- إنضم
- 19 سبتمبر 2009
- المشاركات
- 51,473
- نقاط التفاعل
- 84,383
- النقاط
- 821
- محل الإقامة
- الشرق-الوسط
- الجنس
- أنثى
أيواه عجبتني مسابقة ميلينا قلت نشارك
منعرف يعجبكم الموقف لي راح نحكيلكم ولا تترهجو بالصماطة :p
.
.
.
.
.
بون هادا موقف صرالي وانا صغيرة
واحد النهار جداتي راحت ترقد تدير لاسياست بعدما فتلت الكسكسي وحطتو يشيح فوق الدالة في الشمس
ودخلتني نرقد انا وبنت خالتي مالا خليناها مارقدت وبدينا خطتنا الشريرة :
(يعني أنا مولات الخطة بنت خالتي مسكينة خاطيها جريت عليها )
قتلها نروحو نلعبو بالكسكسي هاداك قاتلي هي هيا وانطلقنا
نخلطو في البرمة لي كانت تفتل فيها ونصبو الما
وحدة تفتل ولوخرا تصب وتيرارارارا ونصبو في الملح
كملنا الصاشية لي كانت تخدم بيها
الكسكسي لي كانت في الشمس كل ولات
سوp وأحنا في قمة السعادة
تنوض الجدة العزيزة
وتحكمنا في الجرم المشهود
الجدة: واش درتوووووو
أنا (الناطقة الرسمية على روحي وعلى بنت خالتي المسكينة): كنا نلعبو برك
والنبي ماحصلتش حاجة ياتيتا
الجدة :قولولي واش درتوووو وعينيها مسكينة خرجو
بنت خالتي:أو..أو...أو...مسكينة تلفتلها الهدرة عادت تمهمه
أنا بكل ثقة:كنا نديرو كيما كنتي انتي تديري قبيل:-r
الجدة: من الصباح وانا في الشمس نندب على راسي وانتوم وخدتولي تعبي اه يازهري لي خدمتو راح خسارة
وانتي بالدات بلعي فمك لانخملك في الحيط
بنت خالتي : ولات تبكي
راحت جداتي تجري جابت البشماق أحمر تاع بلاستيك تاع زمان هادوك الصحاح
وبدى الدوزيام ميطون
هيا تضرب وأنا بعيط هي تضرب وبنت خالتي تعيط
تبا واش يوجع البشماق
عطاتنا طريحة زرقة وعاقبتنا بالبهادل وحصلتنا لماماتنا قالولها زيديهم كي عادو هك خلقو للفساد
وكي روحنا زادت بهدلتي ماما العزيزة وخالتي بهدلت بنتها
ولميناها بخصة لوجوهنا
كي نتفكر بلي كنا فرحانات كي كنا عقاب الكسكسي نخلطو نقولها ايمان صبي الما باه تجي مليحة ههههههههههههههه
وهي تقولي اسناي نخلط كيما جداتي ونقلدو فيها
ندبنا للدنيا وحنا لاخبر
قمة البراءة
دينا طريحة لدرك نتفكروها
جامي جامي ننساوها
ومن تم درحنا مازدناش درنا عملة كبيرة كيما هادي
وبقينا كل مانتفكرو الموقف نضحكو
لأنو جداتنا مافهمتش بلي خلطنا الكسكي وماكناش عارفات بلي الشي هادا راح يهلكها ههه
حسبناها لعبة وعاوناها وخلاه
.........................:up:
