" جــامي حبيت ...جــامي مشيت ..جــامي هدرت مع وآحد فالبورثــابل ..جامي صدقت كلمــة من غيرو هو ...
أنــا اللي حبيتو ..ماحبنيش ...أنا اللي حبيتو حشاهــالي ..مي الغلطــة فيــا ماشي فيه"
-مازلت نتفكــر أول يوم شفتو فيه ...كنــا فالـ 2007 ...في هذاك اليوم كنت مع صاحبتي ..قلتلها شوفي هذا الطفل ..قالتلي :واش بيه ...قلتلهــا : يبقى غير هو فالدنيا هذي مانخممش فيه ..قالتلي :وعلاه ...قلتلهــا : مانعرف ..
مــي الدنيا دارت على كلامــي ...هذا اللي قلت عليه هكذا ..عاد يمشي في دمــي ..عاد هو حياتي وهو كلّ شيء عندي ..
كي وليت نشوفوا كلّ يوم ..وليت نعرف حوايج بزآف عليه ...زوج حوايج لقيتهم "عــائق" ليــا ...لحاجــة اللولا أنو يكون صاحبو تاع بن عمتــي ـ وآعــر ويحمز بزاف علينــا ـ
ثــاني حاجــة ..عرفت بلي هو يحب وحدة وماشي معاها ـ هذي الطفلــة معروفــة بسمعتها السيئـة عندنـا ـ
مــي في هذاك العام ماقدرتش نبعد عليه وبالأخص أني كنت نشوفوا كل يوم ..كنت كلمــا نشوفوا نقعد نضحك وكان هو نفس الشي ...كان يضحك معايا وهذا هو الشي اللي خلاني نزيد نتعلق بيه كثر وكثر ...وفات عام وحنــا هكذا ..وفـ 2008 سمعت من اخواتاتو البنـات ـ اللي تعرفت عليهم ـ أنهم راحلين ...أنا زعفت وبكيت بزااف ..مي نورمــال هو اقعد يجي للمنطقـة ...كنت نشوفوا كلّ 3 أشهــر ...وبقيت نخمم فيه دايماً ..وزاد بعدّ كثر وكثر فـ 2009.و 2010..عاد يخدم في ولايــة بعيدة بزآف ..قعدت على نفس الحال ..نهدر غير عليه ...كان دايمـا في بالي ..وليت كل 6 أشهر باش نشوفوا وزاد فاتت ...ماقدرتش ننساه ...كانت صورتو دايما بين عينيــا ...وكنت كلّ مرّة نسقسي صاحبو عليه عن طريق صاحبتي ....وكان يقولها هذاك صاحبي ونعرفو ..ماشي مليح خلاص ...قولها بعدي عليه واخطيك منو ..هو ماشي سيريو وراح يتمسخر بيها ويخليها ...وراه دار حوايج مش ملاح فحياتو ...
أنا كي وصلني هذا الكلام تعجبت بزااف ...وقلت هذا صاحبو مايحشمش خلاص ...كيفاش يقول على اللي حبيتو أنا هكذا ...أنا اللي حبيتو خاطيه هذا الشيء خلاص ..أنا اللي حبيتو نــاس ملاح ...ماكنتش نصدق الكلام اللي كنت نسمعو عليه وماكنتش حتى نخمم في هذاك الكلام ...ـ الحب أعمـى ـ كنت نشوفوا غير هو برك فحياتي ..مي دايما نتفكر بن عمتي اللي لوكان يسمع رايح يقتلني ويقتلو ....
المهم قعد صابرة بزااف ..كنت نستنى فيه هو اللي يجي ...كنت ندعي دايما ربي يكتبولي وكنت كل مرة نصلي صلاة الإستخارة ...مي دايما ربي يبعدو عليا ...
في هذا العام ـ 2011 ـ قلت أنا مانقعدش هكذا ..أنا لازم ندير حاجـة باش نوصلوا ...مانخليش الحب هذا اللي في قلبي يموت كي والوا
جبت النيميروتاع اختو اللي كنت نعرفها ...وليت نسقسيها عليه ...كانت تعرف بلي أنا نحبو ..وقالتلي : أنا والله نحبك كي اختي ...حاولي تنساي خويا ..والله ماشي ليه ..علابالي بلي رايح يتمسخر بيك برك ..اخطيك منو ..نتي يتمناك أي واحد ..انسااه
قلت في قلبي ...صحاباتي ...صحابو ..اختو ..كامل راهم يبيعوا فيه ..حرام عليهم ..هو مادار والوا ..أنا اللي حبيتو نعرفو مليح
ماصدقتهمش ..وقلت لازم نشوف حلّ غير هذا ..خممت مرّة نجيب النيميرو تاعو ومبعد قلت ...هذي ماشي تربيتي .. هذا ماشي حل هذا جحيم ليا ...وفاتو يامات ودخلت بالصدفــة للفيس بوك تاعو ...شفت الفطوات وكنت متواحشتو بزااف على خاطر من 15 نوفمبر 2010 ماشفتوش ...بالصدفة لقيت النيميرو تاعو ..ارفدتو بلا نخمم فلي قلتو من قبل ...كنت ناوية نعيط نسمع صوتو برك ...عيطت بالمــاسكي ..وكي سمعت صوتوا ماقدرتش نحمــل ...بيبيتلو ..حتى لقيتو عاود ..رديت ..هدرة تجيب هدرة حتى اعرف شكون أنا وبدات الحكاية تاع الصح ..بدا التمسخير ...بدا الحــشي ..كي كان يهدر معايا كنت نقولوا ماتديرش الثقـة فصحآبك ..وفاتو يامات وشهور وأنا نهدر معاه ...كنت نصبر عليه ..كيما يحب يعيط ..كيما يحب يكوبي ..كيما يحب يغلق البورثابل وكيما يحب يهدر ...قلت بلاك يتبدل شوية مي الله غالب ...قلتلو أنا خايفة من بن عمتي اللي يكون صاحبك ..لوكان يسمع نباصي وتباصي معايا ...ضربها بضحكـة ..هذي الحاجة اللولا ..يامات وقالي أنا قلت لوليد عمتك علينا ..قلتلو راك تتمسخر ..علبالي نت ماتديرهاش ولوكان درتها صح ..هو ماراحش يسكت ...قلتلو غدوا نروح لعندهم ونشوفوا ...قالي روحي أنا مارانيش نتمسخر ...كي هبطت لعند بن عمتي عيط عليا ...وأنا شفت معاه مخلوعة ...عمبالي صح حكالوا..قالي واش بيك خايفـة مني ؟؟
حطني في موقف محرج ...أنا زعفت وكسرت لابيس ...وقلت رايحــة ننساه ..راه يتقعد بيا ...
فاتت سمانة وشريت بيس جديدة ووليت نفليكسي ونعيط بالماسكي برك ...واقعدنا نهدرو مي أنا اللي نعيط ...ماحبيتش نمدلوا النميرو ..وليت مانديرش فيه الثقة ...مي الله غالب ماقدرتش ننساه ...وكان يقولي اعطيني النيميرو ونقولك حوايج بزاااف ...كنت خايفــة ...وفي هذاك الوقت جا هو للمنطقــة ...سبحان الله نخرج ويجي مي أنا مانشوفوش وهو مايشوفنيش ...
حتى جات الصدمــة ...قالك أنا دخلت للفيس بوك تاعو ...زعما توحشتو ..حابا نشوف عينيه المذبالين...
دخلت وياريتني مادخلت ...شفت اللي جامي كنت نتصورو ...شفتو الفيديوات ..شفت فطوات ..شفت الحقارة ×الحقــارة
قريت واش كان يكتب لبنات الفيس بوك ...قريت واش كان يقول
جبتها يومين وأنا فالفراش ..ماناكل مانشرب مانخدم حاجــة ...مانهدر مع حتى واحد ...ولما فطنت من الغيبوبــة ..من الجحيم والسراب عيطتلوا...قلتلوا أنا ماحاباش نزيد نسمع صوتك ولا نزيد نشوفك قدامي ...قلتلوا نت فحياتك ماراح تكون سيريوو ..وأنا طيحت بالنيفو تاعي وبالنيفو تاع بن عمتي علاجالك نت ومع الآخر تدير فيا هكذا ...واللي زدت عرفت أنو مازالو يحكي مع حبيبتو القديمـة ...أنا ماشي غير عدت نحتقرو...أنا عدت مانشوفش فيه ...زعمــا زعف وقالي من الهدرة هذي خلاااص ...
كنت حابـة نقولوا هدرة مي زعف وقالي ماتهدريش خلاص وكوبا
أنا كنت رايحــة نقولوا ـ الغلطــة ماشي فيك ..الغلطة فيا أنــا ــ
اسمحولي طولت عليكم مي قلبي راه معمر ..ومدمر ..