ارواحو نحكيلكم على جنازة جدا ربي يرحمها

الحالة
مغلق ولا يسمح بالمزيد من الردود.
A

amouna.dz

:: عضو مثابر ::
السلام عليكم ورحمة الله وبركاته

ان شاء الله تكونو كامل بخير
اليوم حبيت نحكيلكم على جنازة جدا ربي يرحمها ( ماتت في افريل ):tears::tears:

يعني احنا في المجتمع الجزائري عندنا صح عادات مليحة بصح معظمها خرطي في خرطي

كاين وحد التقاليد ما نفهمولها والو

ياخي في دين الاسلام لازم كي يموت كاش واحد ( بعيد الشر ) 3 ايام ما تتنصبش النار في دار الميت يعني 3 ايام ماكانش الطبخ في الدار

وواش نحكيلكم احنا كنا رايحين نديرو في جنازة جدا غير لبن وتمر وخبز ونجيبو كشما ماكلة من اللي يقربولنا المهم ما نطبخوش في دارنا بصح صرا العكس قالنا الناس يهدرو و عيب ( عدنا نخافو من الناس وما نخافوش من ربي ) المهم طيبنا في دارنا وكلش فات علينا عادي دموعنا يسيحو:tears: و احنا مليوحين في الكوزينة قلوبنا مكويين:tears: و احنا نطيبو في اللحم و الطعام والشربة

وين رانا رايحين بهاذ العادات ؟؟؟ الله اعلم

وميش هاذا كلش...... نحكيلكم شويا على لعباد اللي جاو نهار الجنازة :sneaky2:

واش نقللك الصالو كامل غير عجايز ما نعرفهمش خلاص سمانة كومبلي و هوما قاعدين في الدار ( ميش قصدي حاجة ميش مليحة ولا بصح كومام لازم شويا نقدرو الظروف لالا ؟ )

ماعليناش
وهاذ لعجايز ميش قاعدين و ساكتين لالا لالا :busted_red:
قاعدين ويشرطو ....... الماكلة هكا وجيبولي الما و انا ماديسرتش و حوسولي على الدوا نتاعي (يا مرا شايفة روحك مريضة جي في دارك واتهناي )

ماعليناش

والحاجة اللي غاضتني اكثر هي وحد لعجوز مانعرفهاش خلاص جيت رح انوض ليها نبربشها :busted_red:

جاية توال جدا الميتة وتهدر .......
انا هاذا وين جيت من فرنسا و قعدت معايا وحد لمرا مسكينة مطلقة و بنتها ماتت هنا في دزاير و بالسيف باش دبرت دراهم وجات للبلاد ( غير قولولي هاذي هدرة تتهدر قدام ميت ؟؟ :scared:)
ومباعد هاذ لعجوز سكتتها بنت عمي و كي ما لقات واش تقول ........ قاعدة تقول لبنت خالي اللي تقرا في القرآن اسكتي علينا ( هاذي يعني ظرك ما تستاهلش طريحة ؟ )

والمشكل انها ما تقربلناش خلاص بالاك جارة قديمة ولا ما نعرف

وانتوما يا خاوتي

وش رايكم في هاذ العادات ؟

وواش رايكم في لعجايز هاذو ؟

وربي يرحم امواتنا كامل

سلام
​
 
تمت مراقبة الموضوع و إعتماده ,, عذرا على التأخر في ذلك .
 
نقولك الصح ختي انا ضد هاذ العادات راها جنازه مشي عرس وخاصة هذي تاع اهل الميت يطيبو الماكله هوما فالهم والموت فجاه ميكونوش موجدين رواحهم نورمالمو الناس اللي يقربولهم يجيبو ولا الناس يقدرو الظروف وميثقلوش عليهم ربي يرحم جداك و يصلح لحوال مارسي ختي ... سلالام
 
هذي هدرة تاع الجنس الناعم ولو أني نشوف فيه عاد خشن ...
ماعندي مانعلق لأنو راني راجل مانيش مرا صلت صحيتي
​
 
مشكورة اختي على الموضوع
 
سلام اختي اول ربي يرحم جدك وربي يوسع قبرو
والعادة لي قلت علاه تاع مكانش نار في المطبخ لقط قدية
اعلاه اناس في الثالث ايطيبو الكسكسي
ايقولو كي فورو الكسكسي لافابر تاعو تدي روح الميت تخرجه من الدار هدي تقليد ناس بكري جوهالة
والماكلة وهس تعتبر صدقة على الميت برك تلحق الى قبرو​
 
قال محمدdzقسنطيني:
نورمال اختي ماشي عيب
+
شكون درك قعد يطبق في الدين الاسلامي قد قد مكنش
الناس كمل عدت التبع في بعضها
ربي يرحملك جداتك
متتقلقيش برك القلقة من الشيطان​
إضغط للتوسيع...

ايه عندك الحق يا خويا ميرسي ربي يحفظك
​
 
قال نسيم الربيع:
نقولك الصح ختي انا ضد هاذ العادات راها جنازه مشي عرس وخاصة هذي تاع اهل الميت يطيبو الماكله هوما فالهم والموت فجاه ميكونوش موجدين رواحهم نورمالمو الناس اللي يقربولهم يجيبو ولا الناس يقدرو الظروف وميثقلوش عليهم ربي يرحم جداك و يصلح لحوال مارسي ختي ... سلالام
إضغط للتوسيع...

شكرا على مرورك ربي يخليك
​
 
قال bob marley:
سلام اختي اول ربي يرحم جدك وربي يوسع قبرو
والعادة لي قلت علاه تاع مكانش نار في المطبخ لقط قدية
اعلاه اناس في الثالث ايطيبو الكسكسي
ايقولو كي فورو الكسكسي لافابر تاعو تدي روح الميت تخرجه من الدار هدي تقليد ناس بكري جوهالة
والماكلة وهس تعتبر صدقة على الميت برك تلحق الى قبرو​
إضغط للتوسيع...

ربي يصلح لحوال وشكرا على ردك ربي يخليك
​
 
يا حصراه واش نحكيلك الناس ولات متعرف لا الموت ولا الاحترام كن تشوفي هنا ديفوا كي تحضري كاش عزا والله غير يغيضني الحال بزاف تلقاي نسا ضاربين الحطة للي يشوفهم يقول جايين يعرسو مش يعزو وزيد يجو يمنشرو ويهديرو علي الميت
فكرتيني انا نهار للي ماتت جداتي الله يرحمها ماتت عندنا هذاك النهار امبوسيبل ننساه مام كنت صغيرة وجات واحد لعزوجة جارتنا هى عمرها ولا عرفت جداتي جات تتقرعج برك واش دارت قاعدة تمس في ذهب للي جداتي الله يرحمها لابساتو وتشوف فيه وتقول كشما معولة تسرق والله غير يغيضك الحال
علي العموم ربي يهدينا​
 
أختي العزيزة
شكون قالك الدين الاسلامي يحرم الطياب في دار الميت ثلاثة أيام؟​

أختي الكلام هذا غالط ولا أساس له من الصحة
وهو تألي على الدين الاسلامي
الاسلام ما قالش حاجة كيما هكذا​


أنا قريت مرة أنو عندما استشهد سيدنا جعفر ابن أبي طالب رضي الله عنه
أمر رسول الله عليه الصلاة والسلام أهله أن يحضروا طعاما ويأخذوه لبيت جعفر
وقال "فقد جاء ما يشغلهم"
وهو ماحرمش الطياب في دار الميت
فقط قدر ظرف أهل جعفر وعلم أنهم لن يقدروا على تحضير الطعام للصغار على الأقل
في ظل صدمتهم وحزنهم لاستشهاد جعفر
لكن لم يرد أنه حرم اشعال النار في بيت الميت ثلاثة أيام
انما ذلك من العادات البالية التي غزت مجتمعاتنا ونسبت للدين ظلما وعدوانا​

ومن ناحية أخرى أنتي عندك الحق بالنسبة للناس اللي تجي تقعد في دار الميت
من غير ما تراعي ظروف أهل الميت​
 
ربي يرحمها اختي ..... هادي مجرد عادات هادا راهي جنازة
 
ربي يرحم جداك
و العادة تاع الطعام معمباليش بيها
في النهار 3 كاين لي يطيبوا كسكسي
و الله اعلم
 
بزاف ناس ولاو هكدا مع انو في الشرع
اهل الميت ما يطيبوش الناس تشري و تجيبلهم و الزائرين ما يقعدوش عندهم و صوت القرآن يعلو على كل شي
مي هادو الناس و خاصة العجايز راهم في كل بلاصة اهدري ولا اسكتي
و ربي يرحم جداك
 
ربي معاك ان لاله وان اليه رجعون
 
merci 3la lmawdou3
​
 
أولا عظم الله أجرك اختي

من ناحية هادو الامور الله يجيب الخير
لوكان تشوفي عند الرجال ... واحد جايب معاه الملعقة تاعه وقاعد يتبع في الجنايز يجيك غيل في وقت الماكلة
بصح الله غالب ماعندك ماديريلهم
 
الحالة
مغلق ولا يسمح بالمزيد من الردود.
العودة
Top Bottom