~..كَنَـتٍـي الـمـغْـبُـونَـة..~

الباندي · 5 أوت 2015

خير عليكم ..كي مسيتو ..ولاد خالتي و بنات خالتي ....ان شاء الله راكم بخير ...

هذا الموضوع اهداء للغالية ام منير ميمتي ربي يحفضلها ولادها و مولا بيتها ..منورةان شاء الله
و الغائبة اختي نور الهناء ادعولها بالخير متنساوش بارك الله فيكم

---------------------------------------------

تحذير :

هذا الموضوع يحتمل حقائق صادمة و مروعة و مشاهدة تدمي القلب حقيقة للبنات المقبلات للزواج ..حيث هذا المنتوج لا يصلح لذوات القلوب الضعيفة .

"الكنة" وما ادراك ما "الكنة" كلمة تبان ساهلة ..فيها مسكينة غي ثلاث احرف بصح صغيرةو محاينها كبار موراها بلاوي سودةو متسلكش بالهدرة من موراها وكما الدير موحال يرضاو عليها على هذاك بغيت نوقف معاها ليوم تحيا الى الكنات تاع اللمة و ين ما كانو ههههههه

كَنَتٍي العَزِيزَةْ رايحة تقاسي اصبري نحكيلك واش يصرا فيك نهار تزوجي اسمعي و عمري راسك :

الا"الكنة" بغات دير دورة مثلا كل سمانة و لا كل 15 يوم عند دار عجوزتها و شيخها يقولو ليها يا حفيظ "لسقة" هذا الطفلة هاو تGبض دارها بصح المشكل ماشي فيها المشكل راهو في ولدنا طالgلها الحبل و معفسا عليه لوكان يقرصها تشوفي بصح احي احي ..واذا ولات مجيش غي في المناسبات برك يقولو راهي تحوس تقطع وليدنا علينا و تنسيه فينا ..

كما دير متسلكش كَنَتٍي العَزِيزَةْ المسكينة وين دور تابعينها تابعينها

ياشومي و اذا روحتي عندهم و يديك فارغين مايخلولك مايبقولك و تبدى الشرات من تحت
لتحت ياخي مشحاحة ياخي لوكان راحت لدار امها و بويها لوكان جابت القفة معمرة ..مي احنا جايتنا بلاطاي ..نندب بالقرداش ياوليدي واش سلطك على هاذ الكالتي ...واذا ديتي حاجة في يدك يقولو احي احي مافيهاش gاع البنة والو سامطة كي وجها

ومرة اخر كما الدير متسلكش تابعينك تابعينك يا كَنَتٍي العَزِيزَةْ

ياحوجي واذا روحت و انتي شابة و مستيكية الحالة يا مامي يامامي ...و تبدى الشوفات "دراهم وليدنا gاع كملتهم"دراهم وليدنا راحو غي لبسة اها نندب على وليدنا هو ملي تزوج ماشرا والو بصح الشح فيه هو يستاهل نهار يحتاج اللبسة باش يلبس قوللها اعطيني المنصورية تاعها البلو سيال هاذيك بالاك تخرج عليك ياوحد المدمور
والا جات ولابسة سامبل ههههه يقولو ياخي طلابة واش بيها بهدلتينا قدام الناس البسي حاجة تعمر العين ياخي حالة الــgو و ماعندهاش في اللبسة حشمتي بينا".. افهم انت روك

مرة اخرى كما الدير ماهيش سالكة تابعينك تابعينك كَنَتٍي العَزِيزَةْ

والا دخلت معهم في كاش سوجي و عطيتي رايك يبداو واش بيها دخل في روحها لسانها قد المشحاط حوجي ها اسكتي شويا و الموصيبة الكبيرة اذا كنت كَنَتٍي العَزِيزَةْ حشامة ..يقولو عليها واش بيها عكوشة هاذي ياخاااه الهدرة و ماتعرفش تهدر

يعني لاحقينك لاحقينك كَنَتٍي العَزِيزَةْ

ولا كانت وليمة و لا حاجة و عاونتيهم يقولو عليها شوفو شوفو حابة تبين روحها تاع انا شاطرة تلعبها ستوت والا عاونتهم بحاجة خفيفة برك يقولو واش بيها هادي جات تعمر في كرشها و تروح متحشمش على روحها

ببساطة كَنَتٍي العَزِيزَةْ كما ديري ماكي في الخير

و الموصبة الا روحتي و ديتي ولادك معاك كَنَتٍي العَزِيزَةْ يقولو عليك "راهاي باغية تتهنى منهم جابتهم عدنا ..ولا لعبو الذراري ودارو كاش حاجة يقولو ولادها ماهمش مربيين باسكو امهم عوجة ولا جيتي بلاما جيبي ولادك ههههه يقولو "شفتو كيفاه راهي باغية من دروك تقطعهم علينا و تنسيهم في دار جدهم و جداتهم

يعني كَنَتٍي العَزِيزَةْ انت في موقف تحسدين عليه كما درتي حصلتي ربي يعينك عليهم

مزال كَنَتٍي العَزِيزَةْ هذا غي القليل

والا قعدت مثلا و سقسيتيهم على اخبارهم وكيفاش راهم دايرين ولا حكيتلهم على مشاكلك يقولو "راهي ملي تجي و هيا تشكي و تحكي على الناس واش دخلها ياحفيظ شحا دخل روحها المصفارة" ولا سكتي ماقلتي والو يقولو "شفتو لالة تجي تدي لخبار و تعمر القرع و تروح تديهم لمها"

كَنَتٍي العَزِيزَةْ الله غالب زهرك خاطي

و الكارثة الكبيرة الا حضرتي كامل المناسبات تاعهم يقولو ياحفيظ ماتراطي والو هاذ الستوتة في اي لحظة دخل نيفها والا قلتيلهم اسمحولي راني مريضة مانجيش يقولو ياحفيظ شحال متحشمش و تلعبها جاها المرض غي في المناسبة تاعنا بصح لوكان جات العرضة في دار امها تروح ليهم تجري ولابغا جايتها الموت

كيف كيف كَنَتٍي العَزِيزَةْ كما ديري خاسرة في لافار

كَنَتٍي العَزِيزَةْ ديري عليا نعطيك راي شباب ونصيحة لوجه الله رجعيلهم وليدهم و تتهني الــgرعة من حك الراس اللي باغية تزوج ولا مخبوطة دير حسابها من دروك تزوج بواحد مقطوع من سجرة مايسقسو عليه وما عندو اهل هاكذا باش تتهناو من المشاكل

..هاذي المرة راني جيت مع الكنة

المرة الجاية وجدي روحك كَنَتٍي العَزِيزَةْ رايح نبهدلك

ان شاء الله يعجبكم الموضوع برك

اترككم في رعاية الله و حفظه

همس الوُرود · 5 أوت 2015