- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلام عليكم إخوتي وأخواتي
وأسعد الله كلّ أوقاتكم
ان شاء الله راكم لباس؟
المهم كيما وعدتكم من قبل اليوم جبتلكم أول عدد من سلسلتنا
ولي ما قدرش يلتحق بينا البارح ويعرف اساس هاد السلسلة يقدر يتعرف عليها من هنا
http://4algeria.com/forum/threads/430675/
وبما ان هاد السلسة محتواها رايح يطرح مشكلة اختفاء أخلاق المسلم وانتقالها لبلدان اجنبية بالرغم من أنو هاد الاخلاق ظهرت عندنا وولينا اليوم نشوفوها متربعة في بيئة غير بيئتها
وبما أن الإسلام و أخلاق المسلم هي محور سلسلتنا حبيت نفتتح السلسة بموضوع عنوانو
"ديننا الإسلام"
معناها قبل مانبداو نتكلمو على أخلاق المسلم خليونا نتحدثو على الإسلام أولا ومن بعد نشوفو آثار الإسلام على المسلم
وقبل مانبداو نقارنو في أخلاق مسلم بأخلاق كافر خليونا نقارنو انسان مسلم بمسلم
باه من بعد نقدرو نفتحو الابواب المغلقة الواحدة تلو الأخرى
ان شاء الله تبعو معايا ونفهمو بعضنا البعض ونتعلمو ولو القليل من هاد السلسة
http://img15.hostingpics.net/pics/7454690012.gif
بسم الله و على بركة الله
الإسلام
هاد الكلمة بمجرد ذكر حروفها حتى تنتظم نبضات قلوبنا, فمابالك بأخلاقنا وتصرفاتنا, هاد الكلمة لي جعلها فينا ربي سبحانو كالمسطرة , كل مايتعوج فينا جزء حتى يعدلو الإسلام
والإسلام يا خاوتي ماشي مجرد كلمة هوأركان, هو أوامر وهو نصائح
وإذا صدر منا خطأ أو اعوجاج هادا على خاطر رانا نخالفو هاد النصائح والأوامر ونتهاونو في اركان أو اسس الإسلام
وهنا رايحة نفتح مجال للمقارنة لي راهي دائما تلفت انتباهي
(وهي المقارنة بيننا نحن المسلمون لي فتحنا عينينا على الإسلام وآبائنا وجدودنا مسلمين وبين الأجانب لي اعتنقو الإسلام من فترة قصيرة وكانو عايشين بعيدا عن البيئة المسلمة )
مالا تبعوني خطوة بخطوة
أولا
جدّدوا إيمانكم بــ اشهد أن لا إله إلا الله واشهد أن محمد رسول الله
هادي الشهادة لي بمجرد ماتنطق كلماتها يصبح لقبك مسلم بصح واش كاين من وراها؟
الصلاة
لما نسمعو كلمة صلاة نعرفو انها تاني ركن من اركان الإسلام , وهي الصلة بيننا وبين ربي سبحانو, لما تشتاق في الدنيا لشخص وتهز هاداك الهاتف وتتكلم بيه معاه وتحس بهاديك الراحة, نفس الشي بالنسبة للصلاة, الله عز وجل راهو بنفسو يجي يقابلك عند كل صلاة ويسمعلك , فماذا قدمنا للصلاة ؟
صلاة الفجر لي راهي كل يوم تبكي علينا , وحنا لا خبر , لما تجمعنا السهرات نسهرو حتى للصباح , لما نكونو في النت نسهرو حتى الصباح بصح باه نصليو الفجر مانقدروش, بالرغم من أنو المؤذن ينادي الصّلاة خير من النوم وبالرغم من انو نعرفو بلي ركعات الفجر راهي خير من الدنيا وما فيها , واش يزيدنا ربي كتر من هكا تحفيز؟
مانحترموش مواعيد الصلاة على حق, نصليو الفجر مع الظهر والظهر مع العصر والعصر مع المغرب وهي رايحة
ونحتجو في الأخير بضيق الوقت, باه نتفرغو لمشاهدة مسلسل أو مباراة نورمال, بصح باه ناخدو 5 دقايق من وقتنا للصلاة مانقدروش ؟؟
حتى ولادنا نعلموهم من الصغر التكنولوجيات كالتعامل مع الحاسوب أو اللوحات الإلكترونية أو الهواتف الذكية " بحكم يخرج مثقف " بصح الصلاة نتهاونو عليها ونقولو راهو مازال صغير , اصلا الإسلام أكد على الصلاة للطفل وهو مازال صغير
لأنو عقلو الصغير راهو كي الاسفنجة يستقبل برك ولما يتعمر يولي يفرغ واش استقبل , ماخير نعلموه الصلاة ولا نعلموه الحوايج الفاسدة ؟
بصح لو نقلبو الكرة الارضية ونطرحو فكرة الصّلاة على اخوتنا المسلمين الأجانب لي هداهم ربي ودخلو الإسلام من مدة قصيرة وشوف واش تلقى
