مرناش في الدلالة يا ولد الناس

[وصال]

السلام عليكم ورحمة الله تعالى وبركاته​

كيفاش الحال ان شاءالله كامل لاباس عليكم والحمد لله
​

اليوم حبيت نحكيلكم واحد الحاجة صراتلي وقولولي رايكم .

صدقوني يوما بعد يوم اكتشف وقاحة بعض الناس والله حسبتلهم لبنات راهم يتلاوحوا في الزنقة غير يرفد صباعوا تجي ليه .
هادي واحدة تخدم معايا واحد اليوم وانا خارجة من الخدمة تلاقينا في الطريق كنت نستنى في البيس باش نروح للبيت ايا قاتلي الحمد لله لقيتك راني مرسولة ليك تعرفي فلان قتلها ايه بيانسير يخدم معايا قاتلي حاب يخطبك بصح بشرط انك تبطلي الخدمة انا ديراكتومو قتلها ياختي قوليلوا غير الخدمة لي نخدم بدات وعلاه ربي ميحبش و...و.... قتلها عندي اسباب وظروف يا ختي ربي يجيبلوا من جهة واحداخرا قاتلي اذن قولي لبنت عمك تامنوني في هاديك الدقيقة جاتني نورمال لكن امبعد قلت كيفاه هادي اذا ماشي انا بنت عمي والله عجب علاه احنا بقر اذا ماشي هادي هادي .
يوم واحد اخر جات قاتلي كيفاش بدلتيش رايك انا السيد مزال مرجعتلوش الخبر وهو الحق قالي عليك انت الاولى واذا مقبلتيش نقول لبنت عمك قتلها شوفي يا بنت الناس احنا مرناش في الدلالة ولا سلعة واش معناها هاد الكلام حسبتلوا رانا نتلاوحوا يا خي حالة ياخي .هي بدات تقولي حاشة علاش فهمتيها هكذا قولولولي لوكان صراتلكم عفسة كيما هادي كيفاش تجيكم نورمال؟
واش رايكم راني غالطة في هذا الشئ .

 

[CHEMSO]

لا يا اختي انت علي حق و هذا هو الجواب الكافي و االعجيب ان بعض الرجال يهينون المراة في بعض الاحيان بضنهم ان المراة مجبرة علي القبول بهم علي . بصح العكس المراة عندها قيمة و لا يجب اهانتها و خاصة في طلب الزواج.
المهم كل واحد فينا كي يخرج من بيتهم لازم يحسب كل البنات كيما اخته و عندما يتجرا علي اي شيئ لازم يطرح السؤال التالي
هل كون جات اختي في مكانها نقبل ؟
و الله يهدينا و يستر بناتنا و اخواتنا .

 

[اسماء16]

ربي يهديهم رجال دوكا
حرنا فيهم رجال يقولك معليش الخدمة ورجال يقولو لالا الخدمة ملا علاش قرينا
حنونة متعرفي وين راهو مخبي مكتوبك
شدة في ربي هدا مكان
تقبلي مروري
​

 

[امين 22]

ولله واش نقلك ممكن نيتها صافية مي معرفتش تقلك صح ونتي احسني العووووووووووون

 

[سجل أنا جزائري]

اسمحييلي ما علاباليش وش قصدو بصح أنا جاب لي نيتو كانت نورمال

 

[homework]

انت ماشفتي والوا حبيبتي وصال كاين لي يعرض عليك كي ترفضي يقول للأخت نتاعك الناس ولات تلعب في موضوع الزواج

 

[الحب في زمن الخيانة]

يا أختي انا نقلك الجواب
أنت ما عرفتيش جاوبيهم ......... خاطرش السكوت على الأحمق جوابه
هو أحمق و هي أكثر منوا واش عندبالوا هدا راه يشري فاللبسة و لا واش يخي عباد كيفاش دايرين
عندبالهم الزواج لعبة اي وحدة يلقاها يقلها اياي نتزوجوا

قلك واحد يتمشى هو و حنونتوا فالبلاد ....ايا كي شافت باباها فالتلوا أجبد بعيد بابا راه جاي ....... قالها ياك ما يعرفنيش ......قالتلوا ميعرفكش ....... قالها أيا مليح ...... قوليلوا خويا .................. ههههههههههههههههههههههههههه
كاين بعض الناس عندهم عقلية كيما هاك
الله يسترنا

وصال أختي ما تعمريش راسك الوقت اللي لحقنا ليه تتوقعي كل شيء و مازالك تشوفي​

 

[أسامة76]

السلام عليكم
مساء الخير .

العمل للمرأة ممتاز ويطورها ويجعل تفهم واقع المجتمع واحوال الناس , فلا تتركي عملك لاجل خاطب لا تعلمين هل سيكون زوجا صالحا ام لا .
وأما من لا يفرق بين المرأة وبنت عمها فهذا اجدر به الا يقدر اختيار زوجته له .
فهو كما ذكرتي يحسب نفسه داخل سوق بقر او غنم .
ولو ذكرتي انت انك تريدين أي زوج فكان هو ذلك الزوج لغضب منك وقال انت لا تفرقين بين الرجال وتحسبين انك داخله على سوق .

الرسول صلى الله عليه وسلم قال تنكح المرأة لاربع لمالها اوجمالها او نسبها او .لدينها .. ) أو كما قال .

فالذي لا يفرق بين كل تلك الصفات التي تحرص الناس على احدها أوبجمعها كلها في امرأة واحدة
عليه الا يتزوج اصلا

 

[ماكانش]

أهلا بيك وصال
هذي ماتصلحش خلااااااااص
كيما قلتي رانا في سوق الدلالة ولا واش
​

 

[sali-sali]

كون قلتيلها ادا ماشي انا وبنت عمي تزوجيه انتي
كي راهي خطابة وعاجبها تخطبو لروحها ولا لوحدة تقربلها
انا واحد هكدا يبقى غير هو مانتزوجوش
وزاد االبنات لي مايعرفوش يتصرفو هوما لي خلاو فئة من رجال يشوفونا على اساس سلعة يشري ويخير
الله يهدي
​

 

[***سوسن الجزائرية]

عندك الحق أختي واش قلتيلها ..علاه واش عمبالهم بطاطا ارواح وأدي ..ياخي سلعة ياخي ..الله يبعدنا عليهم

 

[وصال]

شكرا جزيلا لمروركم العطر الذي زين صفحتي .
هكذا تاكدت بلي مكنتش فضة معاها عندي كل الحق صافي صحيتوا بزاف يا خاوتي ربي يحفظكم ويخليكم ليا .

 

[وردة الروح]

يا وصال يا حبيبتي
هذا الغاشي كاين منهم بزاف
انت صراتلك مع بنت عمك أنا صراتلي مع أختي و ماشي واحدة افتحي عينيك مليح مع زوج
هذا السيد حاب يخطبني قبل ثمان سنوات
أنا رفضته لأنه جاري
و قرا معاي
و زيد ما يعجبنيش
بعد أربع سنوات عاود ارجع يخطب في أختي الصغرى
أختي هاذي أقامت الدنيا كيفاش إجيه الوقاحة و يتصرف هكذا
بعدها راح تزوج و الحمد لله انسيناه بعدها بعامين طلق مرتو و ارجع يخطب في أختي الوسطى
أيا يرحم باباك ماشي تروح تخنقيه
شفتي في حياتك وقاحة و بجاحة أكثر من هذي
وشنو أنا ماكانش عندي مانع
قلتلهم أنا ما عشقتو ما حبيتو ما علابالي بيه
و كل واحدة عطيتلها حرية الإختبار
أنت كذلك خلي بنت عمك هي اللي تقرر بالاك يتزوج و نحصنو زوج من المجتمع
نصيحتي أنك تسعي في ربط الشمل بلا ما تخبريها بلي كان ناويك أنت و ربي هو اللي إجازيك

​

و ربي إجيب الخير​

 

[Moha le sage]

السلام عليكم

انا حاب نقول ان السيد معذور ... يحوس على وحدة ما تخدمش .. بصح الطريقة اللي جات بيها اللي بعثها ذيك .. هي لي مش مليحة ...

يعني ماشي غش الطفلة ذيك تفرغيه في السيد و تلوميه



انا اليوم و البارح طحت في نفس الموقف ... نفس اللقطة هاذي تاع الخدمة ..قعدت نحكي مع صاحبي ..قالي كاينة وحدة طيبة و متربية و اصلها زين و عايلة ملتزمة .. الخ .. و الطفلة خطبها واحد من قبل و رفضاتو خطراش كان حاب تبطل خدمتها و هي محبتش ...

سقصاني صاحبي وش رايك .. ودار بينا حديث طويل على هاذ الشي ..

انا مبدأيا مني لا ضد الخدمة لا معاها .. اني نشوف في نص اللي نعرفهم يحوسو على وحدة خدامة .. والي نعرفهم و تزوجو نصهم داوها تقرري ... نص فيهم كانت خدامة ..زعمى تقرري ديجا و عجبتهم .. ونص لاخر اصلا يحوس على وحدة من لول خدامة ( التعليم كخدمة متفق عليها ) ...

انا فسرتها انها طمعية .. و صاحبي فسرها انو ما فيها والو كي يتعاونو ... و الواقع لي نشوفو انو حتى اللي بخير عليهم و يسلكو لاباس بيهم يحوسو على مرا خدامة باش يديرو دراهمها طوموبيل ولا يدوهم ...

و اللي يكرهو الخدمة كاين اللي يغير على مرتو ..و ما يحبش يشوفوها و هو حر ..كاين اللي معقد من هاذ الشي ..كاين اللي يخاف عليها ..كاين اللي يحس بلي رجوليتي تنقص من قيمتها ...


المهم ربي يسهل على الناس كامل ..

كاين ظاهرة خرى ..و هي انو في بعض الحالات الراجل باش تقبل بيه اللي حاب يتزوج بيها ..يقبل بشروطها ... و اللي من بينهم الخدمة ...بصح من بعد ما يجيبها لدارو يبدى يدير في السبايب و يبطلها ... و ايحانا يهددها حتى بالطلاق .. و هي كي تكون ناس ملاح و تخاف من عيب الطلاق و من انها تدير المشاكل تولي ترضى و تسكت .. وواش تدير المخلوقة اذا كان الراجل مش راجل .. و دار في رايو عليها ...

قضية التبطال تاع الخدمة هي قضية تاع اقناع ... اذا اقتنعت الطفلة مليح اذا ما اقتنعتش ما يجبرهاش ... و اذا ما قبلتش انها تبطل الخدمة في شرط الزواج .. يعتذر من باباها و منهم ..و يقول كلام لطيف ..من نوع ربي ما كتبش بيناتنا ولا ربي يجيب الخير ليا و ليك ..ماشي يقولها خيرك في غيرك ولا يهبط النيفو لكلام الشوارع و يقلها تندمي عليا و لا تبوري في الدار و معرف وش ..من الحوايج لي يصراو في مجتمعنا

ربي يصلحلك الامور ان شاء الله ختي ... و الكلام لي يعيف حاولي تديري روحك ما سمعتيهش ... رانا في وقت الناس القلوب كحالت و الناس ولات تتلذذ باش تسمع احبابها و اصحابها الكلام لي يجرح ..... و ما يخليش فرصة صغيرة الا يوليلك وحش .... و اللي تحطيه موسى يطلعلك مش غير فرعون برك ..يطلعلك ابو الهول ..


مع لخر حاب نعرف رايك ختي وصال ... هل مستعدة تحكي و تناقشي قضية الخدمة مثلا مع اللي يجي يخطبك ؟ و لا تحطيها لهيه كي الحاجة اللي لا نقاش فيها ... يعني نعرف وجهت نظرك اللي ربما تفيدني انا ثاني


سلام

خوك محمد














​

 

[Moha le sage]

أنا رفضته لأنه جاري
و قرا معاي
و زيد ما يعجبنيش
بعد أربع سنوات عاود ارجع يخطب في أختي الصغرى
أختي هاذي أقامت الدنيا كيفاش إجيه الوقاحة و يتصرف هكذا
بعدها راح تزوج و الحمد لله انسيناه بعدها بعامين طلق مرتو و ارجع يخطب في أختي الوسطى
أيا يرحم باباك ماشي تروح تخنقيه ​

ههههه و الله جبتيلي ضحكة صح ...

الحر بغمزة و البتي بدبزة يا ختي وردة ...


السيد هذا حاط عايلتكم شجرة .. الا ما نحى هاذي الحبة يدي هاذي ...

ربي يهدينا .....
​

 

[وردة الروح]

ههههه و الله جبتيلي ضحكة صح ...​

الحر بغمزة و البتي بدبزة يا ختي وردة ... ​

السيد هذا حاط عايلتكم شجرة .. الا ما نحى هاذي الحبة يدي هاذي ... ​

ربي يهدينا ..... ​

هذا واش قاتلو يماه
لازم وحدة من هذي العايلة ولا مكانش
قالها :لازم ندي وحدة منهم ؟؟؟؟
راكي تشوفي بليك الأولى طلقتها هههه
أرواح انت و حلها
ربي إجيب الخير ​

 

[وصال]

السلام عليكم ​

انا حاب نقول ان السيد معذور ... يحوس على وحدة ما تخدمش .. بصح الطريقة اللي جات بيها اللي بعثها ذيك .. هي لي مش مليحة ...​

يعني ماشي غش الطفلة ذيك تفرغيه في السيد و تلوميه ​

انا اليوم و البارح طحت في نفس الموقف ... نفس اللقطة هاذي تاع الخدمة ..قعدت نحكي مع صاحبي ..قالي كاينة وحدة طيبة و متربية و اصلها زين و عايلة ملتزمة .. الخ .. و الطفلة خطبها واحد من قبل و رفضاتو خطراش كان حاب تبطل خدمتها و هي محبتش ... ​

سقصاني صاحبي وش رايك .. ودار بينا حديث طويل على هاذ الشي .. ​

انا مبدأيا مني لا ضد الخدمة لا معاها .. اني نشوف في نص اللي نعرفهم يحوسو على وحدة خدامة .. والي نعرفهم و تزوجو نصهم داوها تقرري ... نص فيهم كانت خدامة ..زعمى تقرري ديجا و عجبتهم .. ونص لاخر اصلا يحوس على وحدة من لول خدامة ( التعليم كخدمة متفق عليها ) ... ​

انا فسرتها انها طمعية .. و صاحبي فسرها انو ما فيها والو كي يتعاونو ... و الواقع لي نشوفو انو حتى اللي بخير عليهم و يسلكو لاباس بيهم يحوسو على مرا خدامة باش يديرو دراهمها طوموبيل ولا يدوهم ...​

و اللي يكرهو الخدمة كاين اللي يغير على مرتو ..و ما يحبش يشوفوها و هو حر ..كاين اللي معقد من هاذ الشي ..كاين اللي يخاف عليها ..كاين اللي يحس بلي رجوليتي تنقص من قيمتها ...​

المهم ربي يسهل على الناس كامل ..​

كاين ظاهرة خرى ..و هي انو في بعض الحالات الراجل باش تقبل بيه اللي حاب يتزوج بيها ..يقبل بشروطها ... و اللي من بينهم الخدمة ...بصح من بعد ما يجيبها لدارو يبدى يدير في السبايب و يبطلها ... و ايحانا يهددها حتى بالطلاق .. و هي كي تكون ناس ملاح و تخاف من عيب الطلاق و من انها تدير المشاكل تولي ترضى و تسكت .. وواش تدير المخلوقة اذا كان الراجل مش راجل .. و دار في رايو عليها ...​

قضية التبطال تاع الخدمة هي قضية تاع اقناع ... اذا اقتنعت الطفلة مليح اذا ما اقتنعتش ما يجبرهاش ... و اذا ما قبلتش انها تبطل الخدمة في شرط الزواج .. يعتذر من باباها و منهم ..و يقول كلام لطيف ..من نوع ربي ما كتبش بيناتنا ولا ربي يجيب الخير ليا و ليك ..ماشي يقولها خيرك في غيرك ولا يهبط النيفو لكلام الشوارع و يقلها تندمي عليا و لا تبوري في الدار و معرف وش ..من الحوايج لي يصراو في مجتمعنا ​

ربي يصلحلك الامور ان شاء الله ختي ... و الكلام لي يعيف حاولي تديري روحك ما سمعتيهش ... رانا في وقت الناس القلوب كحالت و الناس ولات تتلذذ باش تسمع احبابها و اصحابها الكلام لي يجرح ..... و ما يخليش فرصة صغيرة الا يوليلك وحش .... و اللي تحطيه موسى يطلعلك مش غير فرعون برك ..يطلعلك ابو الهول ..​

مع لخر حاب نعرف رايك ختي وصال ... هل مستعدة تحكي و تناقشي قضية الخدمة مثلا مع اللي يجي يخطبك ؟ و لا تحطيها لهيه كي الحاجة اللي لا نقاش فيها ... يعني نعرف وجهت نظرك اللي ربما تفيدني انا ثاني ​

سلام ​

خوك محمد​

شكرا اخي محمد على الرد الذي اعجبني كثيرا بارك الله فيك

في الحقيقة من جانب العمل كل له راي وانا صدقني لن اتخلى على عملي ولدي اسباب من بينها ان ابي رحمه الله كان متمنيا ان اكمل دراستي لكي اعمل وكنت قد وعدته بالحج ومات قبل ان يشاء الله ان يذهب لذلك سافعل ما بوسعي لكي احقق حلمه فربما فهمت انني لست متمسكة بالعمل من اجل المال بل لاشياء اخرى اريد ان افعلها في حياتي وزوجي ليس مجبر ان يحقق احلامي لذلك ساحققها بنفسي ان شاء الله.
اما عن قضية مناقشة العمل مع الخاطب ساناقشه واذكر الاسباب التي ذكرتها من قبل واذا كان قادر على شقاه ربما بعد الزواج ويكون فيه اولاد و...و..... سابقى في البيت يعني عادي والله اعلم .

 

[فتاة حساسة]

ههههههههههههههههههههههههههههههههههههههههههههههههه عجبتني هاد تاع لا ماقبلتش شوفينا بنت عمها ههههههههههههههههههههههههههههههههههههه..ربي يهدينا..ربي يكتبلك اللي فيه الخير ختي العزيزا