صحيتو شباب صحيتو صبايا
أولا حبيت نطلب منكم طلب بسيط اذا كان ممكن تدعو لزوجة أخى باسكو رايحة تولد اليومين هادو ان شاء الله و اذا كتب المكتوب و تجيب توأم (ادعولها و قولو ربى يسلك وحلها)
اليوم حبيت نزيد نتكلم على جريمة و أنا نعتبرها من أفضع الجرائم و هى:
الاجهاض :
قالك كاينة وحدة حامل راحت عند الطبيب تاعها قاتلو :
دكتور أنا عندى مشكلة كبيرة نعانى منها و لازمك تساعدنى فيها .
قاللها الدكتور تفضلى مدام اذا نقدر نساعدك على عينى و راسى .
قاتلو كيما راك تشوف يا دكتور رانى حامل و ديجا أن ولدت طفل عندو عام و نص و راه متعبنى بزاف ديجا و ما نقدرش نربى زوج درارى صغار و نتحمل التعب تع الولادة مالا يا دكتور أنا رانى حابة نجهض الطفل هذا لى فى بطنى و لازمك تساعدنى .
سكت الدكتور هذاك و قعد يخمم
و مبعد قالها أوكى راح نساعدك بصح بطريقة اخرى و ما كانش فيها خطورة عليك
مالا فرحت المرأة الحامل هاذى و حسبت بلى الدكتور راح يساعدها من المشكلة هاذى و قاتلو أوكى قولى كيفاش راح تساعدنى يا دكتور ؟
جاوبها الدكتور و قاللها أنتى ما تقدريش تربى 2 درارى صغار مع بعضهم ، مالا واش رايك لوكان نقتلو الطفل الصغير لى بين ذرعيك و هكذا ترتاحى و يكون عندك الوقت الكافى و تاخدى قسط من الراحة قبل ما تولدى الطفل لى فى بطنك
و هكا ما كاين حتى خطر على صحتك واش رايك ؟
مالا المرأة هاذيك ولات تترعد و قاتلو لا لا يا دكتور هاذى جريمة قتل ، كيفاش نقتل و ليدى أنا هذا موحال ، غير هاذى ما نعملهاش
مبعد سكتت و قعدت تخمم
و فهمت بلى ما كانش فرق فى قتل الاطفال الاحياء و لى مازالو فى الرحم
و اذا قامت بعملية اجهاض تعتبر عملية قتل عمدى فى حق رزق وهبو ربى علينا .
فيا ترى بأي عقل تفكر المرأة التى تفرط و تقتل مولودها الذى لا ذنب له سوى أنه رزق من الله .
مع تحيات
أخوكم فى الله
Messi Bomb
