جماعة بوكو حرام .. الخوانجية..والسلفية وأصحاب المقام

[جهينة الأخبار]

جماعة بوكو حرام .. الخوانجية..والسلفية وأصحاب المقام


من بكري معناها - من زمان - نشتي نحكي في البوليتيك نتاع السياسية وكنت نجيب الخبر من قاع البير .. على هذا سماوني جهينة الأخبار ، واليوم راني رايح نحكيلكم على الإسلام السياسي ، على خاطر عندي وحد العشرة أيام قريت كتاب لفرانسو بورجا ترجمة الدكتور لورين زكري عنوانو


الإسلام السياسي.. صوت الجنوب ،الطبعة الثانية الناشر دار العالم الثالث ..


الصح هو كتاب زين اللي يقدر يلقاه يقراه ..
أنا نفهم الإسلام السياسي من جهة سبيسيال .. معناها أصحاب اللحى الخوانجية
- كنا نسموهم بكري - كيما هاك ايحوسو ايديرو دولة ثيقراطية أو دولة رجال الدين

وكان الخوانجية يعملوا في السر تحت الأرض وفي الكهوف والشعاب .. وكان يحسبوا رواحهم ما كانش اللي فايقلهم .. والصح نتاع ربي من اللي مات الشيخ الشهيد حسن البنا ربي يرحموا تخلطت أمورهم وتقسموا على أكثر من جماعة وصار اللي ما يعجبوش صاحبو ايدير جماعة وحدو وظهرت جماعة شكري مصطفى – الهجرة والتكفير - في السجن الهجرة خلطوا الأمور .. وتبراو من بعضاهم البعض ..
وبقاو محصورين في مصر وفكرة الجماعة العالمية أو الجماعة الأم ما نجحتش ، وفي نفس الوقت كانوا جماعة خرجو من تحت الإخوان سماو أرواحهم حزب التحرير ، كانوا يحوسوا يجبدو التابي من تحت الخوانجية أو الإخوان المسلمين كيما تحب تسميهم سميهم كيف كيف
نتاع حزب التحرير هذول قالك لازم نرجعو الخليفة وكان الشيخ تقي الدين النبهاني دار روحو خليفة وبعث اولادتو للأمصار في الأرض على شكل ولاة .. ما نيش عارف أنا كي نقرا لجماعة حزب التحرير في موقعم العقاب ايجيني وحد الشعور باللي الجماعة حتى بشيخهم الله يرحموا ضاربتهم السمش ولازملهم حبة بصلة تنح عليهم الدوخة
وعندنا هنا في الدزاير الخوانجية فاشلين من بكري على خاطر حركة الشيخ عبد الحميد بن باديس ربي يرحمو – جمعية العلماء المسلمين – سكرت عليهم الطريق ، وفي أول الأمر في السبعينات ومنتصف الثمانينات كان الشيخ محفوظ نحناح داير حالة .. واللي يسمع كاسيطاتو يحسب القيامة رايحة تقوم واقف ضد الدولة - ديراكت - وكانت في نفس الوقت جماعة تخدم التحت التحت كانو ايفكرو في السلاح والبارود وكان فكرتهم اللي جاء فوق مدرعة يرحل تحت سلاسلها .. ظهروا في بداية الثمانينات وعرفتهم الناس بجماعة الأمر بالمعروف والنهي عن المنكر أو جماعة بويعلي مصطفى واصطدمو مع الدولة وكان اللي كان حتى وصلنا لاحداث اكتوبر وتخلطت الامور وجات الديمقراطية



وسال اللعاب نتاع الخوانجية

الديمقراطية معناها الانفتاح

الديمقراطية معناها الحرية

الديمقراطية معناها رايحين يخرجو من الكهوف والشعاب


وجابولنا ضربة الديمقراطية .. زينة وعزيزة عليا ..نديرها في عينيا

الديمقراطية اللي كانت كفر بواح عند الخوانجية ولات عروسة ترقص على الوحدة والربع
في نص النهار واللي كان ايقيط جحدة ولى ايقيط على المكشوف
نحناح ربي يرحمو ما ضربش النح

قال : أنا ما نيش راجل نتاع سياسية أنا نتاع دعوة إلى الله ..

هدرة زينة يعطيك الصحة

وفي هذا اللحظة بالذات جماعة الشيخ سحنون وعلي بن الحاج وعباسي مدني

خرجو خرجة جديدة

قالوا أحنا ناع السياسية والبوليتيتك

وظرهت الجبهة الاسلامية للانقاذ بقوة على الساحة

جملت القشقاش نتاع الاسلاميين كامل

السلفيين والخوانجية والتكفيريين والشيعة والصوفيين والشوفينيين والصابحين والبايتين واللي ما عندك فيهم خبر
وحشدو الحشود لمواجهة النظام

نحناح ربي يرحمو فاقلها روطار قال لك واقيلة تحشاتلي القصعة فيها اللحم الطرف على حالوا .. ولازمني نحضر ، وفي نص ساعة بطل رايُوو

قال : لا.. لا.. الإسلام هو السياسية والسياسة هي الإسلام

وظهرت حركة حماس
عباسي مدني أعلنها وقال هذي طعنة في الظهر
نحناح ضرب فيها ضحكة وقالوا فاقو ا يا سي عباس مدني تحوسوا تاكلو وحدكم راها ما هيش ساهلة الحكاية
وفي هذي اللحظة كانت الأرض تغلي في الخليج الماريكان - إيبعد البلا على السامعين
معول ايطيح العراق وايطربقها على صدام ربي يرحموا ...

واللي طاق على صاحبوا ............ ما نكملهاش ..؟

الاسلامين لازم يستغلو الحدث باش إيبانوا باللي راهم نتاع سايسة ما همش يلعبوا

واحد لبس كونبا بدلة عسكرية - كبيرة عليه - وراح لوزير الدفاع قالوا لازم تروح تحارب في العراق

ولا تخلينا نروحو نجاهدوا الكفار ...؟؟؟

وزير الدفاع ما هوش صغير ينكع في صبعوا ضحك وشربو كاس حليب وسقدوا بزوج كلمات ..

وقالوا : الليلة روح بات في داركم اضرب فيها شوي سكالوب ومن بعد راني نشوف ..

هذي اللي قالهالو في وجهو.. واللي في ظهروا ..

قالو يا طفيل فوقلها راها الماريكان راك عارف واش معناه الماريكان

راها المرأة كي تولي حامل وفي شهرها السابع تسمع كلمة مارينز تزروط – بمعنى تسقط جنينها –

وجات الماريكان للخليج ووجدوا اللي يفتيلهم باش ايحجو للرياض ويتمركزو هناك الى الابد وظهر نوع جديد نتاع الاسلام السياسي .. جماعة سلفيين ايخافو ربي ويعرفو الشرع خير من جماعة نحناح وجماعة عباسي مدني..

هذا جماعة التاريخ ايقول باللي هم أقدم جماعة فوق الارض بعد ما ليهود نتاع الدونمة طيحوا الخلافة الاسلامية هذول السلفيين من اتباع الشيخ محمد بن عبد الوهاب الله يرحموا ، وصراحة باش ما نظلموش الشيخ ما عندهم حتى ريحة في الشيخ ربي يرحموا

وظهرت فتاوى السلفيين بجواز الاستعانة بالمشركين

وظهرت فتاوى جماعة البلاط وفي سرعة البرق دارولهم تانبر سماوهم السلفيين الجاميين
اتباع الشيخ محمد أمان الله الجامي رحمة الله عليه

هذول السلفيين قالك باللي الحاكم المسلم ما لازمش نخرجو عليه بمعنى ما نرفدوش السلاح باش نطيحوه ، واللي يرفد السلاح راه من الخوارج وكافر وخارج من الملة نتاع محمد صلى الله عليه وسلم ، وقفوا مع السلطان في وجه الطغيان نتاع الاسلاميين ... ؟؟


واللي ما يقراش كيما حالي – ماهو فاهم فيها والو – أحسن حاجة ايديرها ايعمر راسو بقارو زطلة مدوزي


وكي تخلطت بكراع قط – ظرهت بعد 11 سبتمبر اللي طاحو فيها البرجين – راهم ما زال ما بناوهمش – ما لقاوش مقاول حاذق –
ظهرت السلفية الجهادية وأعلنت الحرب على الماريكان واللي يقف في صفها
الخوانجية نتاع الإخوان أو كيما تحب تسميها الإخوان نتاع حسن البنا وجدو هذي الامور تنسف اللي
فات كامل من خدمتهم

لا برلمانات

لا جمعيات

لا تيكي

لا احزاب

واللي دار همر ايبيعها في المارشي نوار

واللي بنا فيلا وودع الشر يرجع ايبيع في الكوكاو في الزقاق

هكذا على طريقة شيخهم ضربو النح قالك منين تتهرد يعطيك خاطية راسي ..أشكون قالو يحتل الكويت وايورط روحوا مع لالاه الماريكان ..؟؟

الجاميين لقاوها فرصة

وجاتهم الدنيا بوجه الحسناء

و ما تتعجبش تلقى سلفي يحكيلك على الزهد والجنة والنار وهو داير فيها 307 في النيلو نتاعها ويتعشى بخروف ويتغدى بخروف

وباش مانطولش عليكم نلخصلكم الاسلام السياسي :


كاين الاسلام السياسي نتاع

الخوانجية الورثة نتاع الشيخ حسن البنا ومن بعد قلبو الفيستة

وكاين نتاع السلفيين وهم قسمين

سلفيين جاميين نتاع حكومات وزردات وهردات

وسلفيين نتاع سلاح وبارود واللي يحكموه يسلخوه ... ؟

وكاين الاسلام نتاع جماعة نص نص شادين العصا من النصف هذول مرة سلفيين ومرة خوانجية ومرة ما عدهم حتى لون وين تكون المصلحة ايكونو معاها

هذا باختصار الإسلام السياسي وعلاقته بالسلطة

ويبقى جهينة الأخبار والشعب الغلبان ياكل في الشلاطة الخضرة - ومعاك يالخضرة - بلا طامطيش وايصلى في 05 اوقات وايصوم في رمضان على الكسرة اليابسة والما ومنين يسمع كاش تجمع ايروح يحضر.. أنا نكذبش عليكم نحب نروح نحضر على جال القاطو وخاصة التجمعات نتاع جماعة الخوانجية.. عندهم وحد القاطو اينح وجع القلب

مرة بقلاوة .. مرة قنيدلات .. ومرة قريوشة .. ومرة مسكوتشة آه ه ه ه نموت عليها

اما السلفيين ما نشتيش نحضر لتجمعاتهم لا قاطوا لا مسكوتشة .. ايشبعوك هدرة

ما تفهمش منها نص حرف ويطلقوك شاتي شربة ماء

المرة القادمة نحكيلكم على الحرب نتاع السلفيين في بعضاهم راه عندها علاقة بموضوعنا

واش رايكم في التحليل نتاع جهينة .. مخخخخخخخ

​

 

[سراي علي]

استعراض للاحداث من وجهة نظرك .. فيه شيئ من صواب وباقيها لا يصلح ان يلتفت اليه اما نظرتك للسلفية فهذا من الخطا الشائع البيين الذي لا يستند الى دليل فكيف نبني احكاما على منهج رباني من مجرد تصرفات افراد ليسوا اكثر من افراد تصرفاتهم تحسب عليهم لا على المنهج في حد ذاته ...

طبعا انا لا ارقى الى اسلوبك الساخر الذي يريد ان يختصر تاريخ الحركة الاسلامية في قطعة سكر وتجمع

فانت تحتاج الى اعادة قراءة متأنية لتاريخ الحركة الاسلامية

وفي ما كتبه عنها المفكرون الاسلاميون يغينك على ان تنظر في ما كتبه صاحب الاسلام السياسي فراسو بورجا .. ونحن لا ناخذ تاريخنا لا عن فرانسو ولا عن غيره


وقد قرات الكتاب وفيه من المغالطات الكثير الكثير وربما اذا تسنى لي ان اعيد قراءتي له من جديد فسادون بعض الملاحظات على تلك المىخذ على الكتاب


شكرا على الموضوع شدني اليه طريقة عرضك للاحداث تشبه الى حد بعيد احاديث الحكاوي التي ترويها العجائز للاطفال​

 

[المعافي]

اخي تحليلك في اخطاء كثير وقليل من الصحيح بسبب اختلاط الامر لك من بين الاحزاب التي تدعي الاسلام وهي عكس ذلك وهي كلها تسعى الى السلطه بطرق غير مباشرها والسلفيه معناها اي اتباع السلف الصالح وهم التابعين والصحابه الذين اتبعوا على منهاج محمد صلى الله عليه وسلم

اهم ملاحضة ليس كل من ادعى السلفيه سلفي بلعكس من يتبع المنهج الصحيح يضهر على اخلاقه وتدينه الصحيح

 

[ثامري سياف]

انت مشكور وبارك الله فيك