ملف كامل عن تجهيز العروس الجزائرية مع بعض النصائح

[la rose de sable]

السلام عليكم لبنات ،،

وش راكم ،،

نتمنى راكم كامل بخير،،

موضوعي تاع الكوسميتيك كمل ، وكان اكثر من رائع بتفاعلاتكم معي واضافاتكم الرائعة

اليوم خممت بش ندير موضوع للأفرشة اللي لازم تديهم العروسة في جهازها

ومباعد قللت لالا ، نحل الموضوع هذا نهدر فيه عن الجهاز بالتفصيل ،،

وطبعا بش ندير قوائم كيما الخطرة اللي فاتت :

جهاز العروس الجزائرية
ملابس التصديرة
فاليزة ليلة الدخلة
قاليزة شهر العسل
ملابس الخرجات
ملابس الزيارات والاعراس
ملابس الشتاء تاع الدار
ملابس الصيف تاع الدار
الملابس الداخلية
الاحذية والحقائب
الأفرشة
الفاليزات والسلل والعلب والماليت
كادوات دار العريس
كادو العريس
الكوسميتيك
قارنيتور الدار
اهمية زيارة طبيبة نساء ،، والفحوصات الطبية ،،
اشياء مهمة جدا



القائمة مفتوحة وكش مانتفكر اني نجي ،،،



تفاعلوا معايا




الموضوع تاعي مش منقول
((( واللي تحب تنقل ، تحط منقوووووووول ،، وربي راهو يشوف )))



وقيمووووووووني بليييييز باسكو والله تعبت وانا نخدم في الموضوع




ادعولي بصلاح الحال

تحمسواااااااا ضرك نحط اول قائمة


​

 

[السلطانة]

وعليكم السلام

بالتوفيق في الموضوع

ان شاء الله تفيدي العرائس
سلامي

​

 

[la rose de sable]

شكرا على الاعتماد

ان شاء الله نفيدكم​

 

[la rose de sable]

السلام عليكم جيتكم مع اول قائمة ،،،

وراني بش نهدر بالترتيب ،،،

وهي فاليزة ليلة الدخلة :


فاليزة ليلة الدخلة

ديري وش تسحقي هذيك الليلة ومن غدوة
كادو العريس
سجادة + طقم الصلاة
ديزابيي البيضاء
الصابو المريش الابيض
صاك صغيييير جدا فيه ماكياج،
عطر مميز
حوايج الحمام : منشفة كبيرة ، منشفة صغيرة ، طقم حمام ، شامبوان، صابون ، جال دوش ، مشطة
دونتيفريس و بروس آ دون و بان دو بوش
بشماق الدوش ابيض وفخم
سيشوار + مع المشطة تاعو + مساكة شعر + شوشو
لبسة يوم التصديرة الصباح ، على حسب عاداتكم ، بيجامة وكومينو وردي او ديزابيي وردي
مع الصابو الوردي
2 سليب احتياط + لي بروتاج + لي بوند احتياط
فيزو ابيض
العباية اللي بش تروحي بيها للحفافة ، + صباط

( دواء الدوار والصداع + دواء المعدة + دواء لا دياري،،،،، ديري احتمال يجيك كلشي من التوتر والخوف ،، بعيد الشر ،، بصح اللي خاف سلم)











انتظروني في القوائم الجاية ،، :-r​

 

[la rose de sable]

كوسميتيك العروس الجزائرية ،

درته في موضوع واحد اخر ،، راهو كامل متكامل ،،
هاو الرابط

https://www.4algeria.com/vb/showthread.php?t=344685​

 

[la rose de sable]

فاليزة شهر العسل


سجادة + طقم الصلاة
دراوات سامبل تستعمليهم اثناء العلاقة
علبة ماكياج كاملة
عطرين ، واحد للخرجة وواحد لما تكوني مع زوجك
سيشوار مع مشطتو + ليسور
مشطة + لالاك + السيروم
اكسسوارات الشعر ابداي بي العضاضات ،،، الخ
طقم حمام+ مستلزمات الحمام من شامبوان وصابون وجال دوش وحكاكة القدم تاع المقبض
لوشن الجسم ( حوايج الترطيب كلها اديها لليد وللجسم وحتى للوجه)
دونتيفريس و بروس آ دون و بان دو بوش ، ومعطر الفم من فريش و شوينقوم و قرنفل للمضغ وقتل ميكروبات الفم
ملابس داخلية نوعي وكثري وبدلي من القصير للطويل ، المستور والمكشوف ، وادي الوان مختلفة
بالاضافة الى ملابس قطنية تحت القش في الشتاء لي بيستي + بودي قطن ,,)
بيجامات ناعمة ساتان وقطن حسب الفصل
لي روب تاع القطن القصار تلبسيهم في النهار كي تنوضي
بلايغ وبناطف وبشامق
الغسول المطهر النسائي
الة براون((( ممكن ماتسحقيهاش بسكو في العرس تنحي بالحلوة وماشكيتش ينوضلك الشعر في ظرف اسبوع))

حوايج الخرجة ،،
لي طايور + احذية كعب وشيك (( البسيهم في الليل كي تعودي رايحة تتعشاي)
الحجابات + احذية مريحة للمشي ( البسيهم في النهار كي تعودوا خارجين تحوسوا))
جوبات + لي ليكات
لي ليكات طوال+ سراول اذا تلبسي
معطف اذا كنتي في الشتاء + بوتيون + بوتس
خمارات نوعي ونسقي
كاش ني للشتاء + قفازات + طقاشر + فيزوات
الادوية الاستعجالية ، دواء الراس ، دواء المعدة ، دواء لا دياري + اسبيجيك للحمى،، اونتيببوتيك ممكن تمرضي انتي او يمرض زوجك لا قدر الله)

صاشي كبيرة فارغة تديري فيها الحوايج اللي توسخوا كي تعودوا راجعين

صاشي ايزيس تحتاجيها بش تغسلي حاجتك ولا حاجة زوجك


((( اعرفي كيفاش تنظمي الفاليزة بش ترفعلك الحوايج هاذو)))
​

 

[la rose de sable]

ملابس التصديرة
عندك تنسي اول شي الكومينو الوردي تاع يوم الحنة مع بيجامتو لازم تكون وردي هي ثاني ديريها تاع ساتان بش تلبسيهم يوم التصديرة الصباح)
الطايور ،، مشري او مخيط ، وانا نفضل المشري ، ديري اللون اللي حبيته والمشهور هو بلون كاسي
روبة سواري مليحة
الفرقاني
كاراكو عاصمي
كوكتال المجبود (تقدري تلبسيه في الحناء تاعك لانه معظم الناس نحو لاكومينو ولا اللبس التقليدية بصح ماتتحزميش عليه)
قفطان
قندورة سطايفي
قندورة وهراني
المنصورية
الجيجلية
الزي العنابي
اللبسة التلمسانية تاع الكبوس


بلا ماننسى كل لبسة يلزمها حذاء او صندال يليق بيها ، والحقيبة الصغيرة تاع اليد

​

 

[la rose de sable]

اذا عجبكم الموضوع نكمل ،،،

راهي مازالت عندي القوائم

 

[21maria]

wawwwwwwwwwwwwwwwwwww merci bien nshakouh bezef

 

[la rose de sable]

de rien hanouna

 

[la rose de sable]

الفراشات


زربية كبيرة ، و 2 صغار ( سو بيي)
4 مطارح صوف ،
8 بساطات ، كل 4 من نوع
الشورى او مفارش الصالون (تابيدور)
الكاش ريدو ( الوان)
صالون ماروكان
الكوفرطات ( زواور(
كوفيرليات ( 5 ، بلون كاسي ، فيولي غامق ، قرونا ،،اسود،، لون اخر)
البطانيات
مفارش ،،
اغلفة مخايد
مخايد احتياط 4
دراوات مزركشة
دراوات سامبل (اغطية تحتية)
النابات احجام --- ديري نوعين بش تقدري تبدلي--
لي بوف
التلايق تاع الخزانة
لينابرو وليبياس تاع المفاتح
فازات للتزيين مع الورود تاعهم
كادرة واحد كبير وجميل
مخدتين للتصديرة ( مدورين)
كرسي الكوافيز مريح مخدوم بالصوف
لي تابي تاع البيبان


​

 

[طيور الجنة21]

السلام عليكم حنونة اعطيك الصحة
موضوعك مشتق من الموضوع المثبت و لكن أعطيك الصحة في الاعادة إفادة

قوليلي و نقولك واش درتي في جهازك ...

https://www.4algeria.com/vb/showthread.php?t=343756

راح نزورك بزاف في الموضوع ما تقلقيش مني برك وتسكري الباب علي

راني نحب نتطفل....هههههههههههه

 

[la rose de sable]

السلام عليكم حنونة اعطيك الصحة
موضوعك مشتق من الموضوع المثبت و لكن أعطيك الصحة في الاعادة إفادة

قوليلي و نقولك واش درتي في جهازك ...

https://www.4algeria.com/vb/showthread.php?t=343756

راح نزورك بزاف في الموضوع ما تقلقيش مني برك وتسكري الباب علي

راني نحب نتطفل....هههههههههههه

اهلا بيك راني نشتي المتطفلين مرحبا بيك

لالا وشي هذا مشتق ؟؟؟ راكم فهمتوا فكرة الموضوع غلط ،،، انتي موضوعك فيه تحطوا وش شريتو بدون ترتيب ،، بصح موضوعي انا راح ننظم فيه القوائم اللي بش تتشرى ،، وكي يشروها يجوا يحطوها في موضوعك ،،

يعني الموضوع راهو نظري ماهوش تطبيقي كيما تاعك ،،،

 

[la rose de sable]

ملابس الخرجة
2 عبايات
مع احذية كعب تليق بالخرجات
2 طايوات لشهر العسل
مع احذيتهم تكون مريحة للمشي
معطف فخم
2 حجابات شيك ويليق بالعرايس
مع احذية شيك وعمليين
خمارات الوان لطيفة ( شتوية و صيفية وشالات و كاشني للبرد القارس)
قفازات اذا كنتي بش تجوزي شهر العسل في بلاد باردة)
صاك احجام و الوان
​

 

[طيور الجنة21]

السلام عليكم جيتكم مع اول قائمة ،،،

وراني بش نهدر بالترتيب ،،،

وهي فاليزة ليلة الدخلة :


فاليزة ليلة الدخلة

ديري وش تسحقي هذيك الليلة ومن غدوة
كادو العريس
يا حبوبتي الكادو تاع العريس راهو يروح مع السورى و ينعتوه لأهل العريس ويقولولهم هاهو ليكم الكادو تاع العريس

سجادة + طقم الصلاة + سبحة + كتيب للأذكار + مصحف
ديزابيي البيضاء
بالطبع أكيد
+
كيمينو أي لون تفضلينه
الصابو المريش الابيض
صاك صغيييير جدا فيه ماكياج،
عطر مميز
حوايج الحمام : منشفة كبيرة ، منشفة صغيرة ، طقم حمام ، شامبوان، صابون ، جال دوش ، مشطة
بشماق الدوش ابيض وفخم+ معجون الأسنان
سيشوار + مع المشطة تاعو + مساكة شعر + شوشو
لبسة يوم التصديرة الصباح ، على حسب عاداتكم ، بيجامة وكومينو وردي او ديزابيي وردي
مع الصابو الوردي
2 سليب احتياط + لي بروتاج + لي بوند احتياط
فيزو ابيض + شورط
العباية اللي بش تروحي بيها للحفافة ، ما تنسايش الحمار+ صباط

( دواء الدوار والصداع + دواء المعدة + دواء لا دياري،،،،، ديري احتمال يجيك كلشي من التوتر والخوف ،، بعيد الشر ،، بصح اللي خاف سلم)
بعيد الشر










انتظروني في القوائم الجاية ،، :-r
أكيد راح نستناوك فالموضوع جد شيق
​

أعطيك الصحة اختي وراني درت بنصيحتك و أضفت القليل في بحرك:p ألف شكر لك

بصح راكي نسيتي أهم حاجة

كادو أم العريس... ياريت تقوليلي واش تديروا لأم العريس كادو

 

[la rose de sable]

أعطيك الصحة اختي وراني درت بنصيحتك و أضفت القليل في بحرك:p ألف شكر لك

بصح راكي نسيتي أهم حاجة

كادو أم العريس... ياريت تقوليلي واش تديروا لأم العريس كادو

ههههههه صار لازم نوري للناس كادو العريس ،،، حنا ماعندناش هذي ،، حنا تمدوله وحدها راسها راسو ، الناس مايشوفوا والو هههههههه

يعطيك الصحة على الاضافات

وكادو ام العريس وعايلته راني درتلهم قائمة وحدهم ،،

والسبحة بش تسبح بيها ليلة الدخلة ؟؟؟؟؟؟هههههههههههههه

 

[la rose de sable]

مهم جدا
مصحف خاص بيك
سجادتين
لبستين للصلاة
سبحة شيك وصغيرة
​

 

[طيور الجنة21]

اهلا بيك راني نشتي المتطفلين مرحبا بيك

لالا وشي هذا مشتق ؟؟؟ راكم فهمتوا فكرة الموضوع غلط ،،، انتي موضوعك فيه تحطوا وش شريتو بدون ترتيب ،، بصح موضوعي انا راح ننظم فيه القوائم اللي بش تتشرى ،، وكي يشروها يجوا يحطوها في موضوعك ،،

يعني الموضوع راهو نظري ماهوش تطبيقي كيما تاعك ،،،

ok زينونة فكرة حلوة و تهبل كيماأنت

راني فهماتك انت حابة كل وحدة فينا ترتب روحها و انا شخصيا كون ماشريتش كراس 120 ص كون ما لقيتش روحي في النظام

 

[la rose de sable]

ملابس الزيارات
ديري حاجة سامبل وشيك وفخمة وتعطي انطباع راكي محترمة ،،

للشتاء ديري ، قنادر قطيفة ،راهم معبيين الحالة ، والمشريين خير واضمن ، انتي وذوقك ودراهمك
اكرر ماتخيطيش القطيفة
هذا بخصوص الزيارات الخفيفة يعني داركم ولا دار راجلك ولا خواتاته ، ولا يجيك ضيف فجأة
كثري منهم لانه الموضة تاعهم ماتروحش ديري 6 ولا 7 بش تتهناي منهم فترة سنتين او اكثر ، ونوعي في الالوان

اما بخصوص الاعراس ،، ديري قفاطن مغربية ، خليجية ،، وطايورات ميني وتاع سراول ( بالاضافة الى قنادر التصديرة)
وفي الصيف ، لازم تخيطي قنادر لاطوال ، وكثري منهم ، ديري على الأقل 10 لانه في الصيف الواحد يعرق سيرتو في عرس لازم تبدلي
ملابس التصديرة للاعراس
ولي روب دو سواري ساتان ديري 2

بلا ماتنسي الاحذية في الشتاء ، والصابوات والصنادل في الصيف ،، والحقائب الصغيرة اللي تتحمل في الايد

ديري خمار يوالم كل لبسة ، ماتعرفي بلاك يكون مكان الزيارة مختلط ، هكا بش تكوني مستور وشيك في نفس الوقت ، ومش لازم يكون خمار من نوعية غالية ، اشري تاع الاسواق الثلاثة بعشرة الاف

ونصيحة اذا كنتي بش تتزوجي في دار العايلة ،، اشري بوليرو ولا جيلي من كل الالوان تلبسيهم في الصيف خير من الخمارات الكبيرة تاع الصلاة

​

 

[la rose de sable]

ok زينونة فكرة حلوة و تهبل كيماأنت

راني فهماتك انت حابة كل وحدة فينا ترتب روحها و انا شخصيا كون ماشريتش كراس 120 ص كون ما لقيتش روحي في النظام

شفتي كيفاه

حتى انا تعذبت في جهازي ، هذاك علاش حبيت نعاون خواتاتي بش مايتعبوش كيفي