أين الغرب من العرب.. نحن القادة و هم التابعون ـ رسالة الى جميع الأغضاء داخل و خارج اللمة ـ

[رنيم الصمت]

​

مش متأكدة اذا راني في القسم الصحيح .. لكن ميهمنيش و ماذا بيا الموضوع ينشر في جميع الأقسام حتى قسم الطبخ و قسم الألعاب وحتى قسم الشكاوي لمدى أهميتو .. مدى أهميتو على الأقل في نظر انسانة مسلمة غيورة على اسلامها و عروبتها و بلدها و الأشخاص اللي معاها و اللي تحبهم في الله​

بالاك الموضوع شوي طويل و قد يكون ممل لكنو يستاهل أنكم تضيعو عليه كاش 5 أو 10 دقايق من وقتكم ، طبعا اذا كنتم انتم ثاني غيورين على ديانتكم و عروبتكم​

ندخل في الموضوع ..​

مرة و أنا نتصفح في الانترنيت صادفت منتدى غربي ، اداني الفضول باه ندخل و نعرف مواضيعهم و نشوف شبيبتهم كيفاه راهم يخممو ... وكيما ندمت على الساعة اللي دخلت فيها .. فرحت .. لأني اكتشفت حوايج مهمة​

نحلفلكم بربي .. ولله العظيم ماشفت أتفه من هاك مواضيع و هاك ناس .. حاشا التفاهة ... وين يبانو معاها، قارنتهم بمواضيعنا صدقوني بر أكحل وش جاب الثرى للثريا .. ويييييييييييين يبانو معانا ، وللا هاذوك المشرفين و هاذيك المواضيع المهمة اللي مثبتينها... يتحسدو عليها .. مايخفاش عليكم، أول حاجة جات في بالي منتدانا اللمة و أعضاءو و مواضيعهم، واش نقولكم .. الله يبارك و يزيد ، صدقوني المنتدى و أعضاءو زادو كبرو في عيني أكثر و أكثر، جا في بالي أني نجيبلكم نما ذج و تشوفو الفرق ​

فعلا الفرق شاااااااااااسع و شاااااااااااااسع و شاااااااااااااااسع ، و مانحكيلكمش على مواضيع بناتهم : فعلا ما يتحكاوش .. ولله وبكسر الهاء ماقدرت ندخل نقراهم من العناوين برك.. كوارث .. العناوين و شوكاتني مالا لو كان ندخل يغمى عليا أكيييد، قلت معليش ربي عالم بنيتي الصافية نعفس على قلبي و نغمض عيني و ندخل و نجيبلكم نماذج باه تشوفو بأعينكم، بصح مقدرتش ماطاوعنيش قلبي و أصلا مايشرفنيش نجيب تفاهات كيما هاذي لمنتدايا الغالي النقي .. هه.. تفاهات؟؟؟.. مارحمك يا التفاهة مع هاذ المواضيع ( بالاك تقولو تعبيرها ركيك و لهجتها و مش جابرتها من كثرت ماني نعاود في كلمة تفاهة ... غصبا عني نقولها و نعاودها و نعاودها ) حابة نلقى مصطلح يعبر فعلا على مدى تفاهتهم مالقيتش... واقيلا الوقت المناسب باه نخترعو كلمة جديدة و نضيفوها للقاموس ..يا عباد الله حتى أساميهم في المنتدى تبهدل​

بصح كاينة حاجة جات في بالي و أنا نقرا في العناوين و نشوف في الأقسام اللي دايرينها ... صحا.. وش راه عاجبنا في ناس كيما هاذو حتان رانا نتبعو فيهم و نعاندو فيهم؟؟؟؟؟؟ صدقوني زدت تأكدت باللي راهم وااااااااااااالو مايسواوش صح مايستاهلوش حتى اللعنة و (اتفووووه) منا، واحد عندهم عندو 30 عام = واحد مول عامين عندنا ،بالعكس حاشا ولدنا مول العامين هو مسلم وسط مجتمعو المسلم يكبر شوي و يعقال​

