قصة واخد وهراني في رحلة الانسكرييسيون

[adnandz]

السلام عليكم خوتي وش راكم
راني وليت بعد غياب طويل والله ما فقت بالوقت
هي انا رحت لفاكونس بالعربيى راني نتشيخ عليكم راني نغير فيكم فهموني

رحت لسكيكدة باش نبحر
انا علابالكم بلي ربحت الباك
كنت داير بيتروشيمي في سكيكدة كنت حاسبهم غادي يقيسوني لتما
كنت فرحان ههههههه

مي في النهاية قاسوني
في تيارت
هندسة ميكانيكية وانتاجية في قصر الشلالة بلدية تابعة لتيارت بعيدة عليها ب 132 كلم واوواواوااواواواواو

ايا انا في الاول قلت ان شاء الله ما نروح نمركي نقعد في داري

مي الا فان دورتها في راسي وقلت هادا هو مكتوبي نروح واللي جات جات

انا ما كنتش نعرف قصر الشلالة وين
المهم قلعت من سكيكدة وصولا الى وهران جهزت نفسي وانطلقت الرحلة باتجاه تيارت

بعد الرحلة الطويلة الاولى وصلت الى تيارت ثم انطلقت الى قصر الشلاشة رحلة طويلة اخرى

هنا الكارثة عندما وصلت الى الجامعة ههههههههههه ماهذا وش هذا جامعة نتاع المحابيس والمعاقبين من طرف بن بوزيد فقال لي الحارس
التسديل في جامعة تيارت ابن خلدون هههههههه
وش ندير نقتل روحي ههههههههههه

المهم وصلت لتيارت سجلت وكان الناس ملاح معي والله ناس تيارت ناس ملاح
المهم سجلت التسجيل المهم
وعدا قالولي ولي باش تدي لكارت ايتيديون

المهم وليت عدوا وديت لكارت ايتيديون
وكملت كلشي
كابتي ولايتي


وتعلمت حاجة بلي ربي ما ينساش عبدو
الكاتبة لاحقة لاحقة خوتي ​

 

[** غزال الصحراء **]

وي قصر الشلالة حكاولي عليها باللي Guantanamo ,, ربي يصبرك شريكي .

 

[سمكة البحر]

بصحتك عدنان عقوبة للتخرج

 

[قَطٌر❀ الٌنَـدَى]

مام انا لاحوني بعيدة علي ولايتنا ب 550 كم لاحوني في تلمسان المرة 1 بكيت علي زهري قلت العام كامل وانا نجبد ونقري وساهرة الليالي ومن بعد شاب راسي مع الطعون والتسجيلات بصح رضيت هذا وش كتب ربي ومتعرف الخير كامل وين راه
ايا بالتوفيق ليك ولكامل الناس للي كيما احنا​

 

[nina bonoise]

ana khalawni fi annaba

 

[tear of angel]

والله ماعرفت نقلك مبروك عليك ولا ربي يعينك

 

[سهام1992]

مبرووووووووووووووووووك عليك والعقوبة ليا
في الباك ماشي قصر الشلالة هههههههههه

 

[EL General]

ربي يقدرك و يصبرك على كل المحن وليد بلادي
​

 

[sisou023]

ربي معاك أنا قاسوني قدام دارنا هههههههه ريحت

 

[programmeur]

واش نقولك خويا دبر راسك واش دير
بصح ربي يعينك
والله يوفقك خويا

 

[khalilou algerino]

ربي يصبرك صحيبي ........... صحيت
​

 

[Kynda]

هههههههههههه واش نقولك خويا ربي معاك معليش اصبر و كمل قرايتك فيها الخير ان شاء الله
​

 

[عفاف الجزائرية]

مبروك عليك خويا عدنان وربي يصبرك وما تخممش ياو 4 سنين ولا 5 يفوتو 5 ايام
وما تعيا تقول قالتها عفاف الجزائرية قالتها
وما تعيا رافد ديبلومك وتتفكر غير في الايامات
بالاك ربي نحاهالك من سكيكدة ومدايرلك حاجة مليحة في تيارت
المهم كوراج برك وكل شي يفوت
​

 

[N@riM@N]

ربي يعــــــونك ياخويا صعيب لبعد عالدار

شويا كوراج بركـ​

 

[adnandz]

مشكورين على تطليع المورال

 

[adnandz]

ويييييييييين راكم

 

[AHLEM1992]

انا البارح تان سجلت في جامعة باب الزوار وحد التنظيم فور لا تقلاق لا والو تفري شغالتك ديراكت سجلت و اديت البطاقة و الاقامة و لابورس قبل 12 كنت كملت و رحت نحوس في باب الزوار هههه
،،،
هدا واش كتبلك ربي يا خويا ادا عندك معرفة في سكيكدة بدل و سايي
و ربي يوفقك بلاك في هادي المادة يكون مستقبل مليح ليك
الله يكون معاك ،،

 

[adnandz]

يا اختي بالبراكة عليك

 

[D aucun]

السلام عليكم
هاك خويا انا تيارتي اوكي وسي جامي لا رحت لقصرشلالة مي كاين عندي صحابي يقرو تم وجامي لاتقول بلي ماشي مليحة داكور يا شيخ وكامل لي سيتي كيف كيف اوكي ديجا الحي الجامعي المتطوع تاع وهران راني تم انا اوكي ونقولك حاجة سقسي غايا على لا سيتي تم غادي تعرف بلي هي اقامة بزاف شابة عدد قليل ياخويا في لافان غادي نفهمك انك انت رايح تقرى دير في بالك حاجة الاقامة وسيلة ماشي غاية و نت غادي تفوت 3 سنين تاعك وتولي لمارافال ياك ايا شانقولك يا شيخ ربي يكونلك في العون
تعيش​

 

[adnandz]

صحيتي خويا العزيز
مي البعد يا خويا ما غاديش تقولي وهران كيما قصر الشلالة
وديجا انا غادي نقرا في تيارت العام الاول والزاوج نروح نتخصص في قصر الشلالة
وجاتني تيارت مليحة بزاف علاه في ميزيك
على جال ناسها