هذا هو القط تاعى مسكين درك راه فى ذمة الله :crying:
هذا القط تاعى كان مربى عندو عام و هو عندى
والفت بيه لازمنى نصبح عليه و نمسى عليه:biggrin:
مالا لبارح نضت على الصباح ما لقيتوش
فركتت عليه الدار كاملة ما لقيتوش
ما خليت لا دوش لا حاشاكم تواليت لا الجردينة ما خليت حتى بلاصة
والو الريحة تاعو ما كانش
آيا خرجت برا لقيت جارى لى ساكن بحدايا
سقسيتو قتلو ما شفتش قط صفر صغير و عندو سنسلة فى رقبتو :biggrin: رانى مقلشو مليح
قالى هيه القط لصفر تاعك هذاك رانى شفتو عند طارق جارنا الصباح حاكمو و حطو فى كاجة:scared:
آيا رحت عند طارق .
طب طب طب :angry:
صحا طارق صباح الخير واش راك لاباس بخير :biggrin:
طارق : سافا الحمد لله
طارق خويا وين راه القط تاعى ؟
طارق : واش من قط !!!
القط لصفر تاعى راهم شافوه عندك:angel_not:
طارق : آه ما تقوليش القط هذاك تاعك ؟ ايييي و الله ما علابالى بلى تاعك ، رانى بعتو ب 20 ألف للشناوة هادوك لى ساكنين فى لاسيتى :huh:
هههه خويا طارق راك تحكى منك صح و لا هاذى باسون دافريل :biggrin:
طارق : لا و الله نحكى منى صح
ياخى حالة ياخى ، الرسول (ص) وصانا على الجار سينون نجبد معاه بدماغ نطيرلو خنونتو:cursing:
ايه تم خلاص قلت الشناوة دارو بيه شكشوكة و لا داروه بلاتو كوشة و لا كلاوه مع الفريت أوملات
المهم أنا لى حيرنى فى الحكاية كاملة
كيفاش واحد مسلم و يعرف مليح الذنب لى يديه كى يضرب حيوان برك ، فما بالك كيف يقتل حيوان
على جال زوج دورو .
و ثانى الشناوة هادو راهم دايرين حملة ضد القطوط تاعنا :sneaky2:
ياو كرطينا خلاصو منو القطوط
علاش الحكومة تاعنا و منظمة الرفق بالحيوان ما يتخدوش الاجراءات اللازمة لوقف العدوان الشنوى على القطوط تاعنا
علاش ما يوقفوهمش عند حدهم
ايه مالا عظمولى لجر فى القط تاعى
و شوفو انتوما واش رايكم .
على فكرة العنوان هذاك رانى كاتب ( على بابا )
على خاطر حنا الشناوة نعيطولهم على بابا
و هوما ما يحبوش ( بالنسبة ليهم الكلمة هاذى تعنى ارهابى .
آيا جمعة مباركة و دمتم فى رعاية الله و حفظه
و السلام عليكم
