عيب عيب ..عليك ياالطبيب

[وطني]

بسم الله الرحمن الرحيم و الصلاة و السلام على قدوتي محمد اشرف المرسلين.....
تحية عطرة لقاع ناس اللمة...فرد فرد....و ان شاء الله راكم قاع بخير....
لا لوجيك انو الانسان كي يمرض...يصبر...و من بعد ادا زاد الضر يروح ديراكت للطبيب...باش يشوف حالتو ...و يعطيه ميداكامون على حساب الكا و المرض ديال داك المريض...و يستنى الشفى على ربي.....
كيما يقلك ..قاع مرضنا و قاع شفنا الطبيب...و قاع كلينا الدوا...و الحمد للله....
واشنو هو...فلا المدة االاخيرة هادي رانا نشوفو وحد الظاهرة و نسمعو عليها بزاف...ف لابراس...و لي هي الاخطاء الطبية....حاب يقول الغلطات لي يديروها الطبة...و لي تكون عندها ننائج كارثية على المريض مسكين _مرض فوق مرض..جايداوي بعثوه يداوي_
حاب يقول كاين ناس تروح مزينة النية للطبيب باش تبرا و تولي اون فورم..في لافان و بسبة غلطة تاع طبيب المريض هاداك يلقى روحو ف مرض ووخداخور و بلو قراف.....
لحقت حتى لوين شي ناس راحولهم عينييهم...شي ناس راحولهم ودنيهم..و شي ناس فقدو حتى الذكورة ديالهم.....
حاب يقول...تاع الصح خلصوها غالية بسبة غلطة ماشي ديالهم...غلطة ديال طبيب
بالاك مادارهاش بلعاني...و ا مون افي غير طبيب لي مالازموش يغلط...بويسك الميليو حساس..و قبل كلش راهو قاري عليها بزاف..
و للاسف كاين الطبيب لي الغلطة جي منو بلعاني...حاب يقول يسمح ف المريض و مايتعاملش معاه بدقة...يسمح فيه...و مايعطيهش بالو.....
هنا علابالنا بلي ماشي الطبيب كاملين يديرو غلطات كيما هادي...الشاهد ربي كاين طبة يخدمو بالنية تاع الصح و يديرو قيمة للانسان المريض.....
ادا كنا نشوفو ف الطبيب داك الانسان المثقف و القاري و لي الله يبارك لازم هو تاني يحترم المهنة ديالو ....و يحترم النسان المريض لي عندو هادي هي
واشنو....قالك الطبة تاع اللمة زعفو مني تاع الصح....:sad:
هههههه و حالفين يقاطعو قاع المواضيع ديالي ههههه
ياخي انا ماقلت والو....؟ظ؟؟؟ و دمتم سالمين

 

[adel-mz]

سلام ،راك لباس يا وطني
bon تقدر تقول بلي الطب في بلادنا ولا كومارس (تجارة) جزر وعقب ،مي باه منظلموش الطبة كامل كاين طبة نتاع الصح ولكن قلة قليلة.+ادا قلنا طبيب معناتو حكيم وانا تبانلي يفتقد الكثير من الاطباء الحكمة.والاخطاء الطبية تحسب عليك شئت ام كرهت.
بارك الله فيك.

 

[هدى]

سلام عليكم ورحمة الله تعالى وبركاته
خويا يقلك كل حكيم طبيب وليس كل طبيب حكيم
واحنا الطبة تاعنا ماشاء الله عليهم ماعندك ماتقول فيهم
انا والله غير نعرف واحد جارنا كان يشكي براسو ديما يوجع فيه راح للطبيب قالو انت لازمك اوبيراسيون
راح عمل لوبيراسيون على راسو بصح المشكل كي داوى راسو راو عينيه
من نهار مسكين عمل لوبيراسيون عاد مايشوفش
تروح للطبيب يقلك الله غالب خاطيني الغلطة
تجي غير فالمريض باتت فيه الطبيب مدي سواردو ودورو مايسمحش فيه وانت لا راحو عينيك ولا راحو كلاويك ربي يسهل عليك مش مسؤولين
واش تحب العوج حتى في الامام خاص يا الطبيب
لارقابة على النفس الا رقابة الضمير والضمير نائم او مات
ربي يصلح الاحوال وخلاص
ومارسي على الموضوع
​

 

[N@riM@N]

تاع الصح ليوم نقرا فشروق خطا طبـــــــــي واش نقلك راسي حبس
تدخل لطبيب يعود يشوفك دراهم وكتاه يكملك ويتهنى منك .,,وزيد الرقابه
وكان جات كاينه رقابه راهي متوصلش لوصايل لهدرجه لي عاد تتساو فيه النفس بدراهم
يعطيك الصحه ع الموضوع
​

 

[sahiko hamza]

ماشي يغلط
راهو يخدم في خدمة ومش عارفها بكل
بويسك كي كان يقرى كان غي يتمسخر وممبعد يعطولو شهادة طبيب بويسك باباه فلان
وممبعد يخدم طبيب ويهلك لعباد وهادي لالجيري
مارسي عليك خو

​

 

[مسلمة وافتخر باسلامى]

واش نقولك خويا ولا اختى
علابالى بالاك راك تقصد حكاية الولد فى الشروق
وصراحة الاخطاء الطبية صح راهى فى تفاقم موش فى بلادنا برك لكن فى الوطن العربى كامل
ورغم انى انا رانى نقرا فى الطب بصح نعترف باللى الاخطاء تصرا
احيانا الاهمال من عند الطبيب خصوصا اللى مشرحش للمريض ديالو واش لازم يدير ويفهمو طبيعة المرض ديالو
وتانى الاهمال من عند المواطن اللى مثقفش روحو ويخلى الطبيب يتمسخر بيه
امالا الناس لازم تاخد حذرها وكى يروحو للطبيب ميحشموش لازمو يسقسو لانه حقهم يفهمو واش عندهم والطبيب يشرح بلا مزيتو
وواش نقولو والله حاجة تغيض بزاف وانا جابلى ربى لازم تكون قوانين تراقب المستشفيات وتحمى المريض
وربى يوفقنا للاصح وينجحنا عن استحقاق اللهم امين

 

[aneshabib]

بارك الله فيك على الموضوع القيم والله غير عندك الحق والله غير صرات في دارنا ماشي يقولهلك واحد اخر وحد النهار مرضت الاخت تاعي ومشات الوحد الطبيبة ياو عطاتها كاشيات تاع مهابل والله غي قريب تروح فيها مزية قرينا الدوا مزية كانت الحبة الاولى والله غير ماخلانيش بابا كنت باغي ندخل ملتها الحبس

 

[meriem150491]

الطبا تاع اخر زمان عادو تدخل عندهم يشوفوك دراهم

كاينة وحدة نعرفها دخلت للطبيب راح دير عملية على رجليها

هيا تحكي معاه هو يقولها الرجل هدي تجيك 3 ولخرا 3 قالتلو نحيلي الستر ومن بعد الدراهم ساهلين والحديث قياس
​

 

[**سارة**]

السلام عليكم
واش نقولك خويا درك المشكل ماشي من الطبة المشكل راهو ف les professeurs الي يقريوهم يطلعوهم فارغين ويبخلوهم مايعاونوهمش يعني يطلعو بالحفاضة برك même pas b la pratique ومن بعد الطبيب يولي يكتب الاسم واللقب تاع المريض غالط وبلاما نهدرو على المرض راهي كارثة واحد يكون مريض برجلو يقولو عندك المعدة
ربي يسترنا برك
مرسي على الموضوع المليح
يعطيك الصحة


​

 

[sarah_]

اولا شكرا على الموضوع مي هذي الظاهرة انتشرت بزاف عندنا انا نعرف واحد عندنا كان مريض كي راح لطبيب قالو راك مريض سرطان والعياذ بالله وعطالو دواء انتاعوااو هو مكانش مريض بيه كي سقسا طبيب اخر قالو مكاش منها مي كان شرب هداك الدواء وفي الاخير مات ربي يصلح الاحوال وخلاص

 

[هدى]

وتانى الاهمال من عند المواطن اللى مثقفش روحو ويخلى الطبيب يتمسخر بيه

عذرا على التدخل أختي بصح واش قصدك بالمواطن الي ما يثقفش روحو
نولو كل طبا ولا كيفاه
انتي يوجعك راسك تروحي للطبيب يقلك هدا الدوا اشريه تروحي تشريه لكان عدتي طبيبة ولا صيدلية تعرفي اسكو الدوا صحيح ومناسب للمرض تاعك ولالا
ولكان عاد انسان خاطي الدومان تاعو يعني انسان عادي ولا بسيط كيفاش راح يعرف ؟؟؟؟؟؟
​

 

[dana1993]

السلا عليكم

ايه كثرو بزاف...وحد المرة ام وحدا نعرفها....يقولوها الاطبائ عند الزائدة الدوية
و فاللخر جا بيبي ...منعرف وين قراو...بنادم رجعوه مصران....

و مرة وحدا مكانتش تجيب دراري...فالحمل اللول قالولها عند المصران ...و الدوا لي شرباتو خلاها تفقد الطفل

بزاااااااااااااااااااااااااف اخطاء...ولي نسا مقص في كرش عبد ولي ولي
بزاف اخطاء....منعرف وين قراو

ربي يصلح الحوال


​

 

[DARINE05]

sah 3ib ki3ad yatl3o gir ba tnkal w m3raf merci

 

[zahya]

ياك راحنا في الجزائر يعني كلش مغشوش....غير الطبة لي ما يكنوش مغشوشين .....هدي امبو سيبل .......وزيد الطب رسالة لكن عندنا الطب مصدر للمال الوفير ...... ولما يدخل المال يغيب العقل والتركيز ......ايه كي تقول يمى .....الطب راح مع فرانسا .......
موضوع قيم شكرا اخي

 

[hiba14]

السلام عليكم
صح شا قلتي احنا وحد الطبيب الماتريال تاعو خاسر و يفوت السكانير نورمال راه داير الكوارت

 

[مسلمة وافتخر باسلامى]

عذرا على التدخل أختي بصح واش قصدك بالمواطن الي ما يثقفش روحو

نولو كل طبا ولا كيفاه
انتي يوجعك راسك تروحي للطبيب يقلك هدا الدوا اشريه تروحي تشريه لكان عدتي طبيبة ولا صيدلية تعرفي اسكو الدوا صحيح ومناسب للمرض تاعك ولالا
ولكان عاد انسان خاطي الدومان تاعو يعني انسان عادي ولا بسيط كيفاش راح يعرف ؟؟؟؟؟؟​

لالا اختى العزيزة
انا قولت هكا خاطرش شفت بزاف ناس تمرض ومتحبش تعرف واش عندها
المقصود من حق المريض يعرف واش مرضو
وادا كان قدار يسقسى ويفهم ويقرا عليه ما فيها والو هدا للفئات القادرة طبعا
واتدخلى كيما تحبى ختى مكان حتى مشكل

 

[احلى لمة]

الله يهديه هدا طبيب

 

[RaNiA]

الطبيب لي تلقاه يقتل لعباد و لا يزيد يمرضهم ما عندو حتى مصداقية طالع بالغش والتريشاج و مبعد يخرج طبيب يقتل ناس و يلم غير السوارد كيما قالو يولي يشوف في المريض دراهم
مي كاين طبة صح ملاح انا ما شفتهمش :p :p حكيت برك بالاك يجيو في جيلنا وحايد ملاح ههههه
​

 

[Houda Chaouienne DZ]

ابابابابا .. واشي هذا يا خويا راكم تمنشرو فالطبا عيني عينك
خويا اول حاجة ماتبعوش الصحافة بزاف .. راهم يشتيو يكثرو و يهولو هذا ماكان
و انا ثاني راني نشوف فيهم دايرين حملة اعلامية على الطبا مانعرف علاه
ماعلبلناش واشي هي اغراضها
ثانيا قولي كشما شفت نتا بعينك ولا سمعت على عباد تعرفهم صراولهم هاذ الكوارث من غير الجورنال
ثالثا الطبيب حتى هو انسان يغلط بصح المهم ماتكونش غلطتو كبيرة .. و ماشكيتش كاينين هاذ الغلطات الكبيرة الا نادرا و ماشي كيما يقولو الجرائد
ثالثا الشفا راهو بيد ربي و المرضى كاين لي يجيو قراف بزاااااف و يحاول معاهم الطببيب و يحاول بصح مايقدرش و في الاخير يموتو هاذي موت ربي الله غالب .. الشفاء راهو بيد ربي مانقدروش نقولو هاذ الطبيب هو لي قتلو
رابعا الحمد لله كاين بزاف طبا يخدمو بضميرهم و يحبو خدمتهم صح و كاين خرين لي يشوفو فيها تبزنيس و في اي مجال كاين هاذ الاشكال
خامسا حتى الجامعة تاعنا ماهيش فور حتى تخرج طبا فور و مع ذلك عندنا طبا الله يبارك و راهم مطلوبين فالخارج
سادسا اسمحلي خويا ع الاطالة
و مارسي على موضوعك
​

 

[Houda Chaouienne DZ]

الطبيب لي تلقاه يقتل لعباد و لا يزيد يمرضهم ما عندو حتى مصداقية طالع بالغش والتريشاج و مبعد يخرج طبيب يقتل ناس و يلم غير السوارد كيما قالو يولي يشوف في المريض دراهم
مي كاين طبة صح ملاح انا ما شفتهمش :p :p حكيت برك بالاك يجيو في جيلنا وحايد ملاح ههههه
​

علاه ختي مام في الاجيال لي فاتو كاين ما شاء الله
و انا شفتهم بعيني
​