كيما العادة بحكم اني مواطن جزائري فلازم عليا ديمن نلجأ الى البلدية باش نستخرج اوراق تعيني فخدمتي / و المفاجاة كي في نهار كنت محتاج و ثائق وشهادات لازم نستخرجها وقمت هذاك النهار بكري باش نسرع في اخراجهم و توفيرهم و في ولاية عين المكان هاذي الولاية المعروفة بكثر التمال المهم ندخلو لصلب الموضوع واش رايكم نهار ندير لاشان من الصباح و كي نوصل باش نخرج الوثائق نتفاجأة بموضف البلدية يقلي سمحلي يا خو الورق الخاصة باستخراج الوثائق مكاش و خلاصولنا / و خلي قاع الشعب الي كان ثماك يخرج بلا ما يقضي صوالحو( عندهم سمانة كومبلي يفتحو بلا اوراق و الوثائق البلدية عيش تشوف وتسمع) / فكرت وحطيت روحي نابغة زماني وقلت علاه هي كاين بلدية وحدة فولايتي خلي نجرب زهري فبلدية اخرى / شاطر بزاف / رحت للبلدية الي اسمها الوئام زعمة على اساس الوئام المدني الي قام بيه الرئيس / الاهم نهار نوصل الحمد لله لقيت هذيك البلدية مكاش فيها غاشي بزاف بصح علاه مكاش قالك البلدية كامل يسير فيها الحارس تاع الباب و موضف واحد قاعد يكتب فالوثائق و يقول للشعب استناو حتى يجي المسؤول على الكاشي أي الطابع البلدي كي يجي يكاشيلكم
و قتاش يجي يا خو ؟؟؟ الله اعلم مقليش خخخخخخخخخخخ جواب روتيني.
معلش لازم نقضي صوالحي اليوم نروح لبلدية شوية ابعد على مكان اقامتي / كي وصلت لقيت الموظفين كامل ثماك يعني لازم نتأكد و سقسيت قالولي كاين الوثائق / معلش ندير لاشان / كي وصلت دالتي نتفاجأ بموظف البلدية يصرخ فيا باعلى صوتو يقلي انت ممنوع تستخرج اوراقك منا ؟؟؟ علاه ؟؟؟ لخاطر بلديتك اسمها .........و الله عجايب
عيش يا الشعبي ، بلدية فارغة من الوثائق و اخرى فارغة من الموظفين و الباقي ممنوع
مووووووووووووووووووووت يا حرودي من الزعاف
المهم من هنا عرفنا بلي خلاص راحت عليها الجزائر جامي راح نواكبو التطور ولا نوصلو نتحررو من التبعية الاقتصادية مدام كاين خدامين متهاونين فالاول يكونو يطالبو و يتمناو يخدمو وكي يلقاوها يبداو فالتهاون و ما الى ذلك
صورة صغيرة عن ما يحدث داخل المؤسسات الجزائرية من قبل موضفيها
