كرهت حياتي

[مشكلتي]

قريت التعليقات نقرا فيها ونبكي والله ربي يسمحلي تجرات وهزيت يدي على امي وعليت صوتي عليها


طلبت منها السماح وقاتلي راني مسامحاتك بصح انا والله منسامح روحي يارب اغفرلي والله ندمت على الساعة لي هزيت فيها يدي على ماما والله منزيد نعاود انشاء الله


كيفاه تجرات وهزيت يدي عليها ربي يطوللها في عمرها باش نخدمها حتان نهار نموت


والله منسامح روحي ):

هدرت مهاها وقلتلها اسمحيلي وسلمت عليها قاتلي راكي مسامحة فالدنيا وفي الاخرة وقاتلي ربي يرضى عليك


انصحوني واش ندير باه يرضى عليا ربي

 

[السلطانة]

رد: كرهت حياتي

الحمد لله عزيزتي
اول خطوة انك طلبتي منها السماح وهاذي حاجة مليحة بزاف
ادعي اعملي دعاء بعد كل صلاة من الله سبحانه وتعالى أنو يغفرلك

ان شاءالله وساوس الشيطان وتفوت
المهم ترضي الوالدة تاعك منا وجاي
وتحافظي عليها وعلى الوالد تاعك
ربي يحفظهملك
ويحفظك ليهم

 

[iman-dz4ever]

رد: كرهت حياتي

الحمد لله ختي كي رجعتي لعقلك و ربي هداك
وشفتي شحال الام حنونة و متلقايش كيفها في الدنيا كااااااااااااااااااااامل
اي واحد ف دنيا تديري فيه حاجة مش مليحة بلاك ما يسمحلكش حتى لوكان جا باباك
بصح الام عمرها لا تقدر باش ماتسمحش لولادها مهما دارو فيها
هي الانسانة الي تفرقت عظامها باش تخرجي لدنيا و تغذيك من صلبها و تحميك حتى من نفسك
ربي يقدرك باش تردي خير امك و تبري بيها و تطيعيها باه في يوم من الايام تكوني ام واولادك يعاملوك بالمثل
ربي يصلح ما بينكما و يهديك و يخليلك امك تاج راسك
و يخليلنا امهاتنا امييييييييييييييييييييييييين

 

[لؤلؤة قسنطينة]

رد: كرهت حياتي

السلام عليكم
يا اختي صدقيني بكيتيني، خاطر كنت متأكدة من هاد النتيجة
وكنت متأكدة 1000 بالمئة بلي كن تقربي ليماك وتطلبي منها السماح رايحة تفتحلك قلبها
لأنو والله ماتلقاي احن من قلب الأم عليك، راهي تنحي من فمها وتمد لولادها
كن قلتيلي ضربت ختي ولا صاحبتي بالاك بصح الام راهي منبع الحنان والرحمة،
على كل حال ننساو الحكاية لي فاتت والحمد لله عدات سلامات وتراجعتي على افعالك
درك حبيبتي شوفي معايا اذا يماك ضربتيها وسبيتيها وكي طلبتي السماح سامحتك
فمابالك بالله عز وجل لي أرحم بيك من يماك ، ونتي راكي تبتي من افعالك والله سبحانه وتعالى
يحب التوابين، يعني مادام تراجعتي على افعالك وبكيتي ندم معناها ربي راهو يحبك
كن ماجاش يحبك مايعطيكش فرصة تتراجعي فيها على اخطائك، بصح مادام الله تعالى
عطاك فرصة لازم تبرهني بلي راكي صح تبتي نهائيا،
أولاً اتقربي من ربي سبحانو اكثر وأكثر، مثلا صلي صلاتك في وقتها وخاصة صلاة الفجر،
اقراي القرآن ولو صفحة كل يوم، ماتنسايش الأذكار ياخذو منك 10 دقائق على الاكثر
بصح يخليوك هادئة ومايخليوش الشيطان يتحكم في تصرفاتك خاطر راكي محصنة بكلام الله،
بالإضافة لرضاية الوالدين، افتحي صفحة جديدة وانساي واش صرا، وخلي يماك تكون صديقتك
وحبيبتك ويماك وكلشي، جنتك راهي قدامك ماتضيعيهاش اوكي؟
على كل حال نقولك اختي مرحبا بيك في عالم السعادة ^^
كيما قالها خويا حكيم في ردو السابق وقالك تحسي بالتعاسة خاطر تحرمتي من السعادة
وهي رضى الوالدين،لأنو قبلة على راس يماك كل صباح وكلماتها ودعواتها الحنونة
راهي سعادة يتمناها كل محروم ، مالا اغتانمي الفرصة وعيشي السعادة
مالا درك اتوكلي على ربي وابداي مهمتك الجديدة
وهي رضى الله والوالدين
وربي يهنيك ان شاء الله ويدوم المحبة بينك وبين اعز انسانة في الوجود
وربي يوفقك وينجحك في الباكالوريا وينجحك في كل امور حياتك
تحياتي
​

 

[Hakan]

رد: كرهت حياتي

الحمد لله على كل حال اولا كيما نعرفو
رضى الله في رضى الوالدين واكيد في الحوايج اللي يرضى عليهم ربي سبحانو
معليه اختي انت درتي اول خطوة
والآن بما انك استغفرت مولاك وطلبتي السماح ربي سبحانو رايح يغفرلك كل شيء خدمتيه واحسني الظن بربك
ربي يوفقك اختي رضى الله هو انك تخالفي واش كنتي ديريه من سوء مع والديك وترجعيه خير برك
وانك صح تتغيري بالتوفيق ..​

 

[zohor kfz]

رد: كرهت حياتي

el7Amdo lillah rabi wafa9ki w radat 3liki lamima
doka lazmki t3awdiha 3la lifat w t7Awli elmosta7il tkon elfatat elbarra
w nchallah rabi ywafa9ki lali y7ob

 

[ام أمينة]

رد: كرهت حياتي

الحمد لله لي سامحاتك يماك
بالتوفيق
​

 

[GI Joe]

رد: كرهت حياتي

essemhili w essemhouli kamel
j espere tkouni menek bssah nadma l hadra sahla lazem tssatissfi rabi w mamak mich nass li ycomentiw

ana mafhamtech la tellment ki dhrabtiha krahti hyatek wala tellement karha hyatek dhrabtiha
2eme waa3ra w nchllh matet3awedch

 

[نعمات]

رد: كرهت حياتي

السلام



اخواتي طاعة الولدين واجب علينا وعليك ان تصلحي ما صنعتي قبل فوات الأوان الحمد الله امك سمحتك و رضت عنك و قالت الله يرضى عليك
اختي اخواتي إلتمسوا قدمي أمك تنالون الجنة
وما أصعب فراق الولدين
انا فقدت امي مند شهور و كانت موتها صعقة لي بكيت في مرضها وطلبت من الله ان يرحمها و يخفف عنها المها و ان يعطيني الصبر عليها لأني كنت أعلم أن أمي ستموت و كنت دائما أجلس أمام رأسها و ساعات أمام قدميها ولكن لم أستطيع فعل أي شيئ لها سوى أن أدعوا الله علي صبر فرقها و ان ينزل علينا السكينة نعم وبعد مدة توفيت أمي و شعرت ان الدنيا اسودتى في وجه و أني فقدت الجنة نعم أختي نعم الأمى هي الجنة إجلس امام قدميها وسوف تستشقي رائحة الجنة
قال صل الله عليه وسلم
إلتزمي قدميها تنالين الجنة

 

[نقاء الورد]

رد: كرهت حياتي

حمد لله ربي يرضى عليك اختي
انتي عرفتي غلطتك وندمانة ربي يصلح لك رايك ويهديك للصواب ويخليلك والديك ♥
​

 

[دعاء الجنات]

رد: كرهت حياتي

درتي غلطة كبيرة بزاف وابشع غلطة في العمر كامل لأنك في موضوعك الأول ماحشمتيش وقلتيها بكل بساطة راني ظربت ماما والله استحيت وانا نقرا فيها كيفاه ماستحيتيش وانت تكتبيها
باه ترضى عليك يماك ماشي تطلبي السماح وتبوسيها وتقولي صايي :لالا لازم ترضيها تاع الصح وتخدميها وتطيعيها وتبيني ليها بلي صح غلطتي في حقها وتصلي وادعي ربي يغفرلك ويطول لك في عمرها ويسعدها ؛ في الدنيا والآخرة
ربي يغفر لك اختي ويفرج عليك

 

[مريم.]

رد: كرهت حياتي

مدام ندمتي معناه ضميرك حي والحمدلله كي اسرعتي وطلبتي سماح لان الموت معرفناهش وقتاش يجي لحمد لله الحمد لله دروك كل يوم قبلي يديها حاوليي تحسييها انك ندمانة ربي يوفقك في حياتك ​

 

[youcef.as.dz]

رد: كرهت حياتي

اذا رضات عليك امك بشراك بالرضا من الرحمان