صاحبك سااااااااااااااااامط

[قرصان الساحل]

تحية اليكم جميعا اما بعد ...
انها السخانة يااااو ننصحكم بالتزام بيوتكم ولا الظل اي مهبولة هادي القارة قادر تصرعك ضربة شمس حلوفة ونحصلو فيك يا الحبيب .. خاوتنا لي راهم خدامين تحت اشعة الشمس ربي يكون معاهم وتحية ليهم والله يستاهلو
اليوم والله حبيت نحكي على واحد الاصناف من الصحاب علخاطر رانا عايشين معاهم وكل يوم نكتاشفو نوع يحير كثر من لي قبلو لكن بطبيعة كل واحد بلاك الحشمة ولا القدر ولا المهم لسبب ما نجموش .. اليوم حبيت نوريلك كيفاه تعرف بلي صاحبك صااااااااااااااااااامممممممممممممممممممممط

النوع الاول
صاحبك اللي مداير سياسة تقشف هو عندو دراهم لباس عليهم مي يحب جيبك مش يحب جيبك يعشقووو يموت فيه ... يعيطلك في كل وقت يقلك وش راك وفي الصح راه يقول وش راه جيبك اني توحشتو ... عندهم مقدمات ديما يبدا يشكي ويبكي .. والله راح نزوج وطومبيل خسرت راحلها جوان كيلاص وحاوزوني من الخدمة ومش نرقد في الليل ..........................................بعد ساعة ........ تقول انت وش خاص صاحبي .. يبدا يقلك والله حشمان منك محتاج برك 5 ملاين كاش شهر ونرجعهملك
انت كي النية تروح تمدلو دراهمك من بعد شهر تعيط .. ان جهاز مراسكلم مغلق او خارج مجال التغطية .. تحوس عليه تلقاه يختفي وادا شافك يبدل طريق ولا يقلك من بعد نعيطلك
نعم انه السامط من نوع بلباصووور المتقشف ساااااااااااااااااامممممط

النوع التاني
صاحبك هدا اقل من النوع الاول عادة وجهو صحيح تحساب مسلفو هذا تلقاه ديما ضرسة العقل تبان لا حشمة لا والو تحساب عاش حياتو كامل مع الحمار الوحشي ... هذا يلقاك تضغ في شوينغوم يقلك هات تقلو والله ما عندي يقلك نورمال من فمك اخخخخخخخ ... تتكيف هات قارو ... تتقهوى هات كوبا ... ماشي رايح يروح معاك ... رايح تتغدى يروح معاك للدار
هذا النوع يمتاز بقوة تحمل خارقة تصل الى الاف الملايين على تحمل الرخس .. كي تقلو يا ودي انت كلب وما تحشمش وفيك وفيك تلقاه يضحك ويقلك هات شوي برك وجهك صحيح
نعم انه السامط من نوع ... النجم صاحب سبونج بوووووووووب اللي اسمو بسيط

النوع الثالث
صاحبك اللي بالكوستيم هنا نفتح قوس هادو لي يضربو الكوستيم يا ودي راهي مش جاية عليكم الكوستيم جات على زوج من الناس كاين كريستيانو وكاين جورج كلوني .. انت راهي جاتك كيما رئيس الموزمبيق ما عرفناك لا رايح لا جاي .... المهم صاحبك هدا طايح خشين ويعرف قوانين اللباقة لكن هو تاني متقشف .. تروحو تتغداو كيف كيف كي تلحقو تخلصو يا يروح يغسل يديه ولا يلعبها الكرسي حصل ولا يدخل يدي في جيبو وكي يجي خرجها ما تحبش ... تشوف معاه انت وهداك لي راح يخلص عليكم ويدو مزالها في الجيب تحساب راه ينقب على البترول كي تخلص انت وتكمل ... اووووووووو واخيرا خرجت يدو بيضاءا سالمة ... ويقول جملتو المشهورة يا صاحبي خلي برك علاه عليك
طب طب صديقي قضي الامر الذي فيه تستفتيان
صاحبك سامط من نووووووووع ... مول الكوستيم مي ماشي كيما جورج كلوني

