كلاصتنا دارت اضراب على أستادة هههه أدخلو تشوفو التبهدايل

[همس الوُرود]

السلام عليكم ورحمة الله وبركاته

واش أحوالكم ناس اللمة صافا؟؟ هادي غيييييبة عندي بزاااف ماكتبتش ميضوع هنا
نتمنى تكونو كامل ملاح عايشين
ايه ندخل ديراكث فالميضوع
اليوم درنا فرض تاع الفيزياء آآآآه برك ملاحظة ( كلاصتنا عندها بروبلام مع الشيخة تاع الفيزياء) بمعنى ماتفهم عندها والو تقول تحكي بالشينوية + تعطينا درس بزي وتمارين بزي والفرض والامتحان تاعها القاري تاع الليسي خلينااا واشمن قاري آينشطاين مايمسش فيه
قالك مالا اليوم شفنا مع الفرض الكلاصة كامل مشوكية بدينا أصلا وربع راح الحال وهي مازالت تصاوب فينا باش مايقدروش يتنفسواا
المهم وحنا كلاصتنا فيها غير الهدارين الي عندهم الصرف فالهدرة
ايه حنا نركزو فالفرض أوموان كاش مانجيبو شوية وهادوك الي مافهمو والو يتعايطو وماشي فرض هادا ونتيا وفيك وفيك وفيك ................ ووحدة داخت من الشوووك ههه المهم وحد الفوضة خلي برك هههه ( أنا ماعيطت ماوالو سلسبيلتكم عويقلة هههه برك نتفرج ونضحك عليهم :d:d:d:p) المهم هي خرجت هاربة بالروح ولكلاصة تقلبت يكسرو فالكراسة والطاولات قلبو لكلاااصة ويعيطو مانقراوشش نسحقو المدير يجي هنااااااااااا مانقراوش مانقراوش مانقراوش أووووووووووووووو هههههههههههه وجابونا المدييييييير ههههههههههههههههههههه
دخل أحمممم لكلاصة كامل سكتت قالنا نعم فليتفضل واحد منكم ليفهمني ههههههه
هزت وحدة يدها وبددات تهدر يا أستاد أنا قريت الفروض تاع ليبروميار كامل كامل ساهلين وقصار ومفهومين مي هي تعطينا في هادا القاري مايمسش فيه وباش يكون في علمك يا أستاد كاين تلاميد جابو معدلات 9 ويحوسو يطلعو نورمالمون كاينة معاونة ماش واحد كيما هادا الي حد مايقدرلو ؟؟
( هههه أنا غير نضحك عليهم والله جاو يبهدلو ) قالها حسنا دوك نحكي مع الأستادة وهي تشوف مع الأمر وتساعدكم وهو يحكي بلعقل معانا وبكل ظرافة كيما يقولو ههههههه أحممم وبداو الي ماش قاريين يهدرو ( آآآآآآآآآآآ خلات ههههههه)​

وماتعرفش تقري وفيها وفيها وفيها ( مي صراحة والله ماحقهم أنا راني نتبع معاها والله راني نفهم بالبيان صح الفرض صعيب مي ماش من حقهم يطيحوا بيها ) المهم هو بقا يهدر معانا ( أنا عجبتني كي راحت 30 دقيقة من القراية ههههه :up المهم نخلي المجال مفتوح علقو على كلاصتنا وواش دارت أنا من جيهتي مانسيبورثيش واش دارت كامل بيسك كون حطو روحم فبلاصتها ماش مليحة

+ راهي كبيرة عليهم وكون أنا جيت فبلاصتها كنت ماش غير نديرو صعيب ( ههههههه شريرة :d)


ملاحظة : زعما قالنا نحكي معاها بلعقل هو خرج وهو ناض يعيط واشيا هادا وهدا فرض يمدوه الناس اليوووووووووووووووووووم اليوم

هههه 2- الدكور تاع كلاصتنا اليوم لعبو فوث ضد كلاصة أخرى خسروهم 18-0 ههههههههههه يععععععع كلاصتنا هادو هوما الي حاسبين روحم حويجة مساكن يلعبو بيهم لعيب :d


أسمحولي علابالي طووللللللللللللللت عليكمممم اليكم الخط سلام :regards01:​

​

 

[بنت الـ25]

صحيتي شعشبونتي المهبولة القارية :-h احممممممممم
نقرا ونضحك :d
كلاصتكم فوووووووور وعجبني المدير جايبها بالفصحى قصف ههههههه
مي تقول الاساتذة تع الفيزياء كامل جاو من كوكب واحد؟ :s
كنت نقرا فيزيك عند وحد العبد ههههه كيما قلتي الدرس في جيهة والتمارين في جيهة
اما الفرض والامتحان فمرفوع عليهم القلم هههههه
قضانا على مستقبلنا الفيزيائي والكيميائي ( الله لا تربحو برك)
وكانو الزملاء ربي يذكرهم بالخير مش مقصرين فيه
طبعا ما يريكلاميوش عالفهامة والنقاط هههههه خاطيهم لقراية
مي يكرهوه ويكرهو الحصة تعو تالمو صامطة
مرة دارولو عفسة مقرفة (طرطقو الشكارة تع الريحة المارقة في نص الحصة) هههههه
المشكل خلانا تغمينا وقفل علينا النوافذ والباب وقالنا تبقاو هنا حتى تصوني لا درس لا والو
متنا يا بابا من هديك الريحة هههههههههههه
وكان معندناش مدير؟ ياك المدير تعنا فالحبس متهم بالاختلاس هههع
حالا كارثية همل الليسي خلاص
ووصلنا للتاغمينال ولقينا رواحنا ما فاهمين فيها ترن انا جبت 7 ونص فالباك في سبتها ما قدرتش ندير ميدسين

المهم انتوما ريكلاميو عالفهامة اكثر حاجة تركزو عليها ومش النقاط
فالباك ما ينفعوكش النقاط تنفعك فهامتك
انتي منخافش عليك تقراي مي مقلتيليش وش دارت نجلا؟ هههههه
​

 

[amira94]

وعليكم السلام ورحمة الله وبركاته

أهلا بأكولتي الفوضوية واش هذا كامل ابابابا واش هاذ الفوضة
أكيد منين تكون سلسبيل تكون الفوضى :d ولا راني غالطة
مي حتى تاع الكلاصة تاعكم بالغو بزااااف نهار يكون الاستاذ يشرح الدرس ولا واحد يتبع معاه
ونهار الفروض والامتحانات يديرو فوضى ومفهمناش وماقريناش أوكي صح الفرض صعيب
يديرو احتجاج لكن بدون فوضى صراحة والله راحت قيمة الأستاذ في هذا الوقت وصح راني معاك كاينين أساتذة مايفهموش مليح لكن مهما يكن يبقى أستاذ
المهم سلسبيلتي أنتي ماتكونيش فوضوية كيفهم اهتمي بدراستك وربي ينجحك
وشكرااا على الموضوع الباهي .....يا أكولتي

​

 

[همس الوُرود]

صحيتي شعشبونتي المهبولة القارية :-h احممممممممم
نقرا ونضحك :d
هههههههه شعشبونة؟؟ هههههههههههههههه ماخصك يا نانا :d:p
كلاصتكم فوووووووور وعجبني المدير جايبها بالفصحى قصف ههههههه
مي تقول الاساتذة تع الفيزياء كامل جاو من كوكب واحد؟ :s
هههههه لالا أختي
1- كلاصتنا على قد ماتافهة على قد ماتدير حوايج تافهين نورمالمون يحكيو مع الشيخة بالظرافة من بداية السنة وحدها تسهل مي هي تعيط عليهم باش يتبعو وهوما يردولها بوقاحة عيات وحدة تقرا معانا هههههه هي فالفرض كاتخزر فيها بيسك كاتكوبي وهي تقولها واشبيييييييييييييييك تخزري فيا خير؟؟ ماخليتينيش نركز
2- هههه على المدير راني لغيت بزاف هدرات تاعو هههههههههه منهم بدا يتفلسف علينا فلاسف تاع علاش تكسرو لكراسة هوما ماش ملك الدولة ملك للتلميد ولازم تحافضو عليهم ووووووههههههه
3- البرنامج الي هاكا هوما ماش من كوكب واحد ههههههههه:p من كواكب عدة يعععع
كنت نقرا فيزيك عند وحد العبد ههههه كيما قلتي الدرس في جيهة والتمارين في جيهة
اما الفرض والامتحان فمرفوع عليهم القلم هههههه
قضانا على مستقبلنا الفيزيائي والكيميائي ( الله لا تربحو برك)
ههههه أها بلعقل برك منيوثتي والله والو والله ماتديريها ههههههههههه ماتدعيش هاكا هههههه
وكانو الزملاء ربي يذكرهم بالخير مش مقصرين فيه
طبعا ما يريكلاميوش عالفهامة والنقاط هههههه خاطيهم لقراية
مي يكرهوه ويكرهو الحصة تعو تالمو صامطة
مرة دارولو عفسة مقرفة (طرطقو الشكارة تع الريحة المارقة في نص الحصة) هههههه
المشكل خلانا تغمينا وقفل علينا النوافذ والباب وقالنا تبقاو هنا حتى تصوني لا درس لا والو
متنا يا بابا من هديك الريحة هههههههههههه

ههههههههه تستاهلو :d
وكان معندناش مدير؟ ياك المدير تعنا فالحبس متهم بالاختلاس هههع
حالا كارثية همل الليسي خلاص
حنا بالمدير و ماش غير هاملة ايهيييييييييييييه مانحكيلكش ختي :p
ووصلنا للتاغمينال ولقينا رواحنا ما فاهمين فيها ترن انا جبت 7 ونص فالباك في سبتها ما قدرتش ندير ميدسين
ههههههه كون درتي الكور وتهنيتي :d
لا عليك ربي ماش مكتبلك ميدسين فيها خير يالعجيوزة ههههه

المهم انتوما ريكلاميو عالفهامة اكثر حاجة تركزو عليها ومش النقاط
فالباك ما ينفعوكش النقاط تنفعك فهامتك
كلاصتنا تريكلامي على كلش مامعاهاش خلاص الظرافة ههههه وحد الناس ملاح مانحكيلكش :d
انتي منخافش عليك تقراي مي مقلتيليش وش دارت نجلا؟ هههههه
هههههههه ايييييييه ربي يوفقنا أختي أدعيلنا
نجلاء ماتقراش معايا ههههههه راهي صاحبتي برك
+ كي جات فالراحة على 10 عندنا ههههههه شافتو قالتنا صعيب :d قالتنا قولولها تعاودلكم الفرض
سلااااااااام يا لعجيوزة :regards01:
وشكرا على الرد الزوين
​

 

[همس الوُرود]

وعليكم السلام ورحمة الله وبركاته

أهلا بأكولتي الفوضوية واش هذا كامل ابابابا واش هاذ الفوضة
أكيد منين تكون سلسبيل تكون الفوضى :d ولا راني غالطة

هههههه واشيا هدا وحدة تقولي شعشبونة ولوخرى فوضوية
ههههههههههههه بلعقل برك عليا مانيش هاكا راني شريرة برك ههههههه آآآه يا حوريتي آآه والله توحشتك
مي حتى تاع الكلاصة تاعكم بالغو بزااااف نهار يكون الاستاذ يشرح الدرس ولا واحد يتبع معاه
ونهار الفروض والامتحانات يديرو فوضى ومفهمناش وماقريناش أوكي صح الفرض صعيب
يديرو احتجاج لكن بدون فوضى صراحة والله راحت قيمة الأستاذ في هذا الوقت وصح راني معاك كاينين أساتذة مايفهموش مليح لكن مهما يكن يبقى أستاذ
وي صح عليها قلت تبهديلة واحد واعي وفاهم مايدير هاكاك + راهي أستادة وكيما تكون مايديروش عليها هاكا والله رجعوها ماتسواش خلي برك
المهم سلسبيلتي أنتي ماتكونيش فوضوية كيفهم اهتمي بدراستك وربي ينجحك
آمين هههههههه مانيش فوضوية ماتخافيش :d:p
وشكرااا على الموضوع الباهي .....يا أكولتي
الشكر كلو للحورية الزينونة هههههههه سلام أختي تهلاي :up:

​

 

[نريمان المسيلية]

هههههههههههههههههه
والله غير نستعرف بيكم مام حنا قسمنا يقولولو المراقبين قسم المتشردين لخاطر منسكتوش على حقنا ومنسمحوش فيه
صح هي من جهة عيب باه تسب استاذة مي حتى هوما لازم يفوقو لرواحهم واش راهم يديرو

 

[همس الوُرود]

هههههههههههههههههه
والله غير نستعرف بيكم مام حنا قسمنا يقولولو المراقبين قسم المتشردين لخاطر منسكتوش على حقنا ومنسمحوش فيه
صح هي من جهة عيب باه تسب استاذة مي حتى هوما لازم يفوقو لرواحهم واش راهم يديرو

هههه هي من جيهة مليحة بالاك تديرنا فرض مليح ماتدريش مي تشوفي التقويم تخلطو هههههههه
والله يا أختي أنا ثوجور زهري مع لكلايص الي هاك ههههه مي هادا شوية باسل بيسك مايعرفوش وكتاش يهدرو ووكتاش يسكتوا هههههههههه مالا عجباتك ناريم؟؟ نعيطلك ناريم ماعليش؟؟ههههههه شريرة:d
سلام أختي ناريم وشكرا على الرد الحنين هههه قصدي الشرير:p
​

 

[نريمان المسيلية]

ههههههههه شكرا حبيبتي وعمري سلسبولة
معليعش عيطيلي واش تحبي كلش من عندك حلو
من الجهة الثانية انا نحب كي يعودو هما يهدرو وانا نضحك وساعة راها تفوت
هههههههه:-hهخعحخهخعاغ

 

[•мϊѕŝ Šрέсǐάł•]

اييييه انا الحمدلله ,, البروف تاعنا تاع الفيزيك اصلا ماتقدريش ترديلو الهدرة ,, هههههه
بصح غير تركزي معاه تفهمي مالغري مازال جديد ,,
بصح كاينة استاذة اخرى والله كاارثة في الاختبار دارتلهم حوايج ماقراوهمش ''مع انه موحد مع تاعنا مي هوما روطار''
كي صححتلهم قالولها تنحيهملنا قالتهم مانحيش ,, واحدة جابت باباها وقامت بيناتهم ,, من هاديك ,, نحاتلهم هذا التمرين كاامل وزادتلهم النقاط كاامل طلعو فوق المعدل ,, '' غاضتني خاطر هذاك هو التمرين المخلط فيهم هههه =( ''
انتوما ربي يكون في عوونكم ,, وكي تطيحي في كلاصة هكذا والله ربي يسترك ,, خاطر تشيع عليكم الى الابد
واذا عدتي انت تفهميلها وتسلكي راسك خليك من الباقي =) =)
تقبلي مروووري ​

 

[°NeSriNe°]

ههههههههه
نستعرف بيكم هاكاك كملوا :up:
مام استاذة تاع فرونسي قلعولها تلاميذ ههههههههههه
الشعب يريد سقوط ..... و يقولوا اسمها
وااااااااي شح فيهم هههههههه

ملاحظـــــــــة : كاين لي مايستاهلوووش بكل صراحة
​

 

[مايا الجزائرية]

سلا م اختي
والله رانا نشوف بعينينا
ولا التلميذ يعلق على كلش
حنا مرة نهائي مات تكنيك بدلولهم الشيخة تاع الفيزيك
ياو هوما دومونداو الشيخة الفلانية وما تجيبولناش من والا
وتخيلي الشيخة هاديك تقري المات تكنيك 3 سنن على طريق حبت تبدل شوي وفي التالي جابوها غير هيا هه
المهم شكرا على مضووعك الهايل كيفك
تقبلي مروري

 

[nina usma]

الشيخ تاع الفزيك في حياتي مدخات نقرى عندو ملفرض للفرض باه نشوفو هههه

مي ماشي شينوي شيخنا

جاي ملمريخ

:d​

 

[إيمان قلب]

سلاام
معليهش اختي ربي ينجحكم كاين بعض الاساتذة يحبو يعجزو يمدو اسئلة دايرة هاك
عندنا واحد البروف مدلنا سوجي مكاش قاع اللي قدر يفهمو كي جا يقرالنا فيه
قاللنا السؤال الاول يجاوب عليه غي القاري
والزاوج نجاوب عليه ربي وأنا
والثالث يعرفو غي ربي انا ومانعرفوش
وسي فري نهار الافيشاج التلاثة والربعة ادير حاااالة

 

[EL General]

راكم مدايرين سوكسي في ميلة كامل ماشي غير في الكلاصة نتاعكم :d

سلآمي ليك و متزيديش تديري الطآبآج خخخ
​

 

[lee yong]

اولا نحييك اختي السلسبيلة المشاكسة:d
انا حبيت نعرف علاه يحبو يديروا الفوضى؟ ولا يحسبوا رواحهم راهم يديروا في لامبيونس ههههههه
مي كاين اللي يستاهلوا ديفوا نحس بلي ما علابالهمش بينا نقراو ولا نقعدوا
واش نديروا ربي وكيلهم...

 

[همس الوُرود]

سلام يا أختي سبيسيال :d

اييييه انا الحمدلله ,, البروف تاعنا تاع الفيزيك اصلا ماتقدريش ترديلو الهدرة ,, هههههه
بصح غير تركزي معاه تفهمي مالغري مازال جديد ,,
بصح كاينة استاذة اخرى والله كاارثة في الاختبار دارتلهم حوايج ماقراوهمش ''مع انه موحد مع تاعنا مي هوما روطار''
كي صححتلهم قالولها تنحيهملنا قالتهم مانحيش ,, واحدة جابت باباها وقامت بيناتهم ,, من هاديك ,, نحاتلهم هذا التمرين كاامل وزادتلهم النقاط كاامل طلعو فوق المعدل ,, '' غاضتني خاطر هذاك هو التمرين المخلط فيهم هههه =( ''
هههههههه مهبولة راكي تغيري؟؟ ههههههه:p ماعليش ختي تكبري وتنساي:d
انتوما ربي يكون في عوونكم
آآآآميييييييييييييييييييييييييين
,, وكي تطيحي في كلاصة هكذا والله ربي يسترك ,, خاطر تشيع عليكم الى الابد
واذا عدتي انت تفهميلها وتسلكي راسك خليك من الباقي =) =)
وي أختي ههههه لكلايص كامل شايعة عليهم وكون نعطيك معلومة تهبلي
كلاصتنا تكلاصات هي الأولى من بين لكلايص فالثريماسثر اللول وف2 ثريماسثر هي الأخيرة ههههه خرجولهم لقرون
تقبلي مروووري
شكرا أختي على الرد الباهيي وربي يوفقك أنتي تاني في قرايتك:-r

​

 

[همس الوُرود]

سلام أختي سيسونة :d هادي غيييييييييييييبة نتمنى تكوني مليحة

ههههههههه
نستعرف بيكم هاكاك كملوا :up:
ههههههههههههههههه ظهرتو كامل أشرار يا محاينك
مام استاذة تاع فرونسي قلعولها تلاميذ ههههههههههه
الشعب يريد سقوط ..... و يقولوا اسمها
والله عيب عليك كاين أساتدة ما شاء الله ماعلاباليش علاش ماتحبوهمش
وااااااااي شح فيهم هههههههه
هههههههههه حنا نقولو الشعب يريد سوط الأساتدة ونتهناو من لقراية وهوما يقولو العكس ههههههههههههه ويفرا المشكل هاكا؟؟
ههههه ربي يهديكمأنا والله نحب هاديك الأستادة

ملاحظـــــــــة : كاين لي مايستاهلوووش بكل صراحة

شكون؟؟ ويلا راكي على الأساتدة هنا نلغي كي قلتلك والله عيب عليك نولي معاك فالرأي هههههههههههههه
سلام أختي سيسونة تهلاي في روحك وميرسي على المرور ان شاء الله ثوجور تطلي على مواضيعي هاك كاش ماتحليها ههههه:p
​

 

[همس الوُرود]

ميرسي على المرور راني نعود ممبعد ونردلكم ان شاء الله
​

 

[nanoche]

ربي يكون معاكم راكم تعانيو ههههههه
أنا نكره لفيزيك و الماث و نكره كل حاجة فيها الحسابات
دوكا اللي راني نعرف نحسب الدراهم و كي يرجعولي الصرف

​

 

[SETIF étudiant]

السلام عليكم مرحبا بيا عندك
الجيل لاخر هادا ما يعرف يقرا ما يعرف يحسب خخخخخخخخخخخخخخخخخ
انا قريت وعمبالي بالمستوى الاستاذ ملي نفخولو في شهرية عاد ما يمدش في الكلاصة وانا كان خطاوني لي كور دروس خصوصية كنت ما نرفدش اصلا (كي كنت نقرا في ثانوية)
ما تقلقوش ها التلاميذ ها الجيل الاخير جيل الاضرابات وتحديد الدرووووس هههههههههههه بروشان فوا يعود الفرض.. الامتحان.. الباك بالقرعة (نجاح تاعكم) ولا درك يعطوكم المواضيع من قبل وصاي ههههههههههههههههههههه