راني حاسة بالحقرة

[zahra z]

السلام عليكم
اليوم رح نحكيلكم على حاجة صراتلي في يوم 10 جوان من هذا العام
يوم مش راح ننساه طول عمري والجرح اللي في قلبي مظنيتش اذا في يوم رايح يبرا
انا طالبة جامعية فعامي الدوزيام الحمد لله كل اموري ماشية عامي طلع مي صراتلي غلطة فواحد النقطة
فهداك اليوم رحت للجامعة لعشية وما لقيتش لبروف اللي صرات عندو الغلطة مي لقيت رئيس القسم اللي هو من بلادي وكنت مستقرباتو ياسر ومقدراتو ياسر وبحكم اني نقرا في ولاية بعيدة على دارنا حبيتو يشرحلي وقتاه يفرولي اموري وكان ضايق بيا الحال ياسر
مباعد هو دخل ومدري وش قالي ومسمعتوش
لحقتو قلتلو مسيو واش قتلي قالي رايحة تصححلك النقطة نشا الله و........
وراكم عارفين السخانة في الجنوب و وقتها ما كانش الماء قتلو مسيو عندك الماء قالي ايه قتلو اعطيني وما دخلتش قعدت لبرا
صبلي الماء وقالي تفضلي انا دخلت كي البهلولة وشربت
مباعد قعد وقالي الدنيا شمس لبرا تفضلي ريحي ...ريحت
هدر معايا بكل احترام مباعد قالي خلاص راح الحال هيا نروحو
جيت واقفة .......جاني على غفلة من تالي وحط يدو على ظهري
انا تشوكيت ما قدرتش نصدق
وقفت خزرت فيه ...قتلو مسيو مفهمتش
تمالكت عصابي شوي قتلو اسمحلي نفوت قالي خايفة؟
مباعد خرجت مشيت رجليا مهزتنيش مقدرتش نكمل جاني وشبيك وشبيك
قتلو روح عليا متخلينيش نغلط
قعد ما راحش وتصورو كان باش يحشيهالي قالي انا وش درت كنت باش نقولك اخرجي برك
وكي لقاني مانيش غبية وعاقلة وساكتة وضعيفة كيما كان متصور رجعها فيا وقالي انت واش كنت قاعدة تسني في المعهد انا فهمت باللي تسني فيا وما تلعبيهاش عفوية ومتفهميش مباعد بدا يبكيلي ويقولي سامحيني.
تصورو يا عالم تصورو يا ناس راني حاسة بالحقرة حاسة حقي ضاع ومعرفتش واش الحل......والله راني من هداك اليوم مزال مفقتش.
للعلم هداك -الحيوان) عندو الماجستير وراح قريب يسوتني الدكتوراه.........

 

[seize&parazit]

يا اختي وكلي عليه ربي انت بنت فامي وربي يحميك من هو ذئاب الله لا تربحو ولا تجريلو جرية انت اقعدي معا روحك وفكري ياك انت متاكدة من نفسك ومن نيتك مالا ماديري حتى حاجة في بالك

 

[mimi-ba]

ربي يهدي هذا ما كان مي وين راحت الرقابة في الجامعات هذا كامل بسبب بن بوزيد ربي يهديه يا أختي أصبري هذا ما كان و صدقيني في هذي الدنيا مازال تشوفي لي عمرك ما سمعتي بيه .ربي يعاونك.​

 

[بنت الجزائر و افتخر]

بما انو نيتك كانت صافيه انا تبانلي نورمال نسيه
و نسي كل شي و وكلي عليه ربي
و استغفري الله و حاولي تنسي
على خاطرش ماشي يوم واحد يضيعلك صفو حياتك كلها
حاولي تنسي
تحياتي​

 

[zahra z]

بارك الله فيك اخواتي حتى انا والله هذاك ماني دايرة
اللي مخوفني الاعوام الجاية كيفاش نقرا كيفاش ندخل للجامعة وهو فيها واذا قراني كيفاش ندير

 

[وهج الصحراء]

نقولك حاجة اختي خليه لربي هم سمو الحق ورايح ياخذ ليك حقك ربي يهديهم لوكان جات ختوا ولا مرتوا مايقبلش عليها هكة وكلي عليه ربي اختي

 

[محبة بلحاج]

زهرة اختي صدقيني هاد المشاكل كاين في كل مكان
الحمد لله انت كنت قوية وقدرتي تدافعي على روحك
ماعليك لوم ختيتو
ربي يسترنا ويحفظنا​

 

[wahid47]

حكاية من مليار حكاية تصرا واش نقول لأختي لاتنسي هذه المقولة
حسبنا الله ونعم الوكيل
​

 

[DARINE05]

الحكايات هاذو يصراو بزااف في الجاميعة وراكي ملييييحة بزاااف كي ماصرا والو

 

[ماكانش]

كاينين من هدا نورع بزاااف ختي في لبلاد وفي الجامعة بالخص

 

[beautiful -soul]

مساء الخير...
ماشي غير انتي لي صراتلك هكدا ..
احمدي ربي انو ماصرا والو وهادي توصي للجاية حنونة
..ماتقلقيش روحك
...تحياتي ليك
سلام!!​

 

[**أم البراء**]

مي هادا صح ماشي بنادم...........الله يهديه
ما تتقلقيش برك ونقصي من زعافك بويسك هذا - الحيوان- ما يستهلش تعطيلو أدنى أهمية...والعام انتاعك إن شاء الله يخرج بيه ولا بلا بيه
ربي يوفقك ويسترك
أختك من البليدة

 

[قالمية ونصف]

الحيوانات لزيما هك كينين فلبلايص كل ربي ينعلهم لادوك رجالة

 

[{مُدَلَّلَتُهُ}]

ya khti wakli rabi hada houwa 7al el jami3a 3adna fi l'Algerie

 

[sam11]

اختي هادي امور تحصل وحصلت بزاف بصح وكلي ربي عليه

وربي يخلص حقك ان شاء الله ما تحسي بحتى حقرة انتي كنتي تحوسي ترجعي حقك بصح

كاين شيء ناس مام تكون قارية بصح اله غالب مخها مقفول وش يعني ما جستير ولا دكتوراه بصح

مخو مقفول وهو حيوان وكلي ربي وخلاص

 

[MiSs Sisi StyLe]

شكون هاد الحيوااااااااااااااااااااااااااااااااااان
ربي يسترناااااااااااااااااااااااااا
وكلي عليه ربي برك و المهم سلااااااااااااااااااامتك برك و ما تعبيش بهاداك الحيوان
راهو والو قدام ربي

 

[رقيقة المشاعر]

تصرا بزاف في بلادنا و بلادات اخرى
ايه ماكاش أمن في هذي الدنيا
ربي يحمينا..~

 

[أحلام لا تنام]

قولي
حسبي الله ونعم الوكيل
هاذي تكفي
ربي أكبر منك ومنو
وصدقيني مايربح
قولي حسبي الله ونعم الوكيل
وافتخري بروحك
على خاطرك بنت أصل
وما تخليش الحكاية هاذي عالقة في راسك
اعتبريها من الماضي
وادي منها العبرة
وماتزيديش تأمني لأي انسان
مهما كان قربك منو
لأنو للأسف أغلب الرجال في وقتنا الحالي
ذئاب في ثياب رجال
الا ما رحم ربي
​

 

[يسرى 2008]

ربي يهدي يا حبيبتي
مي هادي هي الدنيا لازم تشدي على روحك

 

[zahra z]

حسبي الله ونعم الوكيل
بارك الله فيكم اخوتي والله خففتو عليا ياسر
ربي يعطيكم ما تتمناو ويبعد عليكم السوء والبلاء يا ربي
وربي يحمي كل ولية تخاف ربي وتمشي في الطريق المستقيم.
​