قصة حبي

[nabil 09]

قصة حبي
قصة حبي

تمنــيـــتـــك تكــــوني ليــــا *** حبيــــتــك وفتحـــتلك قلـــبي
حبيـــــتــــك بواحــــــد النية *** صـافيــة وافيــة من عند ربي
كنت معـــــاك مغمض عينيا *** روحـــي وديـني ويـن تحــبي
المهـــم نكـــون معـاك نتيــا *** والمهم تكــوني أنتيا مكتوبي
ويلا ظـــلامت علــيا الدنــيا *** وجيـــتي نتــيا وقفــتي قـربي
وحدك تقـدري تضـوّي عليا **** أو نتــــهــنا ويــزول عــذابي
ومـــادا بيـــــــا حـتـــى نتيا **** عمــري مــا تشـــوفك تتعذبي
لأنــــك نتـــيا بالـــــنسبة ليا **** نتـــيا الــروح الـــي في قلبي
أيـــلا راكــــي تسمـــعي فيا *** درك خــلاص مـــانيش نخبي
حتى نهـــار اطـــــفرت فــيا *** باش حكيت واش كــان معبي
كـــــــان ..الحب بالنسبة ليا ***حــــاجة شـــابة خلــقها ربي
لكــــن لمــــا لحـــقــت ليا **** كـــانت هــــي سباب عذابي
كنـــــــتي لـــما تفـوتي عليا ***** تتــــلـفلي، يتخلـطو حسابي
تتلـــف المشــــية من رجليا **** يحبس راســي ويحبس قـلبي
تحبـــس الدمـــعة في عينيا **** ويحبسـو معايا حتى صحابي
يبدوا يسقسـو فيا واش بيا *** ولما يشـوفوك يعرفو سبابي
واش فيـــها كــي تكوني ليا *** قولـــي بــرك واش تطــــلبي
واش طامعة من هاذ الدنيا *** اطـــلبي مــني واش تحــــبي
اذا كـــــانت بيــــــك النــــية *** أنـــا النية درتــــــها لربي
وتمنيتك .. تكونـــي لــــيا *** لازم نتــــيا مــــني تقــــربي
اقعدي معـايا واحكمي عليا ** وما تحكميش عليا في غيابي
ويلا كـــــان علـى التربية *** باش تعرفي إيلا كنت مربي
روحي سقسـي الناس عليا * *** سقسي عدويا قبل من صاحبي
ويلا المشــــكل فيك انتـيا *** ماهيـــش سبة باش تهربي
هــــاذي الفـــــطرة البشرية *** فيــــــها السلـــبي والإيجابي
حتى من الكرة الأرضية ** لوكـــان يروح منها السلبي
تحبس وتفنى هــاذ الدنيا *** نموتوا وما يبقى إلا ربي
اما أيـــلا كــان حكمتي عليا ** وشفتي المشكل راه في جيبي
نقـــولك ربـي في هاذ الدنيا ** يرزقك من حيث لا تحتسبي
وانـــا الرزق بـــالنسبة ليا *** والكنـــــوز الــي خلقــهم ربي
واش رافــــدة الارض هاذيا ** وحتى الي راه فالبحر مخـبي
عمري ما طمعت يكونوا ليا *** ولا درتــهم كـــــامل فحسابي
لانو الكنـــز بــــالنسبة ليا *** راهــــو داخــــــل قلبك مخبي
هذاك الحـب الي عزيتيه فيا ** والــــي راكــــي بيـــه تلعبي
ما عطـيــــتــــلوش أهمية *** وراكي تزيـــدي غير فعذابي
ماعلا بـــالكش كــــــامل بيا *** تحبي عـــدويا تحبي صاحبي
ممكن تحـــبي قـــاع الـدنيا *** إلا أنـــــــا...منــي تهربي
ولما نغيب تحـوسي عليا **** وكــــلي مــا تحــبيش غيابي
نفيــــقـلك لــــما تشوفي فيا *** كلي كـــــاينا حاجة ...وتخبي
ونحــــس كــلي حــــتى نتيا *** ماكيش عـارفة واش تحبي
كيف الحمــــامة تقـربي ليا *** ولما نتحرك تعاودي تهربي
ندخل أو نغلق البــــاب عليا *** ونبـــقى ندعي غير في ربي
ندعـي بــاش تكـوني ليا *** ندعي ونبكي ونفرغ قلبي
ندعي وعارف بلي الدنيا *** ما تمدلكش قاع واش تحبي
ممكن نتيا الي تكـوني ليا *** وممكن ما تكـونيش مكتوبي
تقنعت بالهـــدرة هــــاذيا *** نهار سمعت رايحة تتخطبي
بكيت عليـــك بدموع عينيا *** وبقيت حامل داخل قلبي
سمعت الزغاريد بــودنــيا *** شفتك حتى كي رحتي تركبـي
كانت بزاف صعيــبة عليا *** وحمدت ربي علـى مكتوبي
وتمنيتلك تكــــــوني مهنيا *** إن شاء الله تعيشي كـــيما تحبي
وديري في بالك حتى أنايا *** كيفك فـــــرّج علـــــيا ربي
عرفت وحدة وراهي معايا ** وحدة كيفي على حساب قلبي
وحــــدة تحبــــني غير أنايا ** أو طايعتني في طاعت ربي
صابرة معايا وواقفة معايا *** وحبــــنا بيناتنا راهو مخبي
وراني عايش معاها حكايا ** شابة سميتها ... قصة حبي

 

[ACHWAK2002]

رائعة
من المفروض تحطها في قسم الشعر

 

[BARCA232]

من المفروض تحطها في قسم الشعر​

 

[** غزال الصحراء **]

رائعة
من المفروض تحطها في قسم الشعر

 

[nabil 09]

شكراااا على المرور الكريم ​

 

[BARCA232]

آسف أنا لم أكن أقصد أي شيء
والله قصيدة رائعة
لكن احببت فقط تنبيهك
أخوك محمد
​

 

[nabil 09]

علاش وين راهااااااااااااااااااااااا
قل شكراا اولا تم انتقدني
على العموم شكرا على المرور ​

 

[nermina]

شكرا لك و الله غير قصيدة هايلة و كلماتها رائعة يعطيك الصحة
تحياتي​

 

[nabil 09]

شكرااا على ا المرور الكريم​

 

[77amino77]

صحبي نتا فووووووور بزاف
ياتيك الصحة حنوني
و الله فرغة و اش كان معبي في قلبي
​

 

[nabil 09]

شكرااا على المرور الكريم
​