القهوة و الدخان

[** غزال الصحراء **]

​

السلام عليكم و رحمة الله تعالى و بركاته ,, صحا فطوركم خاوتي ( مالgري راني نكتب في الموضوع و السحور قريب ) المهم واش راكم مع رمضان ؟ غالبكم ولا غالبينو ؟ علابالي باللي الخيار الأول هو حالتكم

اليوم بغيت نحكي على ليجان تاوعنا ,, و بالأحرى بعد ما شفت كليلكة من صحابي كيفاش عايشــين //
واش يعجبني فيهم ما يريحوش دايمن خدامين , يعني جامي يقعدو شوماج دايمن يبوجو و يجيبو المصروف , مي المشكل أنو المصروف هاذا في واش يروح ؟ يفليكسي و يحكي مع صاحبتو !! يشري دخان !! كاس قهوة , و وحدة جال Mp3 ،، صاي قضات المصيريفة ..

و كي تحكي معاه تقولو واش راك تبوجي على روحك باين معول على زواج و لا دار ولا طوموبيل , يلقولك يا حسراه على الSalaire اللي راني ندي فيه , غير حق قهوتي و دخاني !! وجهو صحيح :no_1:

يعني كاللي الحوايج هاذو هوما الأولويات و التاويل حاجة ثانوية ماهيش مهمة خلاص ..

نصيحتي لخاوتي ,, كاين حوايج يهردو الدراهم و الصحة أخطيكم منهم خاصة في الفترة تاع اللي لازم تكون فيها روحك و هوما : ( البنات - الدخان ( و مشتقاته من دعاوي الشر ) - البورطابل - التبياش )

كل حاجة عندها وقتها , مانيش نقول أغبن روحك و ما تتهلاش في عمرك ،، لا لا خويا قيس قبل ما تغيص , كل يوم يفوت عليك و أنت شاب راك تندم عليه كي تولي كبير

يا الله جا الوقت باش نقولكم تهلاو في رواحكـــــــــم , و رمضنو Intik
:wink::wink:

Peace .

 

[EL General]

شكرا موضوع هايل و نتسحرو بيه
تلقا واحد يخدم مونيفري و يهنبر مع الماصوات
و مباعد كي يروح يدورها تبياش و جال
+ فلاش ديسك mp5 و لا بورتابل samsung
باش يكون زعما كبابلي على لوخرين

شكرا أخي

​

 

[** غزال الصحراء **]

شكرا موضوع هايل و نتسحرو بيه
تلقا واحد يخدم مونيفري و يهنبر مع الماصوات
و مباعد كي يروح يدورها تبياش و جال
+ فلاش ديسك mp5 و لا بورتابل samsung
باش يكون زعما كبابلي على لوخرين

شكرا أخي

​

يا خويا إيماجيني ليجان اللي قلت صحابي أغلبيتهم لاصقين غير في الماصوات :surrender:
يعني صعيــبة تطيب روحك مونيفري في الشمس و قاع و في لخر على جال واش ؟ وحدة جال و صباط لاكوست //

صحيتي خويا مارادونا منور .

 

[souhila_95]

موضوع قمة+تقييم
والله ياخويا يهبلوني ليجان نتاع هذا الوقت مانعرف ماشي فايقين مانعرف ناقصين توعية...........
واش نقلك ربي يهديهم للطريق المستقيم
وربي يصلحنا في بلادنا انشاء الله
يعطيك الصحة على الموضوع
وصح سحورك وسحور كل من دخل الموضوع
​

 

[البرنس]

نصيحتي لخاوتي ,, كاين حوايج يهردو الدراهم و الصحة أخطيكم منهم خاصة في الفترة تاع اللي لازم تكون فيها روحك و هوما : ( البنات - الدخان ( و مشتقاته من دعاوي الشر ) - البورطابل - التبياش )


واش نقوولك خويا

راه كلامك صح

والناس راه عقليات كاين ليفكر وكاين ليقول خليني نعيش اليوم

مشكوور خويا هشام

وانا عندي القهوه ضروريه

 

[المتفائلة_91]

وش عنديرولهم ، مساكن يغيضوني ليجان اللي كيما هكا يشفو والله ويقطعو القلب ، عمبالكم علاه ن خاطر ما يعرفوش يخممو مليح ،، ايا وش نديرولهم تجي تهدر مع واحد ، يقولك واش ندير نموت مانعيشش ، اولهم خويا نجي نهدر معاه يقولي وش دخلك نتي تولهي بروحك واسكتي ، والله غير غايضني المخلوق في رمضان مرمضن ينوض بكري ويروح يخدم ، الحاجة اللي يجبها تفض في السهرية ، الله اعلم وش يدير بيها ، تجي تهدرو يهد عليك السقف

المهم ،،

موضوع هيلول



شكرا بوكو



صح سحورك



سلاموووو​

 

[** غزال الصحراء **]

موضوع قمة+تقييم
والله ياخويا يهبلوني ليجان نتاع هذا الوقت مانعرف ماشي فايقين مانعرف ناقصين توعية...........
واش نقلك ربي يهديهم للطريق المستقيم
وربي يصلحنا في بلادنا انشاء الله
يعطيك الصحة على الموضوع
وصح سحورك وسحور كل من دخل الموضوع
​

ندعولهم الهداية و كلش راهو في العقل , إذا راح التخمام راح معاه كلش
شكرا سهيلة , صحا سحورك أنتي زادة

فيلامان .

 

[** غزال الصحراء **]

نصيحتي لخاوتي ,, كاين حوايج يهردو الدراهم و الصحة أخطيكم منهم خاصة في الفترة تاع اللي لازم تكون فيها روحك و هوما : ( البنات - الدخان ( و مشتقاته من دعاوي الشر ) - البورطابل - التبياش )


واش نقوولك خويا

راه كلامك صح

والناس راه عقليات كاين ليفكر وكاين ليقول خليني نعيش اليوم

مشكوور خويا هشام

وانا عندي القهوه ضروريه

أهلا يا برنس ,, اه وي القهوة مام أنا ما تخطينيش , و أنا كي نقول القهوة مانيش نحكي عليها بالذات مي راني نحكي على البروتوكول كامل ,, يعني عرقك وين راه يروح ؟

أنا القهوة يطيبوه الدار , خاصة في سهرات رمضان ما تخطيناش :wink:
شكرا على المرور .

 

[iméne09]

عندك الحق هشام تحير معاهم هو مايجي يجيب مصيرفة حتى بريق ناشف ويهنبر ويدمر على جال حوايج تافهين تلقاهم غير مع تبياش مايسلكوش ني تاويل ني مندبة كترتها لي كبار 30 سنة ومزال مالمش باش يتزوج هدا واش راه يستنى حتى يفوتو تران ولا شاطرين غير في قصور وتبياش ويقولك زمان عقوبة اوموا يخممو يخبيو شوية باش كي طيح بيهم يلقام مصروف الله لا حياة لمن تنادي نهدرو في باطل في الصح واحد ماتلقاه عندو عقل
مسـgـم يخمم في عقوبتو
يعطيك الصحة هشمو موضوع وعليك لكلام+تستاهل تقييم ​

 

[** غزال الصحراء **]

وش عنديرولهم ، مساكن يغيضوني ليجان اللي كيما هكا يشفو والله ويقطعو القلب ، عمبالكم علاه ن خاطر ما يعرفوش يخممو مليح ،، ايا وش نديرولهم تجي تهدر مع واحد ، يقولك واش ندير نموت مانعيشش ، اولهم خويا نجي نهدر معاه يقولي وش دخلك نتي تولهي بروحك واسكتي ، والله غير غايضني المخلوق في رمضان مرمضن ينوض بكري ويروح يخدم ، الحاجة اللي يجبها تفض في السهرية ، الله اعلم وش يدير بيها ، تجي تهدرو يهد عليك السقف

المهم ،،

موضوع هيلول



شكرا بوكو



صح سحورك



سلاموووو​

هاذي هي الدراهم يجيبها النهار و يديها الليل //
و المشكل أنهم حابين يرتاحو و ماهمش عارفيــن كيفاش !!

هاذا الراجع للعقل , اللي يخمم مليح ,, و الله مام بكونطرا تاع تشغيل الشباب قادر يدير بيها !!

و اللي رايو تالف مال قارون ما يحركلوش شعرة ... ربي يلطفنا و خلاص
شكرا على المرور
أسعدني ردك

و صحا سحورك أنتي زادة .

 

[مروة MARWA]

وعليكم السلام ورحمة الله تعالى وبركاته
***
pfffffffff
واش نقولك
ريسانهم فارغة 00
شكون لي مازال يشوف ويخمم لبعيد درك؟ كل واحد يشوف عند خشمو ومايفوتش
لي جان تاع هاد الوقت حاشا البعض= تpياش وبنات
لي يكون حاكم قدرو وخاطيه هاد الشيء = مريض كومpليكسي
واش من عقل بقالهم والغلطة راهي من عندهم في زوج حتى لبنات ماشي قلال بالعمايل تاعهم
راياتهم داهبة
كل يوم راني نشوف ديكاتاستروف كتر وكتر
ماعلينا وكيما نقولو دايما غير ربي يهديهم ويصلح رايهم
***
اسفة ع الاطالة + تقييم

مشكور هشام موضوع قمة
​

 

[** غزال الصحراء **]

عندك الحق هشام تحير معاهم هو مايجي يجيب مصيرفة حتى بريق ناشف ويهنبر ويدمر على جال حوايج تافهين تلقاهم غير مع تبياش مايسلكوش ني تاويل ني مندبة كترتها لي كبار 30 سنة ومزال مالمش باش يتزوج هدا واش راه يستنى حتى يفوتو تران ولا شاطرين غير في قصور وتبياش ويقولك زمان عقوبة اوموا يخممو يخبيو شوية باش كي طيح بيهم يلقام مصروف الله لا حياة لمن تنادي نهدرو في باطل في الصح واحد ماتلقاه عندو عقل
مسـgـم يخمم في عقوبتو
يعطيك الصحة هشمو موضوع وعليك لكلام+تستاهل تقييم ​

شكرا إيمي ,, هاذي هي و الله قلبي يتقطع كي نشوف اللي متوشي الثلاثيــنات و ماهوش خادم تاويلو ,, خاصة إذا تلقى شبابو كل راح في الخدمة و الدمير ,, يعني ما بقالو والو راحت صحتو pour rien

أسعدني ردك //
صحا سحورك

و تم تقيـــم ردك الرائع :wink:

 

[البرنس]

أهلا يا برنس ,, اه وي القهوة مام أنا ما تخطينيش , و أنا كي نقول القهوة مانيش نحكي عليها بالذات مي راني نحكي على البروتوكول كامل ,, يعني عرقك وين راه يروح ؟

أنا القهوة يطيبوه الدار , خاصة في سهرات رمضان ما تخطيناش :wink:
شكرا على المرور .

خويا هشام راني فهمت عليك وانت مافهمتنيش

قتلك فيه ناس تفكر في مستقبلها وفيه ناس حابه تعيش يومها

وقصة القهوه انا غير مجرد جمله قلتها

وصحا سحورك خويا وصحا فطورك انشالله

 

[NaDiA.]

والله غير صح ليجان يسحقو هدرة كيما هادي
والله غير خصهم التوعية مساكن يشوفو غير لليوم و ناسيين بلي غدوة صعيب
واش تدير ربي يكثر من مثالك موضوع قمة و ربي يهدي الشبيبة ..هوما الصح ف هاد البلاد

صح سحورك
​

 

[radia yoyo]

يعطيك الصحة على الموضوع
+3
​

 

[** غزال الصحراء **]

وعليكم السلام ورحمة الله تعالى وبركاته
***
pfffffffff
واش نقولك
ريسانهم فارغة 00
شكون لي مازال يشوف ويخمم لبعيد درك؟ كل واحد يشوف عند خشمو ومايفوتش
لي جان تاع هاد الوقت حاشا البعض= تpياش وبنات
لي يكون حاكم قدرو وخاطيه هاد الشيء = مريض كومpليكسي
واش من عقل بقالهم والغلطة راهي من عندهم في زوج حتى لبنات ماشي قلال بالعمايل تاعهم
راياتهم داهبة
كل يوم راني نشوف ديكاتاستروف كتر وكتر
ماعلينا وكيما نقولو دايما غير ربي يهديهم ويصلح رايهم
***
اسفة ع الاطالة + تقييم

مشكور هشام موضوع قمة
​

أهلا بيك , منين جاك الشي هاذا كامل ميمي ,, و الله كفيتي و وفيتي , لا كان جينا في المسابقة لاكاني قلت : ( إجابة صحيحة و كاملة )

ايه و الله يشوفو غير عند خشمهم , كيما قالو ( زدنا خطوة للقدام طحنا في بير ) واش رايح نقولك ربي يلطف برك ,, و صح لبنات ثاني ما حبيتش نحكي عليهم باش يكون الموضوع مخصص , خطراش لاكان جبدت على الجانب لوخر رايح الصفحات ما يكفوش //

مرسي عليك على مرورك العطر
منورة الصفحة و الله

تم التقيــــم :tears:

 

[** غزال الصحراء **]

خويا هشام راني فهمت عليك وانت مافهمتنيش

قتلك فيه ناس تفكر في مستقبلها وفيه ناس حابه تعيش يومها

وقصة القهوه انا غير مجرد جمله قلتها

وصحا سحورك خويا وصحا فطورك انشالله

و أنا ثاني ما عكستكش برك درت إظافة
ربي يعيشك خيو ,, و مرورك منور الصفحة

تحياتي الخالصة
و صحا سحورك و فطورك أنت زادة :wink: .

 

[** غزال الصحراء **]

والله غير صح ليجان يسحقو هدرة كيما هادي
والله غير خصهم التوعية مساكن يشوفو غير لليوم و ناسيين بلي غدوة صعيب
واش تدير ربي يكثر من مثالك موضوع قمة و ربي يهدي الشبيبة ..هوما الصح ف هاد البلاد

صح سحورك
​

ربي يعيشك نادية ,, وي راني هنا ننصح خاوتي ليجان و ننصح روحي قبل كلش //
كيما قال واحد :: ( ملي عرفت صلاحي حتى لليوم مانيش صاحي )

أسعدني ردك منور الصفحة ..
صحا سحورك أنتي زادة .

 

[مروة MARWA]

أهلا بيك , منين جاك الشي هاذا كامل ميمي ,, و الله كفيتي و وفيتي , لا كان جينا في المسابقة لاكاني قلت : ( إجابة صحيحة و كاملة )

ايه و الله يشوفو غير عند خشمهم , كيما قالو ( زدنا خطوة للقدام طحنا في بير ) واش رايح نقولك ربي يلطف برك ,, و صح لبنات ثاني ما حبيتش نحكي عليهم باش يكون الموضوع مخصص , خطراش لاكان جبدت على الجانب لوخر رايح الصفحات ما يكفوش //

مرسي عليك على مرورك العطر
منورة الصفحة و الله

تم التقيــــم :tears:

هيا كح تشوف ال 5 نقااط
:yahoo: :yahoo: :yahoo:
***
موضوعك في الصميم ويقيس فئات بزاف من المجتمع على ديك نزل عليا الوحي :music_whistling:

بصح هادا هو الواقع صح وواش رانا نشوف يوميا
***
الموضوع منور بصاحبو
تسلم
​

 

[** غزال الصحراء **]

يعطيك الصحة على الموضوع
+3
​

صحيتي راضية ,, شكرا على المرور
خير الكلام ما قل و دل :heh: