وين وصلت قيمة الأستاذ..~

[حالمة بالجنة]

السلاآم عليكم ورحمة الله وبركاآته
....
..
...
....
كيف الأحوال ناس اللمة

؟
إن شاء الله تكونوا بألف خير وصحة وعافية يا رب =)
....
امم اليوم جيت نحكي وشويا مندهْشة لانو صرا موقف مازال الشوك ما راحش هههه

طبعا راني ندرس في الليسي واليُوم كيما العادة كان عندنا تكنولوجيا أفواج

مسكين الفوج تع أستاد التكنو فاااااارغ الناس كامل راحت تقرا إعلام آلي هههه
كاين 10 برك اللي قعدوا (حسبتهم ههه)ومن بينهم أنا
المهم...كنا قاعدين نكتبوا والاستاد شاف واحد يهدر قالوا نوض بدل بلاصتك ويرجع عليه التلميذ ما بغاش يبدلوا بلاصتو
المهم وصلت حتى الاستاذ جا عندوا وتزايدوا في الهدرة المهم أنا كنت نستنى يخرجوا ولا......
امبعدا حتى شفت الولد طبّع)دفع( الأستاد وزاد حكموا وبداو يتضاربوا والتلميد خنق الاستاد_o:
تخيل معايا الموقف تلميذ وأستاذ يتضاربوا ويعني مضاربة بالدبزات وهاكا
أنا انخلعت تع الصح............قعدت نقول نوضوا سلّكوا للي يدرسوا معانا
المهم سلكوا بيناتهم والنص شاد الاستاد والتلميد شادينو وزايد يقول اطلقوووووني عليه _o:اليوم نكسرلوا راسو
المهم جات المديرة والمراقب العام والتفراج القسم تعمر بعد اللي كان فارغ
وزيد كمل عليها التلميذ كي جا يخرج دار للاستاد وقالوا (برا نتفاهموا ) _o:
المهم هذا التلميد داير مشاكل و2 اساتدة دايرين تقرير ومادارولوا والوا...رغم انو كاين بزاف فاتوا مجلس تاديبي على غلطة وحدة
المهم فاتت الساعة والاستاذ ماكانش معانا
وامبعدا الساعة اللي وراها أم التلميذ جات والسي خونا ولا يقرى نورمال _o:
انا قلت نورمالمو اللي يفوت مجلس تاديبي يخرج وما يوليش حتى تفوت مدة عقابوا
لكن لما رجع عرفت بلي فيها إنّ....رغم اني اعرف امو وهي مراقبة برك
المهم نجو للصح لاننا نعرفوا البيستون اللي راه صاري وربي يستر
......طبعاآ أنا حكيت هاد الشي كلو على قيمة الأستاذ.....وعلاه وصلت لهاذ الحد..صح كاين اساتدة يوصلوا رواحهم لكن قليل بالنسبة للامر الثاني
انا بغيت نفهم حاجة .زعما هاد الطفل لما يعيط ويتضارب زعما رجلة ..........والله ما فهمت
و مسكين الاستاذ اللي يجي يهدر معاه يطير عليه ..يعني ربي يعين برك
وولاو زعما يحلفوا في الاستاد خصوصا اللي عندهم لواطا(طونوبيلات .سيارات =) )
حتى يلقاها مكسرة ولا كاش حاجة
والمصيبة الكبيرة في الوالدين...يعني والدوا غالط ويجي تلقاه يعيط ويتضارب معاهم وزيد يوصي ولدوا يقولو يهدر معاك استاد قولي _o:
امي تقولي حنا كنا صغار كي تعيط الاستادة للوالي.هاذاك نهارنا...كنا ناكلوا العصا في الدار وزيد قدام الاستاد ويوصوه ويقولولوا زيد اضربه باش يستعقل ههه =))))
...والله وقت وصلنا ليه
ربي يقدر الأساتذة على جيلنا وربي يهدييينا يا رب =)
إن شاء الله ما نكونش طولت عليكم
ونعطيكم الخط حتى تحكولنا شويا على هاد الأمر..و واش هي أرائكم ؟ =)
ربي يحميكم =)
وفي آماااان الله

​

 

[إنسانة ما]

وعليكم السلام ورحمة الله
بارك الله فيك أختي
ربي يرحم التعليم في الجزائر
قبل كانت للأستاذ قيمته وهيبته، الآن ما أصبح لا قيمة ولا هيبة.
الأستاذ حط من قيمته، والإدارة حطت من قيمته، والوزارة ما خلاتش. والتلميذ يجي من بيت أهله مش متربي ويلقاها سايبة فيعمل وش قالو دماغو.
ربي يقدر الخير

​

 

[ماكانش]

اهلا بيك حالمة بالجنة ربي دخلك ليها
هذي مراهقة، والطفل في هذ السن يحب يبين روحو بلي راهو راجل وواعر باش يشوفو فيه لبنات ...
وهذي هيا نتائج وثمرات المعريفة
الطفل لوكان ماكانش علابالو بلي راح يسلك ومايصرالو والو ماكانش يدير هكذاك
ربي جيب الخير
يعطيك الصحة​

 

[آمِيْرَتُه]

بكري كنا كي نشوفوا معلم او استاذ نخافو و اليوم رجع التلميذ يقابحهم نورمال
الله يهدينا برك و تاني سوء فالتربية
​

 

[touffik]

الله يهدينا الجزائر رحت فيها وين تروح تلقيها هك​

 

[nihade.off]

ههههه حسبتت هذي غير عندنا امالا نزيدك رفدلو كرسي و قريب يضربو ستر ربي برك و profمسكين عندو une petite taille مات بالخلعة و مبعدد تحلف فيه و قالو نعاودلك لعام لغدوا دخل ا لتلميذيقرا لا باباه لا يماه
لعوج راه patrout بصح نظن prof هوا اللي بدا ملي ولا يعاند تلاميده و يحط راسو براسهم rahi grave
ا صلا مستوى نتاعو ماقعدش كي بكري تطرحي عليه سؤال خارج وآش راه كاتب في الورقة يتبلوكا و يحصل و تروحلو الهدرة ​

 

[adel-mz]

سلام
هذا باين يدير الرجلة على غير الاستاذ نتاعو برك ،لوكان يكون برة جاجة ميكتفهاش ،اخـــــــــــي مراهق اخي.الله يهدينا
بارك الله فيك
​

 

[مابقاش بزاف.Dz]

رانا نشوفوا و خلاص
مي و الله ديفوا الاساتدة الي يوصلوا رواحهم باسكو يتعداوا الحدود و ديفوا التلاميد الي يظلموا
ما فهمنا والو

 

[الصراحة راحة]

السلام عليكم ورحمة الله
ما عندي ما نحكي وما نقول
ولازم الاستاذ ما يوصلش روحه
وإذا أتقدرت عليه لازم يجتب العراك مع التلاميذ
والله يهدينا هذا ما نقول ​

 

[مرام التيبازية]

سلام.
ايه خيتو ربي يهدينا ويعينا ياربي انشاء الله يارب ايه هادي هو الجيل تع دوكا بصح خيتو المشكل مراهش بزاف في الوالدين برك المشكل في الدراري كي يكبروا نورمالمو يديروا العقل ويكبروا هما العكس يصغاروا ايه كيما قلتوا عمبالهم رجلة مراهقة وتفووووت انشاء الله...
ســـــــــــــــــلام..

 

[SAFA-94]

ربي يهدي الجميع
​

 

[حكاية احاسيس]

هدي اكيد فيها بيستون حنا كون تشوفي واحد فات على الادرة قبل ما تصوني ب 2 شافتوا المديرة قالت للشيخ نتاعوا دير فيه تقرير و كاين وحدة الكلاسة كاملة راهم رايحين يديروا فيهم تقرير (مشاغبين)
و الله قوات هدي تاع يضرب الشيخ و en+باباه تاني يجي يلعبها على الشيخ و يتبقر و الشيخ ما عندوا ما يقول
ربي يكون ممع الشيوخة

 

[dahbito]

ربي يستر برك والله نتاسف للحال لي وصلنا ليه وين وصل الاستاذ لا يحترم لاداخل القسم ولا خارجه
ربي يجيب الخير ويهدي اولادنا

 

[sali-sali]

ايييييه يا اختي والله هدا هو وقت وصلنا ليه
انا كرهت التعليم
والسبب نتاع هدا شيئ الادارة والاولياء
ويقولك ممنوع الضرب
ايا ممنوع الاستاذ يضرب التلميذ وحلال التلميذ يضرب الاستاذ
وتاني تعلمو يخلوهم يعاودو تلقاه كبير ويقرى مع وليداتو
ماشي تهبل
​

 

[kazawa]

الغلطة من الاستاذ لازم عليه يتجنب الاحتكاك مع التلميذ تاعو لانو يعتبر قدوة + التلميذ ماشي متربي ويزيد يديفوندو عليه باش يرجع بلا عقوبة كيفاش يتربى .مارسي

 

[خوليتا]

و الله تشوف و تسمع لعجاب هادو ليامات --- قريني و أنا سيدك---- ربي يهدينا و شكرا على الطرح الفور

 

[حفيد هواري بومدين]

كاين استاد من استاد
كاين لي حاب يتعمد ويوخد طريحةفي لخر

 

[βǻŋǾừŧά ₡ǖŦё]

السلام عليكم
علابالك ولله عجبتني تاع برا نتفاهمو
ههههههههه مي احنا عندنا مش هكا
تلقاهم يهدرو معاهم بسح جامي
لوكان قاسو بيدو
المهم شكرا على الموضوع الرائع​

 

[رضوة الجزائرية]

مشكورة يا لحبيبة جوابو عند لي منع الضرب وخلا برك وزارة التعليم :re_gards:بابيسطو ومازال الخير لقدام ورايح يصير ما يصير ويصبح الكسول يحكم بيرو المدير والمافيا تدرس بلاصت الاساتدة المنهاج هوكيف تكون السرقات والقتل والاجرام ادا تصبح كل شي بتكتلات i-o:ادا لم تنتمي لمجموعة تصبح بفعل كان :sad:الله غالب برك ربي يستر وحسبنا الله ونعم والوكيل لو نحكو ما نكملوش لانو السوسة راهي بادية تاكل في لعظم من زمان شكرا ​

 

[رضوة الجزائرية]

كاين استاد من استاد
كاين لي حاب يتعمد ويوخد طريحةفي لخر

معاك الحق بصح وين راح الاحترام للكبير زمان كان الكبير يعاقب ولو كان ظالمك كان الاحترام والود بصح درك الصغير لوتغلط فيه يعطيك عظم تكددو صراحة