وعلاه هكدا ؟؟؟؟

[اقبال1]

السلام عليكم و رحمة الله و بركاته



نتمنى كامل ناس اللمة يكون بخير و على الف خير ..

وجعني راسي بزاف بزاف و هكدا حتى جات في بالي انو نكتب هنا واش وجعني علابالي تفهموني ..


اليوم كي فطرنا قاتلي يما نروح باه تشري حجاب تاع شتا لروحها و انا قلتها البارح خلي بعد الظهر خير بسكو الغاشي ينقص و نمشو في راحتنا ... المهم خرجنا من الدار للسوق و مين وصلنا نخلعت الغاشي بلا حساب بصح ما عليش بسكو حتى انا من لغاشي يعني مشي مشكل خلاص ..

قعدنا نتمشاو حتى شافت يما حجاب عجبها قاتلي ندخلو نشروه و انا ندخل الحانونت اول حاجة شفتها انو صاحبوكان مع وحدة يهدرو و لا معلاباليش واش المهم ما نتهمو بحتى حاجة و مشي هدا هو مشكلتي ...

يما قعدت قل من دقيقتين تشوف ف لحجاب حتى نسمع الغنا زايد زايد زايد زايد و الله غي تقول راني في عرس و لا bar المهم زاد الميسيو صاحب الحانوت للغنا بزاف بزاف ..المهم مشي هادي هي مشكلتي بسكو محل تاعو و هو حر فيه وما نحبش نقول بلي " المشتري هو الملك " و نقعد نتفلسف بسكو علابالي في بلادي ماكانش منها ..

انا درت ليه و قتلو بالحرف " معليش خويا طفي الغنا .." و ما جيت نكملها حتى وليت ميتة بالحشمة حسيت قلقتو مع لمدام ..

مشكلتي هنا انا ماجيت نكمل كلامي و اذا هو يطرطق عليا تقول بومبا تقول طيحتلو ..قالي " عاودي عاودي ما سمعتش مليح حبيتي نطفيه ما تدخليش خلاص "

انا قبل ما يكمل هدرتو رفدت روحي و خرجت مع يما و هو كمل يهدر و يسب و ...و خرجت حتى لبرا و هو مازلو يعاير مختصر هدرتو و كلامو انو انا بينت الشارع و انو اونو...جيتي حاسبة روحك و ما تحشميش و انتي و انتي ..يما تسكت يه و تقولو ربي يهديك و هو يزيد و يزيد ..

يعني كل من كان يشوفنا سير كان يقول هادي سرقتلو و لا سباتو و لا حاجة بسكو طريقتو كانت هكدا تقول ..

صدقوني رايحة هو لاحقني و.... و شابة من تالي قالي نزيد نشوفك نشكي بيك



انا لي خلعتني السب هاادا واشنو ؟؟؟؟؟؟؟؟؟؟؟؟

قسما عظما كون كنت في بلاد اخرى كون رحت للمحاكم نورمال بصح مشكلتي انو راني في بلاد لي المرا لازم تسكت و تسكت و تسكت و تسكت قدام الراجل و ما تبهدلش روحها و...

علابالي هدا هو دينا بصح هو تاني مسلم كيفي و ين راه دينو وين راهي اخلاقو ؟؟؟؟؟؟؟؟

هو لي لازم يكون في الحبوس و يتعلم يقادر بنات الناس ..انا نسكت و هاديك تسكت هو يدير confiance في روحو و يقلك راه عندي الحق و يزيد و يزيد

اسيدي حب يقدر براحتو مع الطفلة ساهلة يقلب لابلاك و يدر " مغلق " و يقعد ...مشي يقلب زعافو فيا انا ..

كنت نحب نهدر و نقول يا لميسو انا كي دخلت ماكنت داير والو و كون دخلت و انت حاط لغنا تم هدر معايا مي حقي هدا واشنو ؟؟؟؟؟؟؟

ماعلاباليش اسكو حشمت و لا خفت من هدرة الناس و لا ماعلاباليش مي انا سكت خلاص و يما لعزيزة ماشرات لحجاب و رجعنا ليه ليه للدار و كي حكيت لماما واش صرا قاتلي هادي مشي مربي و انتي كون خرجتي و سكتي ...

بصح انا لي حابة نفهمها يجي راجل هكدا و نورمال يطيح لمرا ؟؟؟؟؟؟؟؟؟؟؟ علاه ؟؟؟؟

جامي تخيلت نشوف هكدا موقف من نهار جيت لبلادي و انا نهبط للسوق مع يما مع بابا مع اخواتي و... و نورمال حتى واحد ما يتكلمنا نص كلمة نروح سالمين فرحانين و نجو سالمين فرحانين
مام بزاف و حتى هنا في اللمة يقولولي هادي هي الحالة بصح انا ما كنت نأمن مليح لحتي صرالي هدا اليوم ..

علابالي راني طولت عليكم بصح سمحولي بسكو تعقدت تاع الصح ...واشنو هدا ؟؟؟؟

 

[bachboucha]

ماوش متربي هادي هي السبة هاذا ماكان ماوش مربي ....​

 

[إنسانة ما]

وعليكم السلام ورحمة الله
أهلا بيك أختي إقبال وسلامة راسك
الله المستعان، وش تحبي أختي قلة التربية وسوء الأخلاص أصبحت سمات هذا العصر.
هذا وش كنَّا نحكيو قبل يومين في الموضوع لي طرحتو إذا تذكري.
وحكاية الغناء هاذي لي في المحلات بلوة عمَّت.
والله العظيم يوم عن يوم نفسي تقرف من الخروج من البيت، ويوم عن يوم نحمد ربي أني صاينة نفسي في البيت ومرتاحة من الخرجة.
وبالنسبة لهذاك الشخص ينطبق عليه حديث النبِّي -صلى الله عليه وسلم-: (إِنَّ مِمَّا أَدرَكَ النَاسُ مِن كَلاَمِ النُّبُوَّةِ الأُولَى إِذا لَم تَستَحْيِ فاصْنَعْ مَا شِئتَ). إذا هو ما استحاش من ربِّ العباد فكيف رح يستحي من العباد؟؟؟؟
ربي يقدر الخير وربي يحفظك أختي وما تتخلعيش منا وجاي. كلشي عادي.

​

 

[جوانا]

wah khti kayna manha w ch7al men mara natlaka bemawakif kima hado machi yasrawli basah yasraw kodami
tji tanshi7 ydirlak hala w mam chirat yji yansa7ha wahad dirlo hala w talsak fih

 

[أم راضية ~_]

إنحطاط الأخلاق هادا هو ; و ماهوش راجل اللي يسب بالعكس تماما و اللي يشطآر مع النسا
ما تقلقيش روحك ختي حب يغطي على أفعالو و حب ييبين روحو قدام الي كانت معاه..

 

[ماكانش]

أهلا بيك إقبال
عملتي مليح كي خرجتي وصمطيه
وهكذاك ومازال ماشفتي والو ...
كيما قلتي ماناش في دولة تاع حق وقانون
في بلاصة أخرى يسب مرا لبرا يباصي
ماديريش في بالك مادامك في الجزاير
هذا قليل الأدب والإحترام والتربية
لالا ماشي قليل الأدلب، هذا عديم الأدب خلاص ماعندوش ذرة
يعطيك الصحة اقبال​

 

[Yacine333]

انسان لا علاقة يتخابط في الهدرة
وبلاك ميعرفش امور السوق
ربي يهديه
والحمد الله كي خرجتتي مانعة ههه
مرسي ختي
​

 

[الخيزران]

هاي باينة ,هو كي دخلتو وشافكم محترمين شعل الغنا باش يليكيديكم زين زين
نورمالمو الزبون ملك
Le client est roi
وكما قالتلك الاخت انسانة غالية لي ما يحشمش يعمل واش يحب
عيبنا الوحيد اننا شعب ساكت مايريكلاميش على حقو كي شافك ساكتة زاد فيها ,لو كان شم فيك رائحة القوة والعنف راهو خنس ناس تخاف وما تحشمش ,
على الاغلب هاذيك ماهيش حانوت تاعو وهو مجرد عامل بالاجرة ولهذا ما يهموش مال الغير. محل الاسترزاق يحولو الى مكان للقاءات واكيد المالك تاعو ما يعلمش
وهذا لغياب الرادع
وكاين بعض الذكور لي تجيهم الحمية والوطيس كي يشوفو بنت يرجعو عنتر تحاسبيني بربي يا لو كان انا غير نلم عليه الامة
ونحطلو سعدو تحت رجليه بدراهمك وتتهاني ؟
راني منفعلة اخر
اختي اقبال المرة الجاية العين الحمرا برك الحياء ماشي من الحق
بصحة الوالدة الحجاب

 

[سلفي والحمد لله]

الله المستعان كارثة والله
راهي باينة يا ختي راهو ينعت في روحو قدام الطفلة زعمة باش تقول صاحبي راجل وواعر
ختي قال تعالى والعصر ان الانسان لفي خسر الا الذين امنوا وعملوا الصالحات وتواصو بالحق وتواصو بالصبر هذا اختي جزاء الداعي للحق لازم يصبر على الاذى بعد الدعوة اليه
يعطيك الصحة ختي على شجاعتك ونهيك عن المنكر تلقايها عند ربي باذن الله
​

 

[adel-mz]

سلام
معندوش حق يشتمك ولا يسبك ،مي اختي بصراحة كنتي غير مع دخلت للمحل نتاعو وليقيتي الحالة متعجبش معناتو محل ؟؟؟؟؟ اخرجي مباشرة من حيث دخلتي ،حتى وان كانت حاجة عجباتك مي منشريهاش ونحوس في جهة خلاف،هكذا تجنبي النوع من هدو العباد الغير محترمين ،خاطر اخي بصراحة كاين ناس تاخذهم العزة بالاثم ،علابالو بلي زبونة ولك كل الاحترام مي صامطين الله غالب ناس موضوعة في غير محلها.
شكرا
​

 

[لاجودان شاف]

حنا بارصاويات خلينا منها راها ريالية جبرية ....انوثة في الكوما

شكراااااااااااااااا
والله يا اقبال جيييت نكتب موضوع حطيييتطو في موضوعك كرد هههههههههه
المهم ماتقلقيش رووحك الجبور كيما هذا راهم يطايشو
لقدام برك​

 

[الخيزران]

شكراااااااااااااااا
والله يا اقبال جيييت نكتب موضوع حطيييتطو في موضوعك كرد هههههههههه

​

ههههههههههههههههههههههههه
راني نسلت في الدموع من الضحك

 

[لاجودان شاف]

ههههههههههههههههههههههههه
راني نسلت في الدموع من الضحك

ههههههههههه
عند لا يشيحو عينيك مالا
ههههههه​

 

[نورجس]

ماشي متربي

 

[الخيزران]

شكرا على الموضوع

 

[وصال]

ياختي واش نقولك قلة الاخلاق والتربية واذا جاءك الذم من ناقص شهادة لك بانك كامل .
خيتوا متعمري راسك ماوالوا هذا انسان حابس مام ولوكان رجعتيلوا مرحش تسلكي معاه اذن من الافضل تسكتي وتخليه يغلي وحدو كالماء في القدرة برافوا عليك قتلتيه غير بالقدر والنار كيمتلقاش واش تاكل بيان سير تاكل روحها .اتهلاي في روحك حنونة ودايما ديري في بالك بلي كلام الغالي يسهرك الليالي وكلام الرخيس مايقيس.

 

[اللـــ فراشةـــمة]

يقول المثل:
إذا لم تستح فافعل ما شئت

وهذا ارجل أكيد لا يحمل ذرة من الحياء، وهو بعيد عن الأخلاق كل البعد، ربي يهدي ماخلق.

 

[إنسانة ما]

يقول المثل:
إذا لم تستح فافعل ما شئت

وهذا ارجل أكيد لا يحمل ذرة من الحياء، وهو بعيد عن الأخلاق كل البعد، ربي يهدي ماخلق.

بارك الله فيكِ أختي، ربي يحفظك
حبيت فقط أنبه على أن ما ذكرتيه ليس مثلاً وإنما هو حديث عن النبِّي -صلى الله عليه وسلم-، واللفظ الصحيح هو: (إِذا لَم تَستَحْيِ فاصْنَعْ مَا شِئتَ).
ربي يبارك فيك أختي

​

 

[ام أمينة]

لا إله إلا الله محمد رسول الله
​

 

[amoulita@mosta]

والله غير ناس عجب والله يهديه مشي حق عليه باه يسبك ولا يعايرك
ختي كان لازم تفهمي روحك بلي ديرونجيتيه شوية
ماتتخلعيش و ماتقلقيش روحك