طبيخ قسنطيني لمناسباتكم وافراحكم

[SONYA25]

السلام عليكم
علابالكم بلي الافراح والمناسبات مبقاتش ديري قهوة والا شاي والا مشروبات وحلويات فقط
حنا في قسنطينة نديرو السماط الي هو الفلون والا المحلبي مع الشريك والفواكه
ليوم جبتلكم حاجة اخرى تقدري ديريها مكان الفلون وهو الطبيخ حاجة جديدة جبتلكم المقادير والطريقة وان شاء الله عن قريب نحطلكم الصور
المقادير خاصة بالمرق تاع اللحم
لحم عجل
بصل
فلفل ابيض
سمن
ملح
ماء ورد
هنا نورمال داوي البرمة تاعك وحطي اللحم البصل والملح والفلفل ابيض مرحي وقليه بشوية سمن كيتقلا مليح امرقي وخلي اللحم يطيب لما يطيب اللحم طفي وحطي قيمة نصف فنجان ماء ورد
هنا تصفي المرق من اللحم ومن الاحسن تصفي بالشاش او كومبخاس الا عندك مهم نتحصلو على مرق صافي مية مية
المقادير الاخرى
كيلة المرق الي طيبتيه قبيل
كيلة ماء ورد
كيلة عسل
كيلة نشاء
كيلة سكر حرش
3ونص كيلات ماء
تخلطي المقادير كامل وتحطيهم في كاسرول يكون ثقيل على نار هادية وتحركي بشوية حتا تتقال الخلطة ويتغير لونها للموطارد هنا طفي عليها وحطيها في صحون وخليها تتماسك
وزينيها بالمكسرات ومن الاحسن الجوز
صدقوني لبنات جربوها والله مراح تندمو
حاجة جديدة وبنتها رايعة :up: عن قريب ان شاء الله نحط الصور تاحا
نتمنى تنال اعجابكم

 

[أم أمين23]

انا شخصيا للامانة يا صونيا ما نيش راح نجربها بس طريقة فعلا جديدة وغربية وان شاءا لله واحدة من الاخوات تجربها او تكون جربتها من قبل وتقولنا على النتيجة ومستنيا الصور اكيد

 

[SAMIRA25]

يعطيك الصحة صونية على هده الوصفة لانو حنا نديرو اللحم الحلو و يجي بنين ان شاء الله اذا قدرت نجرب قيس صحن و نردلك الخبر ربي يجازيك خيرا
و تستاهلي احلى تقييم​

 

[SONYA25]

الله يعشيك سميرة جربيها وقولينا خصوصا ام امين باش حتا هي تجربها

 

[hayota]

غريبة والله لكن انشاء الله نجربها

 

[joumane]

والله ياصونية انا كيما ام امين حيرتيني في الوصفة وناقصها تصاور حبيت نشوفها كيفاه تجي
ولي تجربها هاي تقولنا على الطعم

 

[samah06]

انا في عين امليلة قريبة من قسنطينة ونسمع بيها
لكن ولامرة تجرأت باه نطبخها
نوعدك باه نجربها
مشكورة

 

[loubna2]

شكرا يا القسطينية زيدي ديري لنا اطباق قسنطينية مثل الرفيس والمشلوش و الشريك وطاجين الشواء والمحور ووووووووو
وخاصة خبز الدار القسنطيني والثريدة ومقروط الفرينة الجديد رجاء

 

[SONYA25]

شكرا يا القسطينية زيدي ديري لنا اطباق قسنطينية مثل الرفيس والمشلوش و الشريك وطاجين الشواء والمحور ووووووووو
وخاصة خبز الدار القسنطيني والثريدة ومقروط الفرينة الجديد رجاء

على عيننننننننننننننننني يا لالا ومرحبا بناس عين مليلة اكي جارتتتتتتتتتتتتي

 

[ام سلمان و اسامة]

يعطيك الصحة واخة معرفتهاش غادي ان شا الله
نتعلم طبخ الجزائرية و نردلك الخبر
ربي يجازيك خيرا حبيبتي
​

 

[hadil2044]

بارك الله فيك
​

 

[NąCéƦā]

تسلم ايدكـ...بارك الله فيكــ =)

 

[Emily]

merciiiiiiii
​

 

[AnGel_LoVe]

ماقدرتش نيماجيني الشكل ديالها كيفاش يخرج
كي تحطيلنا تصاور اني نجي ناكل شوية :d
يعطيك الصحة
​

 

[حورية الجزائر]

شكرا على الوصفة

هادي اكيد الي لي يحبو اللحم الحلو

 

[sabah2008]

رانى متحمسة لهده الاطبيخة ونتمنة تزيديلنا اكلات اخرى تاع قسنطينة تاع الجدود وحتا المودارن
لكن سؤالى اللحم نطيبه فى الماء ولا ماء الزهر يعنى يطيب عادى فى الماء نمرق بيه وفى الاخير ندير الماء الورد احنا نقولولو ماء الزهر

 

[SONYA25]

رانى متحمسة لهده الاطبيخة ونتمنة تزيديلنا اكلات اخرى تاع قسنطينة تاع الجدود وحتا المودارن
لكن سؤالى اللحم نطيبه فى الماء ولا ماء الزهر يعنى يطيب عادى فى الماء نمرق بيه وفى الاخير ندير الماء الورد احنا نقولولو ماء الزهر

اسعدني مرورك
اللحم طيبيه في المرقة نورمال كما يطيب وتعودي رحا تطفي عليه زيديلو شويا ماء ورد قيمة فنجان هكاك
يا حبيبه كاين ماء زهر وكاين ماء ورد
وحنا هنا في قسنطينة كل ربيع نقطرو الورد والزهر
بالتوفيق

 

[sabah2008]

اسعدني مرورك
اللحم طيبيه في المرقة نورمال كما يطيب وتعودي رحا تطفي عليه زيديلو شويا ماء ورد قيمة فنجان هكاك
يا حبيبه كاين ماء زهر وكاين ماء ورد
وحنا هنا في قسنطينة كل ربيع نقطرو الورد والزهر
بالتوفيق

شكرا اختى اما لا ندير ماء ورد

شكرا للتوضيح رايحة نجربها فى اول فرصة ونرجعلك الاخبار الطيبة