اختي الصغيرة اكبر مشكل عندي عاونوني لو سمحتم

[salisasso]

السلام عليكم خاوتي ناس اللمة
انا عندي مشكل وحبيتكم تعاونوني فيه الله يجازيكم خير قولولي واش ندير
عندي اختي اصغر مني ب10 سنين هي الصغيرة الدلوعة في الدار
انا الكبيرة عمري23 سنة
المهم اختي هادي تحب تدخل روحها في كل المواضيع الكبيرة والا الصغيرة،اللي تخصها واللي متخصهاش
مشكلتها حابة تكبر قبل الوقت وحابة تكون كيفي
يعني
كي نكون مع حباباتي نحكيو والا نقصروا مع بعض في عدة مواضيع
وعلابالكم بالمواضيع نتاع البنات عديدة ومختلفة
ومن المفروض وحدة في عمرها متدخلش في مواضيع الصبايا اللي في عمري انا
هي لا،تحب تدخل روحها وتهدر وتحكي كأنها وحدة في عمري
والبنات حباباتي ميحبوهاش تقصر معانا طبعا لانها صغيرة دون نقاش
وماتفهمش روحها غير:1 كي يبخصوها والا يقولولها نوضي ما تقعديش معانا انتي صغيرة اقعدي مع اللي قدك في العمر
2 والا كي نقولها انا نوضي روحي العبي مع اللي قدك
تزعف وتشنف وساعات نصيبها تبكي
وكي نفهمها ونقوللها باللي "راني منحبش الناس يبخصوك
كي نكون قاعدة مع البنات الصبايا انتي نوضي افهمي روحك ماشي حتى يبخصوك والا حتى نقولك انا نوضي "
يا جماعة واللي زاد كرهلي حياتي اني كي نحكي معاها ونحب نفهمها تنوض تبكيلي وتقولي
"انتي تكرهيني ومتحبينيش وعمري ماشفت اخت تكره اختها كيما انتي ،عمرك ماتحسي بيا وما تحكيلي اسرارك والا تهدري معايا كيما البنات "
انا الصراحة كرهت حياتي من تصرفاتها اللي مفهمتهاش
ماهيش قدي باه تفهمني وباه نحكيلها اسراري
ماهيش داخلة راسي فكرة اني نحكيلها اسراري
مفهمتهاش تاع الصح ودوختني معاها
علابالكم دركا انا نكتب في هاد الموضوع
دخلت عليا وانا في دار مافيهاش وسن نقراو بعني على الاقل مكتب(بيرو) باه تكتب وهب عندها بحث قاتلي معليش نريح هنا قلتلها ماكاش وين تكتبي شافتني شافتني وزعفت وراحت وكي حكيت معاها حقرتني وماحبتش تهدرمعايا
"هادا القليل من اللي راه يصرالي كل يوم "
يا خاوتي قولولي وش ندير معاها
كرهت كرهت كرهت تاع الصح
علابالكم وليت نسنا زينتا يجي الليل باه نريح منها ومن تصرفاتها
نسنا وينتا نخرج للجامعة باه مانشوفهاش ومايصرالي معاها حتى geste ونحصل فيها
وكي نحب نفهمها ماتفهمنيش
انتظر يد العون
اعانكم الله وجزاكم كل الخير



​

 

[ام منصف]

اختك صغيرة حاولي تفهميها بلعقل حتى تقنعيها بهذا الشيء لانه هذا هو العمر اللي يحسبو فيه ارواحهم كبروا ويحبوا يدخلوا في مجتمع الكبار
واحنا نعتبروهم صغار مهما كبروا وهذا اللي يخلق المشكلة اللي راكي تعاني منها
سايريها طبعا في امور باش ما تنفرش منك ونعتيلها الصح
وجامي تعيطي عليها قدام صحاباتك والا تبخصيها
وان شاء الله تتجاوزي هذه الحالة
​

 

[اسماء16]

عانويها بلهدرة فقط متعيطيش عليها الانها راها في سن صعيب
خليها هي تحكيلك قصري معها فهميها وعونيها بلكلام الحلوى اما عن اسرارك متحكيلهاش وانما اسمعي فقط ليها واش تحب تقولك
وتناقشي معها
متعمليهاش كانها مزالت صغيرة بينك وبينها نورمال
مي قوليلها كي يجو لبنات ليا متريحيش معيا لخاطر ميحبوش زايد ريح معنا بلعقل بلعقل تولي تفهم
مرحلة وتجوز حنونة
تقبلي ردي ومروري
​

 

[محبة الورد]

اختي بلعقل برك على اختك على خاطر ختك راهي في مرحلة المراهقة وراكي تعرفي مرحلة المراهقة كيفاه مدايرة تحب تكبر بسرعة وتولي تقلد فالبنات لكبار ومدام مالقات حتى وحدة كبيرة من غيرك انت حابة تكون كيما انت
بالاك راهي تشوف فيك انت القدوة تاعها
تحب تعاندك تحب تريح معاك باه تدي شوية من عندك من صفات
هي هكذا تظن مي انت فهميها بلعقل بلعقل
ومرة على مرة خليها تريح معاك وتناقشوا مع بعض قسرة عادية وخليها يعني تطمن
وانا هذا مانقدر نقولك ختي ​

 

[Mr Brahim]

اختي بلعقل برك على اختك على خاطر ختك راهي في مرحلة المراهقة وراكي تعرفي مرحلة المراهقة كيفاه مدايرة تحب تكبر بسرعة وتولي تقلد فالبنات لكبار ومدام مالقات حتى وحدة كبيرة من غيرك انت حابة تكون كيما انت
بالاك راهي تشوف فيك انت القدوة تاعها
تحب تعاندك تحب تريح معاك باه تدي شوية من عندك من صفات
هي هكذا تظن مي انت فهميها بلعقل بلعقل
ومرة على مرة خليها تريح معاك وتناقشوا مع بعض قسرة عادية وخليها يعني تطمن
وانا هذا مانقدر نقولك ختي ​

و الله العظيم تقول سرقتي هذي المشاركة من عندي جيت نكتب نلقاك حطيتي واش كنت حاب نقول
المهم اختي العزيزة الحل بيدك انت و حاول تكوني صبورة و متفهمة . . . .
​

 

[مروة خ]

أختي العزيزة أنا مريت بموقف أختك الصغيرة هذي
كانت أختي الكبيرة ديرلي نفس المعاملة
لاخاطر أنا تاني كنت نحب نقعد معاهم ومتخلينيش
كي كنت في هذاك العمر حسيت بنفس الشعور تاع أختك
يسما هذا شيء طبيعي ولازم تعرفي بلي الكبير عمرو مايفهم الصغير
وراهي ظرك في مرحلة الاستكشاف تحب تعرف كلشي تبانلك نتي راهي تحوس تولي كثر من عمرها
ولكن هذه هي سن المراهقة __ معليش ظرك تعدي المرحلة هذي وتكبر
ويجي اليوم اللي هي تحب تشايخ فيه معا صحاباتها ومتخليكش تجي معاهم لاخاطر هدرت بنات
ونتي رايحة تغظبي ههههه كيما حالتي أنا وأختي
وهذي هي سنة الحياة __ فهميها هكذا بالعقلية برك ظرك تفهم

وان شاء الله كلشي يولي على ما يرام =)))
أختك مروة =))
​

 

[أم نعمة]

ماعليش ختي ساعفي ختك غير بشوية عليها وعمرك لا تهدري في ختك عند صحاباتك صاحبي ختك بالاك عندها حاجة باغية تحكيهالك وماراكيش عاطيتلها الفرصة بالاك تحبك بزاف وتحب تكون دايما معاك حليلها قلبك هادي ختك قبل كل شي فهميها غيبشوية قوليلها كي نكون مع صحاباتي ما تجيش كي يروحو نجي نجمع مع ختي خاطرش في هاد اللاج كي تجيبيهالها زعاف تزيد تتغندف لازم تقيميها شوية فهمتي تحسيها بلي راهي كبيرة

 

[la_safa]

السلام عليكم
هههـ اختي مالا راكم كي القط و الفار كيما انا و اختي
شوفي اختي ماتكبريهاش علابالي حوايج هاكا يقلقو صح تاع وحدة تجي تقعد معاك
و تدخل روحها و كذا و كذا
انت برك حاولي تحكي معاها فهميها بلعقل ولا كلحيها و احكيلها اي حاجة
يعني كوني صحبتها على قد عقلها هي هاكا باه ماتزعفش منك
و اون + ماتعيطيش عليها قدام صحباتك كيما قالولك الاخوات
لانو هاذا الشي يحرجها و يجرحها ثاني على هاديك تولي تبكي
و ماتنسايش هاذي اختك و ماعندهاش وحدة تحكيلها من غيرك انت حاولي اسمعيها
لانك انت الاكبر انت لي لازم تتحمليها
و موفقة ان شاء الله
​

 

[القطة الزهرية]

سلالالالالالالالام
او عندي واحد كيفها في الدار ايماجيني حتى نلقاه يعيط يروح لبابا واش اي ضربتني وصراو بزاف مشاكل بسبتو انا كرهت منهم حابة نقتلهم

 

[دعاء19]

هادي حاجة عادية مغاديش تخليها تكرهك حياتك كيما كتقولي غير انتي كبرتي الموضوع اختك مزال صغيرة معرفاش كيفاش تصرف وتعامل مع الناس ونتي بشوية وريها كيفاش وديري ليها عقلها وقوليلها من اكونو صحباتك انا منقعدش معاك لانكم اصغر مني ونخليكم براحتكم تهدروا وحتى انتي خاصك ديري هكا مع الناس لكبار وبشوية فهميها وهكا غادي تفهم ماشي تجاهليلها وتسناي غير وقت باش تمشي جامعة وتهناي منها ومتشوفيهاش مديريش فاختك هكا راهي هي لي غادي ادوم لك اما صحباتك مغاديش ادوموا ليك وهادي ديريها في بالك