واش هذوا النسا يا لطيف ........ربي يستر

[Mr mino]

بسم الله الرحمن الرحيم

sــــلام عليــcom




كيف حالكم وأحـوالكم وباغي نعرف لامـارك تـاع جالكم


بـاش نـدير بـحالكم ونولي شبـاب وبوقوص كيمـا جاركم




كي راكم دايرين ؟؟؟




هانيين ؟؟ مريحين ؟؟ مديــgـــوتين ؟؟ كارهين ؟؟




خيروا وحدا من الربعة





المهم انا راح ندخل في الموضوع علبالي راني بديت نصماط ونولي كيما الرهج


ليوم راح نحكي في موضوعي هذا على واحد الحاجة صراتلي ليوم الصباح

ايا ليوم نضت الصباح على ربي عولت ان شاء الله نفري وحد les papiers

محتاجهم في دوسي تع حرقة .

المهم ايا ستيكيت روحي بيان وخرجت رحت تقهويت ايا وممبعد ديماريت ديراكت نفري

صوالحي ايا وانا ماشي في طريقي عمبالك انا في طريقي كي نجي طالع لاميري لازم

نفوت على وحد الرود فيه الغاشي والكثرة اللي فيه نساء ( هو يعني كاين طريق اخرى

مي انا نبغي هذيك الطريق اكم عارفين علاه ) المهم وانا نمشي ايا نشوف في الغاشي

بزاااااف ملمومين اووووو حرت انا قلت والله نروح نشوف شا كاين فضول برك اه ايا

لحقت للبلاصة اللي فيها الغاشي مافهمت والو نشوف في وحد السيد يعيط والغاشي يهدي

فيه وهو مربب خلاص ومن جهة خلاف كاين وحد لمرا هيا ويشيرصغير مانعرف بنها

مانعرف واش يقربلها ايا انا مافهمت والو سقسيت وحد السيد واقف مساميا

قتله حمبوك قلي شا صرى ؟؟؟



فاصل ونعود


**************************************

**************************************

عدنا



وين كنا ؟؟؟

ايه ايا منين سقسيت السيد اللي مساميا

قالي شت هذيك المرا اللي لهيتا ويقصدلي في المرا اللي قلتلكم عليها

قتله واه

قالي سرقت للسيد هذا صوالح من الحانوت تاعه

قتلو هذا مكان السرقة برك راهي بارتو

قالي استنى المشكل ماشي لهنا

قتلو وين راه المشكل

قالي المرا هذيك كي قلها السيد راكي سرقتيني جبدتلو سيف من الساك تاعها وقاتلو واش

راك تسرق فيا

اوووووووو

علبالك هو قالي جبدتلو سيف وهو ضربني ماس 380 فولط

قتلو هاذيك لمرا جبدتلو سيف ؟؟؟

قالي واه

قتلو احي نندب وين لحقت بينا يا لطيف

مرا تجبدلك سيف هههههه وتشركك تشرحك تشراح

يا يمااااااااااااا

عبالك احنا الراجل اللي يسرق ويقتل نقولوا عليه مجرم

والمرا واش نقولوا عليها ؟؟؟

تقول مجرمة عيب امرا مجرمة ؟؟؟

وانا نقول علاه كاين بنات عدهم ساكات كبااااااااااااار تقول كابة

وهوما راه فيهم السيوفة !!!

مليحة ولينا يثرب وسيف ابن الوهاج

انا اللي محيرني المرا هذي اللي جبدت السيف تشوفها ملاك ومعاها يشير صغير

ماتديهاش فيها الا هاذي كريمينالة

ولات الحالة تخوف اه قادر يغدرك راجل وقادر تغدرك مرا السيف ولا عندهم في زوج

كيما البارمي

يخي مجتمع كيفاه خسر يخي

ربي يجيب الخير برك

الحافظ ربي سبحانو

المهم يا جماعة انا بغيت نفهم


" واش هذوا النسا يا لطيف ؟؟؟ "


ايا مالا

تهلوا في والديكم مليح مليح تربحوا منهم دعوة الخير

وربي يهدينا ويصلحنا ان شاء الله .



هذا الموضوع برعاية

عرض خاص

شارك في الموضوع واحصل على رحلة للتشاد واستمتع بالمناظر الخلابة مجانا

عرض صالح لغاية

آخر رد



ايا على خير اي

تربحوا







​

 

[safo]

مليحة برك ربي يخلف على الشجرة مش على قطاعها​

 

[H@teM]

الله يسسترنا
النورمال ومناش قادين عليهم
خلي ياهاضم
ولا وش قلت امينوا؟؟؟
​

 

[روعة الأخلاق]

السلام عليكم
الله يهديها ~ انقلبت كل الموازين في هذا الزمن !!!!
و اكرر دائما في كل موضوع التعميم تعتيم

و انت قلت : " واش هذوا النسا يا لطيف ؟؟؟ "

و الأصح : " واش هذ المرا يا لطيف ؟؟؟ "

