قولولي واش طيبو في السحور ؟؟

[sweetprincess]

السلام عليكم و رحمة الله ،،

صح رمضانكم ~ّّ||

واش راكم مع رمضان إن شاء الله تكونوا بخير ،، يخي ماشي مغلوبين برك :music_whistling:

أنا حبيت تقولولي واش راكم ديرو في السحور ..

كل يوم حليب و قهوة :glare: كرهنا

من فضلكن كل وحدة تقول واش دير في السحور أنا خيتكم :tears::tears:

و صح فطوركم عزيزاتي :wink:

 

[*Nouha*]

و الله يا ختي انا ما نحبش الحليب و ما نسحروش بيه نسحر بشوية فلان مع القاطو و ساعات نكملها بالبوراك و حوايج خفيفة
كاين عائلات يسحروا بالمسفوف و كاين اللي يوكلوا وش بقى من الفطور و مانعرف
مرسي و صح فطورك
​

 

[ibtesem]

يسحروا بالمسفوف هذا سحورنا
ليعملوه بالزبيب والسكر
شكر

 

[sweetprincess]

شكرا لكما أختاي بارك المولى فيكم
و صح رمضانكم ربي يتقبل

 

[Mr.Tahar]

نكون مغمض عينيا
معلاباليش وش مطيبين
ناكل وخلاص
هههههههه
يسحروا بالمسفوف​

 

[sweetprincess]

نكون مغمض عينيا
معلاباليش وش مطيبين
ناكل وخلاص
هههههههه
يسحروا بالمسفوف​

هههه ماعليش صح رمضانك خويا
​

 

[سالي فور]

انا معنديش نظام محكم ههههههههه كل مرة كيفاه ساعات من الي بقاو في الفطور وساعات بالمسفوف
صح فطورك

 

[المزعجة]

السلام عليك اختي والسلام على حباب اللمة
انا شخصيا ما نسحرش ودارنا ما يسحروش
لكن نقدر ندبر عليك بحاجة وان شاء الله تعجبك عجني بيتزا وخليها تخمر وقسميها دوايرات وديريها في لاقلاص
وخدميلها لاصوص تاعها وخليه جانبا وكي تسهري تكملي تجي ترقدي نحي البيتزا من لاقلاص وحطيها في لفريجيدار لتحت ماشي في لا قلاص كي تنوضي عند السحور ديريها طيب ياخي شفتي البيتزا ما طولش في طيابها عشر دقايق وهي طابت وتسحرو عليها بالصحة والهنا ورمضان مبارك ليك ولكل العايلة ولكل اللمةههههههههه وشكرا تحبو نمدلكوم لاغوسات تاع البيتزا مليحة شوية كيما تحبو ههههههههههههههههه.

 

[امينة الجزائرية]

انا نسحر بالحليب
بصح تاع دارنا يسحرو بالمسفوف
​

 

[IMANO77]

المسفوف ولا الفلون ولا لي بقا من الفطور الرسمي في قرع الماء

 

[nawal1980]

نسحر بالحليب والبريوش ومن داك بالمسفوف والرايب
وراجلي ياكل الي تبقى من الفطور قبل السحور ومن بعد المسفوف باللبن ولترا ماء

 

[حسام 119184]