يمنع منعا باتا

[EL General]

السلام عليكم

صحا لاجوناس نتاع واش راك تهدر
صافا يخي ؟
كاش سخانة ولا ؟ :d راني باش ندير لكم كليماتيزوغ ههه :regards02:

التيتر يقولك : يمنع منعا باتا

هادي على قصتي كي رحت لولاية اليزي عندها تقريب عام و تحديدا في فصل الشتاء رحت انا و صاحبي و ماعندناش الدراهم بزاف ههههه خايفين لا تفرغ خخخخ :d المهم دخلنا للولاية و لقينا بلاصة نباتوا فيها كي نفوتوا هادي الأيامات لقينا مرقد و الحمد لله . المهم فات النهار لول تعبانين ياسر مقدرناش نخرجوا و نحوسو قلنا نخليوها للنهار الثاني لواحد مرتاح خير من تعبان . النهار الثاني خرجنا للسوق الكبير نتاع الولاية و ندورو فيه ربي يبارك فور بزاف

المهم لقينا واحد ثما و تعرفنا عليه طفل قدنا في العمر باش يحكي لنا على الولاية و على السوق و كلش يعرفوا . هههه لوكان تعرفوا واش حكالنا العجب و الله الناس في قمة النية ثما يعني ناس ملاح كامل . قالنا أمور حرنا فيهم و منهم : المرا و راجلها كي يخرجوا مع بعضاهم يتمشاو لازم المرا تمشي وراء الراجل و لوكان تمشي معاه في نفس السطر عيب بزااااااااااف بزااااااااااف (يعني قمة الحياء) و هادي عندنا هههه ماكانش المرا تمشي معاه و سي نورمال تلقى الخمار ماكانش :down:
حاجة اخرى هي كي واحد يخطب وحدة مالازمش يشوفها خلاص حتان نهار العرس الرسمي . يعني مهما طالت الخطوبة حتى 4 سنوات معندوش الحق يشوفها و لا يهدر معاها ههههه قلنالو حنا قبل العرس و الخطوبة يتعارفوا و يتحابوا و التلفون عامل حالة و زيد كل يوم يتلاقاو ههههههههه قالنا لوكان تصرا هنا يقتلوا الزوج و الزوجة ههه

سييي حكالنا أمور ياسر و لما سمعناهم بقينا حايريين من حياء و قمة هادو الناس نقصد هادي الولاية فريموا مازالوا حاكمين الأصوووووووووول و ربي يبارك

عطيتوا الرقم نتاعي و قلت لو أرواح كاش مرة اضرب دورة عندنا ههههههههههه و الله تموت بالقهر يا خو تنسى الأصول هادي هههههههه

قالي على هاديك رانا نمشيو على قاعدة :
يمنع منعا باتا

ايا قولولنا : الأمور هادي مازالت تسيركيلي في الولاية نتاعكم ؟
و كاشما رحتوا نهار لبلاصة و صادفتوا هاكا احكيولنا :-r

EL General
Copyright 2012
​

 

[ماكانش]

أهلا بيك يا الجنرال
بصحتك التحويسة
ههههههههه
حنا نورمال مام قبل مايتزوجو يخرجو مع بعضاهم ماناش معقدين هههههههههههههههه

 

[hadda0425]

يا خويا الجنرال تقول رحتو للصعيد تاع مصر هههههه
انا نقولك الجزائر فيها 48 ولاية وكل ولاية فيها الصالح والطالح
ممكن تكون فئة من الناس مازالت متبعة العادات والتقاليد تاعهم
احنا في ام البواقي مازالت ناس متبعة هاد العادات وناس متفتحين عالخر
حنا تاني في العايلة تاعنا يقبلو الشاب يشوف الخطيبة تاعو بصح ما يقبلوش تخرج معاه
اذا كان حاب يشوفها في البيت وفي وسط العايلة وهاد الفكرة اغلب الشباب ما يقبلهاش
بالنسبة للمرا لي تمشي ورا الزوج تاعها هادي كانت بكري المرا مكانش عندها شخصية
حابة نسألك سؤال وتجاوبني عليه بصراحة
انت تحب المرا تاعك تمشي موراك
انا نقولك هادي من المستحيلات السبع
واش نقولك حنا نتماشاو مع العصر لكن ماننساوش بلي رانا مسلمين والدين تاعنا فيه تحفظات
وبارك الله في ديننا الحنيف
مشكور اخي على الموضوع
​

تحياتي

 

[AnGeL*dZ]

مافهمتش هاذي ........تاع لمرا تمشي ورا راجلها لا علاقة خلاه لا بالحياء لا بالديـن
تمشي من وراه وكي يطيحولها الهدرة هو مايتولهش امالا تمشي حداه وماعرف في وقتنا
من ثما لهيـك حتى عندنا الخطبة تختلف من عايلة لأخرى كاين اللي يسمحولهم يخرجو مع بعضاهم
وكاين اللي يسمحو للخطيب يشوف مرتو في دارلمرا
وكاين اللي طول في الخطبة يديرو الفاتحة
ناس الجنوب تلقاهم محافظين أكثر من تاع الشمال وماعرف
​

 

[ملكًة الاحسآس]

وعليــكم السلام
اممم والله نقرى فالموضوع تاعكـ ونيماجيني في مسلسل باب الحارة خخخ
بوووون نبداو بالمرأة الي تمشي ورا راجلها ، ايه عمري سمعت بهاد الحكاية وديجا يعتبروها كي شغل هيبة للراجـل ومنين يمشي تبعوو هي ، ايييييييه حنا عندنــا رجعت المرا الأولى والراجل موراها رافد فالبيبي خخخ
وبالنسبة لحكاية تاع الخطبـة هدي جاتني بيزار شويــا بويسكـ صح كاين الي مازالو متمسكيــن بهاد الأصول كما سميتهم ، mais نعرفهم يشوفوها نهار يروحو يخطبوو ومبعدها مكان لا خرجة لاتلفوون حتى نهار العرس الرسمي ، يااااو جدة وجدي الله يرحمهم كانو بكري يتلقاو بالسرقة قبل العرس ، يعني ودركـ كاين الي مايشوفوش بعضهم خخخخ او تبانلي الحكاية هدي زاد فيها شويا من عنده هيهيهي
حنا عندنــا كون مايقعدوش مع بعضهم ومايديوهاش شحال من شهر وهما يرحيو فالتلفوون هدآآك ومبعد الشي هدا كامل بلكـ يقولكـ لالا مانسحقش ماعجبتنيش العقلية خخخ
+
آآآآو في هدي نستعرف بيهم vive احبابنــا تاع الجنوب
ويعطيكـ الصحــة آخويا حسني على السوجي الباهي
ـ ومتلومش هدرت بزاااف واش تحب نحب نرحي ـ
​

 

[ISMA.dz]

هههههههههه


احنا ماعندناش يمنع منعا باتا

العكس تلقى المرأة تمشي وراجلها رافدلها صاكها وموراها يحوس يلحق عليها هههه


والطفلة تجيب الراجل بذراعها الا من رحم ربي

ربي يجيب ساعة الخير​

 

[مابقاش بزاف.Dz]

يعطيك الصحة على طح الموضوع
عندنا العكس المرا تمشي و الراجل موراها رافـدها الصاك و ديفـوا يهزلها وليدها
ص كاين ناس مازالت تحافظ على الاصول و عندهم الراجل عندو هيبـه كبيرة مي نظن اي وحده درك ما تقبلش تمشي مورا راجلها واش فيها ادا مشاوا كيفكيف و لا ادا شافها قبل العرس
و تبقى كل ولاية و كل منطقة فيها اصولها و عاداتها و تقاليدها و فيها الناس الي تساير تاع درك و الي مازالت تحافظ على الاصول
ربي يجيب الخيــــــر
سلام

 

[نسيــم البرج]

السّلام عليكم ورحمة الله تعالى وبركاته
صلّوا على الحبيب محمد.
ربّي يبقّي الستر نشاء الله ويبقّيلنا هاذ الناس نتاع الحرمة والحشمة.
المهم حنا عندنا الرّاجل اللّي يمشي مورا لمرا... وإلا راك تشوف في تاوع الخليج هاذوك...الرّاجل داير حجاب ولمرا سيفيليزي.
وساعات تدخل هي للحانوت وتخلّيه في الطوموبيل وكي تخلّص يجي يرفد القضيان ويسلّك ويديه فوg راسو.
واش راح يجيك مي "لي جون" نتاع سبايس تون والمسلسلات وستار أكاديمي.
ربّي يبقّي الستر نشاء الله ويبقّيلنا هاذ الناس نتاع الحرمة والحشمة.
جزاك الله خيرا.
​