واكتشفت بللي فوق ماهم تافهين هم ضعفااااااااااءو حطو مليون خط أحمر تحت هاذ الكلمة ناس كيما هاذو حنا قادرين نأثرو فيهم بسهولة بصح اللي ناقصتنا و اللي يتميزو بيها هم هي: الثقة بالنفس .. نأكدلكم .. راه ماعندو ماهو خاصنا بالعكس رانا أقوياء جدا .. يكفي أننا من أتباع الرسول و فوقها ربي معانا و مؤيدنا ... راكم فاهمين وش معناها ربي سبحانو يكون معانا و مؤيدنا ؟؟؟؟ ...​

تأملو في العبارة لي فاتت شوي و كملو معايا... ​

نورمالمو مجرد التفكير في هذا يخلي قلوبنا تقوى و ثقتنا بأنفسنا تزيد وتزيد .... ونزيد نقولكم حاجة .. علاه الغرب حاقرينا؟؟ عارفين علاه ؟؟ خاطر حنا حاقرين رواحنا .. قادر نفسك يقدروك الناس، أعط قيمة لنفسك الناس تقيمك​

هوما الحاجة الوحيدة اللي عندهم باه يتقواو بيها هي الدراهم .. لافوقها لا تحتها .. حتى و هاك احنا أغنى منهم.. حنا معانا ربي رب السماوات الارض و اللي خلقنا و خلقهم و اذا شاء أبادهم .. نعاود نفس السؤال و تأملو فيه مليح : عارفين وش معناها ربي و ربهم اللي خلقنا و خلقهم ( يعني سبحانو عارف كيفاه راهم يخممو و وش راه يدور في روسهم و .... و...... ) وهو معانا و ضدهم؟؟؟؟​

و هوما وش عندهم؟ هاذوك الفراكات اللي خالعينا بيهم؟؟؟؟؟؟؟؟؟؟؟؟؟ ديرو المقارنة و شوفو .... أصلا لامجال للمقارنة حنا خير منهم بدون نقاش​

اللي ناقصتنا قادرين نديروها بلا ما تكلفنا شعرة و هذا لي شجعني باه نكتبلكم​

لازمنا: ثقة بالنفس ،الاقتناع من داخلنا أننا الأقوى و الأفضل ، العزم على التغيير ، و التوكل على ربي ​

ما لازمش تخلعنا المظاهر و الماديات ما نديرو بيها مشاكل لأنفسنا ما والو، ما تقولو ( ياحيي ..... شوفو أغلب العرب واش راه صاير فيها ... كلهم مذلولين و.....و......و.....و احنا وش راح ندير و وكي راح نتحركو وين نبانو ....) لا متقولوش كيما هاك و نحو هاذ العبارة من قواميسكم ... (( كم من فئة قليلة غلبت فئة كثيرة بإذن الله )) ثم أنا ماقلتلكمش هززو السلاح و روحو بطوهم و اعطوهم طريحة .. اللي طلبتها حاجة بسيطة جدا و لو نطلبها من واحد مازال في كرش أمو و مازال ما زادش يديرها ..​

قلت نديرو الثقة في أنفسنا و نغيرو مابأنفسنا ((ان الله لايغير ما بقوم حتى يغيرو ما بانفسهم))​

نبطلو نعاندوهم و نتبعو فيهم، اذا بقينا هاك ماراح نستفيدو والو بالعكس نزيدو نخسرو و نخسرو وهوما يزيدو يتقواو علينا​

على الأقل ماكلاه نترددو على مواقعهم التافهه و اللي يديروها نديروها ، و نبداو بحوايج بسيطة وماكانش اللي يقولي مانقدر ندير والو ، مثلا احنا جماعة اللمة برك لو كان نعزمو من قلوبنا و نتحدو أنفسنا قادرين نغيرو حاجة ... ايه وعلاه لا ورولي الحاجز و نكسروه مع بعضانا .. واللي مش معول يحط ايدو فوق ايدينا ما كلاه يكمل القراية و يخرج حالا ... البداية تكون مع الصور الرمزية و التواقيع ـ ساعات الادارة ادير مبادرة طيبة و تمحي التواقيع و الصور المخلة بصح نقولهم هذا خطأ، الانسان اذا ماكانش مقتنع في داخلو بفكرة معينة ما كانش لي يقدر يبدللو رايو و لو نحيتولهم الصور و التواقيع ـ و خلونا نستغللو هاذ النقطة لصالحنا ( الانسان اذا اقتنع بفكرة ما كانش لي يقدر ينحهالو)​

