.~.:.~. نورمال .. يخي رانا في عرس ما فيها والو !! .~.:.~.

[Houda Chaouienne DZ]

السلام عليكم و رحمة الله تعالى و بركاته

بسم الله الرحمن الرحيم

واش راكم يا جماعة الخير ؟؟ إن شاء الله تكونو لاباس
إذا ماراكمش لاباس قولولي برك ذرك يتنح عليكم

مادام رانا في فصل الصيف .. و كامل علابالنا بلي فصل الأفراح و المناسبات .. حابة نهدر شوي على بعض الظواهر اللي نشوفوها فالأعراس تبالنا ما فيها والو و هي ماهيش مليحة

أول حاجة : حابة نهدر على ظاهرة التعري في الأعراس .. يا لبنات مام قدام النسا مي شوي شوي .. اسمحولي مي بنات خرين يكثرو فيها .. البسو كيما يصلح مش تلبسولنا لبس الفنانات الفاجرات أعزكم الله و تقولو رانا في عرس نورمال
و الله نروحو للعراس نحشمو من النسا الكبار :blush: .. يحيرو .. أنا مانقولكمش ماتلبسوش حاجة مليح .. البسو حاشة ما هيش مفضوحة بزاف ..

​

ثاني حاجة : و هي دخول الرجال للأماكن وين يكونو النساء .. و يقولولك جينا نكاميريو .. يخي عرس ما فيها والو .. يا أخي في العرس ماكانش ربي ولا كيفاه ؟؟ استغفر الله .. كيفاه تحلل لروحك تدخل للنساء و تكاميري نورمال .. حاب تكاميري مد للنسا يكاميريو .. حتى هوما يعرفو .. ماهيش حاجة صعيبة لدرجة تدخل انت ..

ثالث حاجة : الكورتاج .. لبنات كي يجو يروحو للكورتاج .. لي بالحجاب تقلعو .. و لي ما هيش مدايرة هكذاك مليح .. و كي تقولهم كيفاه .. يقولولك يخي عرس نووورمال .. يا سبحان الله .. تحير .. كيفاه مالا .. ربي قالنا في العرس حلال تنحو الحجاب .. يعني برميسيو .. لي تحب تروح فالكورتاج تلبس حجابها .. و لي ما عجبهاش تقعد واحد ما حتمها ..

يا إخواني .. هاذو أكثر ثلاث ظواهر لي يتكررو بزاف في العراس ..

​

و العباد ماهمش مدايرينلهم قصة بزاف ..

يبانو صغار .. بصح هوما عند ربي كبار ..

و ثاني يديرو فتنة فالمجتمع ..

قداه من مرة تطلقت على جال الكاميرا و الرجال لي يدخلو ..

أنا حبيت نكتب هاذ الموضوع باش نحسسكم بخطورة هاذ الظواهر مام رانا نشوفو فيهم صغار

​

لازم نحاولو نتجنبوهم .. و نخليو لي معانا يتجنبوهم

​

على الأقل نغيرو شويا من مجتمعنا لي رايح يضيع

أنا قلتلكم .. و نتمنى ما تنزعجوش من حديثي

و في الأخير .. نشكركم على حسن القراءة

و نتمنى تشاركوني برأيكم في الموضوع هذا
و تزيدو تثريوه أكثر

و السلام عليكم و رحمة الله تعالى و بركاته
​

 

[** غزال الصحراء **]

موضوع حساس يا هدى ,, خاصة النقطة الثالثة , في الكورتاج تشوف لعجب
ديفوا نتوسوس نقول بالاك راني غالط ماهيش هاجي مولات الحجاب !!

تلقاهم ينحو الخمار و مقطرين ماكياج ..إلخ ,, و كي تسقسي علاش ؟ تقولك ياخي العرس يجينا غير خطرة و لازم نزهاو

و كيما قلتي تحسب ربي ماكانش في العرس ,و الله عجب العجابة
ربي يلطف بأمتنا برك

بارك الله فيك .

 

[EL General]

شكرا على التنبيه أول مرة يرد هذا المووضوع بالمنتدى شكرا لكم ...

بالنسبة للماكياج تع الأعراس : 5 كيلوا آلاك في وجوههم ، و 6 كيلو آوندوي ، تحييير تفهم و لا تتفهم

هاذي الناس كاين منها بزاف ، و الأعراس في الصيف تكثر ، و السخانة علابالكم راهي بزاف ، و هاذيك هي الفرصة المواتية ، كي تجي تحكي معاهم علاه و علاه ... يقولك السخانة لازمنا انحيو قشنا

المهم القالب فيها فيها

و أما بالنسبة للكورتاج ، فهو كيف كيف

و ديرو في بالكم بلي راهو كاين عريس و عروس يتزجوا من ولايات بعيدة و راكم تعرفوا الكورتاج ، هههه طريق كاملة الخمار ماكانش ربي يستر ،، و الكامير اتبع

و أما بالنسبة لـ : دخول الرجال

هاذي نعطيلك الحق فيها
كاين رجال بزاف يدخلوا مش على جال الكاميرا و لا حاجة
يحبوا يدخلوا باش يحرجوا أنفسهم و راكم علابالكم على واه يحوسوا ،
يا صاحبي بنات الناس و راها الناس مخلطة الداخل
روح شوف شريكة العمر و لا حبيبتك بعيد على الناس

مرسي عليكم إثرتم نقطة مهمة في الناس و خاصة في الصيف

مشكورين .........
​

 

[بيكهام]

ربــي يخـليـك موضوعك في القمة
رووووووعـــــة
تقبل منى أجمل التحيات والمودة
شكرا لك
بيكــــهام
تشاو تشاو ​

 

[تسنيم الهناء]

حقيقة يا حلوة هي ظاهرة مش غير منتشرة
و يبانلهم الي تعري اكثر هي لي حطة كثر, ووحدة تلقايها مخلوعة تقلد في اليسا و لي تقلد في هيفاء و لي و لي
هذاك اوموا راهو باين حسابهم عند ربي و العبد بصح حنا لي كارثة

ربي يهدينا هذا ما كان, و الله لعبد شاف كلش بصح و الله ما كان خير من السترة و التربية

شكرا ليك بالتوفيق
​

 

[miss meryy]

عندك الحق اختي الله يهديهم

 

[سماح4]

عندك الحق حنونة واش تحبي ربي يهديهم وأن شاء الله يكون موضوعك تنبيه لكثير من البنات ربي يخليك ويجعلو في ميزان حسناتك ،والله لعجب راهو صاري في بعض لعراس وهذي الظواهر كاين منها فعلا ...شكرا.

 

[ملك اللمة]

الله يهدينا و يهديهم للخير قولو آمين

 

[sandybelle]

الله يهدينا
مرسييييييييييييييييييي على الموضوع

 

[فراشة الايمان]

وش راح تقولي ربي يهديهم ولا يديهم .

 

[DARINE05]

صاح هذي ضاهرة كاينة بزاف ربي يهديهم

 

[ريفال]

شوفي يا اختى الموضوع تاعك راه يحكى في الصح بصح ماشى كل البنات هك كاين لي محتشمة وتعرف كيفاه تلبس وكاين لي رايحة فيها تلبس كيما هيفاء وزيد.......... صح هاد الشئ فرط فى حدو ديفوا تلقى وحدة مسشورة ودايرة مكياج تاع عروسة وخارجة لكاش شاب هداي تانى كاين منها البنت تلقى راحتها في الاعراس زعما كى دير هكا راح يكون معجب فيها لا بالعكس والله ترخص روحها برك

 

[02asma02]

يا ختي واش نقولك ربي يهدي ما خلق
​

 

[أماني2]

يعطيك الصحة
موضوع مليح ونقطة مهمة

كامل لعراس ولاو هكذا ربي يصلح الأحوال
وزيديلها لغنا اللي يديروه بدون توقف وزايد أفون بالدي جي
هذا ازعاج كبيييير

ربي يهدي الجميع ان شاء الله
​

 

[dana1993]

أول حاجة : حابة نهدر على ظاهرة التعري في الأعراس .. يا لبنات مام قدام النسا مي شوي شوي .. اسمحولي مي بنات خرين يكثرو فيها .. البسو كيما يصلح مش تلبسولنا لبس الفنانات الفاجرات أعزكم الله و تقولو رانا في عرس نورمال
و الله نروحو للعراس نحشمو من النسا الكبار .. يحيرو .. أنا مانقولكمش ماتلبسوش حاجة مليح .. البسو حاشة ما هيش مفضوحة بزاف ..


و الله صح كاين منها يلبسو لبسة متصلحش كي تكوني وحدك و متتلبسش يا سيدي هاذو نقولهم ربي يهديكم



ثاني حاجة : و هي دخول الرجال للأماكن وين يكونو النساء .. و يقولولك جينا نكاميريو .. يخي عرس ما فيها والو .. يا أخي في العرس ماكانش ربي ولا كيفاه ؟؟ استغفر الله .. كيفاه تحلل لروحك تدخل للنساء و تكاميري نورمال .. حاب تكاميري مد للنسا يكاميريو .. حتى هوما يعرفو .. ماهيش حاجة صعيبة لدرجة تدخل انت ..


ايه صح كاين بصح حسب اهل العرس هوما لي يتحكمو في كلشي والله في عرس ختي خويا و مدخلش كلشي من بارا لسحق حاجة يبيبي نروحلو ولا يعيط راجل مدخل الحمد لله بصح كاين لي لا احم لا دستور يقولك دارنا ولي معجبوش يقلع بصح ماهيش عقلية هاذي
ربي يصلح لحوال

ثالث حاجة : الكورتاج .. لبنات كي يجو يروحو للكورتاج .. لي بالحجاب تقلعو .. و لي ما هيش مدايرة هكذاك مليح .. و كي تقولهم كيفاه .. يقولولك يخي عرس نووورمال .. يا سبحان الله .. تحير .. كيفاه مالا .. ربي قالنا في العرس حلال تنحو الحجاب .. يعني برميسيو .. لي تحب تروح فالكورتاج تلبس حجابها .. و لي ما عجبهاش تقعد واحد ما حتمها ..

ايه هاذي بزااااااااااااااااااااااااااف تلقايها حجاب نهار الكورتاج الشعر متلوق من الفوق دوني وملتحت ميني وسلكيها نتي انا الحمد لله ملي تحجبت جامي خرجت بلا حجاب هههه ههههه و لكورتاج نروح غير اذا كان تاع الاقرب الاقرب ومع لازم واحد قريب


يعطيك الصحة وتستاهلي تقييم

 

[Mr mino]

والله يعطيك الصحة هدى اختي

موضوعك قمة

بارك الله فيك


​

 

[nina_el_zina]

ah oui normalmo a7na ysamona blade normale psk kole 7aja 3adna normale mais el hmd ma9asitniche hadi el dahira eli raki tez7ki 3liha mani dayra khimare manedi dnoubou ki na7ou w ana chaba bla makiyage hmd mandire makiyage mawalo zini naturale machi taywane tsibihome kamele dayrine des tableaux ta3e makiyage w el lebsa sa7e nelbese
en fin merci beaucoup pour ce phènomaine

 

[islam7729]

ربــي يخـليـك موضوعك في القمة
رووووووعـــــة

 

[✿ мιss яosє ✿]

والله عندك الحق اختي ، هذي طبيعة خاسرة منتشرة في كل بلاصة
وزيدي اشياء اخرى راهي تصرا فالعراس والله العبد ولا يحشم.... اختلاط ولباس مفضوح ورقص وغناء ساقط ....
ربي يهدي ما خلق
​

 

[جزائرية حتى الموت]

الله يعطيك الصحة اختي هدى على الموضوع

بصح شكون اللي راه يعمل بالنصيحة

اللهم اهدينا واصلح شاننا