ممكن تجاوبوا على سؤالي ؟؟؟

[بنت الجزائر و افتخر]

السلام عليكم
واش راكم اعضاء اللمه العزاز وواش اخباركم ؟؟
توحشت اللمه بزااااااااااااااااف

راني في مده طوييييييله ما فرغتش قلبي و جيتكم نفرغ قلبي لاني ما عنديش غيركم حتى اصدقائي قلال و ما يحبوش يسمعو لتفاهاتي

فاتت عليا مده من هاد العام تشوكيت فيها ما كنت نهدر مع اي واحد و السبب هوما البنات اللي في كلاستنا
توجور يعلقو على هدرتي ...توجور يمنشرو فيا ... توجور وين نروح نلقا البنات يهدرو عليا
رغم اني كنت نحبهم الكل و نعاملهم باحترام و هوما دايما يديرو عليا اشاعات و يهدرو و يهدرو
و رغم اني مليحه معاهم كامل يقولو للكل عبير ماشي مليحه

على هادا اسبوعين و انا ما نهدرش معاهم حتى لما واحد او وحده يواسيني يزعفو منو او منها
لانهم جاو و قالولي اخطيك هادوك غيارات

اما درك خلاص ما وليتش نهتم للناس و لا للبنات و رغم انو البنات بس هوما اللي يقولو عليا هدره ماشي باهيه

على هادا صرت نهدر بس مع البنات اللي يستاهلو نهدر معاهم و درك خلاص ما وليتش عبير الحساسه اللي تبكي على جال هدره خايبه و اللي تغيضني بزااااااف اني نعاملهم مليح

انا حبيت نسقسيكم حاجه وحده برك .......... علاااااااااش البنات يديروا هاكا مع انني نعاملهم كي خواتاتي؟؟؟؟؟؟؟؟؟؟؟؟؟

شكرا لسعة صدوركم و شكرا لانكم سمعتولي

تقبلو تحياتي.......:tears:

 

[اسماء16]

خيتو عبير انا راني نشوف ونسمع بززاف قصص من هدا نوع
خليك منهم هدي غيرة برك ملحقوكش ولو يهدرو فيك المهم عيشي حياتك باه كانت وكملي قرايتك وغير تخلاص يخلاص كلش وديري اصدقاء ملاح ومتخميش في هدرتهم كيما يقولووو يهدرو يهدرو كي ميلقوش تردي عليهم يسكتووووو اوكي حنونة تقبلي مروري التواضع اختك اسماء
​

 

[azoula]

شوفي ختي عبير نتمنى تكوني بيان ونقولك الا سمعتي لهدرت الناس واهتميتي بالشي لي يهدروه صدقيني جامي تقدري تعيشي وشوفي للقدام والناس هذو لي قاعدة تحكي عليهم حطيهم تحت رجلك وعفصي عليهم باسكو مايساهلوكش
خذي برايي ماتسمعيش لهدرت الناس والله العظيم يدمروك
وكيما يقولو الغيرة تهدر هاذي هيا لوكان ماغاروش منك والله مايهدرو عليك
وديري كيما ختك ماتسمعيش لكلام الناس وعيش حياتك كيما تحبي............... مرسي​

 

[TIBA BITA]

شوفي اختي ماديريش على هدرتهم و تولهي بروحك و بقرايتك
مكانش حاجة تنفعك في هاذ الدنيا غير مستقبلك

 

[Nono d'alger]

نستعرف بيك ختي
انا تاني راني في نفس المشكل يغيرو مني بزااف مي ماتديريش عليهم أنا نفوت ونخليهم يحكو واش حبو ومانديهاش فيهم

 

[loula09]

انا نقولك ما تكثريش لصحاب اللي كثر لصحاب يبقى بلا صاحب ديري وحدة لي تعرفيها مليح و تكون صالحة ماشي رفقاء السوء باش تحمي روحك من الانحراف او من كلام الناس اللي معندوش حدود لان الطفلة لها سمعتها قبل كل شيء

 

[NaDiA.]

حنونة ديها من عندي ماتحوسي على حتى عربي ياخي واحد ماراه يوكل فيك.. خلاص يروحو يرنكو انا تاني هاكدا الغيرة قاتلتهم كبي يشوفو وحدة مليحة و تقرا و انوشة و حاطة على روحها و الناس تحبها ... يغيرو و يديرو صوال ماتصدقيهمش انا حتى وصلت وحدة تالمو تغير راحت عند يما و كذبت و راكي عارفة لايوسويت.. دونك ماتقيمي حتى واحد و اللي باعك عمرك ماتشريه
و قيمك و شاريك ديريه فوق راسك اوكي ختي ..
و نورمال حاجة ماتغيضك هادي هيا خدمة لعرب..

ايا تايك كير ختك ناديا​

 

[b.bouchra]

هادوا ما ولاوش بنات ولاو فتانات
ربي يهديهم حنونة
عندك حق جامي اديري على ناس كيما هك
ديري ما سمعتي ما شتي سينو
ماكش رايحة تقدري
تعيشي​

 

[FARDOUSS]

لانكي درتي ليهم قيمة
بارك الله فيك عبير
سوجي شباب والله غير تعامليهم بالمليح يقسوك فالثقيل
يا دوك ما راهمش يقيمو اللي يقيمهم بالحسن التعامل
ياو يقيموا اللي يقيمهم بالحبات
راهم غير نتع مصالح دوك الكل يلهث وراء المنفعة
تهلاي في روحك عبورت
​

 

[RANIA_1994]

قيسيهم في التقيل و تقيميهمش هادو غيارات و الواحد كي متقيميهش يقيمك

 

[يا جزائر]

ختي عبير مديريش على هدرت البنات وتلهاي بناس الليحبوك و بقرايتك برك وبينيلهم بلي مراكيش مهتم بيهم​

 

[wafa peace 2011]

ماتقميهومش خليهم يهدروا المهم انتي كونك ماعلابالكش بيهم

 

[omari19]

شوفي اختي في هذا الزمن صحبك هو جيبك
فهمتني ياخي واش رااني نقصد​

 

[Miranda HB]

ختي حتى أنا يديرولي هكذا بصح غيرة برك

 

[الصياد.dz]

زمان يحير

هل أنت ملاك لم تفعلي لهم شيء ؟
سبب هو
الغيره أو أنت مكانش ثالث لهما
وقصدي من أنت ربما فهمتيه

 

[{مُدَلَّلَتُهُ}]

khti ma t9al9ich ro7ak w ma t3amrich rasek bihoum rahoum ghayrine menak bark السبب الوحيد الذي يجعل شخصا يكن الكره لشخص آخر هو عجزه على أن يكون مثله hada houwa rayi

 

[بنت الجزائر و افتخر]

زمان يحير

هل أنت ملاك لم تفعلي لهم شيء ؟
سبب هو
الغيره أو أنت مكانش ثالث لهما
وقصدي من أنت ربما فهمتيه

اخي الرد نتاعك هو اللي جذبني على هادا راح نرد عليك الاول

خويا انا ما قلتش الغيره و ما قلتش انا و طبعا بدون شك انا نحترم راي الجميع و رايك منهم

شوف اخي باش تكون فاهم القصه كامله انا العام اللي فات كنت جديده في هاد الكلاصه و ما كانتش عندي صديقه اصلا هادي اولا

و ثانيا مالعام اللي فات و هوما توجور يديرونجوني و مرات فالكلاصه يبكوني
متلا العام اللي فات بكيت مرات بزاف بسببهم و مرات حتى الاساتذه لاحظو هاد الشي

مارانيش عارفه علاش ممكن لاني دخلت جديده و ممكن راني مضايقتهم في حاجه والله ماراني عارفه علاش

لكن هوما دايما يديرو هاكا و انا اصلا ما عنديش اصدقاء
صديقتي الوحيده خلاتني لانهم فرقو بيناتنا ...........المهم خويا انا ما نطولش لاني لوكان نقعد نحكي ما نكملش خلي البير مغطي واللي فالقلب فالقلب

انا بكري كنت نبكي اما درك عرفت بلي دمعتي غاليه لكن ما قدرتش نحكم روحي و بكاوني هاد العام تاني و انا ما قدرتش نستحمل حتى انو الاساتذه لاحظو اني كنت مكتئبه الفتره اللي فاتت
و كنت دايما وحدي

المهم انا كل اللي حبيت نقولو انو علاش البنات يديرو هاك

و الي تغيظني اني نعاملهم مليح

و شكرا على ردك اخي نتمنى انك تكون فهمت كل واش قلت

تحياتي

 

[بنت الجزائر و افتخر]

شكرا على ردودكم جميعا و نشكركم على النصائح

راكم افدتوني كلكم

تحياتي

 

[بقايا إنسان]

على رأي الشاعر العالم أنصحكي أختي بهذه الأبيات
فإلم يكن صفو الوداد طبيعة ××فلا خير في ود يجيئ تكلفا

 

[منايا الجنة]

تجاهليهم اختي ماتعرفي علاش يديرولك هكدا انا نعرف واحدة صايرلها كيما بصح ماعلاباهاش قاع بيهم