مورقة مظفورة بفواكه البحر

[oumniati]

السلام عليكم ورحمة الله وبركاته
اليوم جبتلكم مورقة مظفورة بفواكه البحر

اولا نتمنى ما تبخلوش عليا بتقييمكم لاني ما جيت نكمل بالسيف بسبب مرض وليدي وثاني حملت الصور من ميكرو ونروح نكتب في ميكرو اخر هههه في خاطر عيونكم

اذا هي وصفة تاع شميشة جربتها واش نقول البنة مممممممممممممممم بغض النظر عن الشكل لانك يمكن ديريها مثل البوراك عادي او مثلثات

طولت عليكم؟

نبداو على بركة الله

في مقلة ديري زبدة +زيت زيتون+زيت عادية مع 3 سنسنات ثوم +فواكه البحر مشكلة--انا

شريتهم هكذاك فيهم شوية كلمار شوية كروفات شوية سيبيا ومحار وحوت ابيض--

زيديلهم جاج حسب الكمية اللي حابة ديريها

+3ورقات رند+كركم+سكنجبير طري اذا امكن او مرحي+فلفل اكحل وشويية ملح لانها تطيب بلا

ماء

زيدي عريفات حشيش غطيها وخليها تطيب على نار قليييييييييلة

كي تطيب نحي الجاج فتتيه وخليه بجيه

فواكه البحر بجيه

ذبلي شوية سلق في مقلة بدون اضافة اي شئ

صفي لاصوص تاعك ورديها للمقلة + شعرية صينية+ شوية زيت زيتون +شوية ثوم+حشيش

ومعدنوس مقطع+هريسة حسب الذوق

وكيما قالت يمكن اضافة شوية صوص صويا او قارس انا عن نفسي ما زدت والو

شميشة قسمت الخليط تاع الشعرية على2
نصف زادتلو فواكه البحر
ونصف زادتلو الجاج والسلق


انا ماكانش عندي سلق فخلطت الجاج مع فواكه البحر يعني ما قسمتش الخليط

ناخذ ورقتين ذيول ندهنهم مليح بالزيت من الافضل يكونو طريين باه ما يتكسروش كي تظفري

نلصقهم بالبيض ونطوي لجناب للداخل ونحط الحشو ونرولي ونلصق في الاخير بالبيض

نخدم بنفس الطريقة 2 اخرين

نبدا الظفيرة من الوسط وفي الجناب نلم الاطراف وندخلهم لداخل ونلصقهم ايضا بالبيض

ادهنيها مليح بالبيض وذري جلجلان او سينوج ودخليها للفرن

اذا بقالك الحشو ديريه في ذيول على شكل صامصة وطيبيهم ثم زوقي بيهم من فوق


وكيما يقولو بالصحة
ونعاود نقولكم البننننة لاتوصف

ملاحظة هي استعملت ايضا فطر اسود اضافة للابيض انا ما كانش عندي:shay:

 

[عفاف الجزائرية]

اول رد واول تقييم من عندي
بالرغم من اني لست من محبي فواكه البحرذلكن شكلها خرجلك يشهي فعلا
والفكرة مليحة نغيرها باللحم المرحي او الدجاج المرحي
مشكورة اختي امنية

 

[ام خديجة1]

شكلها يشهي اختي امنية والله يجعل الشفاء العاجل لوليدك وبارك الله فيك

 

[oumniati]

ربي يخليك عفوفة ويشفيك وتولي لينا كيما كنتي

 

[oumniati]

وفيك بركة فنانتنا ام خديجة

 

[رنيم16]

ماشاء الله
خرجتلك تشهي
ربي يشفي وليدك
​

 

[l'algeroise]

يعطيك الصحة شكلها روعة و باينة بنينة ​

 

[كوثر الوهرانية]

هايلة الوصفة اختي الله يعطيك الصحة و بالشفى على زكرياء
احلى تقييم لكي اختي

 

[Djazaire-El-Ghalia]

يعطيك الصحّة أممم بانة لذيذة أحلى تقييم وشفآلله وليدك

 

[imane27]

شكلها هايل يعطيك الصحة نجربها انشاء الله واحلى تقيييييييييييم:sheer::sheer:

 

[ibtesem]

بارك الله فيك خيرورة امممممممم سهتيني فيها ممكن نعملها ان شاء الله

 

[prncess fifi]

هايلةة امنيتي يعطيك الصحة بصح ما عندناش الديول هنا كاين غير تاع الشناوة يعععععع​

 

[روز]

امممم شكلها هايل اذا لقيت فواكه البحر نجربها ان شاءلله
احلى تقييم

 

[merieme hassi]

تبارك الله عليك حنونة
بالصحة و الهنا

 

[ŚσÚмĨÁ.Ďz]

امممممممم شكلها هايل
يعطييك الصحة
ولك التقييييم
​

 

[omarwa]

جاتك هايلة اختي خيرة شكلها اممممممم + احلى تقييم

 

[oumniati]

ربي يخليكم يا لبنات ويباركلي فيكم
ان شاء الله تجربوها وتعجبكم وما نكونش خيبت ظنكم

 

[ألاء الرحمـــن]

يعطيك الصحة امنياتي شكلها يشهي :sheer:
​

 

[rima29]

يااااااااااااااااااااااي هايلة
يعطيك الصحة حنونة​

 

[نور الهدايات]

يعطيك الصحة امنيتي