مرحبا باللماويين واللماويات من الشرق للغرب ومن الشمال للجنوب
أولا نشكر صاحبة الفكرة سلمى خفيفة الروح دايما تخلعنا بحاجة جديدة
وثانيا حبيت نشارك كأول متطوعة في سلسلة
بقصة صراتلي عندها عام تقريبا
احنا أيام الجامعة كنا سبع صديقات
لكن بعد التخرج في 2010 كل واحدة شافت حياتها وبقى عندي اتصال مع اثنين فقط
ميرا وجوجو
كانو من أعز صديقاتي ونسكنو في نفس المنطقة
في البداية كنا نتلاقاو بزاف مي ممبعد بدا يتقطع الاتصال شوي شوي
ميرا كانت ومزالت قوية شخصية والريح اللي تجي متزعزعهاش ،
دخلت مسابقة ماستر في كلية الإعلام في بن عكنون ونجحت
علابيها قل تواصلنا مي مزال لحد الآن كي تجي لقسنطينة نتلاقاو دايما
والعقلية هي العقلية
مي الشي لي نعرفو على جوجو بدا يتناقص،
ولينا نعيطولها متريبونديش وكي تشوف لابال متعاودش
نتلاقاو بيها بالسيف عليها نكركروها تكركير
وهي تتحجج ساعات بالعمل وساعات معندهاش كريدي ...الخ
وحتى العقلية تاعها تبدلت ، بيسك هي تتأثر بالآخرين بزاف
كي كنا احنا صديقاتها وكانت دايما معانا كانت متبنية أفكارنا
مي كي دخلت ميليو جديد واختلطت بناس جدد تبدلت عقليتها لدرجة ولينا منعرفوهاش
المهم وحد نهار عيطتلي ميرا قاتلي مينات راني انا وجوجو قراب من مقر عملك
لكان تحبي نتلاقاو ونقعدو في بلاصة نحكيو شوية عندنا شحال ما تلميناش احنا الـ 3
انا بطبيعة الحال مقلتش لالا وتلاقينا ، حكينا وضحكنا واسترجعنا ذكريات زمان
ممبعد قالت ميرا لجوجو احكي لمينات الديقات اللي درتيهم
قاتلي جوجو أول ديقة راني رح نحبس الخدمة والمدير كي قتلو نحبس قالي اخدمي 3 اشهر اللي منصوص عليهم فالعقد ما بين نلقاو بديلة ليك وانا رفضت
بعتلي إنذار عن طريق المحكمة وبالاك يشارعوني
قتلها: والديقة التانية
قاتلي : بالاك فيها مشروع زواج
بين قوسين (وانا من بكري نعرف جوجو بلي خلاطة وتعرفت على بزاف شباب
وفي كل مرة نقولولها العلاقة هادي مراحش تصلح وهي تبقى مصرة)
مي فهاد المرة فرحت وتشوقت في نفس الوقت قتلها : احكيلي
قاتلي هو يخدم معايا فالشركة ، اسمو (م) ، تقرب مني وصارحني بلي نعجبو وناوي يخطبني
قتلها : ايه هادا خبر يفرح اوموا وحدة فينا رح تفرج عليها
قاتلي ميرا : احبسي تحكيلك لا سويت
انا: كلي آذان صاغية
جوجو: وحد نهار رحت معاه لعنابة
أنا: آه، انعم
قاتلي: دوكا زوج بنات يخدمو معايا تعرفو على 2 جون من عنابة ،
هدوك ليجان جاوهم مرة من قبل لقسنطينة مي وعدوهم لبنات لمرة
لجاية هوما لي يروحولهم لعنابة
ألوغ قالو لهادا (م) هو يديهم سع قالهم انا ما نديكمش غير لاكان راحت معانا جوجو
قتلها: ورحتي ان شاء الله
قاتلي: سما بقاو يحاولو فيا وقالولي الروحة تعنا هادي متوقفة عليك ، قريب يبكيو والله فريمون حشموني
(يا عمرييييييييييييييييييي قلبي الصغير لا يتحمل )
ورحنا
قتلها : وفالدار وش قلتيلهم؟؟؟؟؟؟؟
قاتلي : عادي
( والكدب ملفوق ، ربحت آ سيدي)
أيا رحنا وكي وصلنا لبونا بيتش
قتلها احبسي ، وش هادي بونا بيتش
قاتلي: اي بلاج في عناية بريفي تما تفاهمو لبنات يتلاقاو مع ليجان
المهم كي دخلنا لقينا لبنات تقريبا مش لابسين
قلت لـ (م) : شوف شوف،
انا هنا مقدرتش نستنى لاسويت
تهجمت عليها كيما يتهجم الأسد على الفريسة
قتلها: وعلاش انتي كي درتي الشي هدا في بالك راكي متربية
الطفلة يا المتربية متكدبش على والديها
الطفلة المتربية متروحش من بلاصة لبلاصة من ورا والديها
الطفلة المتربية متدخلش لشواطئ علابالها وش رح تلقى فيها، وتزيدي تقوليلو شوف شوف ؟؟
وهاد السيد اللي راكي تقولي عليه مشروع زواج ما شكيتش ناويك صح للزواج
خاطر اللي ينوي مرا للزواج يخاف على سمعتها كتر من ما تخاف عليها هي
وما يديهاش لأماكن مشبوهة
باختصار راه يعقب بيك فالوقت واصبري تحبسي الخدمة ابزقي على هاد الوجه لاكان يبقى مشروع الزواج قائم
بيان سيغ هي تشوكات ، متوقعتش ردة الفعل تعي هادي
سكتت وما قدرتش تقولي عندك الحق
ومقدرتش تاني تغلطني خاطر علابالها في أعماقها بلي راهي غالطة
كملنا القعدة بوحد البرود والصمت ومبعد تفارقنا
وكان هداك هو الوداع
من هداك اليوم ما تلاقيتها ما حكيت معاها فالتلفون رغم اني حاولت مي ما صلحتش
حتى انها يوم سمعت بيا تخطبت ما عيطتليش و مام با باركتلي ولو من بعيد والووو
وسمعت ممبعد من ميرا بلي تفركش مشروع الزواج تعها
انا بعد هاد الجلسة قعدت مع روحي وخممت ، أسكو كان من حقي نحكي معاها بهديك لافاصون
علابالي كامل نغلطو وواحد فينا ما راه معصوم
مي من خوفي عليها ويقيني بلي القادم أسوء ما تمالكتش أعصابي والنتيجة اني خسرتها وخسرت صداقتها
ودوكا قولولي :
عندي الحق ندخل في حياتها ولا معنديش؟
عندي الحق كي حكيت معاها بهديك لا فاصون ولا معنديش الحق؟
عندي الحق كي قطعت صلتي بيها ولا ما عنديش الحق؟
نتمنى تجاوبوني
دمتم بخير
آخر تعديل بواسطة المشرف:
