اريد جواب من الشباب

[اية هبة الرحمان]

سوال للشباب و الله قصة صح صرات لصاحبتي
هل انت ضد او مع
المراة تكون متفوقة عليك في المستوى الدراسي
كنت نسمع بنات يقولوا جمالي سبب تعاستي لكن اليوم و للاسف سمعت دراستي سبب تعاستي

هذي صحبتي تعرفت على شاب هو ما يفهمش في مجال الدراسة يعني جامعة ماجستر ووو
المهم حنا رانا نحضروا فالماجستر في الاول ما كانش هذا الشاب عارف واش معناه ماجستر و من بعد عرف واش معناه قالها يا انا يا الماجستر قالها انا ضد القراية مع العلم هو واصل السنة 9 كي تمسكت هي بقرايتها هو انهى العلاقة
قولولي هل الدراسة اصبحت عيب و لا كيفاه

 

[la_safa]

انا بنت هادي هي العقلية تاع اخر زمان
انا نفتخر بالدراسة ..... لانو كون تكوني قارية واحد ما يلعبها عليك

 

[اية هبة الرحمان]

انا نوافقك الراي القراية سلاح المراة و هذي نصيحة من عندي لكل بنات المنتدى مهما كان رايحة تعطيك قيمة واش جاب وحدة قاعدة فالدار لوحدة طبيبة او محامية او............
انا قلت لصاحبيتي عمرك ما تبدلي رايك فالقراية و واصلي حتى للنهاية و ربي رايح يجيبلك راجل من مستواك و يقدر قرايتك و هذي نقطة ضعف فالرجل بزاف رجال يخافوا من المراة المتعلمة لانوا ما يقدرش يحط عليها الهم

 

[المحب الأمين]

عندما تتوقف النساء عن اعتبار المستوى الدراسي سلاح لها ضدّ نصفها الآخر
وعندما تتفهّمه وتحسن العشرة معه ، ولا تتكبّر عليه بعلمها فهذا فضل الله يؤتيه لمن يشاء
وعندما تدري أن زوجها هو حاميها وهو سندها وليس لها غيره
عندئذ يمكن وضع النقاط على الحروف
صدق من قال ، ناقصات عقل
العلم سلاح المرأة ضد الرجل ؟؟؟ وتقولين وش جاب المحامية للي قاعدة فالدار ؟؟؟
لكنّ أمّهات المؤمنين اسوة حسنة لمن كانت ترجو رضا الله والرسول عليه الصلاة والسلام
والله يهدينا ويهديكم
على العموم أفضّل المرأة الذكية المثقفة والذي قرأ تحفة العروس لا بدّ أنه محبّذ أن لا يكون الفارقف الثقافي شاسعا جدا
دمتم ​

 

[ماكانش]

لي عودة اختي
ولي جواب طوييييييييييييييييييييييل

 

[اية هبة الرحمان]

اخي المحب الامين و الله امهات المؤمنين عصر و اليوم عصر اخر
تقولي الرسول صلى الله عليه و سلم و الصحابة مثل رجال اليوم و لا واحد رايح يواقفك الراي
انا لا اعتبر العلم سلاح ضد الرجل بالعكس لكن العلم سلاح لغدر الزمن و اكبر غدر يجي للمراة للاسف يكون من الرجل اما ابوها اما اخوها اما زوجها .........
نزيد نكرر قولي حقا الرجل يخاف من المراة المتعلمة و التي تفوقه في المستوى

 

[sad_pb]

ربي يهديه أنا عندي نورمال المستوى الدراسي أو العلم بصفة عامة ..بالعكس تدي وحدة متعلمة خير من وحدة جاهلة تتعبك​

 

[JSK 14 CH]

الدراسة لن تكون عائق في حياتي ؟؟؟؟؟؟؟ لالا اختي اقراي باه مايحقرش
المرا الامية ماتعرف والوووووووو امالا يحقرها ويغفس عليها
القارية يخاف منها القراااااااية احسن وافضل
​

 

[رقيقة المشاعر]

اكيد تتخلى عليك و تتمسك بدارستها
هذا احسن حل
هو مابغاهاش تكون نيـvـو عليه و خلاص

 

[NICHA03]

و الله يا اختي هاذ صحيتك يعطيها الف صحة باسكو ضركا واحد ماهوش قاري لاوجود له فالمجتمع تاعنا

 

[المتفائلة_91]

اسمحيلي اختي نقلك هذا انسان معقد وحاس بالنقص
ولا كيفاش تفسري يقارن روحو بقرايتها

 

[المحب الأمين]

اخي المحب الامين و الله امهات المؤمنين عصر و اليوم عصر اخر
تقولي الرسول صلى الله عليه و سلم و الصحابة مثل رجال اليوم و لا واحد رايح يواقفك الراي
انا لا اعتبر العلم سلاح ضد الرجل بالعكس لكن العلم سلاح لغدر الزمن و اكبر غدر يجي للمراة للاسف يكون من الرجل اما ابوها اما اخوها اما زوجها .........
نزيد نكرر قولي حقا الرجل يخاف من المراة المتعلمة و التي تفوقه في المستوى

لست أقول أن هناك من يشبه ولو بجزء صغير رسول الله عليه الصلاة والسلام ، أو أحد صحابته رضوان الله عليهم
لكن لنا في رسول الله أسوة حسنة ولوانطلقنا من هذا فقط ستتيسّر الكثير من الأمور وستحّل الكثير من المشاكل التي تولّد سوء التفاهم بين الجنسين في هذا الموضوع وغيره
وكلمة الرجل يخاف من زوجته !! غير مستحبّة هنا ولا يفترض بها تكون فهُما خلقا لتكون بينهما مودّة ورحمة وليس خوف !
راجعي قرارات نفسك فقط واستفتي قلبك فسيحدّثك بالصحيح والمقنع وتخيّلي فقط للحظات ان كان رسول الله الى جانبك فما ستقولين وما ستفعلين ؟؟؟
شكرا لكـ​

 

[azedinm]

اخي انا نقلك حاجة بصح من وجهة نظري

انا كي نعود نهدر مع وحدة جاهلة تعود تهدر على حوايج تافهة برك
بصح كي نعود نهدر مع وحدة متعلمة نحس بلي ما كانش فرق بيناتنا وتهدرلي على حوايج مفيدة وتعرف اداب الكلام





الحمد لله اللي راني معاها متعلمة بصح انا نيـــvــــــو عليها

 

[اية هبة الرحمان]

اشكر الجميع على الرد

 

[naGam]

اختي كاين رجال مايحبوش تكون المرأة مستواها اعلى من مستواه يعني يولي هو بوجادي بحذاها مايعرف والوا ماشي كيماهي تشوف حاجة في تيليفيزيون ولا مع ناس مثقفين وهي تتناقش معاهم وهو يلقى روح ماهوش مثقف كيفها يعني يغير
​

 

[nassim007]

صراحة راني ضد انو تكون طفلة متفوقة عليا !

 

[احساس طفلة]

حتى واحد مايقدر يعرف واش يصرالو مع مرور الايام ...والطفلة لازمها تقرا واذا قدر الله يصرا كاش حاجة لراجلها تلقى قرايتها في يدها وماتكونش ضحكة بين الناس
​

 

[حنان18]

لقوله تعالى :اقرا باسم ربك....

 

[Klach]

اولا انا نتمنى شريكة الحياة تكون قارية او على الاقل مثقفة
لانو انا باذن الله حنكمل قرايتي
و لكن باه واحد نيفو 9 يام اني يدي وحدة عندها ماجيستار ما تليقش
لانو باه يفهمو بعضاهم مستحيل و ما يليقوش على بضاهم
يعني القارية لازم تدي قاري
و صاحب النيفو المتواضع يدي وحدة عندها نيفو متوواضع
شكرا على الموضوع
هذا رايي و تقبلي مروري​

 

[اية هبة الرحمان]

اولا انا نتمنى شريكة الحياة تكون قارية او على الاقل مثقفة
لانو انا باذن الله حنكمل قرايتي
و لكن باه واحد نيفو 9 يام اني يدي وحدة عندها ماجيستار ما تليقش
لانو باه يفهمو بعضاهم مستحيل و ما يليقوش على بضاهم
يعني القارية لازم تدي قاري
و صاحب النيفو المتواضع يدي وحدة عندها نيفو متوواضع
شكرا على الموضوع
هذا رايي و تقبلي مروري
شكرا اخي و يتمنى كلمل ليجان يكونوا يخمموا كيفك كل واحد و نيفوه​