بالاك في شهر رمضان تواقيعنا و صورنا لاباس بيها بصح راني نحكيلكم على منا وجاي​

اللي دايرة وللا داير صورة وحدة أو واحد أجنبي ينحها حالا ضرك قبل لا يخرج من الموضوع و يدير صور تمثل الاسلام و المسلمين، و البنات ماذا بيكم اديرو صور محجبات ، عارفين الحجاب يدير الحساسية للغرب .. ​

تخيلو معايا يجي واحد من الغرب متصفح كيما حالتي و يشوف حالنا هاك ،يعني كيما رانا ضرك و ش راح يقول .. يزيد يحتقرنا و بالاك في المنتديات اللي مشارك فيها يقول نفس الكلام اللي قلتولكم عليهم و ديرو حاجة مهمة في بالكم أنا علاه ركزتلكم على الصور و التواقيع ؟ لأنها تعكس شخصية الانسان، من الصورة و التوقيع تقدر تعرف العضو و كيفاه راه يخمم .. و حتى أساميكم راني نشوف ياسر أعضاء و عضوات مسميين أنفسهم على المغنيين و الممثلين الغربيين... ضرك المتصفح هذا وش يقول؟ يحسب بللي راهم قدوة لينا و احنا نتبعو فيهم وان لم يكونو كذلك و أنا متأكدة بللي حنا أقوى من أنا ننقادو بهاذ السهولة حتى و لو كنا حاطين هاذ الصور و الأسامي .. معلاباليش اذا شفتو الحلقة الخامسة من حصة قصص القران قال الأستاذ أنو من الصفات العشر للقائد هي نفس حرة يعني الواحد منا لازم تكون نفسو حرة و ماينقادش نحو أي شيء​

و تخيلو يجي نفس المتصفح و يلقى صورنا و تواقيعنا كلها اسلامية و أسامينا عربية وش راح يقول أنا متأكدة أنو راح يخلع منا و يديرلنا هيبة كي يشوفنا كامل متضامنين و عندنا كلمة وحدة ...تخيلو هاذ الشخص من أعداء الاسلام ( وراكم عارفين بللي هاذ النوع من البشر يحوسو على أبسط الثغرات باه يوسعوها و يخلقولنا مشاكل بيناتنا و يخلونا ننساو أصلنا و فصلنا و سبحان الله بعد ما وجدت الموضوع و كتبتو رحت نقرا في القران لقيت هاذ الاية : قال تعالى ( ... هو سماكم المسلمين من قبل... ) سورة الحج الاية 78 وفي التفسير أي سماكم في الكتب المتقدمة ،لازم تفكرو هاذ الاية ديما.. حنا مسلمين و مهما كانت ماهيتهم فهم أقل منا و أضعف منا ​

تخيلو هاذ الشخص واحد من هاذو اللي قاعدين يعسو في كاش ثغرة يلقاوها كاش عفسة مش مليحة كاش لقطة خارجة الطريق، ومن بعد كي يدخل يلقى عكس ما كان يتوقع واش يصير فيه؟ أكيد يتشوكا و يقول "جابلي ربي هاذ الناس روسهم يابسة و معندي ماندير مانحاول معاهم نجبد خويطاتي خيرلي" ( راني نترجملكم في كلامو قبل لا يقولو )​

كاين وحد العبارة قالها أحد الأعضاء في احد المنتديات في موضوع ليه عجبتني .. قال: "يقول الله تعالى : "لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَاراً وَلَمُلِئْتَ مِنْهُمْ رُعْباً" (الكهف: من الآية18).​

الطبيعي أنني أخاف ثم أفر، لا أنني أفر ثم أخاف. أليس كذلك؟" ​

​

​

وهو صح كان يحكي في مجال أخر لكن الفكرة عجبتني ونشوف فيها طايحة على موضوعنا يعني نخوفوهم بهاذ الطريقة ومن بعد يهربو​

ومتنسوش بللي منتدى اللمة الجزائرية من أكبر المنتديات العربية و أشهرها و الناس يعودو مستقصدينو يعني المطلوب أعطو صورة مليحة للناس و خاصة الغرب .. شكون لي يمثل بلادنا و ديانتنا مش أحنا؟؟؟ ايه انت لي راك تقرا في الموضوع و انت لي راكي تقراي في الموضوع راني نحكي معاكم كلكم معنيين و اذا راك دخلت و للا دخلتي و قريت الموضوع و فهمتو و متحرك فيك والو .. وا أسفاه .. انت ماتستاهلش حتى باه تكون واحد منا وباه تكون عضو في اللمه​

...........​

........​

....​

..​

مانيش عارفة اذا و صلتلكم رسالتي و للا لا و ماذا بيكم روحو ألقو نضرة و شوفو المنتديات الأجنبية لأني منقدرش نوصلكم الصورة كيما هي بصح متروحوش معاهم بعيد و شوفو معنى التفاهة بل التفاهة بعينها بل تعودو تترحمو على التفاهة و تحسوها حاجة مليحة ... ​

و ردولي بالخبر​

وماذا بيا تقراو الموضوع مليح وتقتنعو بما جاء فيه ..​

وديرو في بالكم مش قصدي نبين روحي عليكم و لا أي شيء​

برك كلاني قلبي ​

متأكدة بللي ماناقصنا والو الا حوايج بسيطة و قادرين عليها و فعلا كي نشوف العرب هاك حاقرين ارواحهم قدام الغرب ـ و أنا كنت و حدة منهم لكن ليس بعد الان ـ يغيضني الحال ... حبيت ندير مبادرة و لو بسيطة و نوصل رسالتي و ان شاء الله نكون وفقت و تعودو حسيتو بالرسالة و حركت قلوبكم ​

و ان شاء الله نشوف التغيير بعيني​

و اذا كنا يد وحدة نكونو أفضل و أقوى ..​

اعتبروها حملة و كل واحد ينوض و يحرك الناس اللي معاه على الأقل في المنتديات العربية الكبيرة ...​

اذا كان موضوعي في المستوى و يستاهل .. راني مسامحة روحو انقلوه و زيدو و نقصو فيه و بدلو اللهجة و اللغة كيما حبيتو و متأكدة مليار بالمية أنو أغلبكم اذا ماكمش كلكم عندكم أسلوب في التعبير و الوصول الى قلوب الناس خير مني بمليون مرة ـ هذا اذا كنت صح راني توشيت قلوبكم ـ​

المهم تعودو اديتو الفكرة لي حابة نوصلهالكم​

و اللي عندو فكرة أو رسالة ميخليهاش في قلبو يقولها ضرك​

و متخفاش عليكم حاجة اللي حركتني و خلاني نحكي هو الأستاذ عمرو خالد كي طرح علينا سؤال في موقعه هل أنت مستعد أن تكون صاحب رساله و مستعد توصيلها للناس​

أنا حطيت روحي في موقف و كتبتلو بالخط الأحمر العريض نعم و سأوصل رسالتي​

وقلت مادامني هدرت لازم نديرها و مانتراجعش نكتبها كيفما جاءت​

و نزيد نأكدلكم مش قصدي لا نبين روحي و لا نشهر بروحي ، هاذي رسالة :001_wub:من ♥قلب عربي مسلم غيور♥ الى ♥ القلوب العربية المسلمة الغيورة ♥ :001_wub:​

♣​

♣♣♣​

♣♣♣♣♣​

♣♣♣♣♣♣♣​

دمنا الأقوى​

و دامت كلمتنا واحدة​

لا اله الا الله محمد رسول الله​

رضينا بالله ربا و بالاسلام دينا و بمحمد نبيا و رسولا​

لكم أرق تحياتي ودعاوي الخالصة.... أختكم في الله ☻رنيم الصمت ☻ ​

 

[رنيم الصمت]

................................................

 

[حفيد هواري بومدين]

مواضيعك قمة تستاهل التقييم صح

​

 

[النورس]

شتان بين الثرى والثريا

شكرا اختي رنيم الصمت على موضوعك الرائع

بالفعل موضوع يستحق التقييم​

 

[شيخة اللمة]

أولا بارك الله فيك على الطرح المميز
فعلا يستاهل النشر في جميع الأقسام و تثبيتو
في رأيي هذي رسالة مهمة بزاف لشبيبتنا
و لو أن موضوعك طويل لكنو هادف
وان شالله يسمعوك
ويقتنعو بكلامك
و تكون رسالتك سبب تغيير البعض ان لم يكونو كلهم