وباه مانطولش عليكم كمثال حي: وحدة من العائلة تزوج ولدها من امرأة المانية ودخلها للإسلام قبل الزواج ومن بعد جا للجزائر باه يقضي عطلة هو ومرتو ويعرفها على يماه, اتخيلو في كل صلاة فجر كل الدار راقدين غير هي لي تنوض تتوضا وتدور عليهم بالواحد وتقولهم راهو وقت صلاة الفجر و[/COLOR]" الصلاة خير من النوم "
شيء عجب والله
الصوم
هاد الكلمة لي يقترن بيها اسم اعز الشهور على قلوبنا " شهر رمضان الكريم " بعد علينا فيه ربي سبحانو الشياطين غير باه يخلي ضميرنا وقلبنا صافي, بصح حدث ولا حرج حتى ولينا نشكو انو الناس نفسهم شياطين -والعياذ بالله- بحكم واش راهم يديرو في هاد الشهر الفضيل, وإلا تلقاهم وكأنهم في سبات يرقدو نهار كامل وينوضو غير ياكلو , واصلا غير يبقاو راقدين خاطر لما ينوضو يخرجو غشهم كامل في الناس وبكلامهم الفاسد وبلسانهم الماضي كلي راهم يصومو مزية استغفر الله , قولولي هنا وين راهي العبادة؟ وين راهو الصوم؟
لو نروحو للمسلمين الأجانب ,مرة شفت حصة يتكلم فيها واحد أجنبي على الصوم تعرفو واش قالهم؟
قالهم: اجمل ركن هو الصوم , لأنو حسيت فيه بالراحة ولقيت وقت كبير لأني استغللت وقت الغدا وزدتو في وقت العمل وحسيت روحي ماشاء الله احسن من وأنا فاطر "
يحمد في ربي على الصيام و هنا تلقاهم يكفرو على ربي لما يكونو صايمين, استغفر الله العظيم
الزكاة
و الحج
هاد الكلمتين لي لما نذكروهم نتفكرو الناس لي اكرمهم ربي بالأموال ما شاء الله, بالنسبة للزكاة ربي راهو رزقك وانعم عليك عكس باقي الناس لي راهي تتتشهى قطعة خبز , وبالزكاة رايح تفرح قلب يتيم و فقير و أرملة و مطلقة و رب اسرة تقفلت عليه البيبان, كيفاه تجيك فرصة باه تدخل الفرحة على قلب انسان كيفك وتستغنى عليها ؟؟ وإلا الظاهرة الجديدة لي رانا نشوفو فيها يزكي بالعينين, يعني كلي يفتخر بزوج دورو لي راهو يقدم فيهم وهوما راهم رزق من الله وقادر يقطعهم عليك في اي لحظة , وبالنسبة للحج نفس الشي تلقى ناس عطاهم ربي المال والبنون وأمنو حياتهم وحياة ولادهم وكي يخلصو عليهم كامل الافكار يقولك نبدا نحوس ونزور العالم, ابدا بزيارة هاداك المكان الطاهر اولا ومن بعد روح وين حبيت باه يزيد ربي يكرمك ويرزقك اكتر , بصح حنا دايما نخليو حتى نكبارو ونعجزو ونوليو نمشيو بالكرسي المتحرك باه نزورو بيت ربي, علاه ؟؟ حتى يولي نصنا يموت بلا ما يكمل هاد الفريضة, علاه مانديروهاش وحنا بكامل قوتنا ؟
تلقى شاب اجنبي اول ما يدخل في الإسلام يزور مكة المكرمة ويعتبرها اول مكان يبدا بيه حياتو, بصح حنا نديروه مكان نخلصو بيه حياتنا وكأنو مقبرة
ساعات والله نفرح لما نشوف زوج وزوجة أول ما يتزوجو يبداو حياتهم بزيارة لبيت الله, ما شاء الله والله حتى نغير ولا لازم نروح لتركيا وإلا فرنسا باه نبان بلي زواجي سعيد؟
ربي يهدينا ويرزقنا ويرزقكم زيارة هاداك المكان الطاهر ان شاء الله
القرآن
كلام الله و كتاب الله وأكبر معجزة جا بيها الرسول صلى الله عليه وسلّم , لكن حنا للأسف نهجروه ونفضلو نقراو روايات او قصص أو اشعار ومانخطفوش ولو زوج صفحات من كتاب ربي سبحانو
تلقى كامل ديارنا فيهم اكتر من زوج وثلاث مصاحف بصح مدايرينهم زينة برك, حتى دارت عليهم الغبرة وسكنت فوقهم العنكبوت
ساعات والله نحشم من نفسي لما نشوف اجنبية مسلمة تتعب وهي تقرا في كل حرف من حروف القرآن بحكم أنو العربية ماشي لغتها, تتعذب وماتحبسش القراءة وحنا كل شي ساهل ونتهاونو
الحجاب
اذا قلنا الحجاب نقولو السترة وإذا قلنا السترة نقولو المرأة واذا قلنا المرأة نقولو نصف المجتمع واساس كل بيت , لوكان جينا نزرعو في بناتنا حب الحجاب من الصغر ما يخرجوش عن السيطرة تاعنا لما يكبرو,
