قطع وذن خوه على جال مرتو ؟؟؟؟

[HWK4ALGERIA]

السلام عليكم لاباس لحوال؟ الحمد لله.
والله يا خاوتي انا البارح كنت قاعد في اللمة جا واحد من الاقارب ودخل عندي وقاللي واش راك ادير قلتلو راني في اللمة، :confused1: لأسف يسمع بيها برك، المهم عرفتو وشي هي اللمة باختصار، ولقاني نكتب في الردود على موضوعي الاخير تاع الاحلام ولي كوشمار فقرا القصة تاع هذاك السيد اللي يسموه الكوشمار، اتشوكا وحار وقعد بلا راس، وممبعد اتفكر وحد الحكاية وحكاهالي ثاني هي واقعية وخلاتني بلا راس ثاني، وكأنك في البلاد هاذي لازم اتكون بلا راس سينو ماراكش امليح، المهم الحكاية مفادها انو قريبي هذا كان في التسعينات جون دارم في منطقة القبائل، ودار خطرة التحقيق في قضية غريبة الضحية فيها أخ بترت أذنه من طرف أخيه يعني واحد اقطع وذن خوه والسبب انو الاول متزوج وشاف المنام بللي مرتو راهي اتخون فيه مع خوه :scared: وجوست مع ناظ gلب الحالة :angry: وهز الموس وراح يحوس على خوه ولقاه امريح في القهوة وقيلة، وحكمو من وذنو ونحاهالو بالموس وكان راح يقتلو لوكان متدخلوش ولاد لحلال.
وفي التحقيق كي سقساوه علاه درت هكذا قاللهم شوفتو في المنام مع مرتي :cursing:.
والسي بو وذينة ضحية أخرى من ضحايا لي كوشمار.
احلام سعيدة نتمناهالكم في اللمة.
شكرا.

 

[soussou_yebda]

لا حول ولا قوة الا بالله هذا متخلف عقليا علاه هو قاله نومني شابة هادي هههههههه

 

[HWK4ALGERIA]

لا حول ولا قوة الا بالله هذا متخلف عقليا علاه هو قاله نومني شابة هادي هههههههه

علش قلتلك بقيت بلا راس، شي يحير.

 

[missa_1]

ياو هذا قلك اهبل ولا خلينا نقعدو

 

[touti_dz]

سور هدا كاش واحد فسرلو المنامة تاعو
انا نعرف واحد بو وذينة عندك لا يكون هو

 

[** غزال الصحراء **]

يا محاينك , هاذي غيرة كبيرة يعني ما قبلش عليها حتى في لمنام !!

ربي يسترنا من ليكوشمار , و الله ديفوا تشوف حوايج يوسوسوك قاع

مرسي عليك علي تقبل مروري خفيف ضريف .

 

[SOUHA]

او هنا عندنا كوشمار كل يوم مع الاستاذة تع المات نعيطولها كوشمار

 

[HWK4ALGERIA]

ياو هذا قلك اهبل ولا خلينا نقعدو

اواه سور المنام كان محبوك امليح وفي لي زيفي سبيسيو لدرجة انو صدقو.

 

[HWK4ALGERIA]

سور هدا كاش واحد فسرلو المنامة تاعو
انا نعرف واحد بو وذينة عندك لا يكون هو

المنامة واضحة وماتحتاجش لتفسير، يحسن عونو هو ثاني معرفش كيفاه يحلم.

 

[HWK4ALGERIA]

او هنا عندنا كوشمار كل يوم مع الاستاذة تع المات نعيطولها كوشمار

كون تتزوج الاستاذة الكوشمار مع الكوشمار تاع ال20 سنة حبس واش راح يجيبو...

 

[HWK4ALGERIA]

يا محاينك , هاذي غيرة كبيرة يعني ما قبلش عليها حتى في لمنام !!

ربي يسترنا من ليكوشمار , و الله ديفوا تشوف حوايج يوسوسوك قاع

مرسي عليك علي تقبل مروري خفيف ضريف .

لالا هو سور كاش ما راه شاك من بكري في مرتو برك المنام زاد اكدلو الشكوك تاوعو هههههه

 

[parkour14]

هذا كل بسبب منام

والله لعجب !!!

شكرا لك خويا ياريس

والله راك جيبها بميزان ذهب

يعطيك الحصة

و تصبحوا على خير

ايا تهلاو في روحكم

سلام
​

 

[fufa22]

ربي يعفو علينا من الشي هذا

 

[HWK4ALGERIA]

هذا كل بسبب منام​

والله لعجب !!!​

شكرا لك خويا ياريس​

والله راك جيبها بميزان ذهب​

يعطيك الحصة​

و تصبحوا على خير​

ايا تهلاو في روحكم​

سلام​

وعليكم، وانت ثاني يعطيك الحصة.
شكرا.

 

[HWK4ALGERIA]

ربي يعفو علينا من الشي هذا

قول ربي يبعد اعلينا لي كوشمار.
شكرا.

 

[aMiNa-K]

ههههههه مليحة هدي
شافو في المنام برك قريب ماقتلو :scared:​

بالاك مناماتو يخرجو صح كما حالتي :music_whistling: .. الحاجة اللي نومها تخرج صح :sad:


الله يهدي ماخلق​

 

[HWK4ALGERIA]

ههههههه مليحة هدي

شافو في المنام برك قريب ماقتلو :scared:​

بالاك مناماتو يخرجو صح كما حالتي :music_whistling: .. الحاجة اللي نومها تخرج صح :sad:​

الله يهدي ماخلق​

بالاك الحكاية ماشي حكاية منام، بالاك حكاية حب وغيرة لدرجة الوسواس، اييييه الحب ايدير اكثر، ربي يسترنا وخلاص.
شكرا.

 

[N@riM@N]

هاد سير جاهل هابط من جبل ولا مجنون مايفرقش بين لمنام والصح
واشي هاد ورانا؟ في غــــابه لي مااعجبوش خوه ينحلو ودنو
هـــــــــــــــــادي التــــــــــاليه.......مرسي ع الموضوع​

 

[HWK4ALGERIA]

هاد سير جاهل هابط من جبل ولا مجنون مايفرقش بين لمنام والصح

واشي هاد ورانا؟ في غــــابه لي مااعجبوش خوه ينحلو ودنو

هـــــــــــــــــادي التــــــــــاليه.......مرسي ع الموضوع​

كي معجبوش خوه gاع راه امليح اتخيلي لوكان احلم بباباه.:scared:
شكرا.

 

[اسمه_ان]

لا حول ولا قوة إلا بالله العظيم


ربي يهدي هاد الناس وربي يستر علينا في هاد الوقت الي صار كل شي فيه نورمال

شكرا لك اخي الكريم على الموضوع

واصل تميزك’’’’
​