بالتوفيق
​

 

[MIDO.DODO]

والله ماعندي مانقولك خو
مرات نسمعو حوايج راسك يحبس كي تسمعهم
ربي يسترنا و خلاص
مي هاذي مرا ولا مافيا ؟؟
شكرا على الموضوع
​

 

[radia yoyo]

هههههههههههههههههه حاشا مش gاع
​

 

[اسماء16]

هههههههههههه نستعرف بيهاااااااا هو علاه يسرق فيهااااااا بلاك مسرقتش وسيف باه نحمو انفسنااااا
نقولك حاجة انا شاركة في الموضوع باه نربح رحة بلااااااااااااااااااااااك...تقبل مروري​

 

[Mr mino]

مليحة برك ربي يخلف على الشجرة مش على قطاعها​

صحيت خويا

مشكور
​

 

[H@teM]

المرة الجاية اللعب بلكلاش
ههههههههه
​

 

[Mr mino]

الله يسسترنا
النورمال ومناش قادين عليهم
خلي ياهاضم
ولا وش قلت امينوا؟؟؟
​

آمين

والله يا حاتم خويا غير كلامك صواب

ربي يجيب الخير

يعطيك الصحة حتوما حبيبي


​

 

[بنـ MaPa ـت]

( هو يعني كاين طريق اخرى ​

مي انا نبغي هذيك الطريق اكم عارفين علاه ) ​

​

علابالك نتا كاش نهار تدي كاش دربة تاع طالون ايغوي على راسك.......
المرة الجاية كبر الكتبة شويا راني بسيف باش قريتها.....فاصل و نعود نجاوبك......

 

[جزائرية حتى الموت]

جبدلته سيف hmy: hmy: hmy: hmy: hmy: hmy:

ضربني وبكى وسبقني وشكى :confused1: :confused1:

:crying: :crying: :crying: :crying: مابقى امان

انا تاني وحد المرة شفت مراة سرقت

والناس ملمومين

بصح ماجبدتلهمش سيف :confused1: :confused1:

ربي يستر

الواحد يمشي في ارض ربي وهو خايف hmy: hmy:

ويا مينو هادي مراة ودارت هاك

فما بالك بالرجل :glare: :glare:

مشي تجيب جانب وتخبي الجانب الاخر

موضوع معاش بالواقع

وكيما قلت

ربي يقدرنا على طاعته وطاعة رسوله عليه الصلاة والسلام


وعلى رضى الوالدين

الله يهدينا

 

[debcha-sat]

والله شي غريب اخي الكريم واش نقولك مرء عندها السيف ؟؟؟؟؟؟؟؟؟؟ تهلا في روحك في هدا الوقت صعيب بـــــــــــاي

 

[nina bonoise]

معندي منقول
des fois نسمعوا حوايج راسك يحبس

 

[[ايمآن]]

سلام
والله مواضيعك نتوحشوهم
كل يوم بحكاية انت
كي العادة يعطيك الصحة على الاشهار
على خاطر الخبزة ولات صعيبة توقع يصرا اي شيء عليها
الوقت شين وربي يجيب الخير
ومش قاع النسا قول يا لطيف على المرا هذي
ومنعرف لراني كاتبة مليح التوقيع تاعك حبسلي راسي:laugh:
تحيتي
​

 

[Mr mino]

السلام عليكم
الله يهديها ~ انقلبت كل الموازين في هذا الزمن !!!!
و اكرر دائما في كل موضوع التعميم تعتيم

و انت قلت : " واش هذوا النسا يا لطيف ؟؟؟ "

و الأصح : " واش هذ المرا يا لطيف ؟؟؟ "

بالتوفيق
​

وعليكم السلام

الله يهدينا آمين اجمعين

يا اختي الموضوع راه بيان على من راه يحكي وانا ماعممتش

بنات الاصل عمري مانقيسهم بكلامي

وديجا ماتجيش

" واش هذ المرا يا لطيف ؟؟؟ "

لانو ماشي مرا وحدا كاين منها بزاف

مشكورة اختي

وتحياتي ليك

​

 

[Elif DZ]

هههههههههههه

المراويت حالة ما تفهمش عليهمـ و هم معادلة صعبة لا تنفع معاهم لا فيزياء و لا كيمياء و لا رياضيات
​

 

[dana1993]

ربي يستر ويهدي الخلق

 

[جزائرية حتى الموت]

مينو توقيعك كل مانشوفه ندوخ

 

[Mr mino]

والله ماعندي مانقولك خو
مرات نسمعو حوايج راسك يحبس كي تسمعهم
ربي يسترنا و خلاص
مي هاذي مرا ولا مافيا ؟؟
شكرا على الموضوع
​

والله سمعنا ومزال نسمعو خو

ربي يستر كيما قلت

وانا شكيت في هذي سفاحة لا هي مرا ولا هي مافية

ربي يخليك خويا

وميرسي ليك بزاف


​