولك الزطلة و الحلوة و الليكستا و معلباليش
وين رايحين بيهآ وين
ومع هدآ الكل مزال اساتدة فيهم الخير

و السلآم عليكم​

​

 

[بنت الـ25]

أهلا أسماء
على وجه ربي ما تزيديش تسطري الكتابة تعك او تعميني آ خلاك ههههه
بون الليسي هادي هي الحياة فيه يقولوك كون ما نتمردوش دوكا وقتاش نتمردو
وبعض الأساتذة (هداهم الله) يعجبهم هداك التمرد ويستمتعو بيه
هداك نهار مروحة فالبيس وكاين 3 أستاذات تع الليسي قاعدين قبلي (وحدة فيهم تقري اقتصاد علابيها فهمت بلي تع ليسي)
طريق كاملة وهوما يحكيو على الطوايش اللي يديروهم التلاميذ ويضحكو وعاجبتهم روحهم grave

انا مين كنت نقرا فالسنة أولى ثانوي كان يقرا معانا واحد الطفل تشوفيه قد البونتة تع الدخان بصح خدايمو شترة
في سبتو ولى قسمنا حكاية على كل لسان من كثرة الطوايش اللي يديرهم فالاساتذة
بداها سب الأستاذة تع الرسم وكي سمعت بيه الاستاذة تع الفرونسي حاوزتو من الحصة تعها ودارت بيه تقرير
تالمو قلق منها ضربها بكوتبي جابها فاللرض
وقبل هادي سب الأستاذ تع لونجلي قالو انت كوميك ،، الأستاذ من الغش هزو وخبطو فالحيط غاشاه:-o
ولاو الأساتذة يكرهونا وميحبوش يجيو يقريونا في سبتو
علابيها يقولك راح لمليح في جرة القبيح
ممبعد نهار ضرب الاستاذة تع الفرونسي حاوزوه وتهنينا

كوراج برك اسوم واحكيو مع الأساتذة قولولهم ماراناش حابين نروحو ضحية التلاميذ المتمردين
وربي يجيب الخير

يضاف الموضوع لقائمة مواضيع http://4algeria.com/forum/threads/419250/

​

 

[سفيان اسلام]

السلام عليكم ورحمة الله

اختي لي راه صاري في المدارس بزاف
والجامعات اكثر مما تتصوري
درك الاساتدة مرهمش كي بكري
يجو باش يعلمو التلاميد ويضربوهم بالمصطرة الخ...
دروك راهم يخافو من التلاميد من هدي المشاكل
والتلاميد ايضا مشي محترمين
مين يدخل الاستاد تبدا الشيرا ولا الشير يحكو مع بعضهم
والاستاد او الاستادة يشرحو في الدرس
والتلاميد مع الكلام والحب الخ......
انا منلومش الاستاد كاع
الفوتيف في التلاميد لسوء التربية الا بعض الناس
ربي يجيب التاويل باش يعرفو قيمة الاستاد وقيمة الدراسة
في كامل البلدان يقراو بالدراهم ويقرو ويجتاهدو
وحنا نقراو باطل عند الدولة ومبغيناش نجتاهدو
وحتى الاساتدة مين يشوفو انسان محترم يحترموه
حتى يلا كان مبوقل ميعرفش يقرا يساعدوه
بصح مين يشوفوه شايف روحه يقيسوه في التقيل
الله يعاون الاساتدة
ويخلينا بلادنا الطاهرة
وشكرا لكي اختي
​

 

[بنت الـ25]

ردك يا سفيان فكرني بوحد الظاهرة جديدة عندنا لهنا في قسنطينة
وبالضبط في المدينة الجديدة علي منجلي
كاينة وحدة جارتي تقري تسيير واقتصاد في ليسي في uv14 اللي ولات اشهر من نار على علم بسبب المشاكل اللي راها صارية لتما
قاتلي نهار بديت نخدم في نوفمبر تحلفو فيا التلاميذ قالولي راكي انتي الأستاذة السابعة اللي تجي هاد العام وان شاء الله في أقرب وقت تستقيلي كيما لي فاتوك
قاتلي نهدر مع واحد فيهم نقولو اسكت يقولي ماخي تخرجي برا وشتوفي وش ندير فيك
قاتلي وليت نخاف منهم نقولهم ديرو وش تحبو
والنقاط قاتلي اللي يدي تحت المعدل يخليها على جدي
قتلها وكيفاش تمديلهم بكل فوق 10؟
قاتلي وش رح ندير راهم تارمينال النقطة هادي ما تقدم ما توخر ومش عجالت نقاط انا نتوخد في عمري عندي طفل خايفة يولي يتيم
ايا وشمن تعليم ووشمن تربية؟؟؟؟ في وقت ولى الأستاذ يخاف على حياتو
​

 

[أنيس أيمن]

السلام عليكم
والله يلا عندكم الحق الاساتدة ولاو يخافو من التلاميد
يجو باش يعلموهم وهوما ولا علا بالهم
هدا هو جزاء الاحسان اخوتي
انسان يحسن اليك ونت تردله الاحسان بالاهانة
وكيما قال ناس بكر نت بالمغرف لفمه وهو بالفرشيطة لعينيك
الله ينتقم من هادو التلاميد لمشي متربيين
وحاشا الناس بنات الفاميليا وولاد الفاميليا
خطرة كان يقرا معايا واحد في 3 الثانوي
كان عندنا الباكالوريا وكان شوية ضعيف في الدراسة
بصح ولد فاميليا يحترم الاساتدة كانهم اهله
وكانو يعاونوه في كل حاجة في النقاط
حتى المدير عاونه باش يدي الباك
لشهادة الاساتدة عليه بلي احسن الناس

 

[سفيان اسلام]

ردك يا سفيان فكرني بوحد الظاهرة جديدة عندنا لهنا في قسنطينة
وبالضبط في المدينة الجديدة علي منجلي
كاينة وحدة جارتي تقري تسيير واقتصاد في ليسي في uv14 اللي ولات اشهر من نار على علم بسبب المشاكل اللي راها صارية لتما
قاتلي نهار بديت نخدم في نوفمبر تحلفو فيا التلاميذ قالولي راكي انتي الأستاذة السابعة اللي تجي هاد العام وان شاء الله في أقرب وقت تستقيلي كيما لي فاتوك
قاتلي نهدر مع واحد فيهم نقولو اسكت يقولي ماخي تخرجي برا وشتوفي وش ندير فيك
قاتلي وليت نخاف منهم نقولهم ديرو وش تحبو
والنقاط قاتلي اللي يدي تحت المعدل يخليها على جدي
قتلها وكيفاش تمديلهم بكل فوق 10؟
قاتلي وش رح ندير راهم تارمينال النقطة هادي ما تقدم ما توخر ومش عجالت نقاط انا نتوخد في عمري عندي طفل خايفة يولي يتيم
ايا وشمن تعليم ووشمن تربية؟؟؟؟ في وقت ولى الأستاذ يخاف على حياتو
​

شفتي اختي شراه صاري
ولت المعلمة المسكينة تخاف
على روحها وخمت على ولدها
والله هدي كاع مشي حالة رانا فيها
نطلب من ربي كيما راهم يديرولها هاك
نشالله ربي ينتقم منهم
علاه يديرو هاك لبنت الناس
يرضو هدا لامهم ولا اختهم
بصح اختي هدو الناس شرار الخلق
يطيق عليهم غير ربي
بصح متخافيش ربي سبحانه يقول
بسم الله الرحمن الرحيم
( ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار

 

[مهدي الثعالبي]

اني ارى فيك الخير يا بنتي و العيب ليس فيكم اقصد هذا الجيل بل العيب فينا نحن الجيل الذي سبقكم فما انتم الا نتيجة للجيل الماضي