السلام عليكم ورحمة الله تعالى وبركاته
اليوم على 7.30 صباحا كي كنت نتقهوى في مقهى " الزعيم "
ممباعد كملت فطوري ورحت جبت الجريدة " الشروق " و قعدت كيما الناس
اشوي هكا جاني واحد قالي " سامو اليكوو " و فهمتها بلي السلام عليكم
طلعت راسي نلقى 3 من افريقيا . . . المكان بالضبط والله ماني داري . . .
المهم البشرة سوداء غاتمة العينين مايلين للحمورة . . . الشعر مشبشب . . . الخ
و مباعد حطيت الجريدة و وقفت ورديت السلام و صافحتهم . . .
قتلهم خير ان شاء الله . . . مافهمونيش ولا ماعرف . . . حاجتهم
مدلي يدو و قالي " نشي هابز " . . . بصعوبة كبيرة حللت الكلمة هاذي
و فهمت بلي قالي اعطيني نشري خبزة " و على حسب الحالة عندهم 3 جور ماكلاوش
و ماشبعوش كروشهم . . . .
ايا قلتلهم بالفرونسي " أسي سلفوبلي " و عيطت القهواجي قتلوا فطرهم . . .
ايا جابلهم كيسان حليب وحبات كورواصون . . . . .
ممباعد ماكملوا قالي " مرسي فوزات جونتي " . . . .
شورلي بيدو كيشغل هات قارو اذا عندك . . . قتلوا ما نتكيفش و شورتلوا بيدي
" no "
حاولت ندي ونجيب معاهم بصح فهمت واش حابين يقولولي . . .
حسيت في عينيهم هاذيك النظرة تاع الخوف و الفقر و الضياع
و خاصة الندامة . . . . .
و مباعد عطيتلهم خمسة لاف فرنك قتلهم اشروها خبزات واتغداو . . .
و روحت للدار . .. . . . . . لهنى وتنتهي القصة
أنا نظن بلي الناس هاذو كي هاجروا للجزائر و بطريقة غير شرعية رسمي . . .
عندبالهم جنة . . . .عندبالهم كاين ارض تحويهم و امنة عليهم كيما أرضهم
و الله كون بقاو في بادهم خير
و ديروا في بالكم حاجة هاذوا في 3 نسخة طبق الاصل على الحراقة الجزائريين في
ليطرونجي . . . .
واش رايكم خاوتي في الشي هاذا . . . .
