أسعد الله أوقاتكم بكل خير
نتمنى تكونو بألف صحة وعافية
عندنا وحد القاطو دموندي بزاف من زمان ماما ديرو فالأعياد
اسمو "قاطو المحقن" مهما نديرو كمية كبيرة تخلص ليه ليه
التسمية نسبة للمول اللي نشكلوه بيه :d
لحد اليوم نديروه فالأعياد ، البقلاوة والمقرود وقاطوات تع اللوز والشوكولا حتى واحد ما يتوشيهم
مي هدا صحن رايح وصحن جاي :bravo01:
والسر أنو خفيف ومش حلو بزاف ، مهما تاكل 10 حبات ما يدورش عليك قلبك :thumb_up02:
مع الحليب أو القهوة اممممممممممم ولا أحلى :yahoo01:
والمرة هادي سخف عليه اخي ، قالي ديرينا كونتيتي لباس بيها حاب نشبع منو ههههههه
وكيما كل مرة درت كمية كبيرة ولكنها خلاصت في يومين هههههههههه :p
علابالي هدرت بزااااف دوكا نروحو للرسمي
:thumb_up02:
بالنسبة للمقادير:
6 بيض
2 كيسان زيت
2 كيسان سكر ناعم
نص كاس نشاء (باش يجي خفيف)
3 خميرة كيميائية
فاني
كيلو فرينة (أنا نستعمل لابال أو سيم تاني مليحة)
ونحب نخدم فالقصعة تع العود :thumb_up02:
نحط البيض تاعي ونخدمو باليد حتى يتجانس
نضيفلو الزيت ونبقى نخلط بيدي
ثم السكر الناعم ونستمر في الخلط
ثم الفاني والخميرة والنشاء
وأخيرا الفرينة بالشوية طبعا نغربلها ونلم العجينة نتحصل على هاد الشكل
نغطيها ببلاستيك
ونشعل الفرن تاعي 180° ونجيب البلاتو نفرش فيه ورق الطهي ونبدا فالتشكيل بهاد المحقن
نحط العجينة فيه ونغطس اصبعي في الزيت وندفع باش تخرج من الجهة الأخرى
نحكم الحبة ونحاول نروليها باش تعطيني شكل جميل
ندخلها للفرن
وهنا بعد ما طابت :d
شف لونها شحال باهي وطعمها اممممممممم مع الحليب لذة لذة :yahoo01:
راني رايحة نزيد كونتيني اخرى لأن اخي قالي ما شبعتوش :-o هههههههههه
نتمنى تجربوها وتدعولي :bravo01:
في أمان الله
