قالك دير النية تسلك على خير ... مي أنا نقلك النية راي زوجت و جابت طفل سماتو فاقوووو

[docteur farah]

سلامووو لحباب
ان شاء الله تكونو كامل بخير

اييه حبيبت ندخل طول للميضوع
بلا مقدمات
كامل نسمعوها ياسر الكلمة هاذي
منيش بلعاني راني بنيتي :d
نية في لهبال :p
اي على نياتها هذيك و هبلة :down:

من كثرت مسمعتها ياسر حكمني ديقواتاج منها
منعرف كان أنا برك الي حاسة الاحساس هذا ولا كامل
سيرتو البنات
اليوم راكبة في التربسبور و رايا زوج
باين عليهم الله الله
و الله غالب التقرعيج ماشي في دمنا
مفهمتش الحكاية واش دور
مي صونا لواحد فيهم التليفون و بدا يعيط على طول صوتو
لعلى سحساب روحو راكب شيفرولوي كمارو تاعو وحدو :p
و نسا روحو راو راكب نقل عمومي

قالو شوووف
انت اذا سقساتك ازلي :-o قوليها خاطي :-r
و العبها النية في الهبال:$

و انا اذا وحلت فيا المشكل
ضرك نقوليها سقساني جاويتو بنيتي :regards02:
و انتي راي نيتك باهية :up:
و ربي يحلهالك من عندووو :tongue02:

و ديري النية في قلبك :love01:
تتحل وحدهاو تقولي نيتي باهية :d سلكتني على خير :s

:scared01::scared01::scared01::scared01::scared01::scared01::scared01:
حبيت نقول حاجة برك مي كلاني قلبي و مقدرتش نقولها
و محبيتش تقعد في قلبي
النية راهي زوجت و جابت طفل سماتو فاقو ( فقنا )
علاه معرضتكمش للعرس ؟
محقهاش :d​

 

[بنت الـ25]

علابالي كي حطيتي الميضوع لهنا كانت نيتك صافية
معلابالكش بلي بلاصتو في واش راك تهدر
خخخخخخخخ
راح وقت النية ودوكا لي يحب يوصل لغرض معين بالكذب والتلفيق والنصب يتمهبل ويلعبها بنيتو
مي احنا تالمو ما فيناش النية نفيقلولو وديفوا نقولوها فالوجه (( ياو فاقوووو ))
​

 

[أم راضية ~_]

السلام عليكم
كاين فرق بين واحد يتمهبل و يلعبها خاطيه الي معروف بــ : "يدير النية فالهبال " ونظن هادا الصنف الي راهو مقلقك وكامل نعانيو منو
وبين واحد صح نية و خاطيه التنوفيق و التزوليق و التزونيق , ونظن ماكيش قاصداتو وهاد الصنف مازال تبعا للخير الي مازال فالدنيا
على خاطر " وجه الخروف معروف "
و يبقى دايما حبينا ولا كرهنا " مول النية يغلب "
صحيتي على الموضوع الجميل​

 

[neSrina^^ serDina]

عندك الحق في وقتنا هدا مابقاتش نية باسكو النية راحت مع ناس زمان هادوك الناس الزنين مي دوكا بقا غير تنوفيق و الحشواات ما بقيناش نامنو حتى بنادم صايي ونجاوبو بالكلمة المعتمدة من طرف الشعب الجزائري ياااو فااقو أ ولد عمي

 

[noufel z prince]

تصفي نـــيتك يشربوهالك دونك خليها غير صالحة للشرب خير .

 

[docteur farah]

علابالي كي حطيتي الميضوع لهنا كانت نيتك صافية
معلابالكش بلي بلاصتو في واش راك تهدر
خخخخخخخخ
راح وقت النية ودوكا لي يحب يوصل لغرض معين بالكذب والتلفيق والنصب يتمهبل ويلعبها بنيتو
مي احنا تالمو ما فيناش النية نفيقلولو وديفوا نقولوها فالوجه (( ياو فاقوووو ))
​

اييه نيتي يا فحلة ههههههه
ولا نقلك فاقو :d درتها بلعاني باه نتعبك ههههههههه :p
صحيتي على المرور الزين يا الزين

 

[docteur farah]

السلام عليكم
كاين فرق بين واحد يتمهبل و يلعبها خاطيه الي معروف بــ : "يدير النية فالهبال " ونظن هادا الصنف الي راهو مقلقك وكامل نعانيو منو
وبين واحد صح نية و خاطيه التنوفيق و التزوليق و التزونيق , ونظن ماكيش قاصداتو وهاد الصنف مازال تبعا للخير الي مازال فالدنيا
على خاطر " وجه الخروف معروف "
و يبقى دايما حبينا ولا كرهنا " مول النية يغلب "
صحيتي على الموضوع الجميل​

اهااااا نيتي باهية نحكي على الصنف لول
بارك الله فيك على الرد الجميل
دمت

 

[docteur farah]

عندك الحق في وقتنا هدا مابقاتش نية باسكو النية راحت مع ناس زمان هادوك الناس الزنين مي دوكا بقا غير تنوفيق و الحشواات ما بقيناش نامنو حتى بنادم صايي ونجاوبو بالكلمة المعتمدة من طرف الشعب الجزائري ياااو فااقو أ ولد عمي

يعطيك الصحة على الهدرة الزينة يا الزين :up:

 

[docteur farah]

تصفي نـــيتك يشربوهالك دونك خليها غير صالحة للشرب خير .

مي قولي كيفاش يشربوها :p
يعطيك الصحة خيو على المرور

 

[عاشقة الكرة]

سلام خيتي
وين راها النية في زمان كثر فيه الخبث والهدرة غير بالفم انا راني قتلهم لاتلاقيتو بيها سلمولي عليها بزاااااااف لي ديريه نية يعطيك بكية سي لا لوجيك زمــــــان النفاق واش يجيك منو ربي يهدينا أجمعين
سلاااااااام​

 

[docteur farah]

سلام خيتي
وين راها النية في زمان كثر فيه الخبث والهدرة غير بالفم انا راني قتلهم لاتلاقيتو بيها سلمولي عليها بزاااااااف لي ديريه نية يعطيك بكية سي لا لوجيك زمــــــان النفاق واش يجيك منو ربي يهدينا أجمعين
سلاااااااام​

ايييه عندك حق
مبقاتش نية
كيفاش يسلمو عليه عبد هي :p

 

[NASRO DZ]

النية راحت مع زمان تع بكري مي الان لا يوجد نية

وتحبي تعرفي الجواب وعلاه احكي لجدك او جدتك وهم يقولو اذا مزالت النية ولا لا

وميرسي على الموضوع

 

[ماكانش]

مازالت النية بصح عند ماليها

 

[مايا الجزائرية]

الاعمال بالنيات ربي يبقي الستر

 

[عفاف الجزائرية]

مازالت كاينة النية اختي ومازال كاين اللي يمشيو بنيتهم مي اولا قلال وتانيا متفرة فيهم
ما نقولش متفرة فيهم باسكو رح يربحو في لافان
يعني اذا ما ربحت تسلك على خير
يعطيك الصحة حبيبة على موضوعك
​

 

[SETIF étudiant]

السلام عليكم النية ماتت بكري مع موت الناس الطيبين
ساعة ساعة الواحد يبغي يجهل نزيد شوي نقول انقطع الخير بين الناس ماشي نحكم باحكامي مي بتجارب واش راه صاري من حولي

دركا نقدر نقول

راح يستغلوك الناس يبروفيتيو عليك اذا كنت نية

وماش رايحين يحترموك

اما اذا كنت انسان قبيح وقاسح

فستلقى الاحترام والتقدير


والنية و الطيبة في هاد الوقت ولات ضعف في الشخصية و تعنيلي ضعف الشخصية
إلا عند جاهل فقط

النية ديما تجازيني في فلافان ديما نقول النية هي سباب خسارتي ووو

والواحد تاني في بعض الامور يكون ويحاول يكون عقلاني خير من انسان نية كيما يجي نهار تقدر تكون الفارس في ساحة المعركة ههههههه لازم تكون قاسح شوي النية الخاثرة ماشي مليحة

النية تكسسسر

لكن ثمارها تجنى في النهاااااااااااااااااية بحديث النبي صلى الله عليه وسلم : ( إن الله تعالى طيب لا يقبل إلا طيبا

 

[Only me]

أنا دخلت على نيتي للميضوع تاعك ،،،

ماحقهاش النية ماتعرضناش للعقيقة تاع بنها ،، معليش اجحنا لي صح نية هههه

موضوعك عجبني بزاااف ،، رانا في وقت مبقاتش فيه حاجة واسمها النية لي بغا يقفز على روحو

 

[رضوة الجزائرية]

الله يهدينا متعة بالحياة مابقاتش مين تروح النية وكثير امور​

 

[zagane]

salam alaycom

elkadb kthar wa elniya dima taghlab el7ila