نعلمو بناتنا التبرج من الصغر باللبس القصير ونحتجو بكلمة " خلي تعيش حياتها وكي تتزوج تتحجب"
حتى الحجاب نفسو وولا موضة وتقليد برك بدل من أنو يكون فرض وأمر من ربي سبحانو
مرة شفت رد امرأة أجنبية دخلت الإسلام وجعني صح, قالتلهم "لما كنت جاية للبلدان العربية كنت فرحانة خاطر رايحة نلقى مكان وين نلقى فيه
المتحجبات ونقدر نمارس الدين الاسلامي بصح لما وصلت استغربت لقيت البنات بدون حجاب ولباسهم قصير
وماشي اللباس لي كنت نتوقعو" درك ماشي هادا كلام يوجع القلب ؟
خاوتي حنا الإسلام نعتبروه مجرد كلمة تتكون من مجموعة من الحروف الهجائية , ماعرفناش قيمتو كهداية كأخلاق كطريق مستقيم
نفتاخرو بنفسنا انو رانا مسلمين بصح نتهاونو في اهم الاساسيات وعلى هادي نلقاو الأجانب لما يدخل في الإسلام النور على وجوهم
, تلقى اسرة دخلت في الإسلام إلا والزوج ملتحي والزوجة والبنات بحجاب شرعي
ولو تقرب لواحد فيهم وتسألو على الإسلام تلقى دموعو تنزل على خدو وهو يبكي ويقولك "درك وين عرفت معنى الحياة "
خاوتي الإسلام دين يسر المهم تحافظ على الصلاة و تصوم بقلبك وروحك قبل لسانك وبطنك, تزكي وتعطي من مال ربي لي رزقك, ماتحرمش روحك من زيارة مكان طاهر كيما مكة المكرمة فربما تموت وتروح روحك مشتاقة لزيارة بيت الله , ماتنساش تعطر لسانك بكلام الله وتستر بناتك وزوجتك واختك بلباس المرأة المسلمة وزيد
الصّدقة
التّسبيح
قرآءة الأذكار
قبل مانحتجو على الأخلاق لي غابت علينا لازم نبداو بالإساس لي راهو ماش مبني على الصح, لما نمشيو على واش قال الإسلام رايحة تترتب حياتنا تلقائيا وكل شي سيء كنا نديروه رايح يغيب مع مرور الوقت ويتصلح
وربما نصفكم يقول كاين من المسلمين لي ما شاء الله و كنت قادرة نقارن بيهم بدل الأجانب, صح كاين من المسلمين لي راهم قدوة ما شاء الله لكن الفرق انو حنا من لي نفتحو عينينا وحنا نمشيو على اخلاق وتربية الإسلام بصح هوما بين يوم وليلة يبدل دارو وأكلو ودينو وعايلتو ولبستو وهدرتو وعبادتو ويغير حياتو كاملة ومن بعد يسبقنا خطوة؟
هنا يُطرح السؤال
هل يعتبر الإسلام بالنسبة لنا مجرد كلمة فقط اساسها نطق الشهادة؟
إذا كانت الإجابة نعم فماهو الحل لتغيير هذه النظرة وزرع اسمى معاني الإسلام في قلوبنا؟
وإذا كانت الإجابة لا, فما السبب في تهاوننا في تأدية فروض الإسلام؟
ما هو الفرق بيننا نحن من فتحنا اعيننا على الإسلام وبين من مر يوم على اسلامه من ناحية تأدية الفروض والواجبات التي امر بها الإسلام ؟
مانكترش عليكم الاسئلة ونترك المجال مفتوح للنقاش والتعبير
اسمحولي الموضوع كان طويل لأنو حاولت نجمع فيه كل شي ,
المرة الجاية رايحة تكون المواضيع مقبولة الحجم
اسمحولي اذا كان اي خطأ في الموضوع من ناحية التنسيق أو الصياغة أو التعبير
اسمحولي اذا كان اي خطأ في حق المسلم أو الإسلام
كل انسان يغلط وغير ربي لي كامل ورانا هنا باه نتعلمو ونقضيو على هاد الأخطاء
اي رأي منكم نتقبلو سواءا بالإيجاب أو السلب
نتمنى يعجبكم الموضوع ونطلب التوفيق من الله تعالى
بتشجيعكم تعاونوني فلا تبخلوا علي بآرائكم
ملاحظة أي كلمة تذكر خلال هذه السلسلة ليست للتعميم , فدائما هناك نصف كأس مملوء ونصف كأس فارغ, وكل كلمة موجودة في الموضوع هي لإحياء أخلاق الإسلام الميتة بداخلنا فقط وليست لمعاتبة أي أحد
تحياتي للجميع
تحياتي للجميع
آخر تعديل بواسطة المشرف:
ربما لأنو طويل قلقو منو هههه, بصح لا استسلام :sport02: المرة الجاية نجيبلكم موضوع مليح :up:
