- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلام عليكم ناس اللمة
وأسعد الله أوقاتكم
وصح رمضانكم :love01:لأول مرة ندخل لقسم الطبخ حاسة روحي ماش في داري وجيت ضيفة هههه
وينهي رقية ولا ملاك يجيو يدخلوني ركايبي فشلو هههه، المهم نسيت على روحي في بالي راني في قسم واش راك تهدر:d
المهم حبيت ليوم نبين لشي ناس بلي حتى حنا ندخلو للكوزينة :down: واشوا خانتنا الصحة برك هههه قصدي خاني التيليفون
راني درت موديفيكاسيون على الصور وان شاء الله يخرجو مليح
المهم اليوم جبتلكم بوراك على الطريقة القسنطينية نتمنى تعجبكم الوصفة
نروحو للمقادير (حاسا روحي نخدم في قناة سميرة هههه)
أول شي البوراك القسنطيني لتحضيرو يحتاج اللحم المرحي والبطاطا كمكونات رئيسية
لتحضير اللحم المرحي
نجيبو لحم مرحي حسب الحاجة مانقدرش نحدد المقدار
تحطيلو الماء + فلفل لكحل والملح + تراpيلو شوي برك بصل و5 ولا 6 حبات توم
وشوي زبدة باه تعطي ذوق مليح ومغرفة طماطم كبيرة
وحطيه على النار حتى يشرب الماء تاعو ويخرج هكا ان شاء الله
ولتحضير البطاطا
بعدما تشرشمي (تغلي) البطاطا وترحيها
تضيفيلها الملح وفلفل لكحل + تقطعيلها المعدنوس + تراpيلها البصل (نص حبة بصل من المفروض تكفي)
+ شوي فرماج باه يعطي ذوق مليح
تقدري تضيفي الزيتون الاخضر لي مقطع لدوائر يجي مليح فيها تاني
ومن بعد تخلطي المكونات في البطاطا وتخرج هكا ان شاء الله
من بعد نبداو في تحضير البوراك وبالإضافة للحم المرحي والبطاطا نحتاجو هاد المكونات
-خطفة (ديول)
- بيض (نقسمو المح الاصفر والابيض )
-فرماج
-هريسة (لي تحب الحار)
من بعد نبداو بتحضير البوراك تاعنا، نوضعو فوق الخطفة (الديول) البطاطا + اللحم المرحي +الفرماج
(لي تحب توضع الهريسة توضعها فوق اللحم المرحي ومن بعد الفرماج)
ومن بعد ندهنوها بالمح الاصفر من فوق ونغلقوها بالاستعانة ببياض البيض
وفي الاخير بعد ما نقليوها في زيت سخون تخرج بهاد الشكل ان شاء الله
وأخيرا بوراكنا جاهز :yahoo01:
وشهية طيبة للجيمع
نتمنى تكون عجبتكم الوصفة نلتقي بعد 10 سنوات ان شاء الله ههه
لا ان شاء الله تشوفوني مرة اخرى هنا وخاصة في شهر رمضان مع وصفات جديدة بإذن المولى
فقط دعواتكم لي بالشفاء العاجل
تحياتي وصح فطوركم :love01:
