كوكب الاعترافات // المشكلة 03 " أنا في ورطة حقيقية... محتاجة لآرائكم !!"

[بنت الـ25]

​

السلام عليكم ورحمة الله تعالى وبركاته

مرحبا بكافة مرتادي منتدانا الكرام مثلما عودناكم في ركن:

° كوكــــب الاعتــــــرافـــات °

المشكلة رقم 03 :
" أنا في ورطة حقيقية... محتاجة لآرائكم !!"


​

السلام عليكم​

حبيت نحكي مشكلتي هنا لاني بصراحة ما لقيت حتى شخص نحكيهالوا​

انا فتاة 24 سنة مخطوبة من مدة قصيرة​

كي كنت فالمرحلة الثانوية كنت فتاة طائشة وكان عندي علاقات مع شباب بزاف بصح هديك كانت مرحلة وخلاصت بعدها انتقلنا للسكن في بلاصة اخرى وانا ربحت الباك وصرت نقرا فالجامعة فالسنة الأخيرة تعرفت على شاب و جا خطبني وماليا قبلو بيه لكن فرحتي ما كملتش ​

بعد الخطبة مباشرة منعرف شكون لي حكى لخطيبي على الماضي تعي حتى نلقاه وحد اليوم عيطلي وهو منارفي وقالي إذا كان الشي لي سمعو عليا صحيح ولا لالا؟​

انا انكرت بشدة وحاولت نقنعوا بلي اللي نقلو الخبر كذاب وربما غالط فيا بصح هو أكدلي ان اللي جابلو الخبر انسان ثقة ويسكن وين كنت نسكن فالسابق وقالي تحبي تتواجهو ونشوفو شكون الكداب !
​

تما فشلت وانهرت وملقيتش وش نرد
​

انا نستعرف اني كنت طائشة في صغري بصح والله والله والله ندمت وتبت ونويت نكون وفية معاه مي هو متقبلش فكرة اني كنت على علاقة مع شباب قبلو (ماشي واحد وماشي زوج ) وفكرة اني كذبت عليه طول هاد المدة كلما يسألني هل عرفتي واحد قبلي نقول جامي انت اللول والأسوء انو لي نقلو الخبر قالو بلي انا كنت شايعة ومكاش لي ما سمعش بيا وبعلاقاتي مع الشباب
وكاين بزاف بنات اهلهم منعوهم يدورو معايا...​

انا دوكا في ورطة حقيقية من جيهة انا نحبو بزاف ومنيش حابة نفسخو خطبتنا ومن جيهة اخرى خايفة بزاف لو يبطل عليا ويسمعوا اهلي بالحكاية ويعرفوا السبب لي خلاه يبطل وتم منعرف وش ممكن يديرولي
وأهم حاجة خايفة على سمعتي بين الناس​

علابالي رايحين تقولولي تستاهلي مي الله غالب اللي فات مات ومتنفعش الندامة​

قلبي رايح يخرج انصحوني كيفاش ندير باش نخرج من هاد الورطة؟ ​

 

[طير الجنة]

شوفي ختيتوا أنت صح غلطت كي درت علاقات بزااف مع لولاد
مي نسيت بلي قادر تشوهلك السمعة ديالك و تبقى تلاحق فيك قاع حياتك
دوك لي صرا صرا أوكي
على هادي غير سيي تعترفي لخطيبك هدا بكلش و تفهميه بلعقل برك
و تسيي تقنعيك بلي كان ماضي و بلي راكي نادمة على واش درت
و حابة تبداي من جديد معاه
و بلي دوكا راكي تحبيه غير هو
و ناويا تكملي معاه حياتك
و أدعي ربي يفرج همك و يفتح عليك
و ان شاء الله ما يكون غير الخير
سلاااام
​

 

[السلطانة]

وعليكم السلام
بالنسبة لمشكلتك
اكيد اي واحد في بلاصة خطيبك كان يتصرف بنفس التصرف
لأنو راح يشكّ في ألف حاجة
لازم عليك تتحاوري معاه وتحكيلو على اللي سقساك عليه
هاكداك تريحي ضميرك وتنحي الشكوك من جيهتو
وتفهميه بلي راكي تبتي وبدلتي كامل حياتك بعد واش صرا ربي معاك اختي
سلامي

​

 

[la_safa]

السلآم عليكم و رحمة الله و بركآته ~
اختي انت غلطتي غلطة كبيرة مآنيش رآح نجبدلكـ على المآضي تآعكـ
لانو كآين بزآف كيفكـ و حآجة فآتت مآنقدروش نرجعو بالوقت ,
لكن الخطآ لي غلطتيه انكـ كذبتي و قلتيلي انت الأول لي كنت معآكـ ,
اديهآ نصيحة من عندي أنو أسآس أي علآقة هي الصرآحة ,
انت كي خبيتي و مبعد سمع عليكـ ذركـ يقول بلي كآين حوآيج يضروه درتيهم
و انت فآهمتني , يعني كون قلتي أكيد كآنت علآقآت عآبرة مآ تضركمش
هذآ هو الخطأ لي نورمالمون مآ تديريهش ,
انت ذركـ مآ تزيديش تنكري و احكيلو كلشي قوليلي حبيت نبدآ معآكـ صفحة جديدة ,
احكيلو بلي انت مآدرتيش الحآجة لي تضرو .. كنتي طآيشة و تبتي ,
حآولي تفهميه , و مآتلوميهش لانو أي وآحد كآن رآح يدير الشي لي دآرو ..
و ادعي ربي يهنيكـ و يخرجكـ من كربكـ بأقل الاضرآر ,
و السلآم عليكم ~

​

 

[عابر سبيل12]

للاسف هادي هي الحكاية الاكثر انتشارا في ايامنا
الانسان يعيش في اللامبلاة والطيش والتسرع والاندفاع اللامبرر والاخطاء الفادحة والمنكرات والشهوات وماالى دالك
وفي الاخير يجني نتائج افعاله الكارثية

صحيح ان ابواب التوبة مفتوحة للجميع ...وان كان الرحمان يسامح ويتوب على عباده فكيف للانسان ان لايسامح لاكن
كان عليكي ان تصارحيه من الاول

 

[سمراء السهوب]

انا نقولك كلمة واحدة الصراحة اساس بناء اسرة متينة واللي يتبنى على الكذب ما يطولش ويطيح والقرار لك

 

[sahiko hamza]

الندم الشديد يساعدك على التوبة
والتوبة النصوحة ربي مايخليهاش هكاك
الى انتي ندمتي وراكي تايبة ماعليكي إلا بالدعاء

سلام
​

 

[الورد الأحمر]

السلآم عليكم ,
الغلطة تآعك الأولى أنك كنت طآيشة ,
وكنتي على علآقآت وكثرتي ,
والغلطة الثآنية لي عليهآ تتحآسبي درك ,
أنك خبيتي عليه ومآ قلتيلوش الصح ,
مش ضروري تعديلو العلآقآت ,
لوكآن غير قلتيلو عرفت قبلك ,
مي مآ كتبتش ,
المهم درك رآكي في موقف ,
صرآحة لآ تحسدين عليه ,
مهمآ تخيلت روحي في بلآصتك ,
بآش نديرلك حل مآ عرفتش ,
وآش نقولك صلي بزآاف ,
وادعي أكثر ,
ربي يفرج عليك الكرب هذآ ,
خآصة إذآ تبتي صح كيمآ قلتي ,
عسى الل يعفو عمآ سلف ,
ويخرجك من الأزمة هذي ,
متفهمة شعورك ,
علآبيهآ الطفلة لآزم تلزم حدودهآ ,
أولآ لشرفهآ وثآنيآ للموآقف هذي ,
المهم ربي يفرج عليك أختي ,
وادعي ربي بزآف بزآف ,
وان شآء الله خير ,
سلآمي ’
​

 

[shosho.21]

اختي صح راكي غلطت كي درت علاقات مع الشباب و هده امور قد تاحدث لاي بنت في سن المراهقة

و لكن اكبر غلطة كي ماصارحتيش خطيبك من الاول حتى يفهمك و ردت الفعل تاع خطيبك متوقعة لانه اي واحد في بلاصتو يدير هك

درك الي فات فات حاولي تتصلي بيه وجها لوجه وشرحيلوالموقف تاعك و بلي راكي غالطة كيماصارحتيهش

ربي يفرج عليك كربك و يوفقك


و الله يا اختي نتمنى ليك كل خير حتى و لو منعرفكش ونتمنى تاني ان شاء الله نسمعو عليك الاخبار الطيبة

 

[راضية حامدة]

يا ريت كانت الاجوبة متاحة للفتيات فقط
كنت تحدثت معك احسن
في الحقيقة رايي يخالف راي المشاركين السابقين
و إن اتفق معهم في بعض الامور
عندي كلام كثير لك و لكن نفضل ما نقولوش على العام
ربي يقرب لك الخير اينما كان
فكري مليح في الحل
و فكري في الاسباب لي وصلاتك لهذا اليوم
مش من جهتك انت فقط
بل من جهة خطيبك ايضا

 

[بنت الـ25]

نتوجه بالشكر لكل من مر من هنا
في انتظار الجديد الذي ستوافينا به صاحبة المشكلة
عما استتب عليه أمرها
دمتم في حفظ الله
​

 

[loca]

اااااااه حوجي يانا تعرفي ختوو وكان خبرتيه من debut و كان تهنيتي دروك و كان راكي كسبتي ثقة تاعووو
مكاش شجرة ميهزهاش ريح و مكاش لي مغلطش صح سترة مليحة و من شيرة يسترها ربي مكان علاش تفضح روحها
بصح انت علاش مخبرتيهش من بدية و كان راكم غاية دروك
اي فهميه و صاي معندك كي ديري مدامك تبتي و ندمتي غي خبريه و شوفي كي تفهميه و صاي باسكو غادي تخسري كلشي كي اهلك كي خطيبك كي سمعتك و ديري حسابك لل غادي يجي يخطبك من بعد و زيد 24 سنة مراكيش صغيرة حنونة
فهميه غير بالعقل و ربي يتقبل توبتك و يسهلك ختووو
و توكلي على ربي و خلي ثقته بيه كبيرة لانو ميخيبش و صلي و ادعي مدام كاين ربي قاع متخافيش والله
ربي معاك ​

 

[jiji la star]

كيما قالت loca هداك مايليق​

 

[الرومنسي الجاد]

ربي يجيب الخــير

موفقة
​

 

[subainaz]

شوي و نرجع

 

[subainaz]

والله يا اختي انا صرالي نفس المشكل
ألا انو انا لما فتحلي الموضوع
صارحتو على طووول وما حاولتش ننكر
لأنو كما يقال
لا نعالج الخطأ بخطيئة
وكيما قلتي نتي حبيتيه انا تاني حبيتو
وعلى هذاك كان لازم تصارحيه
واذا كان يحبك راح يتفهم الوضع مع الوقت
بمعنى نتي ليوم راكي في حالة باش تخسريه في الحالتين :
حالة اذا تابعتي في الكذب نتاعك (اعذريني على قساوة كلامي ) راح تخسريه اكيد عاجلا ام اجلا
أما

الحالة الثانية هي انو تصفي روحك من جهة ربي و تستعرفي بخطأك معاه
وتقوليلو كامل الحقيقة حتى وان كانت مرة
وحاولي تفهميه باللي انتي حبيتيه وحبستي هذاك اللعب تاع الصغار
وهنا تبقى متوقفة عليه
اما يتفهم و يطوي الصفحة ويبدا معاك من جديد
واما ..............وهذا من حقوا تاني

والله أعلم

ربي يكون معاك
وماتنسايش ///// كلشي بالمكتوب


تقبلي تحياتي
​

 

[بنت الـ25]

جديد : صاحبة المشكلة رقم 03
​

شكرا جزيلا اختي مينات حبيتك تنقلي رسالتي هادي في موضوع كوكب الاعترافات
بسم الله الرحمان الرحيم
أوجه شكري لكل الأعضاء اللي مرو من هنا وردو على مشكلتي
أنا كنت في متابعة الردود
مقصرتوش معايا
ولكن الأمور لم تسر على ما يرام
لان خطيبي مقدرتش يتحمل كل اللي صرا
وقرر يفسخ الخطوية
هو وعدني انو ميشوهش سمعتي ويتحفظ على سبب فسخ الخطوية خصوصا قدام أهلي
راني منهارة ونفسيتي تعبانة بزاف
مانيش عارفة كيفاش رايحة نقدر نكمل حياتي عالأقل أيامي القادمة ؟؟

 

[sahiko hamza]

رسالة الى صاحبة المشكلة


نص الرسالة : اختي كيما قتلك في ردي لي فات
التوبة النصوحة لازمها الندم الشديد
وعسى ان تحبو شيئا وهو شر لكم
الدنيا هذي دروس وحاولي تتعلمي من هاد الدرس
وعلى ربي ان شاء الله لا تبتي تاع الصح
اكيد راح يجي لي يستركـ
نعرف بنات دارو اكتر منك وفالتالي ادو مكتوب من بلاد اخرى ...
ماتعرفي على مكتوبك كيفاه راح يجي
حاجة وحدة كملي توبتك وماتنسيش حق ربي

ربي يسترك دنيا وآخرة .

الف شكر آمنة كيما طمنتينا عليها
​

 

[بنت الـ25]

رسالة الى صاحبة المشكلة


نص الرسالة : اختي كيما قتلك في ردي لي فات
التوبة النصوحة لازمها الندم الشديد
وعسى ان تحبو شيئا وهو شر لكم
الدنيا هذي دروس وحاولي تتعلمي من هاد الدرس
وعلى ربي ان شاء الله لا تبتي تاع الصح
اكيد راح يجي لي يستركـ
نعرف بنات دارو اكتر منك وفالتالي ادو مكتوب من بلاد اخرى ...
ماتعرفي على مكتوبك كيفاه راح يجي
حاجة وحدة كملي توبتك وماتنسيش حق ربي

ربي يسترك دنيا وآخرة .

الف شكر آمنة كيما طمنتينا عليها
​

لا شكر على واجب حمزة هدا واجبي
وثانيا شكرا لك على متابعة الموضوع
نصيحتك ان شاء الله تقراها صاحبة المشكلة وتتقيد بيها
مكانش لي ميغلطش في هاد الدنيا سواء عن طيش ولا جهل
المهم الندم والتوبة النصوح كيما قلت انت والعزم على عدم العودة لمقل هذا الفعل

اما بالنسبة لنصيحتي ليك
أختي الكريمة اهم شيء الآن حاولي تتقبلي الفكرة (فكرة فسخ الخطوبة)
وتقراي العذر لخطيبك
وإن شاء الله يرزقك ربي من حيث لا تحتسبين
أهم حاجة اتعلمي من هاد المشكلة الدرس واللي هو
الصراحة .. ثم الصراحة
منقلكش من نهار لول تحكيلو كلشي ولكن إذا سألك اعرفي وش تقولي بلا كذب
سلامي
​

 

[ام منصف]

اختي واش نقولك كل الكلمات ماهيش راح تقدر تحلك مشكلتك لانك في وضع لا تحسدين عليه
مانيش راح نلومك على اللي فات لانك قلتي راكي فقتي واستعرفتي باخطائك اللي كان لازم تحسبيلها حساب هذا اليوم
ما تنهاري ماوالو
خطيبك ما قدرش يسامح ويكمل معاك وهكذا خير باش ما يقعدش عايش معاك في الشك وكل مرة يجبدلك الماضي
كنت عارفة بل ومتاكدة بلي راح يفسخ الخطوبة على حساب ما قلتي
يعني كنت لازم تجهزي روحك نفسيا لهذا اليوم
لازم تتجاوزي مشكلتك كملي قرايتك وطيشي وراك
واذا كتب ربي وجاك مكتوب وحد اخر ما تعاوديش الغلطة اللي درتيها انك كذبتي اذا لا قدر الله وسمع بالماضي نتاعك اعترفي وقولي بانك نادمة وتبتي وماكانش واحد الل ما يغلطش وهذا كان طيش شباب
ربي يقدر اللي فيه الخير وخلاص
​