كيفاش اطيبو اللوبيا الخضرا

[أم أمين23]

على بالي طولت بصح ظروف الله غالب بصح راني جيت
اليوم راح نديرو اللو بيا الخضرا
طبعا نجيبو اللوبيا وقصوها على اتنين ونحيو الراس من الجهتين نغسلوها ونفورهامن بعد نقليها في شوي زيت
ونحط عليها الماء حتان تغلي:

في هده الاثناء نروح نجيب البصل والطماطم كعب نقشرهم ونديرهم روندالات رقال هكدا كيما في الصورة او تاعي هاد البصل والطماطم وسنارية اي الجزر دوائر خخخخخ:

نحط البصل ومن فوقها الطماطم ومن بعد طراف اللحم او الدجاج انا هاد المرة عملتها بالدجاج ونزيد الماء حتان تتغطى كامل ونزيد عليها الزيت والملح والفلفل اكحل والفلفل احمر وراس الحانوت شوي برك وغطيها ونخليها تغلي حتان تلبي
وهاي ليكم في البرمة هنا مازالني ما حطيتهاش في الصحن:

وبالصحة والراحة على قولت اخواتنا المغاربة

في أمان الله في القريب مع طبق جديد ان شاءا لله ومستنيا طريقتكم

 

[SAMIRA25]

السلام عليكم ام امين
يعطيك الصحة اختى و بارك الله فيك
اول شيء حنا نسميوها zaligou ما نعرفش منين جابو هدا الاسم بصح هكا نسميوها
تاني شيء انا كل مرة نطيبا زي مرة بالصوص حمرة مرة بيضاء مرات نزيدلها البطاطا و الكوسة ....
بصح اهم شيء انو جي شايحة شوية ما فيهاش بزاف الصوص و نكترلها الثوم

 

[أم أمين23]

اهلا سمورة نورتي صح كاين شي ناس يقولولها زاليقو وكاين الي يقولولها ماشطو
المهم مادابيك تحطيلنا طريقة من الطرق الي تعمليها للافادة طبعا

 

[ام شيماء]

اممممممممممممممم باينة هايلة

 

[SAMIRA25]

شوفي يا لالاه نحط اللحم <انا نحب نطيب بتاع العجل ما فيهش الدهون بزاف و طري > في الكوكوت نرحي البصل نقطع الثوم 4 الى 5 فصوص و زيت نقلي شوي نزيد زاليقو مغسول و منحيتلو راس ما نقسموش نخليه طويل نمرق غير شوي كيما قوتلك نحبو شايح و نقفل الكوكوت 15 دقيقة نفتح نزيد بطاطا حمرتها من قبل في شوي زيت و كوسة و طماطم حب تاني ادا حبيتي و نزيد نقفل 5 دقائق مناه البطاطا في ساع الطيب و نقدمو انشاء الله نطيبو و نحطلك الصورة

 

[السلطانة]

وعليكم السلام

واخيرا طليتي علينا بماكلة جديدة
اللوبيا الخضرا يخي هيا الفازولا عندنا

طريقة طهيها عندنا نفسها لي قدمتيها
تسلم الأيادي



​

 

[nada242008]

السلام عليكم ام امين
يعطيك الصحة اختى و بارك الله فيك
اول شيء حنا نسميوها zaligou ما نعرفش منين جابو هدا الاسم بصح هكا نسميوها
تاني شيء انا كل مرة نطيبا زي مرة بالصوص حمرة مرة بيضاء مرات نزيدلها البطاطا و الكوسة ....
بصح اهم شيء انو جي شايحة شوية ما فيهاش بزاف الصوص و نكترلها الثوم

مقتبسة من كلمة haricot vert يعني اللوبيا الخضرا .. حنا عربنا الفرنسية وعوجناها ههه
نطيبوها حمرا ولا بيضا
حمرا بالبصلة والثوم وطماطم حب مرحية مع طرف لحم ولا دجاج لي كاين تقليهم مليح ومن بعد تضيفي راس الحانوت والفلفل الحار والملح واخيرا المونجتو وتمرقي مع حبات بطاطا وقبل ماتطفي عليها ب 5 دقائق نضيفو قرن فلفل اخضر
ولا نطيبوها بيضا بالداجاج ولا اللحم لي كاين
حبة بصل مرابية مع شوية زيت ملح وفلفل اكحل والمونجتو نقلي مليح ونمرق غير بشوي ما قدر كاس .. ونغلق طنجرة الضغط ونخليها حتان تنشف المرقة
نقلي البطاطا ونقدمها معاها تجي هايلة
صور من الارشيف تاعي ههه

 

[ام رحاب]

هلا وغلا وسلة حلا

بام امين نورتي ونورت اللمة بطلتك الله يحيك

ولي عودة لشرح الطريقة
​

 

[أم أمين23]

ام شيماء الله اخليك ومستنيين طريقتك اكيد
سميرة مشكورة يا حنونة وطريقة جديدة عليا الصراحة ولا مرة اكلتها غير بهاد الطريقة
ساندرلا والله ما على بالي واش اسمها عندك بصح راهي باينة الصورة والمفروض عرفتيها صح؟
ندى مشكورة على توضيح الاسم وعلى الطريقة تاعك انت ثاني والصور بينتها هايلة تاع الصح وان شاءا لله نجربها على قريب بس سؤال بالنسبة للحم اطيب مع اللوبيا والا حمرتيه وحدو هاداك شوا برك والا تاع البرما ؟؟
ام رحاب الله اخليك ومستنيا طريقتك اكيد

 

[SAMIRA25]

هدا زاليgو تاعي

 

[أم أمين23]

برافو سميرة الطبق شكلو امممم اشهي

 

[samah06]

يعطيك الصحة اختي ولكل العضوات وكل الطرق خير وبركة المهم عشاء ناكلوه ههههههههههههههههههههه

 

[أم أمين23]

اكيد اخيتي ولدلك تعلمنا للطرق المختلفة يجعلنا ننوع شرفتيني بمرورك