مطعم القيد أو شهاب...خضار وادي الذئاب...جزار الاسقلال...بففف ثقافة الشعارات تاعنا

[لاجودان شاف]

مطعم العقيد أو شهاب...خضار وادي الذئاب...جزار الاسقلال...بففف ثقافة الشعارات تاعنا

السلام عليكم ورحمة الله وبركاته
أهلا بجمييييييع ناس اللمة الملاح وان شاء الله راكم ملاح
وأتونسيو راهي جات الشتا ولرياح وكيما قالو ناس بكري بدل لمراح تستراح :re_gards:
اليوم حبيت نحكيلكم على واحد القضية ديما نلاحظها ونقول نهدر عليها مي ما ولاتش برك
- وما تخافوش مش على الانوثة بيسك الانوثة مازلت حالتها مستقرة في الكوما -
روماركيت بلي ثقافة الشعارات عند التجار تاعنا والحوانت ضعيفة خلاص
والعجيب تلقا شعارت معندها حتى علاقة بوش راهو يبيع
ولي يزيد يبولكيلك المخ نيشان قالش جماعة الغرب -تحية كبيرة-
الجماعة التي تهرب غير لشعااارات السينيما:scared: والتلفزيون:scared: والفنانين:scared:
والله تحير
والله يا خوتي مانزيد عليكم كلمة هنا في باتنة كاين وحد المطعم سماه مولاه
مطعم باب الحارة .....والله دوخة صح
كي تشوفو من برا مداير p انوات كبار بزاف وحمر
وكاتب فيهم مطعم باب الحارة في النص
وعلى لادروات مطيش تصورة أبو شهاب هاذاك خاطف فيها عمامة وش نقولك
ومشنف تقول راح يهجملو على الريسطورو تاعو جماعة الحارة لخرا
وعلى لاgوش مطيش تصوويرة تاع واحد ثاني موسطاش
حق الله تشوف لي موسطاش تاعو دوووووخ وتعاف حتى الماء​

يعني حبيت نفهم برك زعما هذا كي يسمي المطعم هكا ويدير هاذ الوجوه
راح يكثرو علي لي كليون ويخدم مليح
وووزيد وش دخل باب الحارة وابو شهاب وابضاي .في عدس ولوبيا وكمونية
وهومبورغار مدوبلي فرماج ناقص مايوناز ......والله تحير
نزيد نحبسلكم راسكم ...والله قدامي خضار مادير لافتة
خضر وفواكة عند باباي - باباي ممعناها واحد سمر في لهجة اقليم باتنة -
ومطيش لافوطو تاع هذاك البطل تاع مسلسل وادي الذئاب
انا عييت نفهم وش دخل واد الذئاب والترك والموصاد
في البطاطا والطماطم والكيلو بالف وربطة معدنوس​

كاين عندنا ثاني مطعم في باتنة تاع مرا سماتو مطعم فتافيت
مافهمتش انا وش تقصد زعما تعرف طيب كيما فتافيت:scared: ولا عقلية فتافيت:scared:
والله دوخ
وبلا ما نحيكو على هاذوك الناس النية
تاع جزار الاستقلال ...:scared:....وش دخل اللحم والمرقاز في 1 نوفمبر ..
او حفاف البركة :scared:....يعني كيفاه كي نحفف عندك طيح عليا البركة
ويوليو عندي بزاف صوارد ..........دووووخة كبيرة​

وكاين وكاين وكاين
ونتوما أكيد راكم شايفين شعرات كيما هاذو في ولاياتكم زيديو احكيولنا عليهم ​

رومارك مروماركية بالماركور_o::
لفظة - أبضاي - مانيش غالط فيها راهي تنطق هكذا
قالهالي واحد سوري كي كان يركب في لومبا وكنتا حاكم بيه السلوم
وهي اصلها - قبضاي - يعني جاية من القبضة -الدبزة-
نحلف بري مكانش جزايري يعرف ها المعلومة هههههههههه
وشكرا
​

جميع الحقوق محفوظة لدى لاجودان شاف ما قرا ما شاف​

 

[adel-mz]

السلام عليكم
ههههه معندكمش برازار حلاق مهند او حلاقة لاميس هههههه ياراجل خلات وجياحت الامة ربي يستر
كل واحد يسمي كيما يبغي المهم ياتيري زعمة الغاشي .رانا عايشين بالهف
يعطيك الصحة يالشاف

بيناتنا والله مانبيع زعمة متعطيناش بارمسيون يالشاف هاو الكاشي عندك ههههههههه
​

​

 

[إنسانة ما]

وعليكم السلام ورحمة الله
صح كاين منها
هنا عندنا واحد فاتح محل فاست فود كاتب عليه: دجاج بلندي .. زعما هو بارع في الدجاج
هذا من باب لفت الإنتباه فقط.
أنا خويا مرة فتح مطعم سماه مطعم أم القرى :cra_zy: وش دخل مكة في الماكلة الله أعلم
+
شكرًا على المعلومة الخاصة بالقبضاي
+
الحمد لله لي الأنوثة مازالت مستقرة
+
رومارك: الإستقلال 5 جويلية مش 1 نوفمبر
​

 

[بيّاع الورد]

اهلا حضارات

هههههههههه ما تتخلعش راهي مودة كباقي المودات اللي اعتدنا عليها

ربي يعطينا العقل

الف ششكر

 

[جمــآنــة]

هههههه ،،

والله صح تحييييييييييييير فيييهم 0_o

انــآ شففت وحد البازآآر مساميينو بـآزار دبي هههههه يعني وش دخل دبي في بـآزآآر تاع الحـآجة بألفييين تدووخ صح ،،

عجبتني الرومارك بالماركور هاذيك الاخيرة هههههه ....
​

 

[ღحنين الروحღ]

السلام عليك ورحمة الله وبركاته
كلامك صحيح يا اخي
وشعبنا الجزائري -فتيات وشباب-لم يتاثروا بالاسماء فقط او بالمطاعم بل تاثروا ايضا بطريقة اللباس والكلام
واسماء البلوتوث واسماء المواليد الجدد
كل ما يطلع فيلم جديد واسم بطل جديد لازم يسموا على اسمه
طلعت نور ومهند سمو كيفهم
طلعت سمر سماو عليها..
طلع ادم سماو عليهم...
ممممممممممممم يقولوا ثقافة ولكن الثقافة لا تقتصر على التقليد للاشياء التافهة
انا عن نفسي لحد الان ماشفتش شعارات واسماء مطاعم مثل الي انت حكيت عليهم
انا الي شفتوا
اسماء البلوتوث
اسماء الفايس بوك اسماء المسن ...........وكل ماتعلق بالنات
اللباس واكثر شئ اللباس*ركز على الكتابة الي باللون الاحمر لانها لا فتة وتخرب العقل ............الله يهدينا كامل*
عقلية الجزائري قلد الي قبيح وماتقلدش الي فيه الفايدة
هاكذا حنايا واكيد احنا عارفين هذا الشئ مي واحد ماقال اواه نبرز شخصيتي وبعدين نقلد الي يفيدني

اما
- أبضاي -
فهي تعني شهم وقوي وراجل بمعنى الكلمة
وكثير ما سمعتها
شكرا لك على الموضوع
الاكثر من رائع
تقبل ردي
دمت بالف خير
​

 

[كلي امال]

كاين بيزيريا في و لايتنا اسمها : دقت ساعة الاكل الى الامام الى الامام كي قاتلي عليها اختي مت بالضحك و حرت في ناسنا الهوا اللي جا يديهم ​

 

[ماكانش]

أهلا بيك يا الشيخ
واش راح يسمسه يا الشيخ مطعم علي لابوانت، ولا مطعم الشلعلع ...
ولا يقتلونا بمطعم الأوراس ههههههه​

 

[إيمان قلب]

السلام عليكم
الحمد لله كي راهي الانوثة حالتها مستقرة فرحنا نهار تخرج من الكوما ولا اخلعنا نهار تتدهور الحالة
الوغ ماجاتنيش بيزار هاذ العفسة , كون لاوقفت على ابوشهاب وباب الحارة
كاينة واحد المخبزة في ولايتنا , سموها مخبزة عبد القادر كايتا ... " نورمالمو تعرفو ؟؟؟"وجيت راح نكتب عليها بالصح ماوالاتش كيما قلت انت ايا معليه راك كتبت انت , واش تحب ياك احنا قاعدين غي نطبعو منعرف شاراح يضيف اسم ابوشهاب ولا باب الحارة على الماكلة ولا الحفافة ولا القهوة
هيا خلطها تصفى , يعطيك الصحة خويا لاجودان على الموضوع الهايل +​

 

[نجاة40]

حنا عندنا كفيتيريا زنقة زنقة
ومقهي ام درمان وبزاف بزاف كيما قلت انت
​

 

[nina bonoise]

ااامممم حتى هنا كاين مطعم باب الحارة ديما نوكل عندهم ماكلتهم بنينة ههههه
و كل طابلة فيها فوطو من شخصيات باب الحارة
انا نحب الطابلة تاع معتز لوووول

 

[zagane]

السلام عليكم
مقهى zanga zanga

 

[حكاية احاسيس]

انا نقولك الصح صح هديك تاع ابو شهاب و جماعتها نورمالمو ماعندها دخل في الخدمة مي كاين و كاين
احنا في الشلف كاين وحد المطعم سموه القدس الغاشي عندو مي مغلي و الناس بدات تروح عند وحداخر نورمال
انا نشوف لازم اسم المتجلر يكون ملائم للخدمة اللي راح تنحط فيه
سلام

 

[اعيش راضية]

هههههههههه موضوع حلو بزاف و شباب
حنا عندنا مطعم الديرة مطعم باب الحارة كيما راك تقول
بصاح ناس الجزائر يحوس يديروا اي حاجة باه يلفتوا الانتباه
سوبيريت ام القرى
اما تاع ريال و البراصا و جماعة زين حدث و لا حرج
المهم تقبل مروري
و الحمد لله غير على الانوثة​

 

[virus2015]

يعني حبيت نفهم برك زعما هذا كي يسمي المطعم هكا ويدير هاذ الوجوه

راح يكثرو علي لي كليون ويخدم مليح
حنا شعب إكسكلوسيف يعني متميز في كلش
البلدان يديرو إشهار ولافتات وصور باش يجيبو لي كليون :sheer:
مي تاوعنا يجيبوهم كروشهم كي يجوعو ما يعرفوش كيفاه يلقاو روحهم قاعدين في الطابلة " ولا واقفين هههه"
وكي يعمروها مليح ويشبعو يبداو لا كريتيك :schmoll: : الماكلة مسوسة، البيتزا معجنة، واحد يقولك شفتو نحى الشمة بيديه وراح يقسم الخبز يععععععع​

تاع جزار الاستقلال ...:scared:....وش دخل اللحم والمرقاز في 1 نوفمبر ..
ولا ما رانيش غالط الاستقلال في 5 جويلية :schmoll:​

رومارك مروماركية بالماركور_o:: عجبتني هذي ههههه​

لفظة - أبضاي - مانيش غالط فيها راهي تنطق هكذا
قالهالي واحد سوري كي كان يركب في لومبا وكنتا حاكم بيه السلوم
وهي اصلها - قبضاي - يعني جاية من القبضة -الدبزة-
نحلف بري مكانش جزايري يعرف ها المعلومة هههههههههه​

في هذي راي معاك :showoff:
مي صاحبنا السوري خاف تتلق السلوم من يدك
على هاديك راح يخلعك بالقبضاي؟؟؟ :santa_1: لاجودان شاف ما قرا ما شاف​

صحيت عى الموضوع خويا :re_gards:
برك جاوبنا هاذ المرة ما تنساناش :sadwalk:​

 

[سلفي والحمد لله]

صحيت يا بوشلغوم اخويا
انا حاب نحل مع وحيد بيتزيريا بيان ستيكي وفي كل طابلة تكون شمعة
وكي يجي عندي كوبل نقولهم بضرافة اعطيوني لي كارت تاعكم باش مانوقعش في المحضور

​

 

[nina usma]

hhhhhhhhhhhhhhhh wlh ghir da7aktni ya hkou :lol: ana f 7oumti kayan wa7d alpisri wasmou alfoussol al arba3a (rakoum chafyinlu hadak alfilm) w kayan wa7ad msami 7anoutu ARA7MA:um_sh: w wlh ghir wa7ad mayachri 3lih psq yakwu les prix 3andu _o::scared: za3ma za3ma dayrin ghir al2asam hada wach yasla7 cha3b mahboul wlh :shiny: hhh

 

[خوليتا]

أو شحال تهدر بزااااف يالشاف هههههه راني نتمسخر ماكالاه تتغشش
أنا شوفت حالقهوة سمها مقهى أم درمااان و بزااااف بزاااااف بصح غير هاذيك شفيت عليها علابالك بلي ذاكرتي ضعييفة بزاااف + ثانكيو على المعلومة نتاع أبضاي + تقييم

 

[صراحة]

بيزيريا برشلونة عطور برشلونة ..............الخ القائمة طويلة عريضة و الاسم ليس على المسمى من البرا الله الله و الداخل يعلم الله شكرا على الموضوع ​

 

[لاجودان شاف]

السلام عليكم ​

ههههه معندكمش برازار حلاق مهند او حلاقة لاميس هههههه ياراجل خلات وجياحت الامة ربي يستر


كل واحد يسمي كيما يبغي المهم ياتيري زعمة الغاشي .رانا عايشين بالهف


يعطيك الصحة يالشاف​

بيناتنا والله مانبيع زعمة متعطيناش بارمسيون يالشاف هاو الكاشي عندك ههههههههه​

​

​

أهلا عادل
هههههههه لالا معندناش بيسك حنا في باتنة كامل مهندين
والبنات كامل لمسيات ..يعني حاجة مش بيزار عندن
+
صح والله جياحت وراحت عايشييين بالهف
+
ههههه هي نكاشي لخويا ونعطيك بارميسيون تروح تقعب
الريvيرون في سوسة هههههه
شكرا
:re_gards:​