- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
أهلا بيكُم يا ناس اللمة المحترمين بصغيركم وكبيركم
إن شاء الله راكم لباس
تبعوني من فضلكم حتى الأخير
نظنّ حسب العنوان ولي هو " العائلة أكبر ممّا تتوقع "
أي شخص رايح يقرا العُنوان رايح يجي في ذهنو أنو العائلة هي
أب وأم وإخوة وكل الاقارب لي يحملو نفس اللقب
صح راني معاكم العائلة هي
الأب لي يخرج مع الصباح بكري ويرجع حتى وقت متأخر من اللّيل
غير باه يخدم ويجيب اللقمة الحلال
ويتحمّل حرآرة الصّيف وبرد الشّتاء غير باه يفرح ولادو ودارو
الأم لي تتعب في تربية الأطفال وتسهر على راحة الجميع
وتكون أول من يستيقظ وآخر من ينام، تحس بكل فرد من العائلة
حتى قبل ما يهدر ولا يشكي وتبقى ديما هي القلب الحنون
أختك ولا أخوك لي مهما تتشاجر معاهم ومهما المشاكل لي بيناتكم
إلا أنّ قلبهم ينبض بيك ويفكرو فيك ودايما يوقفو معاك
بلا ما نذكرو الأقارب لي يحملو نفس اللقب
في بالكم هادي هي العائلة برك؟؟
هنا تحبس كلمة عائلة ؟
درك نقولكم
جارك لي لما تخرج تلقاه يقابلك بإبتسامة ويسقسي على أحوالك
يفتحلك بابو في الفرح والقرح ، يبكي معاك في حزنك ويفرح معاك في فرحك
كي ماتاكلش يقسم معاك ماكلتو وكي ما تلبسش يعطيك معاه لبستو
هادا ما يستاهلش يكون من العائلة ؟؟
الطبيب لي لما تحس روحك بين الموت والحياة تروح تقصدو
يستقبلك بصدر رحب لما تزورو
ويسمع كامل شكوتك ويواسيك ويداوي جروحك ،
لما تحس روحك وحدك في المستشفى
يوقف معاك ويسهر على راحتك
هادا ما يستاهلش يكون من العائلة ؟؟
الشرطي ولا الدركي لي نتا راقد وهو ساهر باه يحافظلك
على الأمن لي راك عايش فيه ، يا إما يسهر الليالي ويا إما يحرس الحدود
يبقى بعيد على عايلتو وقلب يماه محروق عليه
هادا غير باه نعيشو حنا في أمان وسلام
هادا ما يستاهلش يكون من العائلة ؟
المعلم لي قرا كامل حياتو غير باه يوصلنا معلومة تنورلنا طريقنا
علمنا الدين ، علمنا العلوم ، علّمنا التاريخ وتضاريس الوطن
يبكي معانا لما ماننجحوش ويفرح بينا لما ننجحو
هادا ما يستاهلش يكون من العائلة ؟؟
الإطفائي لي يغامر بحياتو على جالك، ماعلابالوش إذا يرجع للدار حي
ولا يجيبوه في صندوق ، غير يسمع أحد المواطنين في خطر
حتى يضحي بحياتو وشبابو على سبيل انقاذ أرواح الابرياء
هادا ما يستاهلش يكون من العائلة؟؟
علابالي كل ما راني نهدر راكم تتفكرو في بزاف ناس
المحامي لي يداف على حقنا ، الممرض لي يسهر على راحتنا
حتى عامل النظافة لي راهو ينظف من ورانا
هاو كامل ما يستاهلوش يكونو من العائلة؟؟
العائلة يا خاوتي ماشي نحملو نفس اللقب
العائلة هي أنو يمشي في عروقنا دم واحد و يربطنا وطن واحد
لي يقيسني يقيسك ولي يقيسك يقيسني
نفرح لما نسمع ناس يتضامنو روح وجسد لما تتقاس ولاية من ولايات الوطن
نفرح لما نوقفو مع بعضانا وقفة رجُل واحد
بالاك باباك ماشي بابا ويماك ماشي يما لكن الأم الواحدة لي تجمعنا هو الوطن
رانا كامل عايلة وحدة وماتفرقنا غير الموت
في الأخير نتا ولا نتي لي راكم تقراو في الموضوع
حتى نتوما راكم عايلتي ، مع تقراو موضوع تدخلو تجريو
تواسيو المجروحين و تعاونو المهمومين ، وترسمو الابتسامة على وجه الجميع
تفرحو معانا وتبكيو معانا ، تستاهلو تكونو عايلتي ^^
ربي يحفظ الجميع وماتنساوش هادا راهو وطن واحد ورانا كامل عائلة
اتهلاو في رواحكم وان شاء الله ما كنتش عليكم تقيلة
تحياتي لكل رجل شهم وإمرأة حرة في هاد اللمة
ســــــلآم
آخر تعديل بواسطة المشرف:
