جيت نسلك أحصلت..... يا ربي واش درت

[kiosedire]

السلام عليكم
مين نبدا لحكاية راها غامتني حاب نخرج واش كاين في قلبي
هذي عاندها مدة نتاع شهرين كونت نريض ندير في شويا سبور كي العادة و لعوايد مع لعشية
نجري مع الطريق غير بالشوية حالة واحد مع الفوتينg وصلت لحود لبلاصة نسمع فالبكا والعياط نتاع مرا دورت شوفت واحد الجان شاد هذيك الطفلة و هي تقولو خليني (بيناتنا حبيت نكمل نجري ) جريت وحد 30 متر هكذاك و ما عطانيش قلبي و أنا نسمع فيها تبكي، رجعت (هذي هي الغلطة ألي راني نادم عليها)
مع وصلت أهدرت مع هذاك الجان قلتو عيب عليك تحـgـر مرا بدا هذاك السيد يزيد معايا فالكلام و الطفلة تطلعي فالزعاف و هي تقولي راه ما حابش يخليني أنروح وو و و
مع لعيا و السخانة نتاع لجري و الله ما علابالي كيفاه ضربتو (ربي يغفرلي) هذاك السيد طاح والطفلة هاذيك ضارت عليا و ناضت تندب .......
وليت نجري بالسيد لطبيب و من الطبيب للكوميساريا و جا بابات هذيك الطفلة و هذي ألي غاضتني تاع الصح يا خاوتي وقف ليا باباها و في وجهي قالي واش دخلك راه خاطبها
أقسم بالله حسيت روحي قرد ما نيش بنادم
واش درت على سعدي خلصت الطبيب و الدوا و روحت لدار الجان هذاك واديت في يدي قضيان كبير يا خاوتي نحاول فيه باه يسمحلي.... آكم تعرفو الشروعات و واش فيها من محاين
هو ما بغى يسمح و والديه ما بغاو يفوتوها و ربي يستر آني نستنا كانش ما ربي يفرج
mais و الله يا النيف ألي طيحتلي قدري ما زدت دافعت على امرا و لوكان نلقاهم يقطعو فيها وكيما يقولو نديرها كية على وجهي (sauf عايلتي ما نحلفش)​

 

[ماكانش]

أهلا بيك خويا لعزيز
شفت كيفاش ولات مدايرة الحالة
أدير الخير تحصل
نعرف واحد كان يمشي بالطوموبيل ايا في الطريق واحد ضربوه بموس وهوا رفدو اداه للسبيطار
كي وصل ياخي حصلوه وشهدوه ومانعرف واش
أنا لنات تخطى نشوفو راح يخطفها وهيا خاطية نتلاح
اما نلقاهم في لخلا ويضرب فيها والله مانتحرك
هيا ألي وصلت روحها ...​

 

[تاج الجزائر]

وعليكم السلام

شوف خويا انت نيتك كانت صافية وكنت في هاد الموقف راجل ونص و25 وبينت بلي

راك خايف ودافع على بنات بلادك والله نستعرف بيك لباش كاين الرجال لي جايحين في

هادي المواقف وانت نقولك ربي يجازيك على حساب نيتك وقلبك

وهادي المرا وخطيبها وباباها ربي يهديهم

مين قالك بلي هاد خطيبها كون قتله الخطيب يدير لخطيبته هاكا قدام الناس؟ مشي يسترها

ويحافظ عليها قاعد يبهدل فيها قدام الناس وهيا غادي تولي مرته بهدلها قبل ما يديها

الله يزيدهم تبهديلة على تبهديلة

ومكان لاه يغيظك الحال قدام ربي راك انت الرابح وانت لي عندك اجر وهوما ما استفادو

من هاد الموقف غير قلة التربية والحيا

ربي يحفظك ويستر بارك الله فيك :shay:
​

 

[DARINE05]

ايييييييييييي يا خويا رانا في زمان ربي يستر

 

[بيكهام]

ششوف لعزيز حمد ربي صباح وعشية
عندنا حنا صرات نفس عفسة مي طفلة متفاهمة مع السيد
دارو فيلم انتاع لبكاء وووو سيد حبس بسيارة تاعو وهبط معنها يسلك في طفلة ياخي ضربوه بموس وداولو سيارة وقعد 5 شهر في سبيطار قريب للموت
شوف كيما قالو ناس بكرى احفظ ميم تحفظك
مشت مشفتش مروحش منجيش .........الخ​

 

[بنـ MaPa ـت]

وعليكم السلاام

سبحان الله هوما ماشي عباد كانو يحلو المشكل نتاعهم بطريقة تانية ماشي هكداك....الناس تقرى النقص بزاف وين تعرف لي مخطوبين؟؟ ديجا نتا رحت تسلك وماعلابالكش واش كاين....نورمال خويا ايدا تعتبرها غلطة قول نشالله ماتتعاودش...والجان هاداك ربي يهديه ويسمحلك ومايزيدش يعاود هاداك الجاست قدام الغاشي
نشالله مايكون غير الخير

مرسي على الموضوع
​

 

[07 _H@yThm]

خير لخير خو متقلقش روحك
بصح كيفاش ضربتو هدا حتان عادت فيها طبيب وداو ؟هههه
​

 

[Estrella]

قالوها ناس بكري ومغلطوش *ماندير الخير مايتبعني الشر*
تجي على نيتك دير الخير فالناس تلقى روحك حاصل حصلة كبيرة ...
donc لازم كل واحد يعفي روحو باه ميطيحش فالمشاكل
انا نحييك خويا على المبادرة الطيبة نتاعك قليل الي يديرها في هاد الوقت بصح شفت واش صرالك ردو فيك اللوم وعشيت نتا الغالط
ناس مولاتش تفهم ...ربي يهديهم
بارك لله فيك ...​

 

[صانعة الافراح]

خويا ما عندك علاه تندم

والله غير موقف يبين بلي مازال كاين الخير فالناس

ربي يحفظك و يفرج عليك

و ما تديرش في بالك بويسك هادوك ناس ما يستاهلوش

انا من رايي تقعد تدير فالخير حتى لوكان تلقى الشر

ربي يستر من هاد الناس و ان شاء الله ربي راح يفرج عليك

شكرا على الموضوع + ربي يستر من هاد الزمان
​

 

[mer10]

انت نيتك كانت صافية لوغمالمون هما الي يطلبو السماح تشوف المنكر في الطريق ا و تسكت

 

[cut girl]

هدي هي الدنيا وكيما يقولو ناس بكري الخير يرفد عمود و يسوط مي ماعليش أجرك عند ربي

 

[kiosedire]

أشكركم جميعا على كلامكم الله غالب هذي هي الدنيا جات هاك:re_gards:

 

[لاجودان شاف]

معلش خويا يجازيك ربي على نيتك

مايش سايبة​

 

[*ايمان*]

عندهم هوما وربي يهديهم انت راك غالط بصح عند الناس الفاهمين كيما احنا راك راجل والرجال قليلون ربي يحفظك

 

[نجاة40]

ههههههه
والله هم يضحك وهم يبكي
البنات يوصلو رواحهم مانكذبوش على رواحنا وانت ربي يبارك مايش الغلطة نتاعك ختراه كنت راجل
حتى امس و احد حكم وحدة فرشها فلرض ويجبد فيها من الشعر قتلها وهي ترد فالهدرة عيات تسكت هي تهدر وهو يضرب ماحبتش تحشم
ربي يسترنا خويا وربي يبارك ماتندمش على الحاجة لي درتها ختراه كل واحد وأصلو ومادام كنت ناوي حاجة نتاع خير ماتقلقش روحك​

 

[kiosedire]

عندهم هوما وربي يهديهم انت راك غالط بصح عند الناس الفاهمين كيما احنا راك راجل والرجال قليلون ربي يحفظك

ربي يخليك اختي مبصح آني حاصل فيها لرقبتي و ربي يجيب الخير درك ما بقاتش نتاع شكون الغالط ولات affaire نتاع شرع و ربي يجيب الخير :sadwalk:

معلش خويا يجازيك ربي على نيتك



مايش سايبة
​

ربي يخليك
mais رااها سابت ولات سوق بلا راعي ولا نقولك خلي البير بغطاه
شكرا على المؤازرة

​

 

[آلاء النايلية]

الله أكبر خويا متحيرش ربي يفرج
ولله العبد ماعرف يدير الخير وللا يطفي الضو​

 

[Iman89]

وعليكم السلام
هاكا ولا كثر خويا ربي يصلح لحوال

 

[kiosedire]

الله أكبر خويا متحيرش ربي يفرج


ولله العبد ماعرف يدير الخير وللا يطفي الضو​

أي نحلف ما نزيد نحل فمي على حاجة خاطيتني توبة آني توبت c'est bon ندير كيتمان باه ما نزيدش نسمع و هديك العفسة ألي يديروها لحصان باش شوف غير قدامو
ربي خير
شكرا​

 

[kiosedire]

وعليكم السلام
هاكا ولا كثر خويا ربي يصلح لحوال

آمين يا رب
شكرا​