هااااالخاوة قتلتونا بالحم ولدجاج واللحم مرحي

[أم انس عبد الله]

السلام عليكم ورحمة الله وبركاته
واش راكم خياتى
ياو بغيت انقولكم عاونونى شوية
انا نحب بزاف المواكل تاوعكم ونحب انطبقهم
بصح يما وبابا ديما ورايا انت اطيبى بالحم ولا الفيونداشي والا الدجاج ولا ماتطيبيش
يقولولى راكي رايحة تتزوجى كون هادا الراجل مايكلوش اللحم والفيونداشي والدجاج كيفاه اتديرى مالا ماتطيبيش
بصح والله مانعرف مواكل بلا دجاج ولا اللحم حتى العجائن راهم يطلبو الحم والدجاج
قولولى كاش وصفات من غير جاج ولا الحم
بصح يكونو ملاح ربي يحفضكم
سلام عليكم
​

 

[ahlem1]

مساء الخير
هنا غراتان خفيف و بنين
ترابي الجزر و القرعة في لا راب الصغيرة(التي تستعمل للتوم) تسوطيهم في شوية زبدة وتزيدي التوم كمون ملح فلفل اسودو تخليهم يطيبو شوي
تخلطي البيض+فرماج قطع+قطع زبدة
تخلطي الكل وتديريه يطيب في مول في الفرن
اذا تحبي تزيدي فيه كمية قليلة لحم مرحي مع بصل مقطعع قطع صغيرة
ان شاء الله يعجبك

 

[كوثر الوهرانية]

مساء الخير
قرتان شوفلار
غلي الشوفلار في الماء و الملح و فلفل اسوم و ثوم و اوراق رند و كي يطيب صفيح خليه يقطر مليح
اخدمي صلصلة البيشمال و اضيفي فيها ثوم مرابي و جومبوا جاج و في الاخير يعني كي تطفي عليه النار اضيفي فرماج مرابي في مولمدهون بالزيت حطي الشوفلار ملازمش تفتتيه خليه قطع متوسطة الحجم و فرغي عليه هديك الصلة و دخلي الفرن حتى يحما مليح

 

[ام حبيب]

يعطيك الصحة اختي فريدة

 

[كوثر الوهرانية]

كاين وصفة اع روز
غلي الروز فالماء و الملح و صفيه و خليه يقطر مليح
من جهة اخرى جيبي مقلة تكون كبيرة او طاجين حطي فيه الزيت و البصل مقطع و ثوم قليهم مليح ديري الملح الفلف اسود و قليل من الزعفران و ملعقة كبيرة او اثنان تاع طماطم المصبرة و جومبوا دجاج خلطيهم مليح مع البصل و فرغي عليهم الروز و خلطي مليح و في ااخير رشي المعدنوش

 

[أم انس عبد الله]

السلام عليكم ورحمة الله وبركاته
بارك الله فيكم خواتاتى
والله فووووووور
مدا بيكم اتزيدو اتجيبولى باه انجربهم
وربي يحفضكم ويشدلكم ولادكم

 

[narjes81]

يعطيكم الصحة

 

[روميس]

شكرا على كل شيء
بصحتكم غذائكم

;):)

 

[samah06]

صحيتو لبنات والله ماش طول اللحم والا الدجاج
رانا نفكررو ونغديوالاولاد
ونهار يجيب نهار
وهاهي وصفة اخرىاحكمي لجريوات او القرعة وقصيها رقيقة او رابيها في
لاراب تاع البصل اي الخشين وحطي غير 2ملاعق اكل زيت في المقلاة على نار هادئة
وحطي عليها هاديك القرعة وغلقيها وخليها اطيب غير في بخار الماء تاعها
طبعا ما تنسايش الملح والفلفل الاكحلولما تشوفيها طابتزديلها قطع فرماج وخليهم يدوبو معاها ومن بعد هاتي مول ادهنيه بالزبدة ورشيه بالشابلير وحطي هداك الخليط وزديلهم البيض مخفوق مع شوية خميرة تاع قاطو ودخليه للفرن ولما يطيب هدا شكلو
واش نقولكم حكاية وكملتو قريتوها
لكن وجتو وهيا راكم معروضين
راني درتو في اوت

 

[روميس]

يعطيك صحا اختي سماح

 

[samah06]

يسلمك حبيبتي رميس والله راني نعرف بزاف اطباق بلا لحم وتجي بنينة
لكن اعدروني راني شويا مريضة وزادلي البورتابل
نشري واحد امليح علجال اللمة

 

[ام اسراءواسحاق]

سلام اختي
اولا انا العدس و اللوبيا دائما نطيبهم بلا لحم او دجاج مع ان يكون عندي ،
و كاينة وصفة انا نحبها بزاف تجيبي البطاطا ترابيها و تضيفيلها الملح و الفلفل و حبة بيض و معدنوس و شوية خميرة نتاع حلوى و تشكليها كريات و تقليها في الزيت ثم قدميها مع صلصلة طماطم و زيني بالمعدنوس،
و عندك بطاطا بيوريه تقدميها بالتون نتاع الطماطم .
و المحمصة او العيش طيبيهم بالجومبو الغنمي يجو بنان .
و حتى لي قراتان ماشي شرط يكون اللحم او الدجاج ،اذا عملتي صوص بيشامال بنيها بالجبن و حتى الجبن على حسب الميزانية ماشي الحاجة الغالية تكون بنينة، و اذا عملتي قراتان بصلصة الطماطم بنيها بالثوم و المعدنوس مثلا بيضنجال اقليه و حطيه في مول و غطيه بصلصة الطماطم و دخليه الفور شوية ينشف و قدميه .
و كي ميكونش اللحم او الدجاج ضيفي البيض باش تكون الاكلة غنية .
و نتي و شطارتك اذا مكنتيش مطيبة باللحم او الدجاج ممكن تضيفي طبق الحلو بدون لحم انا منحبش اللحم كي يكون حلو اعملي سيرو بالماء و السكر خليه يغلي ثم ضيفي التفاح او الاجاص او حتى البرتقال و شوية زبيب او عينة على حسب واش عندك و خليهم يطيبو في هداك السيرو ثم قدميهم مزينين بالجلجلان او لوز، شوفي الصورة.

يعني تعمري الطابلة نتاعك
ادا تفكرت كاش حاجة نقولهالك .
سلامي.

 

[samah06]

السلفية الصغيرة انا نقولك بنتي
متحسبيش كي نحطو اطباق باللحم يعني رانا غداء وعشاء هكا
حبيبتي ررانا كاين وين نطيبو حتى المقرونة في الحليب
ونهار نطيبو نصوررو ونخبيوهم ومن بعد ننزلوهم برك
لازم تتعلمي ادبري امورك بمفردك
واللي يدها بنينة وطيابها مليح اطيب بلا لحم
وشفتي رانا بالاك مرات حتى كي نضيفو نصورو تاع الناس