النوع الرابع
جاي سامط من عند ربي ما يعرف يضحك ما يعرف يضحكك ... يعرف يحكي غير في الرسميات ويموت على الجرانن والاخبار .. كون تحكيلو حاجة تضحك يعتبرها تفاهات خونا سيريو يقطع مي المشكل يعيطلك وكون تضحك ولا يشوف فيك شوفة سماطة ومبعدا انت تحساب روحك قتلت روح ... هدا النوع عادة تكبر معاهم بالخف لأن الوقت معاهم ما يفوتش تريح معاه من 8:00 تقول ايه جبنا النهار تشوف لساعة تحكمك كريزكارديال نعم يا سادة انها 8:03 ... ربي يكون معاك
صاحبك سااااااااااااااااامط يرهج من نوع شفيق

النوع الخامس
جماعة لي يقراو عندكم صاحبكم هداك لي يدير نواظر ويمشط شعرو من جيهة يبان ناس ملاح ومجتهد كي نشوفهم اعععععععععععععع نحب نتقيا قاتلتهم المثالية يمشو غير مع لي يقراو كيفهم وما يحلبوش ناس لخرين .. شوف قولو كلش وما تقولوش وريلي ولا هات ندير عليك فوطو كوبي قادر تقتلو بهاد الكلمة .. ونهار يافيشيو وتدي خير منو يرمقك بنظرات القتيل الى قاتله ... ادعو اليونيسكو لقتل هاد النوع من البشر يعيوووووووووووووووووووووووووووووووني
صاحبك سامط من نوع .. عييت كي تفكرتهم وما نديرلو حتى فوطو علخاطر قلبو مش مليح

.
.
.
.

-----------------------------------------------------------------

عارف كامل مريتو على هاد الانواع وتعايشو معاهم يوميا ايا مش عارف نوع لي يعييكم اكثر قولونا عليه واللي عندو انواع اخرى يذكرها ... وصحيتو سكان افريقيا .. صدقوني انكم محظوظون جدا في قارتكم ههه
تحيــــــــــــــــــــــــــــــــــــــــــــــاتي



​

 

[السلطانة]

رد: صاحبك سااااااااااااااااامط

بون بالنسبة للمخلوقات لي تحكي عليها

النوع الاول بولباصور اكيد معاه انسى دراهمك :down:


النوع الثاني بسيط الدب هههههههههههههههههههههه
تبا قتلتني ضحك
صح هاذا يسلف وفرحان
ويزيد ينهبك من فوق ولاعلابالو
النوع الثالث هههه جورج كلوني لمدرح
هاذا صياد الفرص يضرب فيها عشا ولاغذا على ظهرك ولاعمرو راح يخلص هو قرنيط دوريجين
النوع الرابع لايُمل هههههههههههههه يرهجك بالصماطة وكي تشوفو غير اهرب
فكرتني في وحد المخلوقة كانت تقرا معايا النواظر وشعرها مظفور وتقعد في لوم في قدام لي بروف ههههههههههه تخاف متسمعش كاش كلمة ول
عمرها راطات كور ولاتيدي ومتمد حتى شي


هاذ الانواع كامل تعيي الهربة منهم خير وخير

يعطيك الصحة موضوع top
​

 

[la brunette]

رد: صاحبك سااااااااااااااااامط

السّلام عليْكمْ

هههههههههه أآآنت وحدكْ ايّها الافْريقي
عجْبتني كي راآآك تتفرّج فسيونجْ بوووبْ سكويرْ بانس خخخخخ
واللهْ هادو كاملْ يعيو وووو وخاآآصة الفئة المنتمية لرقمْ
4 و5 آخخخخخ تنفحْلي نعطيهمْ بالبلوكة للرآآس خخخ
كشْما نتفكر صامطينْ هاني نولّي عمو هشهشْ
موضوعْ توووب كالعادة
يعطيكْ اآآلصحّة
​

 

[hadil2044]

رد: صاحبك سااااااااااااااااامط

هههههههه
يعطيك الصحة هشام على الموضوع هههههه قتلتني بالضحك

ياودي السخانة عاملة فينا ربي يصبرنا

اما في ما يخص الانواع جيهتي تلقى ياسر نوع بسيط هههههه تحكمك لاكريز منهم

صحيت على الموضوع واصل
​

 

[أميرة ميرال]

رد: صاحبك سااااااااااااااااامط

ههههههه ضحكتني يا خو والله صح هذو هوما أنواع الأصدقاء وتلقى عندك واحد برك كيما يحب خاطرك والباقي الكل من الكاليتي لي هدرت عليها وأنا نكره صحاب الكوستيم خخخ تلقاها حطة وحالة من بعد كي يوصل وقت تخلص زعماك تدخل يدها للصاك وتحوس على البورطموني وزعماك زعماك ما لقاتوش مازالها تحوس عليها تحس دخلت يدها لبالوعة ماشي لصاك هذا صاك تبحر فيه البورطموني ؟؟؟ ههه ولا نكره الخباشين قصدي الجماعة صحاب النويظرات لي ما يخزروش فيك وكل من يشوفوه يضحك يحسبوه جايح وما يعرفش يقرا ههه وما يحبوش يمدولنا نعملو فوطوكوبي يخافو نطلعو صاروخ وهوما يتخلفو وكيما قلت إذا في لامتحانات لقاو لانوط تاعك خير يخزرو فيك خزرة تبات محموم بالسخانة طالعة سقف ههه هذو هوما الأنواع لي ما نحبهمش والجماعة تاع الوجه الصحيح راه وجهي صحيح كثر منهم ننشعهم نزلفهم ما يدوروش بيا gاع
​

 

[أميرة ميرال]

رد: صاحبك سااااااااااااااااامط

ونسيت ما قلتش تانيـك بلي جماعة شفيق ما نخدمهاش هذو تلقاهم كونستيبي يسمطولك القعدة ولوكان كاش نهار يقولو نكتة ما تفيقش بلي نكتة على خاطر تجي مدرحة كي المود تاعهم هههه
​

 

[ليليا مرام]

رد: صاحبك سااااااااااااااااامط

السلام عليكم
تبا ما هذا آم بي سي 3 او راني فاللمة وفقسم واش راك تهدر نعم انه قسم واش راك تهدر
خونا هشام واش نقولك دخلة قوية منك مع الرسوم
والله كل اللي قلتو صح كاين صحاب وكاين مي لما يكون عندنا صاحب صح حنا نضيعوه الواحد ما يرميش اللوم عليهم برك حنا ثاني وقت يكون الصاحب الحقاني ندوها فيه بذنوب لخرين بمعنى هشام لما تكون صحبتي تبغي مصلحتي وعلاه نقول راهي تنصحني تغير مني لما تحتاجني وعلاه نقول غير نتاع صوالحها وعلاه نحلف ما عنديش وانا عندي وممكن هي فامس الحاجة ليا وعلاه لما تعيطلي نقولها اسمحيلي مديرونجيا وعلاه هي تسقسي وانا حتى مساج ما نخسروش عليها الصحوبية راجل او مرا تكون من الطرفين
اما هذوك الانواع كاين ويكونو مي الواحد راه يتعلم فالدنيا مي ما يحكمش على الناس الكل
عندي صحابات صح وصحابات دارولي ضربات صحاباات نتاع مصالح وصاحبات لوقت الشدة ونخاف انا تفسرت عقليتي مصلحة او ما نسقسيش على هذا تعلمت انو الظروف صح تصنع العباد
شكرا

 

[قرصان الساحل]

رد: صاحبك سااااااااااااااااامط

ههه سخانة تطيب الماييز وتخليه يصير فوشار اضرب الفوشار وقول البلاد ما فيهاش وسخون الحال
على فكرة واش تسموه انتوما عندو بزاف اسماء في دزاير كاين لي يقلو البشنة ولا الماييز ولا الذرى ولا الزبلول ولا ........
بون بالنسبة للمخلوقات لي تحكي عليها

النوع الاول بولباصور اكيد معاه انسى دراهمك :down:
ايه انسى والله علخاطر هاد نوع جربتو تاع صح ما يحشموش نهار يجي يبكيلك تقول نمدلو سروال لي راني لابسو غير يقضي صلاحو ذهب ولا يعد ...

النوع الثاني بسيط الدب هههههههههههههههههههههه
تبا قتلتني ضحك
صح هاذا يسلف وفرحان
ويزيد ينهبك من فوق ولاعلابالو ههه ايه هادو يضحكو عادي مي هادو جماعة البروفوطاج تسمى يحبو حاجة خفيفة قيس ما يمشي نهار ماشي كيما نوع لول
النوع الثالث هههه جورج كلوني لمدرح
هاذا صياد الفرص يضرب فيها عشا ولاغذا على ظهرك ولاعمرو راح يخلص هو قرنيط دوريجين
ههه وي يحشو للناس بالمظاهر وكيما قلت الكوستيم ما تجيش عليه خلاص هو برك يحب يطيح مدير
النوع الرابع لايُمل هههههههههههههه يرهجك بالصماطة وكي تشوفو غير اهرب
ايه النوع الرابع نوع عيوفي بزاااااااااااااااف تقعد معاه يزيدك 10 سنين من عمرك وتزيد تكره حياتك
فكرتني في وحد المخلوقة كانت تقرا معايا النواظر وشعرها مظفور وتقعد في لوم في قدام لي بروف ههههههههههه تخاف متسمعش كاش كلمة ول
عمرها راطات كور ولاتيدي ومتمد حتى شي
ههه تحساب راح تصنع النووي مرات نحسهم ما عندهم حتى معنى في الوجود سامطين يرهجو وحتى في لافيشاج تلقاهم مكان مكان غير البروف يرخف يدو عليهم كي يكون يصحح المهم يشبه برك يقلك او فاهم كي شغل يحاسبهم على النية ههه


هاذ الانواع كامل تعيي الهربة منهم خير وخير وين الهربة وين انهم كالفطريات منتشرون في كل مكان

يعطيك الصحة موضوع top الله يسلمك ختي ربي يحفظك
​

مشكورة على اعتماد الموضوع وختم التميز والله حشمتوني مع اني نكتب ببساطة كبيرة
شكرا ليك ام ياسمين على حضورك وتشجيعك الدائم ربي يهنيك ويعطيك وش تتمناي
تحيـــــــــــاتي
​

 

[قرصان الساحل]

رد: صاحبك سااااااااااااااااامط

السّلام عليْكمْ
وعليكم السلام مرحبا بيك السمرا ختي
هههههههههه أآآنت وحدكْ ايّها الافْريقي
وي الافريقي ديما وحدو -_- علاه تستناي تاع اوربا يكونو بجنبي ههه
عجْبتني كي راآآك تتفرّج فسيونجْ بوووبْ سكويرْ بانس خخخخخ
ههه نتفرج كلش والله في جيل الرسوم الحالي منتفرجش غير سبونج بوب كانت تجي واحد الوقت في رمضان تلقايني مع بنت ختي صغيرة نشوف وخاشع ونضحك لي يشوفني يقول اواه سيد كاش ما صرالو هه
واللهْ هادو كاملْ يعيو وووو وخاآآصة الفئة المنتمية لرقمْ
4 و5 آخخخخخ تنفحْلي نعطيهمْ بالبلوكة للرآآس خخخ
اهم ليك السمرا ختي ببلوك حتى تجيبي مخو في الحيط
كشْما نتفكر صامطينْ هاني نولّي عمو هشهشْ
ههه واش لصقتو فينا هادي هشهش زهرة هي سبابي
وي تفكري ولي عندك ما تجيش
موضوعْ توووب كالعادة
يعطيكْ اآآلصحّة
الله يسلمك ختى حتى انت والله متألقة
​

مشكورة ختي السمرا على تفاعلك الجميل مع موضوعي .. بحق كنت مميزة
موفقة اختي
تحياتي
​

 

[قرصان الساحل]

رد: صاحبك سااااااااااااااااامط

هههههههه
يعطيك الصحة هشام على الموضوع هههههه قتلتني بالضحك
الله يسلمك ختي هديل .. ههه سلامتك ختي بلاك تموتي من الضحك
ياودي السخانة عاملة فينا ربي يصبرنا
نعم انها افريقيا في فصل الصيف حتى الجمل راه يرعف
اما في ما يخص الانواع جيهتي تلقى ياسر نوع بسيط هههههه تحكمك لاكريز منهم
بسيط تاع البروفوطاج وي دمهم بارد ما عندهمش مشكل في الحياة

صحيت على الموضوع واصل
​

يعطيك الصحة على الرد ختي هديل ... نورتي الموضوع
دمتي وفيــــــــــــــــــــــــة
​

 

[قرصان الساحل]

رد: صاحبك سااااااااااااااااامط

ههههههه ضحكتني يا خو ههه ربي يدوم ختي ديما تضحكي والله صح هذو هوما أنواع الأصدقاء وتلقى عندك واحد برك كيما يحب خاطرك والباقي الكل من الكاليتي لي هدرت عليها وي اليوم صعيب بزاف وين تلقى صاحب معندوش فيك مصلحة حتى لي يضحك ليك في وجهك او يحسبلك وانت لا خبر وأنا نكره صحاب الكوستيم خخخ تلقاها حطة وحالة من بعد كي يوصل وقت تخلص زعماك تدخل يدها للصاك وتحوس على البورطموني وزعماك زعماك ما لقاتوش مازالها تحوس عليها تحس دخلت يدها لبالوعة ماشي لصاك هذا صاك تبحر فيه البورطموني ؟؟؟ هههه ايه كون تحب تشوف روحها في المراية تانية تشوف مي في الدراهم ما تخرجش يدها حتى تشوف دراهمك دخلو في لاكاس ههه ولا نكره الخباشين قصدي الجماعة صحاب النويظرات لي ما يخزروش فيك وكل من يشوفوه يضحك يحسبوه جايح وما يعرفش يقرا ههه قاتلهم سيريو كي شغل باه تكون تقرا مليح لازم تزير وجهك اخخخ تبا وما يحبوش يمدولنا نعملو فوطوكوبي يخافو نطلعو صاروخ ايه ولا تقتلهم الفلسفة الزائدة وين كان هو كي كنا نقراو .. واش دخلك كنت نكتشف في كوكب جديد وهوما يتخلفو وكيما قلت إذا في لامتحانات لقاو لانوط تاعك خير يخزرو فيك خزرة تبات محموم بالسخانة طالعة سقف ههه ايه تغيضو يقول منين جابها تحساب يمد فيها من جيبو هه كون جات من جيبك الصفر ويبانلك بزاف علينا هذو هوما الأنواع لي ما نحبهمش والجماعة تاع الوجه الصحيح راه وجهي صحيح كثر منهم ننشعهم نزلفهم ما يدوروش بيا gاع والله هاد ناس لو تمشي معاهم بنية غير ياكلوك لازم يكون وجهك صحيح باه يفهم روحو صينو راح يركبك نورمال
​

يعطيك الصحة ختي اميرة اكي داخلة دخلة الله يبارك في المواضيع ولا الردود راكي عاجبتني ختي وااااااصلي
انت اضافة رائعة للمنتدى تشرفت بيك
تحيـــــــــــــــــاتي
​

 

[قرصان الساحل]

رد: صاحبك سااااااااااااااااامط

ونسيت ما قلتش تانيـك بلي جماعة شفيق ما نخدمهاش هذو تلقاهم كونستيبي يسمطولك القعدة ولوكان كاش نهار يقولو نكتة ما تفيقش بلي نكتة على خاطر تجي مدرحة كي المود تاعهم هههه
​

ههه وي مام انا يعيوني بزاف مي نقلك الصح شكون لي يعيوني بزاف في نفس جماعة شفيق والله كي تصرالي مع واحد نكرهو ونقولهالو في وجهو
هذاك لي كي يقسر معاك انت تضحك نورمال مي كي تقسر عليه تغيضو ويهز نيفو شحال نعيا من هاد السامطين
مشكورة على تفاااااااااااااعلك المميز ختي اميرة نورتييييييييييييييييي
​

 

[الہٰوردة الہٰسہٰوداء]

رد: صاحبك سااااااااااااااااامط

النوع الرابع
جاي سامط من عند ربي ما يعرف يضحك ما يعرف يضحكك ... يعرف يحكي غير في الرسميات ويموت على الجرانن والاخبار .. كون تحكيلو حاجة تضحك يعتبرها تفاهات خونا سيريو يقطع مي المشكل يعيطلك وكون تضحك ولا يشوف فيك شوفة سماطة ومبعدا انت تحساب روحك قتلت روح ... هدا النوع عادة تكبر معاهم بالخف لأن الوقت معاهم ما يفوتش تريح معاه من 8:00 تقول ايه جبنا النهار تشوف لساعة تحكمك كريزكارديال نعم يا سادة انها 8:03 ... ربي يكون معاك



صاحبك سااااااااااااااااامط يرهج من نوع شفيق

hhadaaaaaaa ouèè ykarh la7yat wlh 3ni wa7d 4 yaw mch ghir wa7d bfff mmm
w tani samtiin yasr
mch sa3a 8.03 yaw tog3d 8
hhhh mr6 tjr li toop fl mawadi3 ta3k hichamo mzahilna lafriiik
hhhhh
وبخصوص الجو نقدرو نربحو الاجر كامل اللهم أجرنآآآآآ من الناآآآآآآآآآآر سلام​

 

[قرصان الساحل]

رد: صاحبك سااااااااااااااااامط

السلام عليكم وعليكم السلام مرحبا بيك مريومة ختي
تبا ما هذا آم بي سي 3 او راني فاللمة وفقسم واش راك تهدر نعم انه قسم واش راك تهدر
ههه اي شكشوكة فيها كلش عارفة خوك خلاط من الكبار لي جات يديرها صون vوار
خونا هشام واش نقولك دخلة قوية منك مع الرسوم ايه سبونج بوب اي مليحة تضحكني ههه
والله كل اللي قلتو صح كاين صحاب وكاين مي لما يكون عندنا صاحب صح حنا نضيعوه الواحد ما يرميش اللوم عليهم برك حنا ثاني وقت يكون الصاحب الحقاني ندوها فيه بذنوب لخرين بمعنى هشام لما تكون صحبتي تبغي مصلحتي وعلاه نقول راهي تنصحني تغير مني لما تحتاجني وعلاه نقول غير نتاع صوالحها وعلاه نحلف ما عنديش وانا عندي وممكن هي فامس الحاجة ليا وعلاه لما تعيطلي نقولها اسمحيلي مديرونجيا وعلاه هي تسقسي وانا حتى مساج ما نخسروش عليها الصحوبية راجل او مرا تكون من الطرفين
مريومة ختي ادا كان العيب منا هاديك حاجة خلاف .. مي انا نصارحك كتبت هاد الموضوع علخاطر عايشتو من صحاب المصلحة هادو كاين لي عطاني ديلي يرد فيه دراهم تاع شهر ومبعدا يولي يتهرب منك اي في العام وكاين لي دارها وقت فات وقتلو معليه مي العوام مزالهم وتعاود نفس الفيلم معاه عاود عيط قتلو انسى راك تشفى .. الواحد اهو يميز بين المليح والقبيح امالا مش اي واحد يجي يلعبها عليك صح الواحد يغلط مي يتعلم من هاد الناس لي صح نقولها ما يحشموش ونقولها مادا بيا ناس ما تطيحش في فخ هاد الناس ويمشو بعقليتهم العفوية
اما هذوك الانواع كاين ويكونو مي الواحد راه يتعلم فالدنيا مي ما يحكمش على الناس الكل
حاشى انا ما حكمت على حتى واحد تكلمت بصفة عامة ونظن فكرتي واضحة واي واحد اهو يميز كيما قلت
عندي صحابات صح وصحابات دارولي ضربات صحاباات نتاع مصالح وصاحبات لوقت الشدة ونخاف انا تفسرت عقليتي مصلحة او ما نسقسيش على هذا تعلمت انو الظروف صح تصنع العباد ايه الظروف تصنع العباد
شكرا عفوا

مشكورة على المرور ومناقشتك الموضوع مريومة ختي
تحياتي
​

 

[الورد الأحمر]

رد: صاحبك سااااااااااااااااامط

السلام عليكم

هههه فكرتني في وحدة كانت تظل مادة يدها للصاك كومسي رايحة تخلص وتبقى في هذاك الصاك تربش حتى نخلصو احنا وهي زعمة مازال ما لقاتش الـpـوغطموني تاعها يخي صاكها ماشي صاك راه بير تاع الماء !!! وعندي من جماعة الوجه الصحيح لي دايرين كي الطريق السيار شرق غرب واشنو الطريق راشية على وجوههم هههه هذو هوما لي عندي منهم بزاف والباقي كاين منهم حبات :p
ضحكتني والله ههههه

 

[قرصان الساحل]

رد: صاحبك سااااااااااااااااامط

النوع الرابع
جاي سامط من عند ربي ما يعرف يضحك ما يعرف يضحكك ... يعرف يحكي غير في الرسميات ويموت على الجرانن والاخبار .. كون تحكيلو حاجة تضحك يعتبرها تفاهات خونا سيريو يقطع مي المشكل يعيطلك وكون تضحك ولا يشوف فيك شوفة سماطة ومبعدا انت تحساب روحك قتلت روح ... هدا النوع عادة تكبر معاهم بالخف لأن الوقت معاهم ما يفوتش تريح معاه من 8:00 تقول ايه جبنا النهار تشوف لساعة تحكمك كريزكارديال نعم يا سادة انها 8:03 ... ربي يكون معاك



صاحبك سااااااااااااااااامط يرهج من نوع شفيق

كيفاه راح نرد عليك ا عفاف عربي ولا فرونسي خلطتي ليا حساباتي كامل
​

hhadaaaaaaa ouèè ykarh la7yat wlh 3ni wa7d 4 yaw mch ghir wa7d bfff mmm
w tani samtiin yasr
ايه والله سماطة نابتة معاهم ما عندك ما دير معاهم تلقى روحك قاعد في جو من الصمت المهيب تحساب روحك في جنازة الدبانة لو تتحرك تسمعها تقول يا ربي يصوني تلفوني يهنيني منو هه
mch sa3a 8.03 yaw tog3d 8
هههه ااااااااو صار ما تتحركش خلاص ربي يصبر
hhhh mr6 tjr li toop fl mawadi3 ta3k hichamo mzahilna lafriiik
hhhhh
بيكم راهي زاهية والله انتوما لي مدايرين لومبيونص هنا ربي يحفظكم
وبخصوص الجو نقدرو نربحو الاجر كامل اللهم أجرنآآآآآ من الناآآآآآآآآآآر سلام
اللهم اميـــــــــــــــــــــــــــــــن
​

يعطيك الصحة عفاف ختي والله الموضوع نور بوجودك وي نوع شفيق راهي ناس كامل تشكي منو علخاطر طايحين رسميين ومثاليين فوق الحق لازم الواحد منين داك يضحك ولا يبدل الجو
ربي يهنيك اختي
موفقــــــــــــــة
​

 

[قرصان الساحل]

رد: صاحبك سااااااااااااااااامط

السلام عليكم وعليكم السلام
القبعة الحمراء اون بارصون مرحبا زارتنا براكة
هههه فكرتني في وحدة كانت تظل مادة يدها للصاك كومسي رايحة تخلص وتبقى في هذاك الصاك تربش حتى نخلصو احنا وهي زعمة مازال ما لقاتش الـpـوغطموني تاعها يخي صاكها ماشي صاك راه بير تاع الماء !!! ههه هاد النوع والله مرات يغيضوني تاع ناس كامل عارفة وش راه يدير وهو يتبهلل زعمة اني حاب مي البير غامق بزاف ههه ايه نورمال ما عنديش نقول ما عنديش وعلاه نبدا ندير في الافلام هادو وعندي من جماعة الوجه الصحيح لي دايرين كي الطريق السيار شرق غرب واشنو الطريق راشية على وجوههم هههه ههه عجبتني هادي تاع الطريق راشية على وجوههم هذو هوما لي عندي منهم بزاف والباقي كاين منهم حبات :p ههه ربي ينقص منهم حتى ينقارضو من القائمة تاعك ما عندك ما ديري بيهم يعيو برك
ضحكتني والله ههههه اضحك الله سنك ختي ايه مادا بيا نشوف الموضوع تاعي ضحككم

مشكوووووورة على مشاركتك لينا حكايتك مع صاحبتك السامطة من نوع لابسة كوستيم مي ماشي كي جورج كلوني هههه قلها رانا فايقين ليكم مي نحبو نشوفوكم تنقبو بلاك نلقاو كاش بير تاع بترول في صاك تاعك ههه
ربي يحفظك ختي
تحياتي
​

 

[السلطانة]

رد: صاحبك سااااااااااااااااامط

مشكورة على اعتماد الموضوع وختم التميز والله حشمتوني مع اني نكتب ببساطة كبيرة
شكرا ليك ام ياسمين على حضورك وتشجيعك الدائم ربي يهنيك ويعطيك وش تتمناي
تحيـــــــــــاتي
​

حنا ناس قالمة نقولو للماييس
مستورة ههه وننطقوها مصطورة

 

[الورد الأحمر]

رد: صاحبك سااااااااااااااااامط

حنا ناس قالمة نقولو للماييس
مستورة ههه وننطقوها مصطورة

ههههه والله وتقوليلي واش فكرك فيها ولا علاه هدرتي عليها هههه تفكرت أنا حكاية خلاف تاع المستورة اهئ اهئ اهئ

 

[السلطانة]

رد: صاحبك سااااااااااااااااامط

ههههه والله وتقوليلي واش فكرك فيها ولا علاه هدرتي عليها هههه تفكرت أنا حكاية خلاف تاع المستورة اهئ اهئ اهئ

هعهعهع راني فهمت ويناه لحكاية لي تفكرتي ههههههههههه

:tongue02: