انا وحيدة والديا بالرغم من وحدتي كنت دايما نضحك ونتمسخر ودايرة جو مليح بزااف لدارنا
كنت محبوبة وانسانة حركية بزاف ونشيطة ووو....
كانت عندي صديقة هي أعز من روحي كنت دايما حاطتها في مقام أخت ليا صح حبيتها بزاف ... صديقتي تعرفت على شاب أنا كنت نعرفو و حذرتها منو بزااف وفجأة هي تخلات عليا اوبمعنى آخر طيشتني على جالو ..أختي طيشتني على جال واحد فقط لانو ماعجبتوش عقليتي؟؟ ....
بطبيعتي أنا انسانة حساسة وتجرحت منها بزاااف بكيت بزاااف وتصدمت مددددة عالعموم هي راحت وانا مازدتش هدرت وليت انسانة صامتة وفقط كي شغل عايشة ومش عايشة
.....
في يوم جاء ولد عمتي وقاللي بلي عجبتو بزاف وحاب يخطبني أنا ماكنتش قابلة بيه لاني نعرفوهو عصبي بزااااف حاولت دايما نجبد روحي عليه ومرة كي كثر عليا صارحتو بلي مستحيل نوافق عليه
هو من كثرة ما زعف خرج عليا اشاعات في لافامي ماكانش دار دخلها وماهدرش عليا و ماوسخليش سمعتي وشرفي فيها
كان كل مايروح يهدر حوايج عمري مانديرهم..... هو نسى بلي كما تدين تدان ونسى عذاب لي يهدر في شرف الناس بالغالط
أنا انسانة محجبة حجاب شرعي نصلي و معروفة عند الناس كامل بطيبتي حتى ولاو يقولولي راكي نية بزاف لأنو عمري ولا درت الشك في واحد والا خممت فيه بالغالط ولا قست عبد
ولات سيرتي على كل لسان تصورو أنو عمتي جات لماما وقالتلها ربي بنتك واحكميها عندك حابين تسحرولي ولدي ووو.... ماما طلعلها السكر قريب وماتت في سبابهم
جداتي ولات كي نروح عندهم تغمض عينيها وماتسلمش عليا وهذا كلو خفية على بابا لي كون يسمع قادر مايزيدش يدور بيهم لانو يعرف بنتو ويعرف تربيتها مليح
نهار العيد مام كي رحنا لدار جدي باه نغافرولهم عماتي ماحبوش يسلمو عليا انا عفت روحي وكرهت حياتي لدرجة وليت نتمنى الموت كل يوم على الأذى لي لقيتو منهم صدقوني الأذى النفسي يوجع أكثر من الجسدي والله تعذبت بزااف ولات الدمعة ماتخطينيش حتى كي سمعت بلي يهدرو فيا هكاك دخلت لسبيطار بقيت فيه قداه من يوم
كل هذا صرى في رمضان
أنا كنت كل ماننوض نسحر ندعي ربي ونقوللو يا ربي علابالك بلي ماعنديش غيرك باه نشكيلو همي ماما لوكان كاشما تزيد تسمع قادرة تتشل والا تموت بعيد الشر ونبقى وحيدة
يا ربي ماعنديش غيرك يا ربي أنا وحدي وهوما تكالبو عليا يا ربي غلبو بكثرتهم وأنا ماعنديش غيرك...
كنت دايما ندعي ونبكي تقست من أقرب ناس ليا من صاحبتي أو أختي لي طيشتني على جال طفل ومن عماتي وجداتي لي كان لازمهم هوما يكونولي العون في الدنيا
مانكذبش عليكم بعد مادعيت عليهم ندمت بزاااف
لأنو جداتي لي كانت تدور وجها عليا ليوم راهي في سبيطار بين الحياة والموت كانت صحيحة لباس عليها وفجأة حكمتها لاطونسيون وطلعتلها بزاف فشلت الكلى تاعها ودرك راهي مهددة بالعمى ...
ولد عمتي لي هدر فيا لقى أختو تحكي في التيليفون مع واحد من كثرة ما تغشش خبط يدو على التاقة تاع الزجاج تكسرو زوج صباعو وقالولو بلي يبقاو معوقين مايقدر يدير بيهم والو
والله ماكنتش حابة يصرى فيهم هك وعمري ما شمتت فيهم مام كي رحت عند جداتي في سبيطار ولات غير تطلب في السماح من ماما والله درت حالة بالبكاء حتى ولا الفرملي يقوللهم خلي نضربولها ابرة تهديها شويا
والله عمري مانويت نقيس عبد والا نأذيه دايما نوكل ربي برك وهو يجيبلي حقي
هذي حكايتي صدقوني محتاجة دعواتكم برك حبيتكم تدعولي بالخير وسامحوني طولت عليكم
سلام
