السلام عليكم ورحمة الله تعالى وبركاته
يا حصرااااا على منتدى اللمة وسيرتو منتدى وش راك تهدر
شحال توحشتو ههههههه
وعندي مدة ما حطيتش موضوع لهنا
ما أحلى الرجوع إلى الأصل ^^ :sheer:
ندخل فالموضوع ديراكت
ونتمنى تشاركوني برايكم واللي محبتش يدير رد يدير جام برك قابلة ههههههه
:shiny::shiny::shiny:
السوجي عبارة عن فيلم صرا في العمارة تاعنا منذ 3 ايام
كنا سهرانين مع نانّا (جداتي) وخالي بعدما تعشينا رحت للكوزينة نطيب القهوة ونتول السينية (احم احم ختكم فحلة هههههههه) :shay: وكانت يما معايا
وفجأة ناض الزقا ولعياااط ونسمعو في بنات جارنا يعيطو " اطلقها..اطلقا.. يما اقعدي متروحيش..." مفهمنا والو ومدرناش في بالنا باسك مالفين بيهم تع مداهش
بصح العياط بدا يقوا ونسمعو فالبيبان تع الجيران لخرين بكل تفتحو ..فتح بابا الباب لقى ولد جارنا (10 سنين) قالو وش صرا؟؟
قالو بلا فهامة : او باباهم مات !!!!!!!!!!!!!!!!
_o:وفي لمح البصر يهبط بابا وتلحق يما هازة في يدها التارموس تع القهوة (حتى لحقتها انا ونحيتهالها) :shiny:
وهبطت حتى انا (باسك في بالنا السيد مات) :sadwalk:
وانا هابطة نلقى الراجل (اللي قالو عليه مات) طالع فالدروج ..ااااااااه تشوكيت
_o: _o:ياااه حي ؟؟ مالا وش صرا
_o:بديت نهبط .. وونهبط .. ونهبط حتى قريب نوصل لمدخل العمارة نلقى كامل الجيران رجال ونسا ملمومين وبنات جارنا هداك يتنادبو : ماما ماتت خليوني نروح عند ماما
انا قلت مالا يماهم لي ماتت؟ لا حول ولا قوة إلا بالله العلي العظيم :sad:
نلقى في جارنا (أخر) يحكم فيها ويقولها : يماك اي لاباس عليها اسكتي برك
وهي تندب
وهو يسكت فيها
مبعد جى دور يما ..قالتلها اسكتي وهي تعيط "اطلقوني نروح عند ماما ماتت "وتتمهبل ويما تقولها اسكتي
كي محبتش تسكت وتخبطها يما بكف دار وجهها نلقاها سكتت وطلعت لدارهم :shiny:
ويماهم ينوضو فيها الجيران وكاين حتى أشخاص كانو فايتين من قدام العمارة سمعو العياط طلعو ...فيلم ههههههه
المهم
مبعد شوية هدأت الأوضاع ويماهم هبطوها عند الجيران لي لتحت وبناتها رجعو لدارهم يحوسولها عالكواغط تعها باش يديوها للسبيطار :sad:
وداوها ورجعت سلامات والحمدلله
:showoff:
طبعا تستفسرو عن سبب هاد المسلسل :scared:
السبب انو هاد المراة (يماهم) راحت عند وحدة فاميلتها رايحة للحج
وهي عندهم قالولها تروحي معانا للمطار نودعو الحجاج قالتلهم شاورو راجلي (وعندها حق)
كي عيطولو قالولو رانا نطولو وكي ديماري الطيارة تع الحجاج رانا نوصلولك المادام لباب الدار قالهم تروح على روحها
المرا دخلت عالتسعة ونص تع الليل وينوض ليها ضربها وحاوزها مالدار وقاللها ارجعي وين كنتي و ادي معاك بناتك :scared:
ويقيم العياط والزقااا
مرا و4 بنات عالتسعة تع الليل والجو برا سيبيريا وين يروحو؟؟ وهوما معندهم لا جد لا جدة لا عم لا خال يسكنو قريب لا والو غير ربي والجيران :sad:
لا حول ولا قوة إلا بالله
دركا قولولي: وش رايكم في عقلية هاد المخلوق؟؟
ووينو المخ لي يخمم بيه؟؟
ويا ترى كاين من أمثالو بزاف ؟؟
ولو كان باباك كيما هك كيفاه ممكن تتصرف معاه؟
وأسئلة بزاف راهي دور في راسي ملقيتش كيفاش نعبر عليها؟؟ !!!!!
يخي زمان وصلنا ليه !!!!
:schmoll:
الناس كي تكبر وتدير دراري تعقال وتحسب لكل حاجة
وكاين ناس هداهم ربي كلما يكبر فالعمر يصغر عقلهم
نتمنى تتفاعلو مع الموضوع باش لا كان كاين من أمثالو بزاف يلزمنا نلقاو حل كيفاه نديرو معاهم
عذرا عالإطالة
تحياتي لكل من يمر من هنا
:sheer:
